“Kechi Bayukile Ne”

KULENGULULA lujimuno mufuma bya malwa.

Bantu ba mu muzhi mukatampe wa Darwin mu Australia, byo benengezhezhenga kwikala na kijiilo kya moba a kukokoloka mu 1974, kwajijile ngengele ya kusopesha kwa mwela wakinkunkwila wajinga pepi kufika. Bino uno muzhi wa Darwin kechi wa kyonawinwepo kala na mwela wakinkunkwila pepi na myaka 30 yapichilepo ne. Pano nga mambo ka luno? Bangikazhi bavula bamwenenga nobe kuba kyaubiwa ne, poso kipupu kikatampe byo kyatatwile kutunauna mitenge ne kukundaula bibumba bya mazubo mwafyamine bantu. Juba jalondejilepo lukelo muzhi yense mwaubiletu pwekuu.

Mu Colombia mu November 1985 mutumba watubikile. Sino wasungulukile, kabiji mateshi azhiikile bantu ba mu muzhi wa Armero kukilaila pa 20,000. Nanchi kechi kwajingapo lujimuno lo bebajimwineko kino sa kikyangye kubiwa nenyi? Mutumba wajikimanga pa bañondo bavula. Nangwa byonkabyo na mambo a kupijilwa kwikela ku mutumba, bantu bavula ba mu Armero kechi bateleko maana ne. Babinemanga bebajimwine kuba’mba lonaiko lwajingatu pepi kufika, bino abo bajimwine bantu kyanamukose mukose kupichila mu mawaileshi. Kabiji biñambañamba bya kwambilamo ku machechi byaingijishiwe kukambizha bantu kwikala batekanya. Byo kyaubile ke bufuku, mutumba watubikile bimye bibiji. Umvwe wajinga anweba, nanchi inge mwakonsheshe kusha bipe byenu ne kunyema nyi? Bantutu bacheche bebikileko kuba byobyo kufika ne kimye byo kyabujile kukonsheka kunyemamo.

Javula bantu bafuunda bya mabwe bambila jimo mu kuluñama ku mpunzha kukamwekela kitentanshi. Bino kechi javula jo bamba juba jine po kikamwekela ne. Mu 1999, bitentanshi kuzhokoloka ntanda byaipaile bantu nobe 20,000. Bavula ba mu boba bafwile, balangulukilenga kuba’mba kechi kikebamwekelapo ne.

Mubapo Byepi na Lujimuno Lufuma ku Mwine Lesa?

Baibolo walumbulula bingi bulongo kufumatu ne kala bishiino bine bimwesha moba apelako. Mu kukwatankena pamo na kyokyo, witukambizha kulangulukishapo bulongo pa “moba a Nowa.” “Mambo ao moba byo aji ukyangye kwiya muyulo,” bantu beyekele na mingilo ya bisho bya mu bwikalo, nangwa kya kuba baakaminwe na mambo a bukapondo bwaubile ne woo. Byonka byajinga lujimuno Lesa loapaine kupichila mu kalume wanji Nowa, “kechi bayukile ne poso byo aishile muyulo, ne kwibalobesha bonse shata!” (Mateo 24:37-39) Umvwe wajinga anweba, nanchi mwakonsheshe kumvwina lujimuno nyi? Nanchi byobyo mubena kuba nyi?

Ibyepi inge mwaikalanga mu Sodoma kwipi na Kalunga Kafwa mu moba a muntu wa jizhina ja Lota mwipwa wa kwa Abalahama? Mpunzha yajinga nobe paladisa. Muzhi mukatampe wajinga bingi na bunonshi. Bantu bakasulukile kya kine kine. Mu moba a Lota, “bajilenga, batomenenga, bapotelenga, bapotolweshenga, bajiminenga, bashimikilenga.” Mpunzha mo baikelenga mwajinga byubilo bya bunya bya mama nafwa. Umvwe wajinga anweba, nanchi inge mwakonsheshe kumvwina lujimuno kimye Lota kyo alengulwile byubilo bincha nyi? Nanchi inge mwakonsheshe kumvwina umvwe bemubujile kuba’mba Lesa wafuukula konauna muzhi wa Sodoma nyi? Inyi inge mwamwenengatu nobe kukayatu, byonka byaubile boba bafwanyijilwe kwikala bako banji? Nanchi inge mwakonsheshe kunyemamo, bino kabiji mwabwela mwatala kunyuma byonka byaubile muka Lota nyi? Nangwa kya kuba’mba bakwabo kechi belwitabijile lujimuno ne, pa jonkaja juba Lota jo afuminemo mu Sodoma, “kwafumine mujilo mwiulu wa bukibiliki, wibonawine bonse.”—Luka 17:28, 29.

Bavula mu ano moba etu kechi batako maana ne. Nangwa byonkabyo, abino bya kumwenako byanembwa mu Byambo bya Lesa kwikala bya kwitujimunako ne kwitukwasha kwikala BAKULABA NE KUKENKENTA!

[Kitenguluzha/Kipikichala pa peja 22]

Nanchi Kine Muyulo Wajingako Nyi?

Bantu bavula bamilengulwila bakana’mba muyulo Kechi Wajingako ne. Bino Baibolo wamba’mba muyulo Wajinga Konka.

Yesu Kilishitu wikyambilepo kino, kabiji wajinga mwiulu saka amona kino byo kyaubiwenga.

[Kitenguluzha/Kipikichala pa peja 23]

Nanchi Kine Mizhi ya Sodoma ne Gomola Yaonawinwe Nyi?

Lufunjisho lwa bya kupoyapoya lwa kukeba kuyuka byajingako kala, lwaitabizha kino kuba’mba kyamwekele.

Mpito nayo yaambapo pa kino.

Yesu Kilishitu wikilumbulwile, kabiji kyatongolwa ne mu mabuku a mu Baibolo 14 apusana pusana.