December

Nanchi Yehoba uji na bulume bwa kusangula bafwa nyi? Ee. Mambo ye wa “Bulume bonse.” (Lum. 1:8) Onkao mambo, uji bingi na bulume bwa kuzhiisha balwanyi banji bonse kubikapotu ne lufu. (1 Ko. 15:26) Kishinka kikwabo kya kuba’mba Lesa ukasangula bafwa kitulengela kuyuka’mba Yehoba uji bingi na bulume bwa kusangula bafwa. Aye utela tubangabanga tonse pa mazhina. (Isa. 40:26) Kabiji uvuluka bonse bafwa. (Yoba 14:13; Luka 20:38) Uvuluka bishinka byonse pa bantu bo akasangula, kubikapotu ne byo bamwekanga ne byubilo byo bajinga nabyo, bintu byo bapichilemo mu bwikalo ne milanguluko yabo. Twaketekela kuba’mba kulutwe na lwendo Yehoba ukasangula bafwa, mambo twayuka kuba’mba ukebesha kabiji uji bingi na bulume. Twayai twisambe pa kishinka kikwabo kyakonsha kwitulengela kuketekela mulaye wa Lesa wa lusanguko: Yehoba wasangulapo kala bantu bafwile. Kala kene, Yehoba walengejile banabalume ba kishinka kuvwangakotu ne Yesu kusangula bafwa. w23.04 9-10 ¶7-9

Inge twakooka muchima ne kuyuka mwakukumbwila bulongo, bantu bakakebanga kuteleka ne kutwajijila kwisamba nabo. Inge muntu waimenatu pa kupachika nangwa ubena kwitwendeleka, kechi twafwainwa kutwajijila kwisamba nanji ne. (Maana 26:4) Bino bantu bavula kechi bapachika ne, javula bateleka. Tumwenamo bintu byawama bingi inge twatwajijila kwikala bakooka muchima. Onkao mambo, lombainga kwi Yehoba kwimupa bulume bwa kwimukwasha kwikala bakooka muchima pa kukumbula mepuzho akatazha nangwa inge bantu bemwambila byatama. Vulukainga’mba inge mwaikala bakooka muchima, mukachinuzhukanga kwipachika na bantu. Kabiji inge mwakooka muchima ne kukumbula bulongo mukalengela bantu kupimpula byo balanguluka pe atweba ne pa bukine bwa mu Baibolo. ‘Inengezhezhainga jimo kimye kyonse mwa kwibakumbwila’ bemwipuzha pa byo mwaitabilamo. “Saka muba kino na kukooka muchima ne na mushingi mukatampe.” (1 Pe. 3:15) Twajijilai kwikala bakooka muchima. w23.09 19 ¶18-19

Akilangulukai pa ano mashinda ana mo tumweshesha’mba twatekanya. Kitanshi, muntu watekanya kechi uzhingila bukiji ne. Utekanya inge bakwabo bamuzhingijisha kabiji kechi ushinkanya inge bamukozha ku muchima ne. (Lupu. 34:6) Kya bubiji, muntu watekanya utwajijilatu na kupembelela. Muntu watekanya kechi utoñama nangwa kuzhingila inge kintu kyo apembelejilenga kyabanda kufika ne. (Mat. 18:26, 27) Kya busatu, muntu watekanya kechi uba bintu na kanswatu ne. Muntu watekanya inge ubena kukeba kufuukulapo kuba bintu bimo kechi upelawizha kuba byobyo bintu kwa kubula kulangulukapo ne. Umonapo kimye kya kulangulukilapo jimo pa bintu byo akeba kuba. Kabiji wikala na kimye kyawaina kya kubilamo byo afuukula. Kya buna, muntu watekanya uchinchika meseko kwakubula kwijizhañanya. Uta muchima pa bintu byawama byo abena kumona mu bwikalo bwanji. (Kolo. 1:11) Bantu ba Lesa bafwainwa kutekanya mu bino bintu byonse byo twaambapo. w23.08 20-21 ¶3-6

Kishinka kyanema kyafwainwa kwitulengela kuzhikijila muchima wetu wa kifwanyikizho ke kya kuba’mba Yehoba utalatala mu muchima wetu. Kino kibena kulumbulula’mba umona byakonsha kubula kumona bakwetu kabiji wayuka byo tuji. Lesa uketutemwa umvwe saka tulanguluka pa maana anji aketukwasha kwikala na bumi bwa myaka ne myaka. (Yoa. 4:14) Byubilo byatama, bubela bwa kwa Satana ne bantu babi kechi bakonauna bulunda bwetu ne Lesa ne. (1 Yoa. 5:18, 19) Inge twafwenya kwipi ne Yehoba tukamutemwa bingi kabiji tukamwakamwanga. Tukashikwa mulanguluko wa kumulenga mambo Shetu mambo kechi tukeba kumufichisha ku muchima ne. Nyenga Marta, wa ku Croatia waesekelwe’mba obe bulalelale wanembele’mba: “Kyankatezhe bingi kulanguluka bulongo kabiji nakebeshe kuba kyatama. Bino kwakamwa Yehoba kwanzhikijile.” Kwakamwa Lesa kwamuzhikijile byepi? Marta waambile’mba walangulukile langulukile pa bintu byafwainwe kufumamo inge wauba bulalelale. Ne atweba byo byo twafwainwa kuba. w23.06 20-21 ¶3-4

Yesu wayukile’mba kyaswa muchima wa Yehoba ke kuzhijika jizhina ja Lesa ne kufumyapo mwenge pa jizhina janji. O ene mambo, Nkambo yetu kyo afunjishishe baana banji ba bwanga kulomba’mba: “Tata wetu wa mwiulu, jizhina jenu jizhile.” (Mat. 6:9) Yesu wayukile’mba ano o mambo akatampe avwangamo bilengwa byonse. Kafwako kilengwa nangwa kimo kyazhijika jizhina ja Yehoba kwesakana na bijizhijika Yesu ne. Nangwa byonkabyo, Yesu bamukashile. Pano ñanyi mambo o alengele o bamukashijilepo ku balwanyi banji? Balwanyi banji baambilenga’mba waambilenga mwenga pa jizhina ja Shanji. Yesu wayukile’mba kwamba byatama nangwa kutamisha jizhina ja Shanji jazhila, ajinga mambo akatampe bingi. Yesu kyamukolele bingi ku muchima byo ayukile’mba bakamutotolwesha ne kumupamo mambo pa kuba bino. Kino kyo kintu kikatampe kyalengejile muchima wa kwa Yesu ‘kumukatazha’ byo kwashajiletu maola acheche kuba’mba bamukwate.​—Luka 22:41-44. w24.02 11 ¶11

Pa kuba’mba tunyeme bulongo kapela ka ku bumi, twafwainwa kutemwa Yehoba ne Yesu kukila byo twatemwa balongo betu. (Mat. 10:37) Nangwa byonkabyo, kino kechi kibena kulumbulula’mba kechi twafwainwa kuta muchima balongo betu ne. Tutookesha Yehoba ne Yesu ku muchima inge saka tutako muchima ku balongo betu. (1 Timo. 5:4, 8) Inge ke tube bino tukekala ba lusekelo. Yehoba wayuka’mba kisemi kikala kya lusekelo umvwe ba mulume ne mukazhi benemeka ne kwitemwa bene na bene, bansemi batemwa baana babo ne kwibafunjisha ne baana inge saka bakookela bansemi babo. (Efi. 5:33; 6:1, 4) Inge mwasongola nangwa kusongolwa nangwa mwi baana mwafwainwa kuketekela maana a mu Baibolo. Kechi kuketekelatu byo mubena kulanguluka’mba byawama nangwa’mba mambo bavula byo byo boba nangwa byo bimubuula bashayuka ne. Ingijishainga mabuku etu alumbulula Baibolo aamba pa bintu byawama byafwainwa kwimukwasha kwingijisha bulongo mafunde a mu Baibolo. w23.08 28 ¶6-7

Mwanamukazhi mwina Kilishitu wafwainwa kufundapo bintu bimo byakonsha kumukwasha. Mingilo imo mwanamukazhi yo afunda saka akiji mwanyike yakonsha kumukwasha mu bwikalo bwanji inge wakoma. Fundai kutanga ne kunemba bulongo. Mu bisho bimo, kutanga ne kunemba bekumona’mba kechi mingilo yanema yafwainwa kufunda banabakazhi ne. Nangwa byonkabyo, ino ke mingilo yanema bingi yafwainwa kufunda bena Kilishitu bonse. (1 Timo. 4:13) Onkao mambo, kange muswishe kintu nangwa kimo kwimulengela kuleka kufunda kutanga ne kunemba bulongo ne. Ñanyi bintu byawama byo mukamwenamo? Ino mingilo yakonsha kwimukwasha kutaana nkito. Kabiji ikemukwasha kufunda Baibolo bulongo ne kufunjisha bantu bakwabo. Ne kyakilamo kunema, kuba bino kukemulengela kufwenya kwipi ne Yehoba na mambo a kutanga Mambo anji ne kulanguluka langulukapo.​—1 Timo. 4:15. w23.12 20 ¶10-11

Lombainga kwi Yehoba kuba’mba emukwashenga kushinda meseko. Na mambo a kuba’mba twibambulwa kulumbuluka twafwainwa kwibikangako bingi kushinda bintu byakonsha kwitulengela kuba kintu kyatama. Satana ubena kwingila bingi na ngovu kwitulengela kukankalwa kushinda. Jishinda jimo jo engijisha ke bya kisangajimbwe byatama. Bino bya kisangajimbwe byatama byakonsha kwitulengela kwikala na milanguluko yatama. Kabiji ino milanguluko yakonsha kwitulengela kubula kwikala batoka kwi Yehoba ne kulenga mambo. (Mako 7:21-23; Yako. 1:14, 15) Twafwainwa kulomba Yehoba kuba’mba etukwashe pa kuba’mba tushinde meseko ne kubula kuba bintu byatama. Yesu byo afunjishenga pa lulombelo waambile’mba twafwainwa ne kusashijila’mba: “Tukwashai pa kuba’mba tubule kuponena mu lweseko, kabiji tupokololai kwi aye mubi.” (Mat. 6:13) Yehoba ukeba bingi kwitukwasha, pano bino twafwainwa kumulomba pa kuba’mba etukwashe. Umvwe twamulomba’mba etukwashe, twafwainwa kwibikako bingi kubula kubanga bintu byakonsha kwitulengela kuponena mu lweseko. w23.05 6-7 ¶15-17

Umvwe baji mu masongola banemeka bulunda bwabo na Shabo wa mwiulu, balondela lujimuno lwanji, kabiji luno lwibakwasha kuchinuzhuka ne kushinda makatazho akonsha kulengela butemwe bwabo kukepa. Kabiji bantu baji na bulunda bwakosa ne Yehoba, bebikako kulondela byubilo byanji, nabiji lusa, butekanye, ne kwilekelako mambo. (Efi. 4:32–5:1) Baji mu masongola inge kebamweshe bino byubilo, butemwe bo betemwa bukabaya. Nyenga wa jizhina ja Lena waikala mu masongola myaka kukila 25, waambile’mba, “kyapeela bingi kutemwa ne kunemeka muntu uji na bulunda bwakosa ne Yehoba.” Langulukai pa kyamwekele kyanembwa mu Baibolo. Yehoba pa kusala bantu bafwainwe kwikala bansemi ba kwa Mesiasa, wasajile Yosefwa ne Maliya bajinga ba mu kikota kya kwa Davida. Mambo ka? Mambo bajinga na bulunda bwakosa ne Yehoba, kabiji wayukile kuba’mba bakamutangizhako mu masongola abo. w23.05 21 ¶3-4

Yesu ye Ntangi wetu kabiji aye walumbuluka, pakuba bantu bo atongola kwitutangijila kechi balumbuluka ne. Kyakonsha kwitukatazha bingi kwibakookela, kikatakata inge betukambizha kuba kintu kyo tubena kubula kukeba. Mutumwa Petelo naye wakankazhamine kuba byo bamubuujile. Malaika byo amwambijile kuja banyama babiko bo bakainye mu Mizhilo ya Mosesa, Petelo wakainetu nsalansala bimye bisatu. (Byu. 10:9-16) Mambo ka? Mambo kechi wakwatakenye bulongo uno mukambizho ne. Pakuba mutumwa Paulo wakookejile bakulumpe ba mu Yelusalema byo bamukambizhe kusenda banabalume bana kuya nabo ku Yelusalema ku Nzubo ya Lesa pa kuba’mba bakebatokeshe pa kuba’mba amweshe’mba walondejilenga Mizhilo. Paulo wayukile kuba’mba bena Kilishitu balekele kulondela Mizhilo ya Mosesa kabiji kechi waubilepo kintu kyatama ne. Nangwa byonkabyo, Paulo “[Wayile] na bano banabalume pa juba jalondejilepo ne kwitokesha pamo ne abo monka mwayijile mizhilo.” (Byu. 21:23, 24, 26) Na mambo a kuba’mba Paulo wakookejile, kino kyalengejile balongo ne banyenga kukwatankana.​—Loma 14:19, 21. w23.10 10 ¶15-16

Kampe kechi mwakonsha kulanguluka’mba kwakamwa ke kyubilo kimo kyanema kikosesha bulunda ne. Bino, bantu bakeba kwikala balunda ne Yehoba bafwainwa ‘kumwakamwa.’ Nangwa kya kuba twaingijila Yehoba pa myaka yavula, atweba bonse twafwainwa kutwajijila kumwakamwa. Bino kwakamwa Lesa kulumbulula ka? Twakonsha kufunda byepi kwakamwa Yehoba? Muntu uji na moyo wa kwakamwa Lesa wamutemwa kabiji kechi ukeba kuba kintu kyakonsha konauna bulunda bwanji ne Aye ne. Yesu wajinga na uno moyo wa ‘kwakamwa Lesa.’ (Hebe. 5:7) Kechi wachinanga Yehoba nobe kijanyi ne. (Isa. 11:2, 3) Pakuba, wamutemenwe kabiji wakebanga kumukookela. (Yoa. 14:21, 31) Byonkatu byaubanga Yesu ne atweba tumunemeka Yehoba ne kumwakamwa mambo witutemwa, uji na maana, nchibamambo waoloka kabiji uji bingi na bulume. Kabiji twayuka’mba Yehoba witutemwa ne kuba’mba umvwa bingi bulongo inge ketulondele bintu byo etufunjisha. Umvwe ke tubule kumukookela tumukozha bingi ku muchima bino inge ke tumukookele tumusangajika bingi.​—Sala. 78:41; Maana 27:11. w23.06 14 ¶1-2; 15 ¶5

Mfumu Uzaya byo aikele na luusa lwa kulama walekele kusanchila Yehoba pa bintu byonsetu byawama byo amubijile. Tubena kufunjilako ka kwi Uzaya? Tuvulukenga kimye kyonse kuba’mba Yehoba ye witupa bintu byonsetu byawama byo tuji nabyo. Kabiji ye witukwasha mu mwingilo ye twingila. Kechi twafwainwa kwitotanga pa bintu byo tuba ne. Pakuba twafwainwa kusanchilanga Yehoba pa bintu byonsetu byo tuba. (1 Ko. 4:7) Twafwainwa kwipelula ne kuyuka’mba twibandengamambo kabiji tukeba kwitololako. Mulongo uji na myaka 60 wanembele’mba: “Kechi nafwainwa kuzhingila nangwa kulefulwa inge bakwetu bambuulako mo mbena kulubankanya ne. Inge bakwetu banjimunako pa byo natamisha, nebikako bingi kubula kubwezhapo pa kuba’mba ntwajijile kwingijila Yehoba na muchima yense.” Kishinka ke kya kuba’mba inge twakookela Yehoba ne kutwajijila kwipelula, tukekala bingi na lusekelo mu bwikalo bwetu.​—Maana 22:4. w23.09 10 ¶10-11

Bena Kilishitu batanshi bafwainwe kuchinchikanga. Bapichilenga mu makatazho apichilengamo bantu bakwabo bavula pa kyonkakya kimye. Na mambo a kuba’mba bajinga bena Kilishitu, bapichilengatu ne mu makatazho akwabo. Bavula bebamanyikilenga ku bantangi ba bupopweshi bwa Bayudea, bandama kyalo ba mu Loma ne ku bisemitu byabo. (Mat. 10:21) Kabiji bebikilengako bingi kubula kulondela mafunjisho a bantu basendukile mu lwitabilo bakebelenga kwabanya kipwilo. (Byu. 20:29, 30) Bano bena Kilishitu batwajijile kwikala ba kishinka. (Lum. 2:3) Ñanyi bintu byo baubile? Balangulukile pa bantu bashinjile meseko bo baambapo mu Binembelo nabiji Yoba. (Yako. 5:10, 11) Balombele kwi Lesa kuba’mba ebakoseshe. (Byu. 4:29-31) Kabiji balangulukilenga’mba Yehoba ukebapesha umvwe batwajijila kuchinchika. (Byu. 5:41) Ne atweba inge ketutange mashimikila a bantu bachinchikile o baambapo mu mambo a Lesa ne mu mabuku etu ne kulanguluka langulukapo tukachinchika meseko. w23.07 3 ¶5-6

Yehoba ne Yesu kechi baketusha ne. Mutumwa Petelo byo akaine Yesu, wafuukwilepo kintu kyanema bingi. Nanchi wafwainwe kutwajijila kwikala mwana wa bwanga wa kwa Kilishitu nyi, inyi wafuukwilepo kwikileka? Yesu walombejileko Petelo kwi Yehoba amba lwitabilo lwanji lutwajijile kukosa. Kabiji Yesu wabuujile Petelo pa luno lulombelo ne kuketekela’mba Petelo ukakosesha balongo banji. (Luka 22:31, 32) Kyamweka Petelo byo avulukile bino byambo bya kwa Yesu, kyamutundaikile bingi! Inge ke tufuukulepo kintu kyanema mu bwikalo, Yehoba uketukwasha kwingijisha bakafunga bawama mu kipwilo kwitutundaika kutwajijila kwikala ba kishinka. (Efi. 4:8, 11) Byonkatu Yehoba byo apeele bintu bya ku mubiji Petelo ne batumwa bakwabo, ne atweba uketumwena byo tukeba inge twatangizhako mwingilo wa kusapwila mu bwikalo bwetu. w23.09 24-25 ¶14-15

Yehoba umona byonse byawama byo tubila bakwetu nangwatu tuntu tucheche to twibobila. Umona’mba twauba kintu kyanema bingi kabiji twamukongwesha ye ukebafweta. Inge kala mwajinga bankwasho nangwa bakulumpe mu kipwilo, Yehoba uvuluka mingilo yenu yo mwaingijile myaka ya kala ne butemwe byo bwimulengejile kwingila mingilo yenu. (1 Ko. 15:58) Kabiji nangwatu luno umona byo mwatwajijila kumwesha butemwe ku bakwenu. Yehoba ukeba atweba bonse kutwajijila kumutemwa ne kutemwa bakwetu. Twafwainwa kutwajijila kutemwa Yehoba umvwe saka tutanga mambo anji, kulanguluka langulukapo ne kwisamba nanji mu lulombelo. Twafwainwa kutwajijila kumwesha’mba twatemwa balongo ne banyenga inge saka twibakwasha. Inge butemwe bwabaya, tukafwenya kwipi ne Yehoba ne ku balongo ne banyenga yetu. Kabiji tukekala balunda myaka ne myaka. w23.07 10 ¶11; 11 ¶13; 13 ¶18

Mwina Kilishitu yense wafwainwa kwifuukwila mwine jishinda ja kubukilwamo. Umvwe mwina Kilishitu wasala jishinda ja kubukilwamo wafwainwa kukookela mizhilo ya mu Baibolo yaamba pa kukana mashi ne bintu byo batapishisha bankishi. (Byu. 15:20; Nga. 5:19, 20) Nangwa byonkabyo, bonse bafwainwa kwisajila bene jishinda jo babena kukeba kwibabukilamo. Kampe twakonsha kushiinwa’mba jishinda jimo jawama kubukilwamo nangwa ne. Bino twafwainwa kunemeka luusa lwa balongo ne banyenga lwa kwisajila bene mashinda a kubukilwamo. Onkao mambo, twafwainwa kuvulukanga bino bishinka bina: (1) Bufumu bwa Lesa bo bonkatu bukabuka bantu kya kuba kechi bakakolwapo jibiji ne. (Isa. 33:24) (2) Mwina Kilishitu yense wafwainwa “kushiinwa” amba jishinda ja kubukilwamo jo asala jawama. (Loma 14:5) (3) Kechi twafwainwa kuzhachisha bakwetu pa byo bafuukulapo nangwa kuba kintu kyakonsha kwibatuntwisha ne. (Loma 14:13) (4) Bena Kilishitu bafwainwa kumwesha butemwe ne kuyuka’mba kyanema bingi bena Kilishitu bonse kukwatankana mu kipwilo kukila byanema milanguluko yetu.—Loma 14:15, 19, 20. w23.07 24 ¶15

Nanchi mwanemeka bulunda bwenu ne Yehoba nyi? Twaketekela kuba’mba mwibunemeka bingi. Kufumatu ne kala, bantu bavula banemeka bingi bulunda bwabo ne Yehoba. (Sala. 104:33, 34) Bantu bavula bepana kupopwela Yehoba. Abino byo byaubile ne bena Isalela ba kala bo batelanga’mba Banazili nangwa bantu bepana kwingila mwingilo wanema. Banazili bajinga bena Isalela baingilanga na mukoyo kabiji bepaine kwingijila Yehoba mu jishinda japuseneko na bakwabo. Mizhilo ya Mosesa yaswishishe mwanamulume nangwa mwanamukazhi kulaya lulayañano ne Yehoba lwa kwisajila aye mwine kwikala Munazili pa kimye kyo afuukulapo aye mwine. (Bala. 6:1, 2) Mu luno lulayañano mwavwangile mizhilo yalondelanga Banazili yabulanga kulondela bena Isalela bonse. Pano mambo ka mwina Isalela o afuukwilangapo kwikala Munazili? Mwina Isalela wafuukulangapo kwikala Munazili na mambo a kutemwa bingi Yehoba ne kukeba kumusanchila pa bintu byawama byo amubila.—Mpitu. 6:5; 16:17. w24.02 14 ¶1-2

Baibolo javula wamba pa “bukishinka,” nangwa’mba “butemwe bubula kwaluka” Lesa bo amwesha balunda nanji. Kabiji Baibolo waamba pa butemwe bubula kwaluka bantu ba Lesa bo bemwesha mulwabo. (2 Sam. 9:6, 7) Bukishinka bwetu bubailako pa kupitapo kimye. Twayai tumona Danyela byo atwajijile kwikala wa kishinka. Danyela wapichile mu meseko avula bingi mu bwikalo bwanji bonse. Mu ano meseko onse wafwainwe kumwesha’mba wajinga wa kishinka kwi Yehoba nangwa ne. Byo ajinga na myaka kukila 90 po po apichile mu lweseko lukatampe bingi. Ba mu kije kya mfumu bamushikilwe bingi Danyela ne kulengulula Lesa ye apopwelanga. Onkao mambo, baumvwañene kuba’mba bamwipaye. Balengejile mfumu kubikako muzhilo wafwainwe kulengela Danyela kukookela Lesa nangwa kukookela mfumu. Danyela inge wakebelenga kwikala wa kishinka ku mfumu, wafwainwe kuleka kulomba kwi Yehoba pa moba 30. Bino, Danyela wafuukwilepo kwikala wa kishinka kwi Yehoba.​—Da. 6:12-15, 20-22. w23.08 5 ¶10-12

Yehoba ukeba’mba tutwajijile kutemwa balongo ne banyenga. Inge mulongo nangwa nyenga wituba kintu kyatama, twafwainwa kuketekela’mba kechi waubijilemotu ne, bino amba ubena kwibikako kulondela mafunde a mu Baibolo. (Maana 12:18) Lesa watemwa bakalume banji ba kishinka nangwa kya kuba balubankanya. Inge twalubankanya kechi witusankilapo ne, kabiji kechi utwajijila kwituzhingijila ne. (Sala. 103:9) Ne atweba twafwainwa kulekelangako bakwetu mambo byonka byuba Shetu wa mwiulu! (Efi. 4:32–5:1) Vulukainga’mba mpelo byo ibena kufwenya pepi, twafwainwa kufwenya kwipi ku balongo ne banyenga. Twafwainwa kuketekela’mba kwitumanyika kwakonsha kukizhamo. Bakonsha ne kwitukasa mu kaleya na mambo a lwitabilo lwetu. Inge kino kyamweka, po po tukakebeshanga balongo ne banyenga yetu.​—Maana 17:17. w24.03 15-16 ¶6-7

Mu Baibolo muji mashimikila a banyike bakookelanga Yehoba, basangajikile muchima wa Yehoba kabiji baikele na lusekelo mu bwikalo bwabo. Davida naye byo byo aubilenga. Byo ajingatu mwanyike, Davida wafuukwilepo kwingijila Lesa kabiji waikele mfumu wa kishinka. Bino bimye bimo walenganga mambo. (1 Mfu. 3:6; 9:4, 5; 14:8) Inge mwatanga jishimikila ja kwa Davida ne bintu byo aubile, bikemutundaika kwingijila Yehoba mu bukishinka. Nangwa ikala na mutanchi wa kutanga pe Mako ne Timoti. Baingijile Yehoba mu bukishinka saka baji banyike. Batokeshe Yehoba ku muchima. Bintu byo mubena kuba luno byo bimwesha bikekala bwikalo bwenu kulutwe. Inge mwaketekela mwi Yehoba ne kubula kwiketekela, Yehoba usakukemukwasha. Mwafwainwa kwikala bwikalo bwawama kabiji bwa lusekelo. Vulukainga’mba Yehoba usanta bingi byo mubena kumwingijila. Onkao mambo, kafwako kintu kyaesakana pamo na kwingijila Yehoba shetu witutemwa ne. w23.09 13 ¶18-19

Mutumwa Paulo wayukile’mba balongo ne banyenga bajinga bambulwakulumbuluka. Balongo ne banyenga bamo bo apwanañenenga nabo mu kipwilo batendekele kumuzhinauka. (Byu. 9:26) Pa kupitapo kimye, bamo batendekele kwamba byatama pe aye pa kuba’mba balengele bakwabo kubula kumuketekela. (2 Ko. 10:10) Paulo wamwene mukulumpe umo mu kipwilo waubile kintu kyakonsheshe kutuntwisha bakwabo. (Nga. 2:11, 12) Kabiji mulunda wa kwa Paulo aye Mako wamufutukilemo. (Byu. 15:37, 38) Paulo inge wakebelenga inge waswishishe bino byamwekele kuleka kupwanañana na bamuzhingijishe. Pano bino, watwajijile kunemeka bano balongo ne banyenga kabiji watwajijile kwingijila Yehoba mu bukishinka. Ñanyi kintu kyakwashishe Paulo kutwajijila kwingijila Yehoba na mukoyo? Paulo watemenwe bingi balongo ne banyenga. Kutemwa bakwabo kwalengelanga Paulo kutatu muchima pa byubilo byabo byawama, kechi kuta muchima pa byo balubankanyanga ne. Kabiji buno butemwe bo bwalengejile Paulo kuba biji mu kinembelo kya lelo. w24.03 15 ¶4-5

Mu Baibolo muji mashimikila avula bingi aamba pa ene mambo kwikala na kyubilo kya kukooka muchima o kwanemena. Akilangulukai pe Izaka. Byo aikelenga mu Gelala mu muzhi wa bena Filishitiya, bantu ba kichima ba mu yewa muzhi bamuzhiikijile mishima yonse yapoyile bakalume ba shanji. Izaka kechi watendekele kulwa nabo ne, bino wafuukwilepo kuya na kwikala kwalepa nabo. Kabiji wapoyile ne mishima ikwabo. (Nte. 26:12-18) Bino bena Filishitiya batwajijile kwamba’mba mema aji mu mishima yo apoyile abo. Nangwa baubile bino byonse, Izaka kechi watobokele nabo ne. (Nte. 26:19-25) Ñanyi kintu kyamulengejile kutwajijila kukooka muchima nangwa kya kuba bamuzhingijishenga? Ke kuba bintu byonka byaubanga bansemi banji, ko kuba’mba kupwisha bintu mu mutende byonka byaubanga shanji aye Abalahama kabiji wakookele muchima byonka byajinga inanji aye Sala​—1 Pe. 3:4-6; Nte. 21:22-34. w23.09 15 ¶4

Yehoba watumine Mwananji mubeji pano pa ntanda kwiya na kufunjisha bantu pa Bufumu ne kupana bumi bwanji pa kuba’mba etupokolole ku bundengamambo ne lufu. Kepo Lesa amusangwile ne kwikala Mfumu wa mu Bufumu bwa Lesa. Kishina kine kya mu Baibolo ke kya kuba’mba jizhina ja Yehoba jikatumbijikwa byo akafikizha kyaswa muchima wanji pano pa ntanda kwingijisha Bufumu bwanji bubena kulamwa na Kilishitu. Kino kechi kikapimpulwa ne. Witulaya kuba’mba byonse byo afuukula bikamweka monka mo aambijile. (Isa. 46:10; Hebe. 6:17, 18) Ino ntanda ikekala Paladisa mukekalanga baana ba kwa Adama baoloka kabiji balumbuluka “myaka ne myaka.” (Sala. 22:26) Abino kechi byo byonkatu bikoba Yehoba ne. Ukakwatankanya ne bilengwa byanji byonse bya mwiulu ne bya pano pa ntanda. Bonse bakakookelanga Yehoba mambo ye ukekala kalama wabo. (Efi. 1:8-11) Nanchi kechi mwasangalala pa bino byonse bikoba Yehoba nenyi? w23.10 20 ¶7-8

Bayudea bafumine mu Babilona byo bafikile mu Yelusalema, batendekele kupita mu makatazho na mambo a kukajilwa kwa bya mu bwikalo, milukuchi ya bumulwila ntanda ne kwibamanyika ku bisaka byaikalanga kipikipi. Kyakatezhe bingi kuta muchima ku mwingilo wa kushimukulula nzubo ya Yehoba. Onkao mambo, Yehoba watumine bangauzhi babiji, Hagai ne Zekaliya, kuya na kutundaika bantu kwikala na kizaku kya kwingila mwingilo wanji. (Hagai 1:1; Zeka. 1:1) Kabiji, bantu balondejile bibatundaikile bano bangauzhi. Nangwa byonkabyo, byo papichile myaka 50 bantu babwelele ku Yelusalema bakebelenga kwibatundaika jikwabo. Ezela, wayukile bingi kukopolola mizhilo, wafumine ku Babilona kuya ku Yelusalema na kutundaika bantu ba Lesa kuta muchima pa kupopwela Yehoba mu bwikalo bwabo. (Eze. 7:1, 6) Byonkatu bungauzhi bwa kwa Hagai ne Zekaliya byo bwakwashishe bantu ba Yehoba kutwajijila kuketekela mwi Yehoba byo bebamanyikilenga, ne atweba lelo jino twafwainwa kuketekela’mba Yehoba uketukwasha inge ketupite mu makatazho mu bwikalo bwetu.​—Maana 22:19. w23.11 14-15 ¶2-3

Mu ñanyi mashinda mo tumweshesha’mba twatemwa bena Kilishitu bakwetu? Jishinda jimo jo tubilamo bino kekwibatekenesha. Kwikala na kifyele kuketulengelanga “kwitekenesha atwe bene na bene.” (1 Tesa. 4:18) Twakonsha kutwajijila byepi kwitemwa atwe bene na bene? Twakonsha kuba bino inge ke tulekeleko bakwetu mambo nangwatu inge kyakatazha kuba bino. Mambo ka o kyanemena kikatakata lelo jino kwitemwa atwe bene na bene? Petelo waamba’mba: “Mpelo ya bintu byonse yafwenya kala pepi. Onkao mambo, . . . itemwishai anwe bene na bene.” (1 Pe. 4:7, 8) Mpelo ya buno bwikalo bwatama byo yafwenya kala pepi, ñanyi bintu byakonsha kwitumwekela? Yesu byo aambilenga pa baana banji ba bwanga, waambijile jimo amba: “Bakemushikwa ku bisaka byonse bya bantu na mambo a jizhina jami.” (Mat. 24:9) Pa kuba’mba tutwajijile kwikala ba kishinka kwi Yehoba nangwa kya kuba betushikwa, twafwainwa kukwatankana. Inge twauba bino, Satana kechi uketwabanya ne, mambo butemwe bwitukwatankanya pamo.—Fili. 2:1, 2. w23.11 13 ¶18-19

Bukine bwa mu Mambo a Lesa buji bingi na bulume. Umvwe ketufunjishe bantu kuyuka Yehoba ne kwibakwasha kuyuka byo aji, mufuma bintu byawama bingi. Kino kilengela bantu kuleka kulondela mafunjisho a kwa Satana a bubela kabiji batatula kumona byubilo byawama biji na Shetu wa mwiulu wa butemwe. Bakumya bingi pa bulume bwanji bwakila. (Isa. 40:26) Bafunda kuketekela mwi aye na mambo a buchibamambo bwanji bwaoloka. (Mpitu. 32:4) Bafunjilako bintu byavula bingi ku maana anji akila. (Isa. 55:9; Loma 11:33) Kibatekenesha bingi kuyuka’mba aye ye butemwe. (1 Yoa. 4:8) Inge batwajijila kufwenya kwipi ne Yehoba, luketekelo lwabo lwa kukekala myaka ne myaka lukoselako. Tuji na mwingilo wanema bingi witupa Yehoba wakukwasha bantu kufwenya kwipi kwi Shabo wa mwiulu. Umvwe twauba bino, Yehoba uketumonanga’mba “twi ba mwingilo umo” ne aye.​—1 Ko. 3:5. w24.02 12 ¶15

Inge mubena kufunda Baibolo nangwa inge bansemi benu Bakamonyi ba kwa Yehoba, nanchi mubena kulangulukapo kubatizhiwa nyi? Umvwe ibyo, uno ke mulanguluko wawama bingi. Nangwa byonkabyo, saka mukyangye kubatizhiwa, mwafwainwa kwipana kwi Yehoba. Mwipana byepi kwi Yehoba? Pa kwipana, mumulaya mu lulombelo amba mukapopwelanga aye yenka kwapwa kabiji amba mukatangizhako kuba kyaswa muchima wanji mu bwikalo bwenu. Kino kilumbulula kumulaya Yehoba amba mukatwajijila kumutemwa ‘na muchima wenu yense ne na mweo wenu yense ne na maana enu onse ne na bulume bwenu bonse.’ (Mako 12:30) Mwipana kwi Yehoba kwa bunke bwenu, ko kuba’mba anweba ne Yehoba kwapwa. Kupusanako na kwipana, lubatizhilo lubiwa pa mvula bantu kumwesha’mba mwipana kwi Yehoba. Kwipana kwenu ke lulayañano lwanema bingi kabiji Yehoba ukeba’mba mwikelenga mwayila lulayañano lwenu byonka byo mukeba ne anweba.​—Sapwi. 5:4. w24.03 2 ¶2; 3 ¶5

Baji mu masongola bonse bapita mu makatazho. Baibolo waambishatu patooka kuba’mba aba baji mu masongola “bakamonanga bya malwa mu mibiji yabo.” (1 Ko. 7:28) Mambo ka? Masongola aleta pamo bantu babiji bambulwakulumbuluka baji na byubilo byapusana pusana kabiji ne bintu byo batemwa nabyo byapusana pusana. Bafuma mu bisho ne nkomeno yapusana pusana. Pa kupitapo kimye, batendeka kumwesha byubilo byo babulanga kumwesha saka bakyangye kwisongola. Bintu bya uno mutundu byo bileta makatazho mu masongola. Mu kifulo kya kumonapo mashinda mo bakonsha kupwishisha lukatazho pamo, bakonsha kutendeka kuzhachisha mwinakwabo. Bakonsha ne kutendeka kulanguluka’mba babane nangwa kwikana. Nanchi kuba bino ko kukebalengela kwikala na lusekelo nyi? Ine. Yehoba ukeba bamulume ne mukazhi kunemeka masongola nangwa kya kuba umo ubena kwikazha mukwabo bufinda. w24.03 16 ¶8; 17 ¶11

Byo mwipaine ne kubatizhiwa, mwatwajijile kufunda pe Yehoba ne kumuyuka bulongo kabiji mwamutemenwe bingi. Kino kimulengejile kuketekela’mba mulaye wa Lesa wa kwikala myaka ne myaka mu paladisa pano pa ntanda ukafika. (Hebe. 5:13–6:1) Kyamweka mwimwena anweba bene bukine bwa byambo biji pa Loma 5:2-4. Mwapita mu bya malwa byapusana pusana, pano bino, mwachinchika ne kumona Lesa byo emukwasha. Na mambo a kuyuka’mba Lesa wimutemwa kabiji amba usekela mwi anweba, kino kimulengela kushiinwa’mba ukemubila bintu byonse byo alaya. Luketekelo lwenu lwakoselako bingi kukila ne byo lwajinga kala kabiji mwilunemeka bingi. Lwimukwasha kuchinchika kabiji lwimukwasha mu mashinda apusana pusana mu bwikalo bwenu ne kwimulengela kwikalanga bulongo na ba mu kisemi kyenu, kufuukula bulongo bya kuba ne kwingijisha bulongo kimye kyenu. Mutumwa Paulo waambilepo kintu kikwabo kyanema bingi kutazha ku luketekelo lo twikala nalo inge twaitabilwa kwi Lesa. Wimulengela kushiinwa’mba bintu byo mubena kutengela bikafika.—Loma 15:13. w23.12 12-13 ¶16-19

Umvwe tubena kupita mu lukatazho, byo tulanguluka, byo tumvwa ku muchima ne byo tuba bipusanako na byo kikala inge kechi tuji mu lukatazho ne. Byonkatu bwato byo bebukumpula ku luvula, ne atweba tumvwatu nobe babena kwitukumpula ku makatazho o tupitamo. Yehoba umvwa byepi inge tubena kupita mu makatazho avula bingi? Aye witulaya’mba uketukwasha. Mvula wa kinkunkwila inge waiya, bwato butendeka kukumpauka bingi. Kunshi ya mato avula balengelako tubilapo tuji nobe towelo twa jisabi twiakwasha kubula kukizhamo kusunkena nangwa kupinuka inge kwaiya mwela nangwa mvula wa kinkunkwila. Kino kilengela bantu kwenda bulongo kwakubula kumvwa moyo ne kwibazhikijila ku mapuso. Tuno tubyela tulengela bwato kubula kukumpuka, twingila bingi bulongo inge bwato bubena kwenda kuya kulutwe. Po pamotu ne atweba, Yehoba uketukwasha inge twatwajijila kumwingijila mu bukishinka mu bimye bya makatazho. w24.01 22 ¶7-8

Umvwe mwaumvwa moyo, ishikishai’mba: ‘Ñanyi bintu Yehoba byo angubilapo kala?’ Langulukainga pa bintu Yehoba byo abujile kulenga mu kipasha kyanji kabiji bibula kumupopwela nabiji bañonyi byo ebajisha ne maluba byo eavwika. Tukaketekela mwi Yehoba kuba’mba ne atweba uketuta muchima. (Mat. 6:25-32) Kabiji langulukainga pa bintu Yehoba byo aubila bapopweshi banji. Mwakonsha kufunda pa muntu umo ye baambapo mu Baibolo wamwesheshe lwitabilo lwakosa nangwa kutanga pa byapichilemo bantu ba Yehoba ba mu ano moba. Kabiji mwafwainwa kulanguluka languluka pa bintu bimubijile Yehoba. Abino bintu bimukwashishe byepi kufunda pe aye? (Yoa. 6:44) Wakumbula byepi milombelo yenu? (1 Yoa. 5:14) Ñanyi bintu byawama byo mubena kumwenamo mu kitapisho kya Mwananji ye atemwa bingi?​—Efi. 1:7; Hebe. 4:14-16. w24.01 4 ¶6; 7 ¶17