February

Kimye Mfumu Hezekiya kyo alombele’mba Yehoba amubuke, wamukumbwile ne kumubuka. (2 Mfu. 20:1-6) Pano bino mutumwa Paulo byo alombele kwi Yehoba kuba’mba amufumye “mwiba mu mubiji,” Yehoba kechi wapwishishe lukatazho lwanji ne. (2 Ko. 12:7-9) Batumwa abo ba Yakoba ne Petelo bakebelenga kwibepaya kwi Mfumu Heloda bonse babiji. Yakoba bamwipayile pa kuba Yehoba wapokolweleko Petelo. (Byu. 12:1-11) Kampe twakonsha kulanguluka’mba, ‘Mambo ka Yehoba o abujijile kupokolola Yakoba bino wapokolwele Petelo?’ Baibolo kechi waambapo ne. Bino twafwainwa kushiinwa’mba Yehoba kechi “uba byatama” ne. (Mpitu. 32:4) Kimye kimo Yehoba wakonsha kukumbula milombelo mo twabujilenga kulangulukila. Bino na mambo a kuba’mba twashiinwa’mba Yehoba kimye kyonse uba byawama kabiji byaoloka, kechi twijizhañanya na mo akumbwila milombelo yetu ne.—Yoba 33:13. w23.11 21 ¶6

Nembi aye Yakoba waambile’mba bantu ba maana ‘bakookela.’ Kino kibena kulumbulula’mba twafwainwa kunemeka ne kukookelanga bantu Yehoba bo atongola. Yehoba kechi ukeba’mba tukookelenga bantu babula kukeba’mba tukookelenga mikambizho yanji ne. (Byu. 4:18-20) Twakonsha kulanguluka’mba kyapeela kukookela Yehoba kukila kukookela bantu. Yehoba witupa mizhilo yalumbuluka itukwasha. (Sala. 19:7) Bino bantu baji na luusa pano pa ntanda kechi balumbuluka ne. Nangwa byonkabyo, Shetu wa mwiulu wapa luusa bansemi, ba mu kafulumende ne bakulumpe mu kipwilo. (Maana 6:20; 1 Tesa. 5:12; 1 Pe. 2:13, 14) Abano bonse inge ke twibakookele ko kuba’mba tubena kukookela Yehoba. w23.10 6 ¶2-3

Jishinda jimo jikosesha lwitabilo lwetu ke kulanguluka languluka pa bulume bwa Yehoba. Uji na bulume bwa kufikizha kyonse kyo alaya. Wakonsha kuba bino mambo ye wa Bulume Bonse. (Yoba 42:2; Mako 10:27; Efi. 3:20) Walayile Abalahama ne Sala kuba’mba bakasema mwana nangwa kya kuba bakotele. (Nte. 17:15-17) Kabiji wabuujile Abalahama amba baana banji ukebapa kyalo kya Kenana. Bena Isalela baana ba kwa Abalahama byo bajinga mu buzha myaka yavula mu Ijipita, bamwene nobe uno mulaye kechi ukafika ne. Bino wafikile. Wabuujile kisungu aye Maliya kuba’mba ye ukasema Mwananji. Kino kyafikizhe mulaye Yehoba ye aambijile jimo kala kene mu bujimi bwa Edena. (Nte. 3:15) Umvwe saka tulanguluka pa milaye yonse yalayile Yehoba ne byo eifikizhe tuyuka’mba uji bingi na bulume. Kabiji lwitabilo lwetu mu mulaye wa kuba’mba Lesa ukalula ino ntanda ke ipya lukakosa.​—Yosh. 23:14; Isa. 55:10, 11. w23.04 28 ¶10-12

Yehoba wakumbwile lulombelo lwa kwa Davida lwa kukeba kumupokolola. (1 Sam. 19:10, 18-20; 2 Sam. 5:17-25) Ne atweba twafwainwa kwikala na luno luketekelo. (Sala. 145:18) Kimye kimo, Yehoba ukumbula milombelo yetu mu jishinda jo twabujilenga ne kuketekela. Paulo walombele’mba Lesa afumye “mwiba mu mubiji.” Pa bimye bisatu, Paulo walombele pa lonka luno lukatazho. Nanchi Yehoba wakumbwile milombelo yanji nyi? Ee. Pano bino, wakumbwile mu jishinda Paulo jo abujilenga kuketekela. Kechi wafumishepo lukatazho lwanji ne, pakuba Yehoba wamupele bulume bwa kuchinchika pa kuba’mba atwajijile kumwingijila mu bukishinka. (2 Ko. 12:7-10) Ne atweba lelo jino Yehoba wakonsha kwitukumbula mu jishinda jo twabujilenga kuketekela. Twafwainwa kuyuka’mba aye wayuka bingi bulongo bintu bituwamina pa kuba’mba etukwashe. Kabiji Lesa “wakonsha kuba bintu byavula kukila pa bintu byonse byo tulomba nangwa byo tulanguluka.” (Efi. 3:20) Onkao mambo, wakonsha kukumbula milombelo yetu mu jishinda jo twabujilenga ne kuketekela. w23.05 8-9 ¶4-6

Kyawama bingi kulangulukanga pa mulaye wa mu Baibolo wa lusanguko. Mambo ka? Mambo kechi twayuka juba jo tukakolwa nangwa kufwisha muntu ye twatemwa ne. (Sapwi. 9:11; Yako. 4:13, 14) Luketekelo lwa lusanguko luketukwasha kuchinchika makatazho a uno mutundu. (1 Tesa. 4:13) Binembelo bitubuula kuba’mba shetu wa mwiulu wituyuka bingi bulongo kabiji witutemwa bingi. (Luka 12:7) Onkao mambo, Yehoba Lesa wafwainwa kwituyuka bingi bulongo pa kuba’mba aketusangule na byubilo ne milanguluko yetu. Kabiji Yehoba witutemwa bingi uketulengela kwikala na bumi bwa myaka ne myaka nangwatu inge twafwa, uketusangula. Mambo ka o twafwainwa kuketekela uno mulaye wa lusanguko? Mambo twashiinwa kuba’mba witulaya ukebesha bingi kabiji uji bingi na bulume bwa kufikizha byo alaya. w23.04 8-9 ¶2-4

Yosefwa ne Maliya baingijilanga pamo pa kuba’mba batwajijile kukosesha bulunda bwabo ne Yehoba. Bayukile ene mambo o kyanemena kupopwela Yehoba pamo mu kisemi. (Luka 2:22-24; 4:16) Baji mu masongola luno bakonsha kufunjilako byavula. Inge muji na baana byonka byajinga Yosefwa ne Maliya, kampe kyakonsha kwimukatazha kutanwa ku kupwila nangwa kwikalapo na kimye kya kupopwela kwa kisemi. Kabiji kampe kimukatazha kwikalapo na kimye kya kufunda nangwa kulombela pamo na benakwenu. Bino mwafwainwa kuvulukanga’mba kupopwela Yehoba pamo kukemulengela kufwenya kwipi ne aye ne kubayisha butemwe mu kisemi kyenu. Onkao mambo, kupopwela Yehoba kwafwainwa kwikala kintu kitanshi mu bwikalo bwenu bonse. Inge kya kuba muji na makatazho mu masongola enu, kwikala na kupopwela kwa kisemi kwakonsha kwimukatazha. Bino mwakonsha kutendeka kwisamba pa bintu bicheche byo mwatemwa. Kuba bino kukemulengela kwitemwa bingi ne kukebesha kwingijila Yehoba pamo. w23.05 22 ¶7-8

Kwakamwa Lesa kwakwashishe byepi Obadiya? Kwamulengejile kwikala wa kishinka kabiji waketekelwa. Onkao mambo, mfumu wamutongwele kwikala kalama wa mu nzubo yanji. (Esakanyaiko Nehemiya 7:2) Kwakamwa Lesa kwakwashishe Obadiya kwikala na kyubilo kya kuchinchika. Wajingako mu moba a bukalama bwa Mfumu Ahaba. (1 Mfu. 16:30) Kabiji mukazhanji ye asongwele aye Yezebeli wapopwelanga Baela, washikilwe bingi Yehoba kya kuba wakebelenga kuzhiisha bupopweshi bwa kine mu bufumu bonse bwa ku buyeke. Waipayile ne bangauzhi ba Lesa bavula. (1 Mfu. 18:4) Yezebeli byo atendekele kukeba bangauzhi ba Lesa kuba’mba ebepaye, Obadiya wasendelepo bangauzhi bamo 100 ne kuya na kwibafya mu jiyengo mu mabumba abiji, ‘jibumba jimo bantu 50 ne kwibapa kajo ne mema.’ (1 Mfu. 18:13, 14) Umvwe Yezebeli wayukile byaubile Obadiya, inge wamwipayile. Obadiya wafwainwa waumvwine moyo kabiji kechi wakebelenga kufwa ne. Pano bino, watemenwe Yehoba ne bantu bamwingijilanga kukila byo atemenwe bumi bwanji. w23.06 16 ¶9-10

Yehoba watwajijila kutangijila bantu banji lelo jino byonkatu byo aubanga kala. Wibatangijila kwingijisha Mambo anji ne Mwananji, aye mutwe wa kipwilo. Nanchi twamona kintu kikwabo kimwesha’mba Yehoba watwajijila kwingijisha bantu kwitutangijila nyi? Ee. Akilangulukai pa byamwekele panyuma ya mwaka wa 1870. Charles Taze Russell ne balunda nanji batendekele kuyuka’mba mwaka wa 1914 wajinga mwaka wanema bingi mambo Bufumu bwa Lesa popo bwatendekele kulama. (Da. 4:25, 26) Kukebakeba bungauzhi bwa mu Baibolo ko kwibakwashishe kuyuka kino kishinka. Nanchi Yehoba wibatangijilenga mu bintu byo bakebelekebelenga mu Baibolo nyi? Ee, wibatangijilenga. Mu 1914, bintu byamwekelenga mu ntanda byamwesheshe patoka kuba’mba Bufumu bwa Lesa bwatendekele kulama. Nkondo Itanshi ya Ntanda Yonse yatendekele. Kabiji myalo, bitentanshi ne bipowe bya nzala nabyo byatendekele. (Luka 21:10, 11) Yehoba waingijishenga bano banabalume bena Kilishitu kutangijila bantu banji. w24.02 22 ¶11

Atweba twi bantu ba Yehoba. Onkao mambo, twayuka’mba witutemwa kabiji ukeba’mba atweba twikalenga bulongo. (Loma 8:35-39) Tumwenamo bingi inge twaingijisha ne kulondela mafunde a mu Baibolo. (Isa. 48:17, 18) Pano ñanyi bintu byo twafwainwa kuba inge ke tupite mu makatazho? Kampe wa mu kisemi wakonsha kwitufichisha ku muchima. Kimye kimo twakonsha kukolwa kikola kikatampe kyakonsha kwitulengela kubula kwingila mwingilo wa Yehoba byonka byo twaingilanga kala. Twakonsha kufikilwa na bya malwa. Nangwa kumanyikwa na mambo a bintu byo twaitabilamo. Inge ke tupite mu makatazho a uno mutundu twakonsha kulanguluka’mba: ‘Mambo ka o mbena kupichila mu bintu bya uno mutundu? Nanchi paji kintu kyatama kyo nauba nyi? Nanchi kino kibena kulumbulula’mba Yehoba kechi ubena kumpesha nenyi?’ Nanchi mwakilangulukapo bino nyi? Umvwe ibyo, kange mulefulwe ne. Bantu ba Yehoba ba kishinka bavula nabo byo byo balanguluka.​—Sala. 22:1, 2; Ha. 1:2, 3. w23.04 14 ¶1-2

Umvwe twaesekwa kuba kintu kyatama, ponkapotu twafwainwa kuleka kulanguluka nangwa kuba kintu kyakonsha konauna bulunda bwetu ne Lesa. Yehoba ukeba atweba kumukookela “na muchima yense.” (Loma 6:17) Tumwenamo byawama mu byonse byo etubuula kuba, kabiji kechi twakonsha kupimpula mizhilo yanji ne. (Isa. 48:17, 18; 1 Ko. 6:9, 10) Diabola wingijisha bukapondo ne meseko pa kuba’mba etulengela kubula kuba byo twafuukula. Satana ukeba ‘kwituja,’ nangwa’mba konauna bulunda bwetu ne Yehoba. (1 Pe. 5:8) Bena Kilishitu batanshi bebazakamishenga, kwibapuma, ne kwibepaya mambo bafuukwilepo kukookela Lesa. (Byu. 5:27, 28, 40; 7:54-60) Nangwatu lelo jino, Satana watwajijila na kwitumanyika. Tubena kumona balwanyi byo babena kuba ku balongo mu Russia ne mu byalotu bikwabo. Kabiji mwaya ntanda yonse, balwanyi betu babena kumanyika balongo ne banyenga mu mashinda avula. Kununga pa kwingijisha lumanamo, Satana wingijisha “bya bujimuku.”​—Efi. 6:11. w23.07 15-16 ¶6-9

Kutwajijila kufunda Baibolo kukemulengela kutemwa bingi Yehoba. Buno butemwe bwimukwashanga kwingijisha byo mubena kufunda. Mwingijishanga mafunde a mu Baibolo pa kufuukula bintu. Kabiji mukatendeka kulanguluka ne kuba bintu bulongo mambo mukeba kutookesha Lesa ku muchima. Mwibikangako kulondela Shetu wa mwiulu byonkatu mwana byo alondela bansemi bamutemwa. (Efi. 5:1, 2) Kimo kimye twakonsha kwishikisha’mba, ‘Nanchi luno namutemwa bingi Yehoba kukila byo namutemenwe kimye kyo natendekele kufunda bukine nyi? Nanchi ndanguluka ne kubila bintu monka Yehoba mo akebela ne kumwesha butemwe ku balongo ne banyenga nyi?’ Nangwatu inge twayuka’mba kechi twatemwa Yehoba ne balongo ‘byonka byo twibatemenwe kala ne,’ kange tulefulwe ne. Kino kyo kyamwekejile ne bena Kilishitu batanshi. Yesu kechi wibakaine ne. Ne atweba kechi uketukana ne. (Lum. 2:4, 7) Yesu wayukile kuba’mba twakonsha kwikala na butemwe bo twajinga nabo kala kimye kyo twatendekele kufunda bukine. w23.07 8 ¶2-3

Mutumwa Petelo walubankenye javula. Patanshitu, Petelo wiketekejile mwine ne kwamba’mba nangwatu batumwa bakwabo bakamushe Yesu, aye kechi ukamusha ne, ukatwajijila kwikala wa kishinka. (Mako 14:27-29) Kabiji pa kimye kikwabo, Petelo wakankelwe kutwajijila kulaba ne kukenkenta. (Mako 14:32, 37-41) Kyalondejilepo, Petelo wamushiile Yesu balwanyi banji byo baishile na kumukwata. (Mako 14:50) Kyapeleleko, Petelo wakaine Yesu jisatu ne kuchipa amba kechi wamuyuka ne. (Mako 14:66-71) Petelo waubile byepi byo ayukile’mba walenga mambo akatampe? Kyamukolele bingi ku muchima kya kuba watendekele ne kujila. (Mako 14:72) Yesu kechi wazhachishe Petelo pa byo alubankenye ne. Pakuba wamwambijile’mba bakamupa mingilo yanema. (Yoa. 21:15-17) Petelo wayukile’mba walengele mambo akatampe. Pano bino, kechi walekele kwingijila Lesa ne. Mambo ka? Mambo wayukile’mba Nkambo yanji aye Yesu watwajijile kumutemwa. Ñanyi kintu kyo mwafwainwa kufunjilako? Yehoba ukeba’mba tuyuke’mba witutemwa kabiji witulekelako mambo.​—Loma 8:38, 39. w24.03 18-19 ¶13-15

Bulalelale buleta bumvu, bulengela kwimona nobe kechi mwanema ne, kwikala na memi a kubula kukeba ne kulengela bisemi kwabenamo. Kwa kubula nangwa kuzhinaukatu ne, muntu wa maana ukana kuya ku “nzubo” ya mwanamukazhi wakosama. Umvwe waswa luno lwito, ulengela bulunda bwanji ne Yehoba kupwa. Bantu bavula baji na bino byubilo basambula bikola bibalengela kufwa bukiji. (Maana 7:23) Kyepelo 18 kiji mu Byambo bya Maana kitango 9 kyapezhako’mba: “Benyi banji baji mu Kilende mwazhika.” Mambo ka bantu bavula o baswila lwito lwanji luleta bya malwa? (Maana 9:13-18) Kintu kikwabo kyuba bantu bavula kyo twafwainwa kuchinuzhuka ke kutamba bya mulekese. Bamo balanguluka’mba kijitu bulongo kutamba bya mulekese. Bino kutamba bya mulekese kubika bantu mu makatazho. Baleka kwinemeka bene ne kuleka kunemeka bakwabo. Kabiji kikatazha bingi kuleka kino kyubilo. Umvwe bantu batamba bino bipikichala kikatazha bingi kwibilubamo. Kutamba bya mulekese kechi kukwasha bantu kuleka bya kusakasaka byatama ne. Pakuba bya kusakasaka po po bikilamo. (Kolo. 3:5; Yako. 1:14, 15) Kutamba bya mulekese kwalengela bavula kuba bulalelale. w23.06 23 ¶10-11

Nangwa kya kuba byalo bimo bimena buno bufumu bwa ntanda yonse bwa Anglo-America, kechi bikapingapo ne. Twayuka kino mambo jibwe jimenako bufumu bwa Lesa jikafumpa maulu a lukipashañano emenako bufumu bwa Anglo-America. (Da. 2:34, 35, 44, 45) Nanchi mwashiinwa kuba’mba bungauzhi buji mu buku wa Danyela bwaamba pa maulu a kyela kya kapotwe avwangakana na buchimba bubena kufika nyi? Bintu byo mukobanga mu bwikalo bwenu byo bikamweshanga’mba mwashiinwa. Kechi mu kata muchima pa kukeba mali avula nangwa kukeba bintu byavula bya mu bwikalo mu ino ntanda yo basa konauna katataka ne. (Luka 12:16-21; 1 Yoa. 2:15-17) Kumvwisha buno bungauzhi kuketukwasha kuyuka buneme bwa kusapwila ne kufunjisha bantu. (Mat. 6:33; 28:18-20) Inge mwayuka buno bungauzhi, iipuzhai buno bwipuzho: ‘Nanchi byo mufukuulapo bimwesha’mba nashiinwa kuba’mba Bufumu bwa Lesa katatakatu bukafumyepo makafulumende a bantu nyi?’ w23.08 11 ¶13-14

Ipelulai ne kuvulukanga’mba luno kechi mwafwainwa kuba bintu na mambo a kukoma, butuntulu bwa mubiji nangwa bintu bikwabo byonka byo mwaubanga kala ne. Byonkatu byaubile Bazilai, mwafwainwa kukanapo mingilo imo inge kya kuba mwakonsha kukankalwa kwiyuba na mambo a butuntulu bwenu bwa mubiji nangwa kukoma. (2 Sam. 19:35, 36) Umvwe kyakonsheka ubai byonka byaubile Mosesa. Mosesa walombele bukwasho kabiji wapelepo bakwabo mingilo imo. (Lupu. 18:21, 22) Umvwe mwipelula kechi mukobanga bintu byakonsha kwimulengela kukooka ne kubula kunyema bulongo. Kabiji kechi twafwainwa kwizhachisha na mambo a bintu byatama bifuukulapo bakwetu ne. Kechi twakonsha kufuukwilako bakwetu nangwa kwibazhikijila ku makatazho o bapitamo na mambo a kubula kufuukula bulongo abo bene ne. Mwana mwine wakonsha kufuukulapo kuleka kwingijila Yehoba. Kino kilengela bansemi kwikala na bijikila bingi. Nangwa byonkabyo, bansemi bezhachisha na mambo a kubula kufuukulapo bulongo kwa baana babo, bekala na kisendwa kikatampe. Yehoba kechi ukeba amba bansemi balangulukenga bino ne. w23.08 29 ¶11-12

Samisonyi wajinga mbulwakulumbuluka byonka byo tuji, onkao mambo kimye kimo kechi wafuukulanga bintu bulongo ne. Kintu kimo kyo afuukwilepo kyamulengejile kupita mu makatazho a kusesula. Samisonyi byo aingijileko pa bumutonyi myaka icheche watemenwe “mwanamukazhi waikalanga mu Kimpachiko kya Soleka.” Uno mwanamukazhi “jizhina janji wajinga Delila.” Patanshi Samisonyi wakebelenga kusongola mwanamukazhi mwina Filishitiya. Yehoba wamuswishishe kuba bino mambo wakebelenga jishinda ja kulwilamo na bena Filishitiya. Kabiji palutwe kacheche, Samisonyi wayile ku Gaza ku nzubo ya pite. Kabiji akwa nako Yehoba wamupele bulume bwa kulwa ne bena Filishitiya ne kwibashinda. (Mito. 14:1-4; 16:1-3) Nangwa byonkabyo, kyamweka Delila wajinga mwina Isalela. Na mambo a kuba’mba uno mwanamukazhi wajinga mwina Isalela, kino kechi kyafwainwe kulengela Samisonyi kuya na kulwa na bena Filishitiya ne. Bena Filishitiya bapele Delila mali avula bingi pa kuba’mba afutukemo Samisonyi. w23.09 5 ¶12-13

Maana akonsha kwitukwasha kubula kuba bukaji. Muntu uji na maana wikanya inge bantu babena kumwendeleka pa bintu byo aitabilamo. Javula bantu betwipuzha mepuzho kechi betubuula ene mambo o bepwizha mepuzho ne. Onkao mambo, saka mukyangye kukumbula, vulukainga’mba kechi mwayuka kine kintu kyalengela uno muntu kwimwipuzha ne. (Maana 16:23) Akilangulukai Gidiona byo akumbwile banabalume bena Efelaimu. Bamuzhingijile mambo kechi wibechile’mba bamukwasheko kimye bena Isalela kyo balwilenga na balwanyi babo ne. Pano ñanyi kine kintu kibalengejile kuzhingila? Kyamweka bazhingijiletu. Maana akwashishe Gidiona kuyuka mwakukumbwila bulongo kabiji wayukile ne ene mambo o bazhingijile. Baibolo witubuula’mba: “Byo aambile bino, balekele kumukatazha.”​—Mito. 8:1-3. w23.09 16 ¶8-9

Yehoba ne Yesu baji na bulunda bwakosa bingi nabiji bobwa bwa mwana ne shanji. Kwa kubula nangwa kuzhinaukatu ne, Yehoba kyamukolele bingi ku muchima pa kumona Mwananji byo bamumanyikilenga, kumukana ne kumweseka. Nsemi yense wafwishapo kala mwana, wayuka kuba’mba kino kileta bingi bulanda bukatampe. Twaketekela kuba’mba bafu bakasangulwa. Nangwa byonkabyo, inge twafwisha kitukola bingi ku muchima. Kino kitukwasha kuyuka Yehoba byo aumvwinenga ku muchima Mwananji byo amanaminenga ne kufwa pa joja juba mu kimye kya mwela wa mebele mu mwaka wa 33 C.E. (Mat. 3:17) Kutendeka luno kufika ne pa juba ja Kivuluko, mwakonsha kufunda pa bukuzhi pa Kupopwela kwa Kisemi nangwa pa lufunjisho lwa pa bunke. Pa juba ja Kivuluko, mwafwainwa kutamba vidyo wanema bingi wa pa Kupopwela kwa Lukelo. Inge twanengezha michima ku Kivuluko, kiketupelela bingi kukwasha bakwetu nabo kumwenamo.​—Eze. 7:10. w24.01 11 ¶10-12

Kulomba kwi Yehoba jo jishinda jimo Yehoba jo akonsha kwitupelamo bulume. Yehoba ukumbula milombelo yetu ne kwitupa “bulume bwakila bwa bantu.” (2 Ko. 4:7) Kabiji Yehoba wakonsha kwitukosesha inge ketutange Mambo Anji ne kulanguluka langulukapo. (Sala. 86:11) Byambo bya Yehoba biji mu Baibolo, ‘biji bingi na bulume.’ (Hebe. 4:12) Inge kemulombe kwi Yehoba ne kutanga Mambo anji, ukemupa bulume bwa kuchinchika kabiji ukemulengela kwikala na lusekelo ne kwimukwasha kwingila mingilo yakatazha. Pano twayai tumone Yehoba byo akoseshe ngauzhi Yona.Yona Wanyemene mwingilo wakatezhe bingi wamupele Yehoba. Na mambo a kino, kwashajiletu tiki inge wafwile na luvula lukatampe. Kabiji wasaka akepayishe ne bo ajinga nabo mu bwato. Yona byo bamutayile pa mema, bamumiine ku jisabi. Wajinga munda mwa jisabi mwafichiletu bwii. Ñanyi kintu kyaubile Yona pa kuba’mba bamukoseshe kimye kyo ajinga munda mwa jisabi? Walombele.​—Yona 2:1, 2, 7. w23.10 13 ¶4-6

Nangwa kya kuba mutumwa Petelo wanembejile ano makalata bena Kilishitu bajingako pa kyokya kimye, Yehoba wavwangilemo ano makalata mu Mambo Anji. Ano makalata etukwasha bingi ne lelo jino. (Loma 15:4) Tuji mu ntanda muji bantu babula kwitabila mu bungauzhi bwa mu Baibolo. Bano bantu bakonsha kwitwendeleka mambo twatwajijila kusapwila amba mpelo ikeya. Bantu bamo bamba’mba kechi ikeya ne. (2 Pe. 3:3, 4) Inge bantu bo tusapwila, bo twingila nabo nangwa ba mu kisemi ke bambe bino, lwitabilo lwetu lwakonsha kukooka. Petelo walumbulula bintu byakonsha kwitukwasha. Bantu bamo bakonsha kulanguluka’mba Yehoba wabanda kuleta mpelo ya buno bwikalo. Byambo byanembele Petelo bituvululamo kuba’mba jishinda atweba bantu jo tubajilamo kimye japusana na bimona Yehoba. (2 Pe. 3:8, 9) Kwi Yehoba myaka kiumbi iji nobe juba jimo. Yehoba watwajijila kutekanya mambo kechi ukeba muntu nangwa umo konaika ne. Nangwa byonkabyo, inge juba janji jikafike, buno bwikalo bukeya ku mpelo. w23.09 26-27 ¶2-5

Mambo ka mutumwa Paulo o anembejile ino nkalata bena Kilishitu Bahebelu baikalanga mu Yudea? Kyamweka wibanembejile ino nkalata na mambo a bishinka bibiji. Kitanshi, wakebelenga kwibatundaika. Bano Bahebelu bavula bakomejile mu bupopweshi bwa Bayudea. Bantangi babo ba bupopweshi bebendelekanga na mambo a kwikala bena Kilishitu. Mambo ka? Mambo kechi bajinga na nzubo ya kupopwelamo Lesa nangwa kya kusokelapo bitapisho kwi Lesa ne. Kabiji kechi bajingapo na bañanga ba Lesa ba kwibemenako ne. Kino kyakonsheshe kulefula baana ba bwanga ba kwa Kilishitu ne kwibalengela kubula kwikala na lwitabilo lwakosa. (Hebe. 3:12, 14) Kabiji bamo batendekele kulanguluka kubwela ku bupopweshi bwa Bayudea. Kya bubiji, Paulo wavulwilemo bano bena Kilishitu Bahebelu kuba’mba kechi bebikilengako kumvwisha bukine bwazhika, ko kuba’mba “kajo kakosa” ka mu Mambo a Lesa ne. (Hebe. 5:11-14) Kyamweka bamo kechi balekele kulondela Mizhilo ya Mosesa ne. w23.10 24-25 ¶3-4

Banabakazhi bamo basalapo kwikala bazhike. (Mat. 19:10-12) Bamo bekala bazhike na mambo a bintu byapusana pusana. Shiinwai kuba’mba Yehoba ne Yesu banemeka bingi bena Kilishitu bazhike. Banyenga bazhike mwaya ntanda yonse batundaika bingi bakwabo mu bipwilo kwingijila Yehoba. Na mambo a kuba’mba batemwa ne kuta muchima bakwabo, kino kibalengela kwibamona ku bavula amba banyenga yabo kabiji bainabo. (Mako 10:29, 30) Bamo batwela mu mwingilo wa kimye kyonse. Banabakazhi bena Kilishitu bengila bingi pakatampe mu mwingilo wa kusapwila mwaya ntanda yonse. (Sala. 68:11) Abya mwakonsha kunengezha bintu bulongo lonka luno pa kuba’mba mutwele mu mwingilo wa kimye kyonse nyi? Mwakonsha kwikala bapainiya, kwingilako mwingilo wa buntungi nangwa kwingijila pa Betele. Lombai kwi Yehoba pa kuba’mba emukwashe kwingilako ino mingilo. Isambai na babena kwingila ino mingilo pa kuba’mba muyuke bintu byo mwafwainwa kuba. Kepo munengezhe bintu byakonsha kwimukwasha kufikilamo bulongo. Inge mwatwela mu mwingilo wa kimye kyonse, kino kikemukwasha kwingilako ne mingilo ikwabo yavula ya Yehoba. w23.12 22 ¶16-17

Na mambo a kuba’mba malwa akatampe ajitu pepi, kyanema bingi atweba bonse kukookela mukambizho wa kusapwila mambo awama. Nangwa byonkabyo, kyakonsha kwitukatazha kuta muchima ku mwingilo wa kusapwila inge tubena kupita mu lukatazho lwa mali, nangwa kampe babena kwitukanya kwingila mwingilo wa kusapwila. Ñanyi kintu kyakonsha kwitukwasha kutangizhako mwingilo wa Yehoba? Twafwainwa kuketekela’mba “Yehoba wa mabumba” uketukwasha. Uketukwasha inge twatwajijila kumwingijila mu bwikalo bwetu. Onkao mambo, kechi twafwainwa kuchiina kintu nangwa kimo ne. (Hagai 2:4) Yehoba ukebesha bingi atweba kutesha muchima ku mwingilo wanema wa kufunjisha bantu kwikala baana ba bwanga. Hagai watundaikile bantu ba Yehoba kutendeka mwingilo jikwabo wa kushimukulula nzubo ya Lesa. Yehoba wibalayile’mba “ukebobila bibusa” inge balondela byo bebakambizhe. (Hagai 2:18, 19) Ne atweba twakonsha kuketekela’mba Yehoba uketubila bibusa inge twatesha muchima kwingila mwingilo ye etupa. w23.11 16 ¶8; 17 ¶11

Mu nkalata yo anembejile bena Loma, mutumwa Paulo waambile’mba bantu bonse bandengamambo. Pano mambo ka Lesa o akonsha kutelela muntu amba waoloka ne kumubila bibusa? Pa kuba’mba atweba bena Kilishitu bonse tutaane mukumbu, twayai twisambe pa byaambile Paulo pe Abalahama. Yehoba watelele Abalahama amba waoloka byo aikelenga mu kyalo kya Kenana. Mambo ka Yehoba o atelejile Abalahama amba waoloka? Nanchi kechi na mambo a kuba’mba wakookejile Mizhilo ya Mosesa nenyi? Ine. (Loma 4:13) Mambo kimye Lesa kyo atelele Abalahama amba waoloka kechi kwajinga Mizhilo ya Mosesa ne. Ino mizhilo beipaine ku bena Isalela saka papita kala ne myaka 400. Pano ñanyi kine kintu kyalengejile Lesa kutela Abalahama amba waoloka? Yehoba wamumwesheshe lusa lwanji lukatampe ne kumutela’mba waoloka na mambo a lwitabilo lwanji.​—Loma 4:2-4. w23.12 3 ¶4-5

Bonkabwa bufuku ngauzhi Natana bo abuujile mfumu Davida byambo biji peulupo, Yehoba wabuujile Natana kuba’mba Davida kechi ye ukamushimikila Nzubo ne. (1 Moba 17:3, 4, 11, 12) Ñanyi kintu kyaubile Davida byo atambwijile uno sawakya? Aye watendekele kunengezha mali ne bintu pa kuba’mba mwananji Solomone akebingijishe ku uno mwingilo. (1 Moba 29:1-5) Yehoba byo abuujile Davida kuba’mba kechi ye ukamushimikila Nzubo ne, ponkapotu walayañene nanji lulayañano. Yehoba walayile Davida kuba’mba mwananji ukalama myaka ne myaka. (2 Sam. 7:16) Fwanyikizhai Davida byo akekala na lusekelo mu ntanda ipya, mu Bukalama bwa Myaka Kiumbi byo akayuka’mba Mfumu aye Yesu, wafumine mu kisemi kyanji. Jino jishimikila jitukwasha kuyuka’mba inge twakankalwa kubapo kintu kimo kyo twakebelenga mu mwingilo wa Yehoba, Lesa wetu wakonsha kwitupesha mu mashinda o twabujilenga ne kulangulukapo. w23.04 16 ¶8-10

Mukataana’mba binembelo bimo mu Baibolo bikemutekenesha, kikatakata inge mubena kumvwa moyo. Mabuku nabiji buku wa Yoba, wa Masalamo ne wa Byambo bya Maana akonsha kwimutekenesha bingi kuvwangakotu ne byambo bya kwa Yesu biji mu Mateo kitango 6. Kulomba kwi Yehoba ne kutanga Mambo anji kukemutekenesha bingi. Twafwainwa kushiinwa’mba Yehoba uketukwasha inge ketupite mu makatazho mu bwikalo bwetu. Yehoba kechi uketulekelela ne. (Sala. 23:4) Yehoba walaya kwituzhikijila, kwitukosesha, kwitukwasha ne kwitutekenesha. Kinembelo kya Isaya 26:3 kyaamba pe Yehoba amba: “Mukapokolola boba bemuketekela; Mukebapa mutende wa myaka ne myaka, Mambo baketekela mwi anweba.” Onkao mambo, ketekelainga mwi Yehoba ne kuba bintu byakonsha kumulengela kwimukwasha. Umvwe mwauba bino, mukekala na bulume nangwatu mu bimye bya malwa. w24.01 25 ¶16-17

Byambo bya bungauzhi biji mu kinembelo kiji peulupo bibena kufika lelo jino. Kabiji byambo bya lutekenesho byalondelapo byaamba pa kimye kyetu kyo tujimo amba: “Kabiji baana bobe bonse bakebafunjisha kwi Yehoba, ne mutende wa baana bobe ukavula bingi. Obewa bakakukosesha na mambo a bololoke. . . . Kafwako kintu kyo ukachina ne, kabiji kafwako kikakulengesha moyo ne, mambo kechi bikakufikila ne.” (Isa. 54:13, 14) Nangwatu “Lesa wa buno bwikalo” aye Satana, kechi uji na bulume bwa kulekesha mwingilo wa kufunjisha ubena kwingila bantu ba Yehoba ne. (2 Ko. 4:4) Yehoba wabwezha bupopweshi bwa kine kabiji kechi bakebutamishapo jikwabo ne. Bukatwajijila kwikalako myaka ne myaka. Kafwako kyela nangwa kimo kya kwitulwishako kikengila ne. w24.02 4 ¶10

Atweba bena Kilishitu twanemeka bingi lulayañano lwetu lwa kwipana kwi Yehoba. Kimye kyonse kyo tubena kufuukula bintu bya kuba kuvwangakotu ne byakunza kisemi, tuvuluka lulayañano lwetu. Twingila na ngovu kukebela ba mu kisemi kyetu. Pano bino kechi tutangizhako bintu bikeba ba mu kisemi kyetu ne. Pakuba tutangizhako bikeba Yehoba. (Mat. 10:35, 36; 1 Timo. 5:8) Kimye kimo twakonsha kufuukula bintu byakonsha kubula kusangajika balongo betu pa kuba’mba tusangajike Yehoba ku muchima.Yehoba ye watendekeshe kisemi kabiji ukeba’mba twikalenga na lusekelo mu kisemi. (Efi. 3:14, 15) Inge tukeba kwikala na lusekelo, twafwainwa kubanga bintu Yehoba byo akeba. Yehoba wimusanchila bingi pa muchima wenu wa kwipana kumwingijila ne byo mwibikako kukebela ba mu kisemi kyenu bintu byo bakeba, kwibatemwa ne kwibanemeka.​—Loma 12:10. w24.02 18 ¶11, 13