Bebakasa na mambo a lwitabilo lwabo—Singapore

Kafulumende wa Singapore wabikako muzhilo wa kuba’mba bantu bonse bafwainwa kutwela bushilikale kabiji kechi unemeka luusa luji na bantu lwa kukana kutwela bushilikale kwesakana na jiwi jabo ja mu muchima ne. Bansongwalume Bakamonyi bakana kutwela bushilikale, bebabika mu kaleya bimye bibiji pa bañondo 39.

Inge nsongwalume wafikizha myaka 18 ya kusemwa, wafwainwa kutwela bushilikale mu Singapore. Umvwe wakana na mambo a jiwi janji ja mu muchima, uya na kwikala bañondo 15 mu kamba ka bashilikale. Umvwe bano bañondo bapwa, bamukasulula ne kumukambizha kuvwala kivwalo kya bashilikale ne kutendeka kufunda bya bushilikale. Kabiji inge wakana kuba bino, bamubwezhamo mu kampu wa bashilikale bañondo bakwabo 24.

Kafulumende wa Singapore Wakana Kukookela Mukambizho wa Kipamo kya UN

Kipamo kya United Nations kyabuujile kafulumende wa Singapore “kuyuka’mba muntu wakonsha kukana kutwela bushilikale kwesakana na jiwi janji ja mu muchima, mambo uji na luusa lwa kukasuluka mu milanguluko ne mu bya bupopweshi byonka byaamba buku wa Universal Declaration of Human Rights.” Nangwa kya kuba kafulumende wa Singapore waikala mu kipamo kya United Nations kufuma mu 1965, kyakana kulondela uno muzhilo wa bikako kino kipamo. Kafulumende wa Singapore wanembejile nkalata kipamo kya UN Commission on Human Rights pa 24 April, 2002, kuba’mba: “Umvwe bintu byaitabilamo muntu nangwa byubilo byanji byapusenamo na mizhilo ya kyalo, bafwainwa kumupamo mambo.” Mu jishinda jikwabo uno kafulumende waambilenga kuba’mba “kechi tubula kupamo mambo muntu ukana kulondela muzhilo waamba pa kutwela bushilikale ne.”

Ndonda ya Byamwekele

1. 16 January, 2019

   Bakamonyi ba kwa Yehoba batanu na bana bakiji mukaleya na mambo a kukana kutwela bushilikale.

2. November 2013

   Bakamonyi 18 bebakwata na mambo a kukana kutwela bushilikale.

3. 24 April, 2002

   Bantangi ba mukafulumende baambile’mba kyalo kya Singapore kya kakana kuswisha luusa lwa bantu lwa kukana kutwela bushilikale ne.

4. February 1995

   Batwajijila na kukanjikizha bantu kutwela bushilikale ne kukasa Bakamonyi ba kwa Yehoba bekala mu Singapore bakana kutwela bushilikale.

5. 8 August, 1994

   Kije Kikatampe kya mu Singapore kyakana kutotolola mambo a Bakamonyi.

6. 12 January, 1972

   Kafulumende wa Singapore washinkile mwingilo wa Bakamonyi ba kwa Yehoba.