Nanchi Mukivuluka Nyi?
Nanchi mwamwenamo mu kutanga magazini a Kyamba kya Usopa kyakatataka nyi? Monai inge mwakonsha kukumbula ano mepuzho:
• Twakonsha kwamba byepi bulongo ‘ñambilo yafwainwa,’ ko kuba’mba bukine pe Lesa ne nkebelo yanji? (Zefwa. 3:9)
Byonkatu byo twamba mulaka, ne ‘ñambilo yafwainwa’ nayo pa kuba’mba twiyambe bulongo, twafwainwa kutelekesha, kufunda ku bañambi bayuka kwamba bulongo, kulabijila mazhina a mabuku a mu Baibolo ne byepelo bimo bya mu Baibolo, kwambanga javula pa bintu byo tufunda, kutanganga na jiwi jasansuka, kumona biji mulakazhilo nangwa’mba nembelo ya bukine, kutwajijila na kununguluka, kwikala na bimye bya kufunda, ne kufunda bya “kwambanga” ñambilo yafwainwa.—8/15, mapeja 21-25.
• Byambo bya kuba’mba “lutambo wa mizhinge isatu” byakonsha kwingila byepi mu masongola?
“Lutambo wa mizhinge isatu” ke ñambilo ya bukifwanyikizho. (Sapwi. 4:12) Umvwe yaingijishiwa mu masongola, yavwangamo mulume ne mukazhi, ko kuba’mba mizhinge ibiji, yo bazhingila pamo na muzhinge wa pakachi, aye Lesa. Kukwatankana pamo na Lesa kulengela mulume ne mukazhi kwikala na bulume bwa ku mupashi bwa kuyuka mwakubila na makatazho ne kwikala balusekelo.—9/15, peja 16.
• Byambo byanembwa mu Bahebelu 6:2 bya kuba’mba “kutulapo maboko” byatala mwepi?
Mu kifulo kya kutazha ku kutongolwa kwa bakulumpe mu kipwilo kya bwina Kilishitu, byatazhizhenga pa kutentekwa kwa maboko pa kupana bya bupe bya mupashi wazhila mu jishinda ja kukumya. (Byu. 8:14-17; 19:6)—9/15, peja 32.
• Bakulumpe mu kipwilo bafwainwa kunemeka byepi bakwabo?
Jishinda jimo mukulumpe mu kipwilo jo akonsha kunemekelamo bakwabo ke kupichila mu kubula kwambila bakwabo kuba bintu byo akonsha kukankalwa aye mwine kuba. Kabiji wibanemeka kupichila mu kwibabula bishinka bine byalengela amba bobe kyokyo kintu kyo aamba’mba bobe.—10/15, peja 22.
• Mukulumpe mu kipwilo kya bwina Kilishitu wakonsha kufunjilako ka kwi kafunga mwina Isalela byo aingijishanga kamama kakonkomana?
Kafunga waingijishanga kamama kakonkomana kufungilako jitanga janji. Mikooko pa kutwela nangwa kulupuka mu kipaka, yapitanga ‘munshi ya kamama kakonkomana,’ ne mu jino jishinda wakonshanga kwiibala. (Levi 27:32) Popamotu, ne kafunga wa bwina Kilishitu naye wafwainwa kuyuka ne kutwajijila na kulamawizha jitanga ja mikooko ya Lesa yo apewa kulama.—11/15, peja 9.