May

Bena Kilishitu batanshi nabo bapichile mu kipowe kya nzala kikatampe kyaishile “pano pa ntanda ponse” ne. Kyamweka bansemi baakaminwe bingi pa byo bafwainwe kumwenanga kajo ba mu bisemi byabo. Bansongwalume ne bansongwakazhi bakonsheshe kusapwila byepi bulongo? Nanchi balangulukilenga’mba bafwainwe kupembelela kufikatu ne kipowe byo kikapwa nyi? Nangwa kya kuba bapichilenga mu bino bintu, bena Kilishitu bayukile mwakubila. Batwajijile kusapwila mu mashinda apusana pusana kabiji bapeelengapo balongo ne banyenga bajinga mu Yuda bintu byabo. (Byu. 11:29, 30) Byo batambwijilenga bukwasho kufuma ku balongo ne banyenga bemwenejile Yehoba byo ebakwashishenga. (Mat. 6:31-33) Bulunda bwabo bwakosele bingi na balongo ne banyenga bebakwashishenga. Kabiji bantu bapainenga bupe nangwa baingijilenga mwingilo wa kukwasha bakajilwe, bajinga bingi na lusekelo lufuma mu kupana.​—Byu. 20:35. w23.04 16 ¶12-13

Kimo kimye, Yehoba wingijisha bantu babula kwitabila kukumbula milombelo ya bapopweshi banji. Waingijishe mfumu Atazakeshi kuswisha Nehemiya kuba’mba abwele ku Yelusalema na kukwasha kushimukulula muzhi. (Ne. 2:3-6) Ne mu ano moba, Yehoba wakonsha kwingijisha bantu babula bapopweshi banji kwitukwasha inge twakajilwa. Milombelo yetu kechi ikumbulwa mu mashinda a kukumya ne. Bino mikumbu ya ino milombelo itukwashatu kwikala ba kishinka kwi shetu wa mwiulu. Onkao mambo, yukainga Yehoba byo akumbula milombelo yenu. Kimye kyonse twafwainwa kulangulukanga pe Yehoba byo akumbula milombelo yetu. (Sala. 66:19, 20) Lwitabilo lwetu lwitulengela kulomba kwi Yehoba ne kuswa kuba’mba Yehoba ukumbula milombelo yetu.​—Hebe. 11:6. w23.05 11 ¶13; 12 ¶15-16

Umvwe twipana kwi Yehoba, tumulaya’mba ye yenkatu ye tukapopwelanga kabiji tukobanga kyaswa muchima wanji. Twafwainwa kulama uno mulaye ye twalayile Yehoba. Kabiji kechi kyakatazha kuba bino ne, mambo Yehoba witulengele’mba tubenga kyaswa muchima wanji. (Lum. 4:11) Yehoba witulengela na muchima wa kukeba kumuyuka ne kumupopwela, kabiji witulengele mu kipasha kyanji. Onkao mambo, tufwenya kwipi ne aye ne kusekela mu kuba kyaswa muchima wanji. Umvwe ketube kyaswa muchima wa Lesa ne kuba byaubilenga Mwananji ‘tukakokoloka.’ (Mat. 11:28-30) Ubainga bintu bikemukwasha kutemwa bingi Yehoba nabiji kulanguluka languluka pa bintu byawama byo emubila ne bintu byawama byo akemubila kulutwe. Umvwe mwatemwa Lesa kikemupeelela bingi kumukookela. (1 Yoa. 5:3) Yesu waubilenga kyaswa muchima wa Lesa mambo walombelenga kwi Yehoba kumukwasha kabiji watele muchima pa mfweto yanji. (Hebe. 5:7; 12:2) Lombainga kwi Yehoba kuba’mba emukoseshe byonkatu Yesu byo aubilenga ne kulanguluka langulukanga pa luketekelo lwa kukekala myaka ne myaka. w23.08 27-28 ¶4-5

Atweba bonse twatemwa bantu batekanya. Tunemeka bingi bantu batwajijila na kupembela nangwa kya kuba kyo baketekejilenga kyabanda kufika. Tusanchila bingi bakwetu betutekenya inge twibalubankanya. Kabiji tusanchila bingi betufunjishanga Baibolo mambo betutekenyejile inge twabula kukwatakanya bukiji byo twafunjilenga ne kwibingijisha. Kyakila pa byonse, tusanchila bingi Yehoba Lesa pa byo etutekenya. Nangwa kya kuba tukeba bakwetu kwitutekenya, kimye kimo tukankalwa kutekanya mu bintu bimo nabiji inge twakelwa tuji mu motoka bino kulutwe yetu kuji myotoka ibena kwenda pachepache nangwa inge bakwetu betuzhingijisha. Kabiji kimo kimye kitukatazha bingi kutwajijila kupembelela kufika kwa milaye ya Yehoba. Nangwa byonkabyo, twafwainwa kutekanya mu bino bintu byonse. w23.08 20 ¶1-2

Yehoba waambijile Gidiona kuba’mba abuule banabalume bavula kubwelamo ku mazubo abo. Kampe wakonsheshe kulanguluka’mba: ‘Luno lupimpu luketukwasha nyi? Lwakonsha kwingila nyi?’ Nangwa byonkabyo, Gidiona wakookejile. Ano moba bakulumpe mu kipwilo nabo bakookela bibabuula jibumba ja Lesa byonka byaubile Gidiona. (Hebe. 13:17) Gidiona wakookejile Yehoba nangwatu mu kimye kyo aubile moyo ne kwingila mwingilo wabikile bumi bwanji mu kizumba. (Mito. 9:17) Yehoba byo amulayile kuba’mba ukamukwasha, Gidiona washiinwe’mba Lesa ukamukwasha kuzhikijila bantu banji. Bakulumpe mu kipwilo bekala mu mapunzha mo bakanya mwingilo wa kusapwila boba byonka byaubile Gidiona. Bebikako bingi kutangijila kupwila ne mwingilo wa kusapwila nangwatu inge bebambila’mba basakwibakwata, kwibatotolwesha, kwibapanga nkito nangwa kwibamanyika. Mu kimye kya malwa akatampe, bakulumpe mu kipwilo bakebikangako kukookela mikambizho yonse yo bakebambilanga nangwatu inge yakatazha kwiilondela. w23.06 5-6 ¶12-13

Yehoba walengejile jishimikila ja kwa Ñanga Mwine Mukatampe aye Yehoyada kunembwa mu Baibolo pa kuba’mba tufunjileko. (Loma 15:4) Yehoyada bamunemekele mambo byo afwile, “bamuzhiikile mu Muzhi wa Davida konka ko bazhiikile bamfumu, mambo waubile bintu byawama mu Isalela kwi Lesa wa kine ne ku nzubo yanji.” (2 Moba 24:15, 16) Jishimikila ja kwa Yehoyada jitukwasha atweba bonse kwikala na moyo wa kwakamwa Lesa. Bakulumpe mu kipwilo bakonsha kuba byaubile Yehoyada inge saka bamonapo mashinda a kuzhikijilamo balongo ne banyenga. (Byu. 20:28) Bakulumpe bakonsha kufunjilako kwi Yehoyada kuba’mba, inge saka bakamwa Yehoba ne kutwajijila kwikala ba kishinka, ukebakwasha kuba kyaswa muchima Wanji. Banyike bakonsha kufunjilako kwi Yehoba byo aubile kwi Yehoyada ne kunemeka balongo ne banyenga bakulumpe byonka Yehoba byo ebanemeka kikatakata aba bamwingijila myaka yavula. (Maana 16:31) Twayai tutwajijile kutundaika ‘babena kwitutangijila’ ne kwibakookela.—Hebe. 13:17. w23.06 17 ¶14-15

Pa kupwila, ingijishai milangwe inge mukeba kuyuka bimye binga byo mwafwainwa kukumbulapo. Umvwe ke tusuntule maboko bimye byavula, twakonsha kulengela ubena kutangijila kutongolangatu atweba nangwa kya kuba bakwetu kechi bakikumbulapo ne. Kino kyakonsha kulengela bakwetu kuleka kusuntula maboko. (Sapwi. 3:7) Umvwe basapwishi bavula basuntula maboko kimye kya lufunjisho, kechi twafwainwa kusuntula’mba kanatu twambepo byonka byo tukelwa kuba ne. Kimo kimye utangijila kechi wakonsha kwitutongola kimye kyonse kyo twasuntula ne. Kino kyakonsha kulengela twalefulwa. Bino kechi twafwainwa kuzhingila inge kya kuba kechi betutongolapo ne. (Sapwi. 7:9) Umvwe kechi kyakonsheka kukumbulapo bimye byavula ne, mwafwainwa kutelekesha mikumbu ya bakwenu ne kwibasanchila pa mikumbu yabo inge mwapwisha kupwila. Balongo ne banyenga batundaikwa bingi umvwe mwibasanchila byonkatu byo mwakonsha kwibatundaika inge yenu mwaji kukumbula. w23.04 23-24 ¶14-16

Fundainga Mambo a Lesa ne kulanguluka langulukapo. Kichi kikosa bingi inge kyatwala mizhazhi panshi pene. Ne atweba inge twaikala na lwitabilo lwakosa mwi Yehoba, tukatwajijila kushikimana. Kichi inge kibena kukoma mizhazhi itwajijila kuya panshi pene ne kutaaba. Ne atweba umvwe saka tufunda ne kulanguluka langulukapo, tukosesha lwitabilo lwetu kabiji tushiinwa’mba mashinda a Lesa o awama. (Kolo. 2:6, 7) Vulukainga mikambizho, maana ne luzhikijilo lwa Yehoba byo byakwashishe bakalume banji ba kala. Ezikyo wateleko muchima malaika byo apiminenga nzubo ya Lesa yo amwene mu kimwesho. Kino kimwesho kyamukoseshe bingi Ezikyo, kabiji kino kimwesho kitufunjisha byavula pa byo twafwainwa kukookela mafunde a Yehoba aamba pa bupopweshi bwa kine. (Ezi. 40:1-4; 43:10-12) Ne atweba tumwenamo inge twafunda ne kulanguluka languluka pa bintu byanema biji mu Mambo a Lesa. Twafwainwa kwikala na muchima washikimana ne kuketekela mwi Yehoba na muchima yense.​—Sala. 112:7. w23.07 18 ¶15-16

Mu Baibolo muji banyike bavula bo mwakonsha kufunjilako. Bano banabalume batemenwe bingi Lesa kabiji baingijilenga bulongo mingilo ya kukwasha bantu ba Lesa. Kabiji mwakonsha kutaana banabalume bena Kilishitu bakwabo baji na bulunda bwakosa ne Yehoba mu kisemi kyenu ne mu kipwilo. (Hebe. 13:7) Kabiji mwakonsha kufunjila ne kwi Yesu Kilishitu. (1 Pe. 2:21) Pa kufunda pa bano banabalume, langulukai pa byubilo byawama byo bajinga nabyo. (Hebe. 12:1, 2) Kabiji fuukulai ne kumona mashinda mo mwakonsha kwibalondela. Muntu uji na maana a kupima bintu ulangulukapo bulongo pa bintu saka akyangye kufuukula bya kuba. Onkao mambo, ibikaiko pa kuba’mba mwikale na ano maana a kupima bintu. Patanshi mwafwainwa kulanguluka pa mafunde a mu Baibolo ne kulanguluka pa byo akonsha kwimukwasha. Kyalondelapo, mwafwainwa kwingijisha ano mafunde pa kufuukula bintu bitookesha Yehoba ku muchima. (Sala 119:9) Kwingijisha mafunde a mu Baibolo kukemukwasha kwikala banabalume bena Kilishitu baji na bulunda bwakosa ne Yehoba.​—Maana 2:11, 12; Hebe. 5:14. w23.12 24-25 ¶4-5

Bansemi bafwainwa kufunjisha baana babo bya kukumbula bulongo inge bakwabo bebepuzha pa byo baitabilamo. (Yako. 3:13) Pa kupopwela kwa kisemi, bansemi bafwainwa kwisambangapo na baana ne kumwesha byo bafwainwa kuba bino. Mwafwainwa kwisamba nabo pa bintu byo bafwainwa kwibepuzha ku sukulu, kumwesha byo bafwainwa kukumbula ne kwibafunjisha kukumbula bulongo ne kukooka muchima. Pa kupopwela kwa kisemi, mwakonsha kwisamba ne kumwesha byafwainwa kuba baana benu. Kuba bino, kukebakwasha kushiinwa ne kulumbulwila bulongo bakwabo bintu byo baitabilamo. Pa jw.org pa kipungu kya kuba’mba “Banyike Bepuzha’mba” paji ne mapepala a kunembapo banyike. Abino bebinengezha kukwasha banyike kushiinwa na byo baitabilamo ne kwibakwasha kuyuka bya kukumbula mu byambo byabo. Kwisamba pa ino mitwe mu kisemi kuketukwasha atweba bonse kwamba pa byo twaitabilamo saka twatekanya kabiji mu jishinda jawama. w23.09 17 ¶10; 18 ¶15-16

Nanchi mwakibikilapo kala kikonkwanyi mu mwingilo wa Lesa bino mwakankalwa kwikifikizha nyi? Inge ibyo, kechi yenu bonka ne. Philip wakebelenga kuwamishako milombelo yanji ne kulombanga bimye byavula, bino kyamukatezhenga kutaana kimye kya kulomba. Erika wibikijile kikonkwanyi kya kufika bukiji ku kusambakana kwa kuya mu mwingilo, pano bino, wakelwanga javula. Inge muji na kikonkwanyi kyo mwabula kufikizha, kechi mwafwainwa kulefulwa ne. Nangwatu kikonkwanyi kicheche kikebewa kimye ne kwingila na ngovu. Kukebesha kufikizha kikonkwanyi kyenu kumwesha’mba mwanemeka bingi bulunda bwenu ne Yehoba kabiji mukeba kumupa byawamisha. Yehoba wanemeka bingi byo mwibikako. Kabiji kechi ukeba anweba kuba byakila pa bulume bwenu ne. (Sala. 103:14; Mika 6:8) Onkao mambo, mwafwainwa kwibikila kikonkwanyi kyo mwafwainwa kufikizha. w23.05 26 ¶1-2

Bantu bachinchika bapita mu bintu bibalengela kwikala na moyo. Nangwa byonkabyo, kechi baleka kuba kyawama na mambo a bino bintu byo bapitamo ne. Danyela wajinga nsongwalume wachinchikile bingi. Watanganga byanembele bangauzhi ba Lesa, kubikako ne bungauzhi bwa kwa Yelemiya. Na mambo a kuba bino, Danyela wayukile bulongo amba, Bayudea katatakatu bafume mu buzha mu Babilona. (Da. 9:2) Danyela wimwenejile kufika kwa bungauzhi bwa Yehoba kabiji kino kyamulengejile kuketekala mwi Yehoba. Bonse baketekela mwi Lesa bachinchika bingi. (Esakanyaiko Loma 8:32, 37-39.) Kintu kikwabo Danyela kyo aubanga ke kulomba kwi Shanji wa mwiulu kimye kyonse. (Da. 6:10) Inge walubankanya, wabulanga Yehoba byonse byajinga ku muchima ne kulomba lulekelo lwa mambo. Kabiji walombanga kwi Lesa amba amukwashe. (Da. 9:4, 5, 19) Byonkatu byo tuji, Danyela kechi wasemekelwepo na kyubilo kya kuchinchika ne. Waikele na kino kyubilo na mambo a kutanga, kulomba ne kuketekela mwi Yehoba. w23.08 3 ¶4; 4 ¶7

Inge ketukookele bakulumpe balama kyalo, tumwenamo atweba bene ne bakwetu pamo. Mu ñanyi jishinda? Kitanshi, tuchinuzhuka kwitukambula inge twabula kukookela mizhilo. (Loma 13:1, 4) Umvwe ketukookele bakulumpe balama kyalo, bantu bakamona’mba Bakamonyi ba kwa Yehoba ke bantu ba lukookelo bingi. Myaka yavula yapitapo bashilikale mu Nigeria batwelele mu Nzubo ya Bufumu balongo ne banyenga saka babena kupwila. Bakebelenga bantu bakainenga kupana misonko. Bino mukulumpe wa bashilikale wakambizhe bashilikale kulupuka mu Nzubo ya Bufumu. Waambile’mba: “Bakamonyi ba kwa Yehoba kimye kyonse bapana misonko.” Inge kemukookele mizhilo kino kikakwasha bantu kuyuka’mba Bakamonyi ba kwa Yehoba ke bantu ba lukookelo. Inge kemube bino mukalengela balongo ne banyenga kuzhikijilwa. w23.10 9 ¶13

Bantu ba Yehoba bamo bapembelela mpelo ya buno bwikalo myaka yavula bingi. Bantu bamo balanguluka kuba’mba mpelo ya buno bwikalo yabanda bingi. Yehoba wayuka bilanguluka bantu banji. O ene mambo o ambijile ngauzhi Habakuka amba: “Kino kimwesho kibena kupembelela kimye kyakyo kyatongolwa, kabiji kibena kupelawizha kwiya amba kifike ku mpelo yakyo, kabiji kechi kikabula kufika ne. Nangwa kya kuba kyabanda, wikitengelenga! Mambo kwa kubula nangwa kuzhinauka ne, kikafika. Kechi kikakelwa ne!” (Ha. 2:3) Nanchi byambo byaambile Lesa byafwainwe kukwashatu Habakuka nyi? Nanchi bino byambo byakonsha kwitukwasha ne atweba nyi? Yehoba waambijile mutumwa Paulo kubuula bena Kilishitu bino byambo batengejilenga ntanda ipya. (Hebe. 10:37) Onkao mambo, inge tubena kulanguluka’mba mulaye wa Yehoba wa kwitupokolola wabanda kufika, twafwainwa kushiinwa’mba “kwa kubula nangwa kuzhinauka ne, kikafika. Kechi kikakelwa ne!” w23.04 30 ¶16

Bena Isalela bavula bakainenga’mba Yehoba kechi waingijishenga Mosesa kwibatangijila ne. (Bala. 14:10, 11) Pa bimye byavula, bena Isalela bakainenga’mba Yehoba kechi watongwele Mosesa kwibatangijila ne. Na mambo a kino, Yehoba kechi waswishishe bena Isalela bavula kutwela mu Ntanda ya Mulaye ne. (Bala. 14:30) Nangwa byonkabyo, bena Isalela bamo balondejile lutangijilo lwa Yehoba. Yehoba waambilepo pa muntu umo amba: “Kaleba . . . Wandondejilenga na muchima yense.” (Bala. 14:24) Lesa wapesheshe Kaleba kabiji wamuswishishe kusala mpunzha yo akebelenga kwikalamo mu Kenana. (Yosh. 14:12-14) Kabiji kisaka kya bena Isalela kyalondejilepo nakyo kyalondejile lutangijilo lwa Yehoba. Yoshua byo bamutongwele kuswana pe Mosesa ne kwikala ntangi wa bena Isalela, “bamunemekele bingi moba onse a bumi bwanji.” (Yosh. 4:14) Na mambo a kino, Yehoba wibapesheshe ne kwibalengela kutwela mu ntanda yo ebalayile.​—Yosh. 21:43, 44. w24.02 21 ¶6-7

Byonkatu dokotala byo apima mashi mu mubiji wetu pa kuba’mba ayuke inge muchima ujitu bulongo, ne atweba twakonsha kuyuka’mba twatemwa Lesa inge twatwajijila kutemwa bakwetu. Inge twamona’mba kechi twatemwa balongo ne banyenga byonka bo twibatemenwe kala ne, kino kimwesha’mba twaleka kutemwa Lesa byonka byo twamutemenwe kala. Bino inge twatwajijila kutemwa balongo ne banyenga, po po tukayuka’mba twatwajijila kutemwa Lesa. Inge twaleka kutemwa balongo ne banyenga byonka byo twibatemenwe kala, twafwainwa kuyuka’mba luno ke lukatazho lukatampe bingi. Mambo ka? Mambo bulunda bwetu ne Yehoba buji mu kizumba. Mutumwa Yoano waamba pa kino kishinka amba: “Awa wabula kutemwa mulongo wanji ye amona na meso, kechi wakonsha kutemwa Lesa ye abula kumona ne.” (1 Yoa. 4:20) Ñanyi kintu kyo tubena kufunjilako ku kino? Tukatookeshatu Yehoba ku muchima inge ‘ketwitemwe atwe bene na bene.’​—1 Yoa. 4:7-9, 11. w23.11 8 ¶3; 9 ¶5-6

Bashanji Yehoashi byo bafwile saka akijitu mwanyike, Ñanga Mukatampe aye Yehoyada ye wamukomeshe ne kumufunjisha pe Yehoba. Yehoashi wajinga bingi na maana mambo walondelanga bintu byo bamufunjishe kwi Yehoyada. Na mambo a byaubile Yehoyada, Yehoashi wafuukwilepo kwingijila Yehoba ne kukwasha bantu nabo kutendeka kumwingijila. Kabiji wanengezhe ne kuba’mba Nzubo ya Yehoba beiwamishe. (2 Moba 24:1, 2, 4, 13, 14) Inge bansemi benu nangwa bantutu bakwabo babena kwimufunjisha kutemwa Yehoba ne mizhilo yanji, yukai’mba babena kwimupa bupe bwanema bingi. (Maana 2:1, 10-12) Bansemi bakonsha kwimufunjisha mu mashinda apusana pusana. Bansemi benu bakatemwa bingi inge mwaingijisha byo bemubuulako kufuma mu Baibolo. Kyakila pa byonse, musangajika Yehoba ne kwikala na bulunda bwakosa ne aye. (Maana 22:6; 23:15, 24) Nanchi bino kechi byafwainwa kwimulengela kutendeka kuba bintu byaubilenga Yehoashi byo ajinga mwanyike nenyi? w23.09 8-9 ¶3-5

Yehoba witulaya’mba uteleka ku milombelo yetu. Lesa wetu watemwa bingi bapopweshi banji ba kishinka. Onkao mambo, ukatelekanga ku milombelo yabo. (Sala. 10:17; 37:28) Nangwa byonkabyo, kino kechi kibena kulumbulula’mba aye uketupa bintu byonse byo tumulomba ne. Twafwainwa kupembelela ne kuketekela’mba bintu bimo byo tumulomba uketupabyo mu ntanda ipya. Yehoba ulanguluka pa kyaswa muchima wanji pa kuba’mba akumbule milombelo yetu. (Isa. 55:8, 9) Ukeba’mba ino ntanda, mukekalenga bantu bonse bakamukookelanga. Bino Satana wamba’mba bantu bakonsha kwikala ba lusekelo inge kebebalame ku bantu bakwabo. (Nte. 3:1-5) Pa kuba’mba Yehoba amweshe’mba byamba Satana bya bubela, waswisha makafulumende a bantu kulama bantu bakwabo. Nangwa byonkabyo, bukalama bwa bantu bo bubena kulengela makatazho avula bingi abena kupitamo bantu lelo jino. (Sapwi. 8:9) Twayuka kuba’mba Yehoba kechi ukapwisha ano makatazho onse lonka luno ne. w23.11 21 ¶4-5

Abalahama byo afikizhe myaka 100 ne Sala myaka 90, mulaye ye bamulayile wa kwikala na baana kechi wakifikile ne. Kwesakana na bimona bantu, kyamwekelenga nobe Abalahama ne Sala kechi bakonsha kwikala na mwana ne. Kino kyakonsheshe kumukatazha bingi Abalahama kuswa. Nangwa byonkabyo, “wajinga na luketekelo ne lwitabilo lwa kuba’mba ukekala shabo bisaka bya bantu byavula.” (Loma 4:18, 19) Ne kya kine, kintu kyo aketekejilenga kyafikile. Wasemene Izaka mwana ye apembejile pa myaka yavula bingi. (Loma 4:20-22) Twakonsha kwitabilwa kwi Lesa ne kwikala balunda nanji byonka byajinga Abalahama. Abino byo byaambilepo ne Paulo byo anembele’mba: “Byambo bya kuba’mba, ‘bamutelele’mba,’ kechi bebinembejiletu aye yenka ne, bino ne na mambo a atweba bo bakatela’mba twaoloka, na mambo a kuba twaitabila mu yewa wasangwile Yesu.” (Loma 4:23, 24) Byonka byajinga Abalahama, ne atweba twafwainwa kwikala na lwitabilo, kwingila mingilo yawama ne kuketekela kuba’mba Yehoba ukafikizha milaye yanji. w23.12 7 ¶16-17

Inge makatazho o mubena kupitamo abena kwimuletela moyo, yukai’mba Yehoba wayuka makatazho o mubena kupitamo ne bijikila byo muji nabyo. Yehoba wamwene bena Isalela byo bamanaminenga mu Ijipita ne “makatazho o [bapichilengamo].” (Lupu. 3:7) Kimye kimo inge mubena kupita mu makatazho kyakonsha kwimukatazha kuyuka inge Yehoba ubena kwimukwasha. Umvwe byo byo kiji, lombai pa kuba’mba muyuke inge ubena kwimukwasha. (2 Mfu. 6:15-17) Kepo mulanguluke pa ano mepuzho: Nanchi jashi nangwa mikumbu ya balongo ne banyenga mu kipwilo imukosesha nyi? Abya buku, vidyo nangwa nyimbo yetu ikwabo imutundaika nyi? Nanchi kujipo mulongo nangwa nyenga wimutundaika kwingijisha binembelo nyi? Twakonsha kulubamo bitutundaika balongo ne banyenga mu kipwilo ne bintu byo tutanga mu Mambo a Lesa byo bitukwasha. Ano ke mashinda onse Yehoba o engijisha kwitutundaikilamo. (Isa. 65:13; Mako 10:29, 30) Kabiji amwesha’mba Yehoba kine wituta muchima. (Isa. 49:14-16) Kabiji abino byonse bitulengela kutwajijila kumuketekela. w24.01 4-5 ¶9-10

Yesu saka akyangye kubwela mwiulu, wavulwilemo baana banji ba bwanga mwingilo ye ebapele wa kusapwila “mu Yelusalema, monse mu Yudea ne mu Samaliya, ne monse mwapela ntanda.” (Byu. 1:8; Luka 24:46-48) Palutwe kacheche, bantangi ba Bayudea bakwachile batumwa abo ba Petelo ne Yoano ne kwibatwala ku Saniedilini. Bakambizhe bano banabalume ba kishinka kuleka kusapwila kabiji bebachiinye. (Byu. 4:18, 21) Petelo ne Yoano baambile’mba: “[Anweba] bene chibilai mo mwalangulukila, umvwe kyawama kwimumvwina anweba, kukila kumvwina Lesa. Pakuba atweba kechi twakonsha kuleka kwamba pa bintu byo twamwene ne kumvwa ne.” (Byu. 4:19, 20) Petelo ne Yoano byo bebakasulwile, baana ba bwanga balombele kwi Yehoba kuba’mba ebakwashe kuba kyaswa muchima wanji. Yehoba wakumbwile lulombelo lwabo.​—Byu. 4:31. w23.05 5 ¶11-12

Yehoba ne Mwananji baikala pamo myaka yavula bingi ya kukankalwa kubala kukila bilengwa byonse. Pa myaka yavula yo baikele pamo mwiulu, baikele na bulunda bwakosa bingi. Yehoba wamwesheshe’mba watemwa bingi Yesu byonka byaamba kinembelo kya lelo. Yehoba inge wakebelenga inge waambiletu’mba: ‘Uno ye muntu mo mmwena lusekelo.’ Pano bino byo akebelenga kuba’mba tuyuke’mba watemwa bingi Yesu, wamutelele amba “Mwanami ye natemwa.” Yehoba wasekejile mwi Yesu ne mu mwingilo ye amupele. (Efi. 1:7) Yesu kechi wazhinaukanga pa butemwe bwajinga na Bashanji pe aye ne. Wayukile kufuma panshi ya muchima kuba’mba Bashanji bamutemenwe bingi. Wabwezhezhe bwezhezhengapo kwamba’mba Bashanji bamutemenwe bingi.​—Yoa. 3:35; 10:17; 17:24. w24.01 28 ¶8

Fwanyikizhai kino: Muntu ye mwaketekela wasampanya bintu byatama bingi pe anweba. Anweba bene mwayuka’mba bintu byo abena kusampanya bya bubela. Pano bino, bantu bamo bebitabila’mba bya kine. Kabiji bano bantu nabo batendeka kusampanya byobyo bintu bya bubela ne kulengela bantu bakwabo bavula kwibitabila’mba bya kine. Kino kyakonsha kwimulengela kumvwa byepi ku muchima? Kwa kubula nangwa kuzhinaukatu ne bino byambo bya bubela byo basampanya pe anweba bikemulengela kumvwa kutama ku muchima. Akino kyo twafwanyikizha kyakonsha kwitukwasha kuyuka Yehoba byo aumvwine ku muchima kimye kyo batamishe jizhina janji. Malaika umo waambijile mwanamukazhi mutanshi aye Evwa bintu bya bubela pe Yehoba. Evwa waitabijile bintu bya bubela byaambile malaika. Buno bubela bwalengejile bansemi betu batanshi kusatukila Yehoba. Kyafuminemo, bundengamambo ne lufu byakumbene ku bantu bonse. (Nte. 3:1-6; Loma 5:12) Makatazho o tubena kumona mu ntanda lelo jino nabiji lufu, makondo ne lumanamo aiyako na mambo a bubela Satan bo asampanya. Nanchi Yehoba umvwa kutama ku muchima na mambo a buno bubela ne bintu byatama byafumamo nyi? Ee, umvwa kutama ku muchima. Nangwa byonkabyo, Yehoba kechi wazhingijile kya kuba keakebe ne kushinkanya ponkapotu ne. Aye watwajijila kwikala “Lesa wa lusekelo.”​—1 Timo. 1:11. w24.02 8 ¶1-2

Mwakonsha kulondela byepi byaubile Yosefwa inge mwaesekwa? Mwakonsha kufuukwila jimo lonka luno byo mwafwainwa kuba inge mwaesekwa. Kanainga ponkapotu kuba bintu byashikwa Yehoba ne kubula kutwajijila kulangulukapo. (Sala. 97:10; 119:165) Kuba bino kukemulengela kubula kulenga mambo inge mwaesekwa. Kampe mwashiinwa kuba’mba mwataana bukine ne kuba’mba mukeba kwingijila Yehoba na muchima wenu yense, pano bino, kuji kintu kimo kibena kwimulengela kukankazhama kwipana ne kubatizhiwa. Inge ibyo, mwakonsha kulondela byaubile Mfumu Davida. Mwafwainwa kusashijila Yehoba amba: “Anweba Lesa, nkebakebai ne kuyuka muchima wami. Mpimapimai ne kuyuka milanguluko yami yankatazha. Monai mwi amiwa inge mujipo kyatama, ne kuntangijila mu jishinda ja myaka ne myaka.” (Sala. 139:23, 24) Yehoba upesha boba “bamukebesha.” Kuba bintu bikemulengela kwipana kwi Yehoba ne kubatizhiwa kumwesha’mba mubena kumukebesha.​—Hebe. 11:6. w24.03 6 ¶13-15

Ñanga mukatampe waimenangako bantu kwi Lesa. Ñanga mukatampe mutanshi wa bena Isalela aye Alona bamutongwele kwi Yehoba kimye kyo bapaine tente wa lusambakeno. Nangwa byonkabyo, kwesakana na byalumbulwile mutumwa Paulo, “bantu bavula baswainenga pa buñanga mambo lufu lwibalengejilenga kubula kwikala myaka ne myaka.” (Hebe. 7:23-26) Kabiji na mambo a kuba’mba bano bañanga bakatampe bajinga bambulwa kulumbuluka, bapananga bitapisho pa mambo a mambo abo. Paji bingi lupusano pakachi ka bañanga bakatampe ba bena Isalela ne ñanga mwine mukatampe aye Yesu Kilishitu. Yesu Kilishitu Ñanga wetu Mukatampe ke “wa mwingilo . . . wa tente wa kine, ye apopele Nkambo, kechi bantu ne.” (Hebe. 8:1, 2) Paulo walumbulwile’mba ‘na mambo a kuba’mba [Yesu] wikala myaka ne myaka, kafwako nangwa umo wakonsha kuswana pa buñanga bwanji ne.’ Kabiji Paulo wanungilepo’mba Yesu ‘kechi wazhilululwa ne, wapusana na bandengamambo’ kabiji aye byo apusanako na bañanga bakatampe ba bena Isalela, “kechi wafwainwa kutapisha bitapisho pa juba pa juba” bya mambo anji ne. w23.10 26 ¶8-9

“Jiulu ja kala” jilumbulula makafulumende a bumulwila ntanda atangijilwa na Satana ne bandemona. (Mat. 4:8, 9; 1 Yoa. 5:19) Kyambo kya “ntanda” kyo baingijisha mu Baibolo kyakonsha kulumbulula bantu bekala pano pa ntanda. (Nte. 11:1; Sala. 96:1) Onkao mambo, “ntanda ya kala” ilumbulula bantu boba byatama ano moba. Yehoba kechi ukawamishatu jiulu ne ntanda bijiko lelo jino ne, bino ukebyonaunatu pelu. Kepo akapingizhapo “jiulu jipya ne ntanda ipya,” ko kuba’mba kafulumende mupya ukalamanga bantu baoloka. Yehoba ukalengela ntanda ne bantu kwikala ke bipya. Kino kibena kulumbulula’mba Yehoba ukawamisha ntanda ne kulengela bantu kwikala ke balumbuluka. Byonka Isaya byo aambijile jimo, Yehoba ukalengela ino ntanda kwikala yawama byonka byajinga bujimi bwa Edena. Yehoba uketulengela kwikala ke bapya nangwa kwitubwezha byonka byo kyajinga kala byo aketubuka atweba bonse pa muntu pa muntu. Balemana, bampofu ne bashinka matwi bonse bakebabuka. Bafu nabo bakebabwezha kwikala ke bomi.​—Isa. 25:8; 35:1-7. w23.11 4 ¶9-10

“Malwa akatampe” akatendekatu nobe mu kukopa kwa jiso. (Mat. 24:21) Malwa akatampe akapusana bingi na malwa akwabo mambo twayukila jimo kuba’mba akamweka, kechi aketubazhimuna ne. Myaka 2,000 yapitapo, Yesu wajimwineko baana banji ba bwanga kwinengezhezha jimo ku jino juba. Umvwe twinengezhezha jimo kiketukwasha kuchinchika mu kimye kya malwa akatampe ne kukwasha bakwetu nabo kuchinchika. (Luka 21:36) Twafwainwa kuchinchika pa kuba’mba tukookele Yehoba ne kuketekela’mba uketuzhikijila. Twafwainwa kuba byepi inge bintu bimo nangwa bintu byonse bya balongo ne banyenga yetu byaonaika? (Ha. 3:17, 18) Kwibobila kifyele kuketulengela kwibakwasha. Ñanyi kintu kyo tukoba inge bisaka bya bantu bikakwatankana pamo bitulukuka kabiji kino kyalengela ke twikale pamo na balongo ne banyenga yetu? (Ezi. 38:10-12) Twafwainwa kwibatemwa bingi pa kuba’mba baketukwashe mu kimye kyakatazha. w23.07 2 ¶2-3

Bena Kilishitu baji mu masongola bakonsha kufunjilako byavula ku ba mulume ne mukazhi bo banemekele bingi ku bena Kilishitu batanshi bavula. Bano ba mulume ne mukazhi bajinga ba Akwila ne Pilisila. (Loma 16:3, 4) Bino baubilanga bintu pamo, nabiji kwingijila pamo mingilo, kusapwila, ne kukwasha bakwabo. (Byu. 18:2, 3, 24-26) Kabiji ponse Baibolo po aamba pe Akwila ne Pilisila, wibatongola bonse babiji. Baji mu masongola bakonsha kufunjilako ka ku byo baubanga? Langulukai pa bintu byavula byo mwafwainwa kuba anweba pamo na benakwenu. Nanchi kechi mwakonsha kwingijila pamo mingilo nenyi? Akwila ne Pilisila baingijilanga pamo mwingilo wa kusapwila. Nanchi ne anweba byo byo muba nyi? Kabiji Akwila ne Pilisila baingijilanga pamo nkito. Anweba ne benakwenu kampe kechi mwingila nkito imo ne, bino nanchi kechi mwakonsha kwingijila pamo mingilo ya pa nzubo nenyi? (Sapwi. 4:9) Inge ke mwingijile pamo mingilo imo, mukakwatankana kabiji mukekalanga na kimye kya kwisamba. w23.05 22-23 ¶10-12

Pa bimye bimo atweba bonse tumvwa moyo. Mfumu Saulo byo apangilenga Davida ne kukeba kumwipaya, Davida wanyemejile mu Gata mu muzhi wa bena Filishitiya. Mfumu wa Gata aye Akishi, wayukile’mba Davida wajinga kiyangala ye batakaikilenga mu lwimbo amba waipaya bena Filishitiya “makumi a biumbi.” Kino kyalengejile Davida “kumuchiina bingi” Akishi. (1 Sam. 21:10-12) Waakaminwe pa bisakumuba Akishi. Pano ñanyi kintu kyakwashishe Davida? Salamo 56, wamwesha Davida byo aumvwinenga ku muchima kimye kyo ajinga mu Gata. Uno Salamo waamba pa byalengejile Davida kumvwa moyo kabiji walumbulula ne kyamukwashishe kuleka kumvwa moyo. Davida byo aumvwine moyo waketekejile mwi Yehoba. (Sala. 56:1-3, 11) Kuketekela mwi Yehoba kwamukwashishe bingi. Na bukwasho bwa Yehoba, Davida walangulukilepo jishinda jimo jamukwashishe bingi: Wibepekezhe nobe mukonye. Kabiji na mambo a kino, Akishi kechi wamwipayile ne, wafuukwilepo kumupanga. Onkao mambo, Davida wapulukile.​—1 Sam. 21:13–22:1. w24.01 2 ¶1-3

Bañanyi bo baambapo mu kinembelo kya lelo? Bano ke bashingwa bo basangula. Onkao mambo, kimye bashingwa bashalapo baji pano pa ntanda kyo bakebasenda kuya mwiulu kwipi na mpelo ya malwa akatampe, mwingilo mutanshi ye bakengila ke wa kulwa nkondo. Inge bebasangula kuya mwiulu, abo pamo ne Kilishitu ne bamalaika banji bazhila bakalwa nkondo ikapelako na balwanyi ba Lesa. Akilangulukai pa kino. Bena Kilishitu bashingwa bamo bakiji pano pa ntanda bakoma kala kabiji bulume bwabo bubena kuya na kupwa. Pano bino inge bebasangula kuya mwiulu, bakekala bilengwa bya mupashi biji bingi na bulume bibula kufwa, kabiji bakalwa nkondo pamo na Kilobo Mfumu wabo aye Yesu Kilishitu. Inge nkondo ya Amagedonyi yapwa, bakengijila pamo ne Yesu kukwasha bantu kwikala balumbuluka. Kwakubula nangwa kuzhinaukatu ne, byo bakekala mwiulu, bakobila balongo ne banyenga pano pa ntanda bintu byavula byawama bingi byo babujile kwibobila kimye kyo bajinga pano pa ntanda saka baji bambulwa kulumbuluka. w24.02 6-7 ¶15-16

Bamo batwajijila kukankazhama nangwa kya kuba benengezha kwipana ne kubatizhiwa. Bakonsha kebalanguluke’mba inge nabatizhiwa kampe nkalenga mambo akatampe ne kumpanga mu kipwilo. Umvwe byo byo mulanguluka, yukai’mba Yehoba ukemukwasha ‘kwenda monka mo akebela mwa kumutookeshesha ku muchima.’ (Kolo. 1:10) Kabiji ukemupa ne bulume bwa kuba byaoloka mambo wakwashapo kala bantu bavula kuba byaoloka. (1 Ko. 10:13) Kino kyo kintu kimo kilengela bavula kubula kwibapanga mu kipwilo. Yehoba ukwasha bantu banji pa kuba’mba batwajijile kwikala ba kishinka. Atweba bonse twi bambulwakulumbuluka kabiji twesekwa kuba byatama. (Yako. 1:14) Nangwa byonkabyo, kiji kwi anweba bene kufuukulapo kyo mwakonsha kuba inge mwalefulwa. Kishinka ke kya kuba’mba anweba bene yenu muji na bulume bwa kwifuukwila byo mwafwainwa kuba. Bantu bamo bakana’mba atweba bonse kechi tuji na bulume bwa kuchinuzhuka kuba byatama ne. Pano bino, kechi byo byo kiji ne. Mwakonsha kufunda bya kwikanya ku milanguluko ne byubilo byatama. w24.03 5 ¶11-12