“Lesa Ubena Kwitukwasha Kulubako”

NATALYA ne mwananji wamulume uji na myaka ya kusemwa itanu na ina aye Aslan bekumbachile saka baimana kwipi ne Zarina ne mwananji wamukazhi aye Anzhelika. Baana bakwabo kukila pa 1,000 ne bakulumpe bajinga kipi kipi bebazhokolokele ku balwanyi bajinga na mata.

Lukelokelo pa Kisatu pa 1 September, 2004, baana ne bansemi babo bajinga pangye na kwinengezha kusekelela juba ja kushinkwilapo sukulu mu taunyi mucheche wa Beslan mu kibunji kya Alania, mu kyalo kya Russia. Ponkapotu bantu bajinga na mata ne mabomba bebalukukile ne kutendeka kuloza mata mwiulu ne kubijika. Bano bambanzhi bakijile pa 30 baambijile jino jibumba ja bantu jaumvwine bingi moyo kutwela mu kishimikwa kikatampe mo bakayilanga makayo a kukosesha mubiji babwela bazhokoloshako ne tupata.

Kwaikele Nkondo Pakachi ka Balama Mutende ne Bambanzhi

Onkao mambo, nkondo yatendekele pakachi ka bambanzhi ne balama mutende yapwishishe moba asatu. Natalya wafundanga Baibolo na Bakamonyi ba kwa Yehoba uvuluka’mba: “Nkyangye kulombapo kala byo nalombele jo ja juba ne.”

Kyajinga kimye kya kisalo, kabiji mu kino kishimikwa mwatwile bingi kyuya. Kufumatu lukelo pa juba ja bubiji, bano bambanzhi kechi bapelepo kajo nangwa mema bantu bo bashinkijile mu kishimikwa ne, kabiji pa juba ja busatu pa Kitanu, bantu bamo bafwile bingi kilaka ne nzala kya kuba bafuukwilepo kutoma masukula ne kuja maluba baana o baletejile bafunjishi babo. Natalya waambile’mba: “Kalombwana waikele pepi ne atweba wampele jibula. Nejabenyepo pakachi, mutamba umo napele Anzhelika, mukwabo napele Aslan.”

Mabanga pa juba ja busatu, kwaikele kiwowo kikatampe. Natalya washimikizha’mba: “Tupata twatubikile twamponeshe panshi kabiji napungijile. Mwiulu mwakutakenetu bwishi, kabiji mata atendekele kuvuma. Natalya ne Aslan bakalabile panshi kupita palwijilenga bashilikale ne bambanzhi. Mwina Ossetia umo wa jizhina ja Alan wibanyemeshe ku mpunzha kwajinga bulongo. Bino bantu bavula kechi banyemenemo ne.

Byafuminemo mu ino Nkondo

Baana bavula bingi ne bakulumpe bafwile, kubikapotu ne Anzhelika. Pa milungu yavula mu Beslan mwaumvwanyikilengatu mabingo ne kujila. Kibamba kya kwa Natalya kyatalañene na sukulu, onkao mambo, wamwenenga byamwekelenga pa sukulu, kabiji nangwatu kimye kyo bashimikile sukulu mukwabo pepi, Aslan kechi wakebelenga nangwa kunyantapo kulu ne. Kechi wakebanga ne kuya pangye na kukaya ne. Natalya waambile’mba: “Twalombele Yehoba kuba’mba amukwashe Aslan kuchinchika.” Mu kuya kwa kimye wachinchikile kabiji watatwile jibiji kuya ku sukulu.

Natalya kyamukatezhe bingi kutanwa ku kupwila kwa bwina Kilishitu pa Nzubo ya Bufumu. Waambile’mba: “Inge nji na bantu bavula mu kibamba, nalangulukanga’mba katatakatu kishimikwa bekilukuke. Nalombanga kuba’mba pabule kumweka kyatama. Byo papichile kimye, nalekele kuya na kupwila. Kabiji kuyuka kuba’mba bantu bavula bafwile, bino atweba twapuluka kwandetelanga milanguluko yavula bingi.”

Twatendekele Kulubako

Natalya waambile’mba: “Nsanchila bingi ba mu kipwilo batwajijile na kunkwasha. Kamonyi umo wa jizhina ja Tatyana waiyanga na kummona kimye kyonse inge papita moba asatu mu mulungu. Mu kuya kwa kimye, watendekele kwiya na Kamonyi mukwabo wa jizhina ja Ulyana wajinga bingi na kifyele, kabiji witutundaika bingi kabiji waambangatu pachepache. Ulyana wayukile bingi Binembelo. Wantundaikile bingi pa byo nebikangako kabiji kechi wanchibikizhanga kimye kyo naambanga ne.”

“Ulyana wantangijile byambo byaambile mutumwa Paulo bitanwa pa 2 Kolinda 1:9. Panyuma ya kupita mu bya malwa mu Asha, Paulo waambile’mba: ‘Twashiinwe’mba tusakufwa.’ Watangile ne kinembelo kya Isaya 40:31 kyaamba’mba: ‘Aba baketekela mwi Yehoba bakekala na bulume. Bakatumbukanga kuya mwiulu nobe bampungu.’ Abino binembelo kubikapotu ne bikwabo byo antangilanga Ulyana ne bakwabo byantundaikile kutendeka jikwabo kutanwanga ku kupwila kwa bwina Kilishitu pamo na baana bami. Nangwa byonkabyo, kutanwa mu kibamba mwavula bantu kundengela kimo kimye kubula kukasuluka.”

Mu kuya kwa kimye, Zarina waikele Kamonyi wa kwa Yehoba kabiji uji na luketekelo lwa kutambwila Anzhelika kimye kyo akasanguka ne kwikala na bumi mu ntanda ya mutende ikalamwanga na Bufumu bwa kwa Lesa. (Mateo 6:9, 10; Byubilo 24:15) Natalya ne baana banji babatizhiwe mu 2009. Ne pa kino kimye, bekela kwipi na kishimikwa kwaikejile nkondo kabiji bakilanguluka pa bintu byatama bibamwekejile. Natalya waambile’mba, “Kino kimye nakonsha kwamba pa bintu byammwekejile kwakubula kumvwa moyo nangwa kumvwa ku muchima kukola.” “Lesa ubena kwitukwasha kulubako.”