Bebakasa na mambo a lwitabilo lwabo—Eritrea
Kafulumende wa kyalo kya Eritrea wakwata ne kukasa Bakamonyi ba kwa Yehoba ne bantutu bakwabo kwa kubula kwibatotolwesha nangwa kwibabuula ene mambo o bebakwachila. Banabalume ne banabakazhi Bakamonyi, kubikapotu ne baana ne bakoma, bebakasa na mambo a mingilo ya bupopweshi nangwa kwa kubula ne kwibabuula kyo bebakashila ne. Bansongwalume bebakasa na mambo a kukana kutwela bushilikale.
Kyalo kya Eritrea byo kyatambwile bwana bwa bene mu 1993, Bakamonyi ba kwa Yehoba bebangachile luusa lonse lo bajinga nalo. Ndamakyalo aye Afewerki wibangachile luusa lwa bungikazhi mu kyalo kwingijisha muzhilo walengele Ndamakyalo pa 25 October, 1994, mambo a kuba’mba Bakamonyi kechi bevwangilemo mu bya bunsaji bwajingako mu 1993 bwa kutambula bwana bwa bene ne kukana kutwela bushilikale. Kufumatu kyokyo kimye, ba mwingilo wa kulama mutende mu kyalo kya Eritrea babena kukasa, kumanyika, ne kwikazha bufinda Bakamonyi ba kwa Yehoba pa kuba’mba bebakanjikizhe kusankilapo lwitabilo lwabo.
Bakamonyi Bafwila mu Kaleya na Mambo a Bwikalo Kutama
Bakamonyi ba kwa Yehoba bana bafwila mu kaleya mu kyalo kya Eritrea. Bakamonyi babiji bafwile mu 2018 kimye kyo bebavilwijile mu kaleya ka Mai Serwa. Ba Habtemichael Tesfamariam bafwile saka baji na myaka 76 pa 3 January, ne ba Habtemichael Mekonen bafwile pa 6 March saka baji na myaka 77. Kafulumende wa Eritrea wakashile bano banabalume babiji mu 2008 kwa kubula ne kwibabuula kyo bebakashijile ne.
Ba Misghina Gebretinsae bajinga na myaka 62, bafwile mu July 2011 na mambo a kukizhamo kutwa kyuya mu mpunzha mo bebakashijile yatelwanga’mba “mpunzha ya panshi” mu kaleya ka Meitir. Ba Yohannes Haile bajinga na myaka 68, bafwile pa 16 August, 2012, na mambo a lukatazho luntutu lumo mu kaleya ka Meitir mo baikele myaka ina. Bakamonyi ba kikulumpe basatu bafwile kimye kyo bebafumishe mu kaleya na mambo a mambo a bwikalo kutama mu kaleya mo bajinga.
Bo Bakasa kwa Kubula Kwibatongwela Myaka yo Bakekala mu Kaleya
Banabalume basatu, ba Paulos Eyasu, ba Isaac Mogos, ne ba Negede Teklemariam, baikala mu kaleya kutendeka pa 24 September, 1994, bebakashile na mambo a kukana kutwela bushilikale. Banabalume bakwabo jikumi baikala mu kaleya myaka kukila pa jikumi.
Bakamonyi bamo baji mu kaleya bebalamina mu jitolokoshi ja kimbayambaya jijitu na kakibelo kacheche, bakwabo bebalamina mu tumazubo twa mabwe nangwa twa malata to bazhiika panshi.
Mu July 2017, Bakamonyi bonse bo bakashijile mu kaleya ka Meitir Camp bebavilwijile ku kaleya ka Mai Serwa Prison kaji kwapela muzhi wa Asmara. Pa 30 November, 2017, Bakamonyi bonse 13 bo bakashijile mu kaleya ka Sawa Camp, kubikapo ne ba Paulos Eyasu, ba Isaac Mogos, ne ba Negede Teklemariam, nabo bebavilwijile ku kaleya ka Mai Serwa.
Bakamonyi babalume bavula baji mu kaleya bebakasa kikupu, kechi bakafumamo ne, bakafwilatu monka, nangwa bakebafumyamotu inge bamona’mba kwashalatu pacheche kufwa. Na mambo a kuba’mba mu kino kyalo kechi mujipo mizhilo yalumbuluka nangwa mashinda a kulondela mu bya mambo pa kuba’mba bepokolole mu mambo ne, bano balongo bebakasa kufikatu ne byo bakafwa.
Time Line
15 January, 2019
Bakamonyi bonse pamo baji mu kaleya baji 53
6 March, 2018
Ba Habtemichael Mekonen bafwile saka baji na myaka 77, kimye kyo bebavilwijile mu Kaleya ka Mai Serwa.
3 January, 2018
Ba Habtemichael Tesfamariam bafwile saka baji na myaka 76, kimye kyo bebavilwijile mu Kaleya ka Mai Serwa.
July 2017
Bakamonyi bonse bo bakashijile mu Kaleya ka Meitir Camp bebavilwijile ku Kaleya ka Mai Serwa kwapela muzhi wa Asmara.
25 July, 2014
Bavula bo bakashile pa 14 April bebakasulwile, bino bantu 20 bo bakwachile pa 27 April ne luno bakiji monka.
27 April, 2014
Bakamonyi 31 bebakwachile kimye kyo bapwijilenga.
14 April, 2014
Bakamonyi kukila pa 90 bebakwachile kimye kyo bajinga na Kivuluko kya lufu lwa kwa Kilishitu kikalako pa mwaka pa mwaka.
16 August, 2012
Ba Yohannes Haile bafwijile mu kaleya saka baji na myaka 68 na mambo a bwikalo kutama.
July 2011
Ba Misghina Gebretinsae bafwijile mu kaleya saka baji na myaka 62 na mambo a bwikalo kutama.
28 June, 2009
Bakapokola balukukile nzubo ya Kamonyi kimye kyo bapwijile ne kukwata Bakamonyi bonse 23 bataainweko, kutendekela pa ba myaka 2 kufika ku 80.
28 April, 2009
Bantangi ba mu kafulumende bavilwile Bakamonyi ba kwa Yehoba bo bakashijile mu ofweshi wa bakapokola ne kwibatwala ku Kaleya ka Meitir Prison, kufumyakotu Kamonyi umo.
8 July, 2008
Bantangi ba mu kafulumende batatwile kulukuka mazubo a Bakamonyi 24 ne ko bengijila makito, kabiji bavula bo bakwachile bo bakebela bisemi bintu bikebewa mu bwikalo.
May 2002
Kafulumende washinkile mabumba onse a bupopweshi abula pa mabumba a bupopweshi ana o baitabizha ku kafulumende.
25 October, 1994
Ndamakyalo wapaine mukambizho wa kwangata Bakamonyi ba kwa Yehoba bungikazhi mu kino kyalo ne luusa lonse lo bajinga nalo.
24 September, 1994
Ba Paulos Eyasu, ba Isaac Mogos, ne ba Negede Teklemariam bebakashile kwa kubula kwibabuula mambo o bebakwachijile nangwa kwibatotolwesha ne, kabiji ne luno bakiji mu kaleya.
Myaka ya mu ma 1940
Jibumba ja Bakamonyi ba kwa Yehoba jalengelwe mu Eritrea.