June

Yehoba wibapesheshe bena Kilishitu batanshi mambo bayukile mwakubila na makatazho o bapichilengamo. Bena Kilishitu batanshi bimye bimo bebamanyikanga, kwa kubula ne kuketekela. Langulukai pa kyamwekele kwi Banabasa ne mutumwa Paulo byo basapwijilenga mu Lisitila. Patanshitu bebatambulwijile bingi bulongo ne kwibateleka. Kabiji bantu bakainyenga, “baitabishe mabumba” ne bano bantu baashile mabwe Paulo ne kulanguluka’mba wafwa. (Byu. 14:19) Nangwa byonkabyo, Banabasa ne Paulo batwajijile kusapwila mu mapunzha akwabo. Ñanyi bintu byafuminemo? Bakwashishe bantu “bamo kwikala baana ba bwanga,” kabiji byambo byabo ne byo bapichilemo byakoseshe bakwabo ba mu lwitabilo. (Byu. 14:21, 22) Bavula bamwenejilemo na mambo a kuba Banabasa ne Paulo kechi balekele mwingilo wa kusapwila ne, nangwa kya kuba bebamanyikilenga. Ne atweba Yehoba uketupesha bingi inge twatwajijila kwingila mwingilo wanji. w23.04 16-17 ¶13-14

Mfumu Davida mu bumi bwanji bonse wajinga na balwanyi bavula bingi, kabiji pa bimye byavula walombanga kwi Yehoba kuba’mba amukwashe. Davida waitabijile kuba’mba Yehoba umvwa ne kukumbula milombelo yanji. Ne atweba twakonsha kwikala na luno lwitabilo. Baibolo witubuula kuba’mba Yehoba upana maana ne bulume bwa kuchinchika. Wakonsha kwingijisha balongo ne banyenga nangwatu bantu babula kumupopwela kwitukwasha byonka byo bebakwashishe ne abo. Kampe Yehoba kechi wakonsha kukumbwila milombelo yetu monka mo tubena kukebela ne, bino twayuka kuba’mba ukakumbula. Uketupa bintu byonkatu byo tubena kukeba, kabiji uketupa pa kimye kyonkatu kyo tubena kwibikebelapo. Onkao mambo, twajijilai kulomba ne kuketekela kuba’mba Yehoba ukemukwashanga mu ano moba. Kabiji mu ntanda ipya ‘ukapa bilengwa byumi bintu byonse byo bikeba.’​—Sala. 145:16. w23.05 8 ¶4; 13 ¶17-18

Kyawama kuta muchima pa byawama byakonsha kufumamo mu kufika bukiji ku kusambakana kwa kuya mu mwingilo, kabiji wafikizhe kikonkwanyi kyanji. Ñanyi bintu byawama byo mwafwainwa kutapo muchima? Inge mwibikila kikonkwanyi kya kutanga Baibolo nangwa kuwamishako milombelo yenu, langulukai pa kyo kyo kikonkwanyi byo kikemukwasha kukosesha bulunda bwenu ne Yehoba. (Sala. 145:18, 19) Inge kikonkwanyi kyenu kya kwikala na kyubilo kimo kya bwina Kilishitu, tai muchima pa byo kyakonsha kwimukwasha kuwamishako bulunda bwenu na bakwenu. (Kolo. 3:14) Nembai bishinka byafwainwa kwimulengela kufikizha kikonkwanyi kyenu. Kabiji Pwanañanainga na bantu bemutundaika kufikizha kikonkwanyi kyenu. (Maana 13:20) Kwambatu kine, atweba bonse kwikala moba amo o tubula kwikala na kizaku. Nanchi kino kibena kulumbulula’mba kechi twakonsha kufikizha kikonkwanyi kyetu nenyi? Ine. Twafwainwa kwingijila pa kufikizha kikonkwanyi kyetu nangwa inge kechi tuji na kizaku ne. Nangwa kya kuba kechi kyapeela kuba bino ne, bino mukekala na lusekelo inge mwafikizha kikonkwanyi kyenu. w23.05 27-28 ¶5-8

Kuyuka’mba kubula kufuukula bulongo ko kwalengela, kwitukwasha kusolola mambo o twalengele, kwingijilapo ne kubula kubwezhapo kintu kyo twaubile. Kuba bino kwitukwasha kutwajijila kunyema kapela ka ku bumi. Inge kechi mwafwainwa kupimpula kintu kyo mwafuukwilepo ne, fundai mwakubila na kyokyo kintu. Kechi mwafwainwa kutaya kimye kyabaya na kulanguluka’mba kintu kyo mwafuukwilepo kyo kyawamine nangwa kuzhachisha bakwenu ne. Pakuba swai kuba’mba kintu kyo mwafuukwilepo kuba kyatamine kabiji ibikaiko kuba bintu byawama luno. Inge jiwi ja mu muchima jibena kwimuzhachisha pa kintu kyatama kyo mwaubile lombai kwi Yehoba ne kuswa’mba mwaubile kintu kyatama kabiji lombai lulekelo lwa mambo kwi Aye. (Sala. 25:11; 51:3, 4) Lombai lulekelo lwa mambo ku bantu bo mwazhingijishe kabiji umvwe kyakonsheka ambilai bakulumpe mu kipwilo bemukwashe. (Yako. 5:14, 15) Funjilaiko ku kintu kyatama kyo mwaubile pa kuba’mba mukabule kubwezhapo jikwabo. Inge mwauba bino shiinwai’mba Yehoba ukemubila lusa ne kwimukwasha.—Sala. 103:8-13. w23.08 28-29 ¶8-9

Yehoyada wakwashishe Yehoashi kwikala muntu wajinga na byubilo byawama. Onkao mambo, mfumu byo akijinga mwanyike waubile bintu byatokeshenga Yehoba ku muchima. Pano bino Yehoyada byo afwile, Yehoashi watendekele kumvwina babinemanga basatukile. (2 Moba 24:4, 17, 18) Nangwa kya kuba Yehoba wazhingijile pa byo baubilenga, “wibatuminanga bangauzhi kuba’mba bebabwezhe kwi aye . . . , bino bakaine kumvwa.” Bakainetu ne kumvwa ku mwana Yehoyada aye Zekaliya, wajinga ngauzhi wa Yehoba kabiji ñanga kabiji muvyala wanji. Nangwa byonkabyo, mfumu Yehoashi walengejile Zekaliya kumwipaya. (2 Moba 22:11; 24:19-22) Yehoashi kechi watwajijile kwakamwa Yehoba ne. Yehoba waambile’mba: “Aba bandengulula nkebalengesha bumvu.” (1 Sam. 2:30) Nzhita ya bena Silya yajingatu na bantu bacheche, yashinjile “Nzhita ikatampe” ya kwa Yehoashi kabiji ‘bamukozhezhe bingi.’ (2 Moba 24:24, 25) Yehoashi bamwipayile ku bakalume banji mambo waipayile Zekaliya. w23.06 18-19 ¶16-17

Mutumwa Paulo waikele kimye kyabaya mu Efisesa na kusapwila ne kufunjisha mambo awama. (Byu. 19:1, 8-10; 20:20, 21) Watemenwe bingi kabiji wakebelenga kwibakwasha kutwajijila kwikala ba kishinka kwi Yehoba. Bena Efisesa Paulo bo anembejile nkalata, balondejilenga mafunjisho a bupopweshi bwa bubela kabiji baubilenga bingelekezha. Bantu baikalanga mu Efisesa baubanga bulalelale ne byubilo bikwabo bya bunya. Mu bishimikwa bya kukayilamo byajinga mu uno muzhi ne pa bijiilo bya bupopweshi, bantu bavula besambangatu pa bulalelale ne pa bubipisho bonse. (Efi. 5:3) Bantu bavula ba mu Efisesa ‘balekele kumvwa bumvu’ kwamba pa bintu bya bunya. (Efi. 4:17-19) Saka bakyangye kufunda kyawama ne kyatama, bena Efisesa jiwi jabo ja mu muchima kechi jibakatazhanga ne. Kino kyo kyalengejile Paulo kwibalumbulula’mba “abo milanguluko yabo iji mu mfishi kabiji bebafumya ku bumi bufuma kwi Lesa.” Bena Efisesa bamo kechi batwajijile kwikala mu mfishi ne. w24.03 20 ¶2, 4; 21 ¶5-6

Gidiona wafwainwe kwibikako kutangijila bantu ba Lesa. Byo balwilenga nkondo bufuku, bena Mijanyi banyemene kabiji Gidiona wibapupijile kufuma ku Kimpachiko kya Yezelela kukafika ku Mukola wa Yodano. (Mito. 7:22) Nanchi Gidiona wakankelwe kwabuka Yodano nyi? Ine. Nangwa kya kuba aye ne banabalume 300 bo ajinga nabo bakookele, baabukile ne kutwajijila na kupupila bena Mijanyi kabiji bebataaine ne kwibashinda. (Mito. 8:4-12) Gidiona waketekejile kuba’mba Yehoba wakonsha kumukosesha kabiji Yehoba wamukoseshe. (Mito. 6:14, 34) Gidiona ne banabalume bo ajinga nabo bapupijile bamfumu babiji babena Mijanyi panshi nangwa kya kuba bano bamfumu bajinga pa bangamela. (Mito. 8:12, 21) Bino Lesa wakwashishe bena Isalela kukwata bano bantu ne kwibashinda. Bakulumpe mu kipwilo nabo bafwainwa kuketekela mwi Yehoba, “aye ubula kukooka nangwa kupwa bulume.” Aye ukosesha bakooka.​—Isa. 40:28, 29. w23.06 6 ¶14, 16

Twakonsha kwikala na muchima washikimana inge tubena kupita mu meseko. Onkao mambo, ketekelai mwi Yehoba. Langulukai pa bintu byawama byamwenejilemo Balaka na mambo a kutwajijila kuketekela mu lutangijilo lwa Yehoba. Pa kyo kya kimye bantu ba mu Isalela kechi benengezhezhe kulwa nkondo ne. Kabiji kechi bajinga na bilwilo ne. Bino Yehoba waambijile Balaka kuya na kulwa na mfumu wa bena Kenana aye Sisela ne nzhita yanji yajinga na bilwilo byavula. (Mito. 5:8) Ngauzhi wamukazhi aye Debola waambijile Balaka kukunkulukila munshi ya mutumba kuya na kulwa ne Sisela ne makalaki anji 900. Kyakonsheshe kwibakatazha bingi bena Isalela kulwa na bantu bajinga na makalaki aendanga lubilo na mambo a ko balwijilenga. Nangwa kya kuba Balaka wayukile kino, bino wakookejile. Bashilikale byo bakunkulukijilenga munshi ya mutumba wa Tabola, Yehoba wanokeshe mvula mukatampe. Makalaki a kwa Sisela atapamine mu mateshi kabiji Yehoba walengejile Balaka kushinda. (Mito. 4:1-7, 10, 13-16) Nangwatu lelo jino, Yehoba uketulengela kushinda inge twamuketekela ne kuketekela mizhilo ifuma ku jibumba janji. w23.07 19 ¶17-18

Kutekanya ko kuketulengela kukekala na bumi bwa myaka ne myaka. Inge twatekanya tukapembelela kufika kwa milaye ya Lesa byonka byajinga bantu ba Lesa banji ba kishinka bakala. (Hebe. 6:11, 12) Baibolo witwesakanya ku byuba njimi. (Yako. 5:7, 8) Njimi wingila na ngovu kubyala ne kutekezha, bino kechi uyuka nkunwa byo ikoma ne. Onkao mambo, upembelela ne kutekanya kuketekela’mba ukanowa. Ne atweba twibikako kwingijila Yehoba na mukoyo nangwa kya kuba “kechi twayuka juba nkambo yetu jo akeshilamo ne.” (Mat. 24:42) Bino na mambo a kuba’mba twatekanya, twayuka’mba Yehoba ukafikizha byonse byo etulaya pa kimye kyanji mwine. Umvwe twabula kutekanya, tukakankalwa kupembelela kabiji tukakumpulwa ne kusha bukine. Tukatendeka kuba bintu byo tulanguluka’mba byo byafwainwa kwituletela lusekelo. Bino umvwe twatekanya, tukachinchika kufika ne ku mpelo kabiji tukapuluka.​—Mika 7:7. w23.08 22 ¶7

Inge twaesakanya buno bungauzhi buji pa Danyela 2:41-43 na bukwabo buji mu buku wa Danyela ne Lumwekesho kilengela kuyuka’mba ano maulu emenako bufumu bwa United States ne bwa Britain. Buno bufumu bubiji bwingijila pamo kabiji buji bingi na bulume. Danyela waambilepo pa buno bufumu bwa ntanda yonse’mba “bukekala aku bwakosa, aku bwanekena.” Mambo ka o bwanekenena ku lubaji lumo? Mambo bantu ba mu buno bufumu baji nobe buchimba bwanekena balengulula bulume buji na buno bufumu buji nobe kyela kya kapotwe. Tufunjilako bishinka byavula bingi ku kipashañano kyalumbulwile Danyela. Kitanshi, bufumu bwa ntanda yonse bwa Anglo-America bwamwesha’mba buji bingi na bulume. Bufumu bwa United States ne Britain bo bwashinjile mu nkondo itanshi ne nkondo ya bubiji ya ntanda yonse. Nangwa byonkabyo, buno bufumu bwanekena kabiji bwatwajijila na kunekena mambo bangikazhi ba mu buno bufumu balwa mulwabo ne kwimena kafulumende. Kya bubiji, bufumu bwa ntanda yonse bwa Anglo-America bo bukapelako kulama pano pa ntanda Bufumu bwa Lesa saka bukyangye konauna bufumu bonse bwa bantu. w23.08 10-11 ¶12-13

Pa bimye bimo Davida waikalanga na bijikila na mambo a makatazho ne meseko o apitangamo. (Sala. 18:4, 5) Nangwa byonkabyo, Yehoba wamukokoloshanga mambo wamutele muchima ne kumumwesha kifyele. Yehoba watangijilanga mulunda nanji wajinga na makatazho ku “munyemvu wavula” ne ku “mapunzha a kukokolokelamo kwavula mema.” Kino kyalengejile Davida kwikala na bulume ne kutwajijila kwingijila Yehoba na lusekelo. (Sala. 18:28-32; 23:2) Po pamotu ne lelo jino, “na mambo a butemwe bwa Yehoba bubula kwaluka kechi twavila” byo tubena kupita mu meseko ne makatazho a mu bwikalo bwetu ne. (Jila. 3:22; Kolo. 1:11) Javula bumi bwa kwa Davida bwaikalanga mu kizumba, kabiji wajinga na balwanyi bavula bajinga bingi na bulume. Nangwa byonkabyo, kumutemwa kwi Yehoba kwamulengelanga kumvwa kuzhikijilwa. Mu makatazho onse o apitangamo, Davida wayukile’mba uji ne Yehoba kabiji kino kyamutekeneshanga bingi. O ene mambo o aimbijile’mba: “[Yehoba] wampokolwele ku bintu byonse byangubishenga moyo.” (Sala. 34:4) Pa bimye bimo Davida waumvwanga bingi moyo. Pano bino, kuyuka’mba Yehoba wamutemwa kwamulengelanga kuleka kumvwa moyo. w24.01 30 ¶15-17

Funjilaiko ku bintu byatama byafumine mu kubula kufuukula bulongo kwa kwa Yehoashi. Ñanga Mukatampe aye Yehoyada byo afwile, Yehoashi wasajile balunda batama bamulengejile kutendeka kuba bintu byatama. (2 Moba 24:17, 18) Waumvwijile baana ba bamfumu ba mu Yuda babujile kutemwa Yehoba. Ne anweba mwaswa kuba’mba Yehoashi kechi wafwainwe kutwajijila kupwanañana na bano bantu ne, mambo bajinga na byubilo byatama. Nangwa byonkabyo, Yehoashi watwajijiletu kupwanañana nabo. Muvyala wanji aye Zekaliya byo amolweleko, Yehoashi wafuukwilepo kumwipaya. (2 Moba 24:20, 21; Mat. 23:35) Kintu kyo aubile kyatamine bingi. Patanshitu, Yehoashi wajinga muntu wawama. Pano bino, waalukile ke nsatuki kabiji mbanzhi. Kyapeleleko, bamwingilo banji bamwipayile. (2 Moba 24:22-25) Bwikalo bwanji bwafwainwe kuwama inge watwajijile kumvwina Yehoba ne bakalume banji. w23.09 9 ¶6

Yesu wayukile’mba mutumwa Petelo ukatwajijila kwikala wa kishinka. Onkao mambo, Yesu waambijile Petelo amba “kileke kuba moyo.” Yesu kechi wazhinaukilenga Petelo ne. Kino kyalengejile Petelo kwingila bulongo. Palutwe kacheche, Petelo ne Andeleo balekele busulu bwa kukwata masabi ne kutendeka kwingijila pamo ne Yesu mu mwingilo wanji. Kabiji Yehoba wibapesheshe bingi. (Mako 1:16-18) Petelo wafunjijileko bintu byavula bingi kwi Kilishitu byo ajinga mwananji wa bwanga. Wimwenejile mwine Yesu byo abukilenga bantu bakolelwe, byo apanganga bandemona ne kusangulatu bantu bafwa. (Mat. 8:14-17; Mako 5:37, 41, 42) Petelo wamwene kimwesho kya Mfumu wa mu Bufumu bwa Lesa aye Yesu. Kabiji kechi walubilemo kino kintu ne. (Mako 9:1-8; 2 Pe. 1:16-18) Onkao mambo, Petelo wamwene bino byonse mambo wajinga mwana wa bwanga wa kwa Yesu. Watemenwe bingi kuba’mba walekele kwizhachisha kabiji wamwenejilemo byawama. w23.09 21 ¶4-5

Mu nkalata yanji itanshi, mutumwa Petelo waingijishe byambo bya kuba’mba kutemwa “na muchima yense.” Butemwe bwa uno mutundu “buvweta pa mambo avula.” (1 Pe. 4:8) Kampe Petelo wavulukile pa bya mufunjishe Yesu pa kulekelako bakwabo mambo. Pa kyokya kimye kyamweka Petelo walangulukilenga’mba wajinga bingi na lusa byo aambile’mba wakonsha kulekelako mambo mulongo wanji “jitanu na jibiji.” Bino Yesu wafunjishe kulekelako bakwabo mambo “bimye 77,” ko kuba’mba kwakubula pa kupelela. Ne atweba byo byo twafwainwa kubanga. (Mat. 18:21) Inge kimukatazha kulondela luno lujimuno, kange mulefulwe ne. Atweba bonse bapopweshi ba Yehoba pa bimye bimo kitukatazha bingi kulekelako bakwetu mambo. Nangwa byonkabyo, twafwainwa kwibikangako kulekelako bakwetu mambo ne kupwana nabo. w23.09 29 ¶12

Kimye kyo ajinga munda mwa jisabi, Yona wajinga na luketekelo lwa kuba’mba Yehoba usakumvwa lulombelo lwanji lwa kukeba kulapila lo alombele kufuma panshi ya muchima ne kushiinwa’mba Yehoba usakumukwasha. Palutwe kacheche, Yona byo bamupulwishe, waswile kuya na kwingila mwingilo Yehoba ye amupele. (Yona 2:10–3:4) Inge mubena kupita mu makatazho, nanchi mwikala na bijikila bingi kya kuba mwakankalwa ne kulomba bulongo kwi Yehoba nyi? Abya mukooka bingi kya kuba kemukankalwe kufunda Mambo a Lesa nyi? Vulukainga kuba’mba Yehoba wayuka makatazho enu onse o mubena kupitamo. Onkao mambo, nangwatu inge mwalomba mu byambotu bicheche, mwafwainwa kushiinwa’mba ukemupa byonse byo mukeba. (Efi. 3:20) Umvwe mwakankalwa kutanga Baibolo nangwa kufunda na mambo a kukolwa, kukooka nangwa bijikila, mwafwainwa kuteleka ku Baibolo ne mabuku alumbulula Baibolo o bakopela mu mawi. Kabiji mwakonsha kuteleka ku nyimbo yetu ne mavidyo aji pa jw.org. Yehoba ukeba bingi kwimukosesha kabiji uba bino inge mwalomba kwi aye. Kepo kebakebai mikumbu ya milombelo yenu mu Baibolo ne mu mabuku etu. w23.10 13 ¶6; 14 ¶9

Jishinda jo balengejilemo tente wa lusambakeno mukachi jo jishinda jintutu jimo jo bashimikijilengamo ne mazubo a Lesa mu Yelusalema. Mukachi mwajinga bibamba bibiji ko kuba’mba “Mwazhila” ne “Mwazhijisha,” kabiji pakachi kabyo pajinga kipembe. (Hebe. 9:2-5; Lupu. 26:31-33) Mu kibamba kya mwazhila mwajinga kya kutulapo malampi kya ngolode, kya kusokelapo bya kufutumuna ne tebulu wa bashinkwa. Bañanga “bo bashingile manyi” bo bonkatu bo baswishishe kutwela Mwazhila na kwingila mingilo yabo yazhila. (Bala. 3:3, 7, 10) Mu kibamba kya Mwazhijisha mwajinga jikwachi ja ngolode ja lulayañano jamwesheshenga amba Yehoba uji monka. (Lupu. 25:21, 22) Ñanga mukatampe ye yenkatu wapitayilanga kipembe ne kutwela Mwazhijisha mu Juba ja Kufuchilamo Mambo pa mwaka pa mwaka. (Levi 16:2, 17) Watwelangamo na mashi a banyama o alambulanga pa mambo anji mwine ne pa mambo a bantu ba mu kisaka kyonse. Pa kupitapo kimye, Yehoba wasolwele patoka bino bintu byajinga mu tente wa lusambakeno byo byaimenejilengako.—Hebe. 9:6, 7. w23.10 27 ¶12

Mambo a Lesa aambapo javula pa “kwitemwa atwe bene na bene.” (Yoa. 15:12; Loma 13:8; 1 Tesa. 4:9; 1 Pe. 1:22; 1 Yoa. 4:11) Kafwako muntu nangwa umo wakonsha kwibumona butemwe ne, mambo muntu mwine ye umvwa inge uji na butemwe nangwa ne. Onkao mambo, bakwetu bakonsha kuyuka byepi amba twibatemwa? Byo twamba ne byo tuba byo bikamwesha’mba twibatemwa. Twakonsha kumwesha butemwe balongo ne banyenga mu mashinda avula bingi. Bino byo bintu bimo byo twakonsha kuba: “Saka mwamba bya kine mu lwenu.” (Zeka. 8:16) “Kwikala mu mutende anwe bene na bene.” (Mako 9:50) “Ikalainga batanshi kunemeka bakwenu.” (Loma 12:10) “Itambwilainga anwe bene na bene.” (Loma 15:7) ‘Ilekelaingako mambo anwe bene na bene.’ (Kolo. 3:13) “Isendelaingako anwe bene na bene bintu bimunemena.” (Nga. 6:2) “Itekeneshainga anwe bene na bene.” (1 Tesa. 4:18) “Ikomeshainga anwe bene na bene.” (1 Tesa. 5:11) “Kwilombelako anwe bene na bene.”​—Yako. 5:16. w23.11 9 ¶7-8

Pa juba pa juba twafwainwa kumweshanga’mba tuji na lwitabilo lwakosa mu bintu byo tufuukulapo kuba nabiji kusala balunda, bya kisangajimbwe, sukulu, masongola, kwikala na baana ne nkito. Twafwainwa kwishikisha’mba: ‘Nanchi bintu byo mfuukulapo kuba bimwesha’mba nji na luketekelo lwa kuba’mba mpelo ya buno bwikalo ijitu pepi kabiji katatakatu Lesa akalule ino ntanda ke ipya nyi? Inyi nguba bintu byubapo bantu bimwesha’mba kechi baji na luketekelo lwa kwikala myaka ne myaka nenyi?’ (Mat. 6:19, 20; Luka 12:16-21) Umvwe twakosesha lwitabilo lwetu mu mulaye wa kuba’mba ntanda ipya ijitu pepi, tukafuukulanga bintu bulongo. Inge twaikala na lwitabilo lwakosa twakonsha kuchinchika makatazho nabiji kumanyikwa, kukolwa kikola kikatampe nangwa bintutu bikwabo byakonsha kwitulengela kulefulwa. Patanshi twakonsha kuchinchika ano makatazho. Pano bino makatazho a uno mutundu akonsha kutwajijila pa kimye kyabaya. Onkao mambo, twafwainwa kwikala na lwitabilo lwakosa pa kuba’mba tuchinchike ne kutwajijila kwingijila Yehoba na lusekelo.​—1 Pe. 1:6, 7. w23.04 27 ¶4-5

Yehoba ukeba atweba kubapo bintu bimo pa byo twalomba. Mulongo wakonsha kulomba kwi Yehoba kuba’mba amukwashe kutambula luusa ku mukulumpe wanji wa nkito pa kuba’mba akatanwe ku kushonkena. Yehoba wakonsha kukumbula byepi? Wakonsha kukwasha uno mulongo kuchinchika pa kuba’mba esambe na mukulumpe wanji wa nkito. Bino uno mulongo wafwainwa kuya ku mukulumpe wanji wa nkito ne kumubuula. Kabiji wakonsha kuba bino bimye byavula. Kimo kimye wakonsha kwisamba na mukwabo kuba’mba bepimpule moba a kwingila. Nangwa wakonsha kutambula moba a kubula kwingila kwakubula kumufolesha mali. Yehoba ukeba atweba kutwajijila kulomba kwakubula kuleka. Yesu walumbulwilenga’mba bintu bimo byo tulomba kechi bakonsha kwitupa ponkapotu ne. (Luka 11:9) Onkao mambo, kechi mwafwainwa kuleka kulomba ne! Lombainga kufuma panshi ya muchima kabiji kwakubula kuleka. (Luka 18:1-7) Inge twauba bino, kimwesha’mba kintu kyo tubena kulomba kyanema bingi kabiji tumwesha kuba’mba twaketekela’mba uketukwasha. w23.11 22 ¶10-11

Yehoba walayile mulunda nanji Abalahama amba bisaka byonse bya bantu biji pano pa ntanda bakebipesha kupichila mu mwananji. (Nte. 15:5; 22:18) Na mambo a kuba’mba Abalahama wajinga na luketekelo lwakosa mwi Lesa, washiinwe kuba’mba mulaye wa Lesa kine ukafika. Nangwa byonkabyo, Abalahama wafikizhe myaka 100 ne mukazhanji naye myaka 90, pano bino, bano ba mulume ne mukazhi ba kishinka kechi baikele na mwana ne. (Nte. 21:1-7) Nangwa byonkabyo, Baibolo waamba’mba: “[Abalahama] wajinga na luketekelo ne lwitabilo lwa kuba’mba ukekala shabo bisaka bya bantu byavula monka mwayijile kyo baambile.” (Loma 4:18) Bintu byaketekejilemo Abalahama byafikile. Wasemene mwana wamulume aye Izaka, ye atengejilenga pa myaka yavula. Ñanyi kintu kyalengejile Abalahama kushiinwa’mba Yehoba ukafikizha mulaye wanji? Na mambo a kuba’mba Abalahama wajinga na bulunda bwakosa ne Yehoba, ‘washiinwe’mba akya Lesa kyo alayile’ ukekyuba. (Loma 4:21) Yehoba waubijile bibusa Abalahama ne kumutela’mba waoloka na mambo a lwitabilo lwanji.​—Yako. 2:23. w23.12 8 ¶1-2

Mulongo mwanyike waketekelwa wingila bulongo mingilo yo bamupa. Akilangulukai pa byaingilanga Yesu. Waingilanga mingilo yanji bingi bulongo kwakubula mulele. Kabiji waingilanga mingilo yanji yo bamupele kwi Yehoba nangwa kikatazhepotu byepi. Watemenwe bingi bantu kikatakata baana banji ba bwanga kabiji wibafwijile. (Yoa. 13:1) Londelainga Yesu ne kwingila na ngovu mingilo yonse yo bemupa. Inge kechi mwayuka bya kwingila bulongo mwingilo ye bemupa ne, ipelulai ne kwipuzha balongo bayuka kwingila bulongo yewo mwingilo pa kuba’mba bemukwashe. Kange mwingilenga mingilo kikulutu amba mwaingila ne. (Loma 12:11) Pa kuba mwafwainwa kwingila bulongo ne kwiipwisha. Kabiji mwafwainwa kumwesha’mba mubena kwingijila “Yehoba, kechi bantu ne.” (Kolo. 3:23) Nangwa byonkabyo, mwafwainwa kuyuka’mba kechi mwalumbuluka ne. Onkao mambo, kyawama kwipelula ne kuswa kwimukwasha inge mwabula kwingila bulongo.​—Maana 11:2. w23.12 26 ¶8

Kituletela bingi lusekelo inge twabatizhiwa ne kwikala mu kisemi kya Yehoba. Kwikala mu kino kisemi kwitulengela kwikala balunda ne Yehoba. Kino kitulengela kumvwa byonka byaumvwine nyimbi wa Salamo aye Davida waambile’mba: “Ye mwine wa lusekelo ye musala ne kumuleta kwipi kuba’mba ekale mu bipango byenu.” (Sala. 65:4) Yehoba kechi uswisha muntu ujitu yense kwiya mu bipango byanji ne. Usala boba bamwesha’mba bakeba kwikala na bulunda bwakosa ne aye. (Yako. 4:8) Inge mwipana kwi Yehoba ne kubatizhiwa, mwafwainwa kushiinwa kuba’mba ‘ukemwitulwila mapesho avula kya kuba kechi mukakajilwa kintu nangwa kimo ne.’ (Mala. 3:10; Yele. 17:8) Kubatizhiwa yo ntendekelotu ya mwingilo wenu wa kwingijila Yehoba. Mwafwainwa kwibikako kwikela monka mwayila kwipana kwenu kwi Yehoba nangwatu mubena kupita mu meseko nangwa mu bya malwa. (Sapwi. 5:4, 5) Byo muji mwana wa bwanga wa kwa Yesu, mwafwainwa kulondelanga byaubanga Yesu ne kukookela mikambizho yanji.​—Mat. 28:19, 20; 1 Pe. 2:21. w24.03 8 ¶1-3

Mwafwainwa kuba byepi umvwe anweba ne benakwenu kechi mwikalapo na kimye kya kwikala pamo ne? Mwakonsha kuba byepi? Langulukai pa mujilo. Mujilo kechi ufikenatu kubaya aku mumwambulatu ne. Mwafwainwa kutwajijila kusonselapo pa kuba’mba ateemenga. Nanchi ne anweba kechi mwakonsha kutendeka kwikalako pamo kimye kicheche pa juba pa juba nenyi? Pa tubimye twa uno mutundu, mwafwainwa kubanga bintu byo mwatemwa anweba bonse babiji. (Yako. 3:18) Umvwe ke mube bino, butemwe bo mwitemwa bukabayilangako pachepache. Mushingi ukebewa bingi mu masongola. Mushingi uji nobe mwela ulengela mujilo kuteema. Kwa kubula uno mwela, mujilo wakonsha kuzhima bingi bukiji. Kyo kimotu, baji mu masongola inge kechi babena kwipa mushingi ne, butemwe bwabo bwakonsha kutendeka kukepa. Pakuba ba mulume ne mukazhi bebikako kwimwesha mushingi, butemwe bwabo butwajijilatu na kubayilako. Nangwa byonkabyo, vulukainga kuba’mba benakwenu bafwainwa kuyuka kuba’mba mwibapa mushingi, kechi kulangulukatu anweba bene amba mwibapa mushingi ne. w23.05 22 ¶9; 24 ¶14-15

Mu Baibolo muji bantu ba Lesa ba kishinka baamba pa bimye byo bapichilenga mu makatazho ne kumvwa moyo na mambo a kwibakatazha ku balwanyi babo ne bintu bikwabo. (Sala. 18:4; 55:1, 5) Ne atweba kampe tubena kupita mu meseko pa sukulu, pa nkito, mu kisemi nangwa ku kafulumende. Nangwa kampe twakonsha kukolwa bingi ne kumvwa moyo amba tusakufwa. Mu bimye bya uno mutundu, twakonsha kukankalwa ne bya kuba. Yehoba wakonsha kwitukwasha byepi mu makatazho a uno mutundu? Witutekenesha ne kwitusangajika. Isambainga ne Yehoba mu lulombelo ne kutanga Mambo anji kimye kyonse. (Sala. 77:1, 12-14) Onkao mambo, inge muji na bijikila kintu kitanshi kyo mwafwainwa kuba ke kulomba kwi Shenu wa mwiulu. Mubuulai Yehoba bijikila byenu ne bintu bibena kwimulengela kumvwa moyo. Mutelekai kupichila mu kutanga mambo anji kabiji ukemutekenesha.​—Sala. 119:28. w24.01 24-25 ¶14-16

Kyanema bingi kwikala na kizaku pa kuba’mba mufikizhe kikonkwanyi kyenu. Inge mwaikala na kizaku ne kukebesha kufikizha kikonkwanyi kyenu, mukengilanga bingi na ngovu. Inge twaikala na kizaku, tukafikizha bikonkwanyi byo twibikila. Onkao mambo, mwafwainwa kuba byepi pa kuba’mba mutwajijile kwikala na kizaku? Lombainga pa kuba’mba mutwajijile kwikala na kizaku. Yehoba ukengijisha mupashi wanji wazhila kwimukwasha kufikizha kikonkwanyi kyenu. Bimye bimo twibikila bikonkwanyi na mambo a kuba’mba kyo kintu kyo twafwainwa kuba, kabiji kyawama bingi kuba bino. Pano bino, kampe kechi twakonsha kwikala na kizaku kya kwibifikizha ne. Langulukainga pa bintu bimubila Yehoba. (Sala. 143:5) Mutumwa Paulo walangulukilenga pa lusa lukatampe Yehoba lo amumwesheshe, kabiji kino kyamulengejile kwikala na kizaku kya kwingila mwingilo wa Yehoba. (1 Ko. 15:9, 10; 1 Timo. 1:12-14) Ne anweba inge ke mulanguluke languluke pa bimubila Yehoba, mukekala na kizaku kya kufikizha bikonkwanyi byenu.​—Sala. 116:12. w23.05 27 ¶3-5

Tutokesha Shetu wa mwiulu inge ketutote jizhina janji. (Sala. 119:108) Nanchi kino kibena kulumbulula’mba Lesa wa bulume bonse uji nobe bantu bambulwa kulumbuluka bakeba kwibatota na mambo a kukeba’mba bebatundaike nyi? Ine. Inge ketutote Shetu wa mwiulu, tumwesha’mba bintu bikwabo byaambile Satana pe atweba bonse pa muntu pa muntu bya bubela. Satana wamba’mba kafwako muntu nangwa umo wakonsha kuzhikijila jizhina ja Lesa mu bukishinka ne. Kabiji wamba’mba kafwako muntu wakonsha kwikala wa kishinka kwi Lesa inge bamweseka ne. Wamba’mba atweba bonse twakonsha kusatukila Lesa inge ketulanguluke’mba tukamwenamo mu kuba bino. (Yoba 1:9-11; 2:4) Pano bino, Yoba wajinga wa kishinka kabiji wamwesheshe’mba byaambilenga Satana byajinga bya bubela. Nanchi ne anweba mwakonsha kutwajijila kwikala ba kishinka nyi? Atweba bonse pa muntu pa muntu twakonsha kuzhikijila jizhina ja Shetu wa mwiulu ne kumutokesha ku muchima inge twatwajijila kumwingijila mu bukishinka. (Maana 27:11) Kinetu, kino ke kintu kyanema bingi kyo twafwainwa kuba atweba bonse. w24.02 8-9 ¶3-5

Mosesa ne Yoshua byo bafwile, Yehoba watongwele bamitonyi bakutangijila bantu banji. Kabiji mu moba a bamfumu, Yehoba watongwele bangauzhi ba kutangijila bantu banji. Bamfumu ba kishinka balondejilenga bibabuujilenga bangauzhi. Nabiji Mfumu Davida waswile byo bamolweleko kwi ngauzhi Natana. (2 Sam. 12:7, 13; 1 Moba 17:3, 4) Mfumu Yehoshafwata walondelanga byamubuulanga Yahaziela kabiji watundaikanga bantu ba mu Yuda “kuketekela bangauzhi ba [Lesa].” (2 Moba 20:14, 15) Byo bapichilenga mu makatazho, Mfumu Hezekiya walombele bukwasho kwi ngauzhi Isaya. (Isa. 37:1-6) Kimye kyonse bamfumu kyo balondelanga lutangijilo lwa Yehoba, bebapeshanga kabiji kisaka nakyo kyazhikijilwanga. (2 Moba 20:29, 30; 32:22) Kyamweka Bantu bashiinwe’mba Yehoba waingijishenga bano bangauzhi kutangijila bantu banji. w24.02 21 ¶8

Satana ukeba’mba tupwanañanenga na bantu bakonsha kwitulengela kulala mizhilo ya Yehoba. Twafwainwa kuvulukanga’mba kechi tupwanañanatu na bantu bo tumona kilungi na kilungi ne, bino mwavwangwa kupwanañana ne na boba bo twisamba nabo pa foni nangwa pa Intaneti. Twafwainwa kukaana ndangulukilo yatama ya bantu ba mu ino ntanda bamba’mba byubilo byatama bijitu bulongo. Twayukishatu bulongo kuba’mba ndangulukilo ya uno mutundu yatama. (Efi. 4:19, 20) Twafwainwa kwiipuzha’mba: ‘Nanchi nkebesha kuchinuzhuka kupwanañana na bantu bo ñingila nabo, bo mfunda nabo ku sukulu nangwa bantutu bakwabo babula kunemeka mizhilo ya Yehoba nyi? Nanchi nchinchika ne kulondela mizhilo ya Yehoba nangwa kya kuba bamo bakonsha kutendeka kuñendeleka nyi?’ Byonka byaamba 2 Timoti 2:20-22, twafwainwa kujimuka bingi pa kusala balunda netu nangwatu mu kipwilo. Twafwainwa kuvulukanga’mba bamo kechi bakonsha kwitukwasha kutwajijila kwingijila Yehoba mu bukishinka ne. w24.03 22-23 ¶11-12

Nanchi mwakifwanyikizhapo kala Yehoba byo aji nyi? Yehoba kechi twakonsha kumumona ne. Pano bino, Baibolo wamulumbulula mu mashinda apusana pusana. Yehoba bamutela’mba “jo juba jetu kabiji jo jikebo jetu,” kabiji amba “mujilo usokañana.” (Sala. 84:11; Hebe. 12:29) Mu kimwesho kyo amwene, Ezikyo walumbulwile Yehoba amba uji nobe jibwe ja safila, kyela kibekauka ne kyeya kyamwekelenga nobe kakongolo. (Ezi. 1:26-28) Na mambo a kuba’mba kechi tumumona Yehoba ne, kyakonsha kwitukatazha bingi kuswa kuba’mba witutemwa. Bamo balanguluka’mba Yehoba kechi wakonsha kwibatemwa ne, na mambo a bintu byatama byo bapichilemo mu bwikalo bwabo. Yehoba wayuka byo tumvwa ku muchima ne byo kyakonsha kwitukatazha kufwenya kwipi ne aye. Pa kuba’mba etukwashe kuyuka byo aji, witubuula kupichila mu Mambo anji kuba’mba ye Lesa wa kifyele. Butemwe kyo kyambo kilumbulula bulongo Yehoba byo aji. (1 Yoa. 4:8) Baibolo waamba’mba Lesa butemwe. Butemwe bo bumulengela kuba bintu byonse byo oba. Butemwe kyo kyubilo kikatampe kimulengela kubila byawama bantu bonse, bamutemwa ne babula kumutemwa.​—Mat. 5:44, 45. w24.01 26 ¶1-3

Yehoba watongwele Mosesa kutangijila bena Isalela kufuma mu Ijipita kabiji waubilepo kintu kimo kyo aingijishe ke jikumbi jaimenenga mulumbulumbu kimye kya mute ne mujilo waimenenga mulumbulumbu kimye kya bufuku. (Lupu. 13:21) Mosesa walondejilenga jikumbi ne mujilo byaimenenga mulumbulumbu kumutangijila aye ne bena Isalela ku Kalunga Kachila. Bena Isalela baumvwine bingi moyo byo bamwene’mba bebashinkila pakachi ka Kalunga Kachila ne nzhita ya bena Ijipita ibapupijilenga. Bino Mosesa kechi walubankenye ne. Yehoba mwine ye watangijilenga bantu banji kwibatwala ku Kalunga Kachila kwingijisha Mosesa. (Lupu. 14:2) Nangwa byonkabyo, Yehoba wibapokolwele mu jishinda ja kukumya bingi. (Lupu. 14:26-28) Pa myaka 40, Mosesa watwajijile kulondela jikumbi jaimenenga mulumbulumbu kutangijila bantu ba Lesa mu kiselebwa. (Lupu. 33:7, 9, 10) Mu jikumbi, Yehoba waambile ne Mosesa kabiji Mosesa waambijile bantu byamubuujile Yehoba. Bena Isalela bamwene bintu byafwainwe kwibalengela kushiinwa’mba Yehoba wibatangijilenga kwingijisha Mosesa. w24.02 21 ¶4-5