Masongola ke Bupe Bwafuma kwi Lesa

1, 2. (a) Ñanyi bintu bimo byo tulangulukapo pa bantu besongola katataka, kabiji mambo ka? (b) Ñanyi mepuzho o tusakwisambapo mu kino kitango?

NANCHI mumvwa bulongo kutanwa ku masongola nyi? Bavula bomvwa bingi bulongo, mambo bimye bya uno mutundu byakonsha kuwama bingi. Mumona aba babena kwisongola saka bamweka kipale. Kabiji bamweka kusangalala bingi! Pa jino juba, bekala bingi na lusekelo kabiji bamona’mba kimye kyonse bintu bikebawaminangatu.

² Pano bino, ano moba mu masongola avula muji bingi makatazho. Nangwa kya kuba tukeba kumona aba besongola katataka kutwajijila kwikala bulongo mu masongola abo, bimye bimo twakonsha kulanguluka’mba: ‘Nanchi ano masongola akekala a lusekelo nyi? Nanchi akatwajijila nyi?’ Mikumbu ya ano mepuzho ikemena pa mwanamulume ne mwanamukazhi kana bakalondela mafunde a Lesa aamba pa masongola ne kwiengijisha nangwa ne. (Tangai Byambo bya Maana 3:5, 6.) Bafwainwa kwingijisha mafunde pa kuba’mba batwajijile kwikala mu butemwe bwa Lesa. Twayai twisambe pa mikumbu ya mu Baibolo ya ano mepuzho ana: Mambo ka a kusongwela nangwa kusongolwa? Umvwe mukeba kusongola nangwa kusongolwa, muntu wa mutundu ka ye mwafwainwa kutwela nanji mu masongola? Mwakonsha kwinengezha byepi saka mukyangye kutwela mu masongola? Kabiji ñanyi kintu kyakonsha kukwasha ba mulume ne mukazhi kutwajijila kwikala na lusekelo mu masongola abo?

MAMBO KA A KUSONGWELA NANGWA KUSONGOLWA

3. Mambo ka o kyatamina kusongola nangwa kusongolwa na mambo a bintu byabula munda ne munyuma?

³ Bamo balanguluka’mba muntu pa kuba’mba ekale bwikalo bwawama kabiji bwa lusekelo kanatu wasongola nangwa kusongolwa. Kino kechi kya kine ne! Yesu wajinga katanda, waambile pa kwikala katanda amba bupe kabiji watundaikile boba bakonsheshe kwikitambula kuba byonkabyo. (Mateo 19:11, 12) Mutumwa Paulo naye waambilepo pa buwame bwa kwikala katanda nangwa muzhike. (1 Kolinda 7:32-38) Yesu ne Paulo kechi balengelepo muzhilo wa kuba’mba muntu yense wafwainwa kwikala katanda nangwa muzhike ne; binembelo byaamba ne kuba’mba kukanya kusongola ke ‘lufunjisho lwa bandemona.’ (1 Timoti 4:1-3) Pano bino, bukatanda nangwa buzhike bukwasha bingi boba bakeba kwingijila Yehoba kwa kubula bya kwibatabankanya. Onkao mambo, kechi kyakonsha kuwama kusongola nangwa kusongolwa na mambo a bintu byabula munda ne munyuma, nabiji kwitukanjikizha ku bakwetu amba kanatu usongole nangwa kusongolwa ne.

4. Masongola awama alengela baana kwikala na ñanyi kitendekesho?

⁴ Nanchi kujipo bishinka byanema byakonsha kulengela muntu kusongola nangwa kusongolwa nyi? Ee kobiji. Mambo masongola nao ke bupe bwafuma kwi Lesa wetu. (Tangai Ntendekelo 2:18.) Onkao mambo, masongola muji ne mo awamina kabiji akonsha kuleta lusekelo. Masongola awama ke kitendekesho kyawamisha kya bwikalo bwa kisemi. Baana bakebewa bwikalo bwawama muji bansemi ba kwibakomesha, kwibatemwa, kwibafunjisha ne kwibatangijila. (Salamo 127:3; Efisesa 6:1-4) Nangwa byonkabyo, kusema baana kechi kyo kishinkatu kya kusongwela nangwa kusongolwa ne.

5, 6. (a) Kwesakana na byaamba Musapwishi 4:9-12, ñanyi bintu bimo byawama bifuma mu kwikala na bulunda bwawama? (b) Masongola akonsha kwikala byepi nobe lutambo wa mizhinge isatu?

⁵ Twayai twisambe kinembelo paimena kino kishina ne kine kintu kibena kwambiwapo: “Bantu babiji bawama kukila uji bunke mambo bamwenamo byawama mu mingilo yabo. Mambo inge umo wapona, mukwabo ukamwimanyapo. Pano kyakonsha kwikala byepi umvwe muntu uji bunke wapona kwa kubula wa kumwimanyapo? Kabiji umvwe bantu babiji balaala pamo, bomvwa kyuya, pano muntu uji bunke wakonsha kumvwa byepi kyuya? Kabiji muntu umo wakonsha kushinda mukwabo uji bunke, pakuba bantu babiji kechi wakonsha kwibashinda ne. Kechi kyapela lutambo wa mizhinge isatu kuchibika bukiji ne.”—Musapwishi 4:9-12.

⁶ Kine kintu kikatampe kyo babena kwambapo pa kino kinembelo ke buneme bwa kwikala na mulunda. Masongola avwangamo bulunda bwa pa muchima. Byonka byaamba kino kinembelo, buno bulunda bwakonsha kulengela ba mulume ne mukazhi kwikwasha, kwitekenesha ne kwizhikijila. Masongola akosa bingi kikatakata umvwe mwaikala muntu mukwabo wa busatu. Lutambo wa mizhinge ibiji byonka byaamba kinembelo wakonsha kuchibika. Pakuba lutambo wa mizhinge isatu yo bazhingila pamo wakonsha kukatazha bingi kuchibika. Umvwe ba mulume ne mukazhi bebikako kutokesha Yehoba pa muchima, masongola abo ekala nobe yewa lutambo wa mizhinge isatu. Yehoba wingila mwingilo mukatampe bingi mu masongola, onkao mambo ulengela bulunda kukosa bingi.

7, 8. (a) Ñanyi jifunde Paulo jo anembejile bena Kilishitu bakatanda ne bazhike baji na lukatazho lwa kukeba kwilaala? (b) Baibolo witukwasha byepi byo twafwainwa kumonanga masongola?

⁷ Kabiji mu masongola mo monkatu mo baswisha kupwishishamo bulongo kilaka kya kwilaala. Mu masongola, kwilaala kuleta bingi lusekelo. (Byambo bya Maana 5:18) Nangwa kya kuba muntu “wapitaila pa jifumbi ja bwanyike,” jaambapo Baibolo, ko kuba’mba kimye kibayilamo kilaka kya kukeba kwilaala, kino kilaka kechi kileka kumukatazha ne. Umvwe muntu keabule kwikanya, kino kilaka kyakonsha kumulengela kutendeka kuba bintu byatama. Paulo bamutangijile ku mupashi kunemba jino jifunde pa mambo a bakatanda ne bazhike amba: “Umvwe bakankalwa kwikanya, basongole nangwa kusongolwa, mambo kyawama kusongola nangwa kusongolwa kukila kupya muchima.”—1 Kolinda 7:9, 36; Yakoba 1:15.

⁸ Umvwe muntu ubena kukeba kusongola nangwa kusongolwa, kyawama kuyuka kintu kine kyo abena kubila byobyo. Byonka byaambile Paulo, aba basongola nangwa kusongolwa, “bakamonanga bya malwa mu mibiji yabo.” (1 Kolinda 7:28) Bantu baji mu masongola bapita mu makatazho abula kupitamo boba babula kusongola nangwa kusongolwa. Umvwe mwasalapo kusongola nangwa kusongolwa, mwakonsha kukepeshako byepi makatazho ne kubayisha lusekelo? Jishinda jimo ke kusala bulongo muntu wa kutwela nanji mu masongola.

MWAKONSHA KUYUKA BYEPI MUNTU YE MWAFWAINWA KUSONGOLA NANGWA KUSONGOLWAKO?

9, 10. (a) Paulo walumbulwile byepi ene mambo o kyatamina kwikasa kikonkoji kimo na bantu babula kwitabila? (b) Ñanyi bintu bifuma mu kulengulula mikambizho ya Lesa yakanya kusongola muntu wabula kwitabila?

⁹ Paulo bamutangijile ku mupashi kunemba jifunde janema bingi jafwainwa kwingila pa kusala muntu wa kutwela nanji mu masongola. Wanembele’mba: “Kechi mwikase kikonkoji kimo na babula kwitabila ne.” (2 Kolinda 6:14) Kino kikonkoji kyo aingijishe kyaimenejile pa bya bunjimi. Umvwe banyama babiji bapusana mu bimino ne mu kubaya nangwa mu bulume bebakashila ku kikonkoji kimo, kikebakatazha bingi kwingila. Kyo kimotu, umvwe muntu waitabila ne wabula kwitabila besongola, makatazho akabayilangakotu. Umvwe mulume nangwa mukazhi ubena kukeba kutwajijila kwikala mu butemwe bwa Yehoba, bino mukwabo muchima ukijitu kungi, bintu byo bakakebanga kuba mu bwikalo bwabo bikayangatu munsunya, kabiji kino kyakonsha kuleta bijikila byavula bingi. O ene mambo mutumwa Paulo o akambizhe bena Kilishitu kusongolatu “kanatu monka mwi Nkambo.”—1 Kolinda 7:39.

¹⁰ Bimye bimo bena Kilishitu babula mu masongola balanguluka’mba kijitu bulongo kwikasa kikonkoji kimo na muntu wabula kwitabila kukila kwikala bunke. Bamo basalapo kulengulula mafunde a mu Baibolo ne kusongola nangwa kusongolwa ku muntu ubula kwingijila Yehoba. Aba boba bino, javula bafumyakotu kalulu kuvimba meso. Bena Kilishitu ba uno mutundu bataana kuba’mba basongola nangwa kusongolwa ku muntu ye bakonsha kubula kwisamba nanji bintu byanema bya mu bwikalo. Bakonsha kumvwa’mba bajitu bunke kukilatu ne byo baumvwanga saka bakyangye kusongola nangwa kusongolwa. Pano bino, kuji bena Kilishitu bakatanda ne bazhike bavula baketekela ne kulondela mafunde a Lesa. (Tangai Salamo 32:8.) Nangwa kya kuba balangulukapo kusongola nangwa kusongolwa juba jimo, batwajijila kwikala bakatanda nangwa bazhike kufikatu ne kimye kyo bataana muntu ye bafwainwa kutwela nanji mu masongola wingijila Yehoba Lesa.

11. Ñanyi kintu kyakonsha kwimukwasha kutaana muntu wafwainwa kusongola nangwa kusongolwako? (Monai ne kakitenguluzha “Ñanyi Bintu Byafwainwa Kwikala na Mukwetu ye Nkeba Kutwela Nanji mu Masongola?”)

¹¹ Pano bino, kechi kalume wa Yehoba yense wafwainwa kwikala muntu wa kutwela nanji mu masongola ne. Umvwe mubena kulanguluka pa kusongola nangwa kusongolwa, kebakebai muntu uji na byubilo byawama, ukeba kwingila mingilo ya Lesa yapusana pusana kabiji watemwa Lesa byonka byo muji anweba. Jibumba ja kalume wa kishinka janemba mabuku avula bingi pa uno mutwe, kyakonsha kwimukwasha bingi kutanga oo mafunde a mu Binembelo ne kulombapo kuba’mba emutangijile pa kufuukulapo kino kintu kyanema.a—Tangai Salamo 119:105.

12. Ñanyi bisho pa mambo a kusongola biji mu mapunzha amo, kabiji ñanyi kintu kyo baambapo mu Baibolo kyo bakonsha kulondela?

¹² Mu mapunzha avula, kwesakana na bisho, bansemi bo bakebela mwanabo muntu wa kusongola nangwa kusongolwako. Mu bisho bya uno mutundu, bavula bayuka’mba bansemi bo baji na maana akila kabiji bayuka bintu byavula byakonsha kwibakwasha kusala muntu wafwainwa. Masongola a kwimusajilako mwanamukazhi nangwa mwanamulume javula engila bingi bulongo byonka byo kyajinga mu kimye kya kala. Umvwe bansemi basaka kukebela baana babo muntu wa kutwela nanji mu masongola, bafwainwa kufunjilako ku byaubile Abalahama byo atumine kalume wanji kuya na kukebela mwananji Izaka mwanamukazhi wa kusongola. Mali ne kuya nkuwa kechi byo bintu Abalahama byo ateleko muchima ne. Aye watesheshe muchima kukebela mwananji Izaka mwanamukazhi mu bantu bapopwelanga Yehoba.b—Ntendekelo 24:3, 67.

MWAKONSHA KUBA BYEPI UMVWE MUKEBA’MBA MASONGOLA ENU AKEKALE AWAMA?

13-15. (a) Byambo biji pa Byambo bya Maana 24:27 byakonsha kukwasha byepi nsongwalume ubena kukeba kusongola? (b) Nsongwakazhi wakonsha kwinengezha byepi pa kutwela mu masongola?

¹³ Umvwe mubena kulangulukishapo pa kusongola nangwa kusongolwa, mwafwainwa kwishikisha’mba, ‘Nanchi nenengezha kusongola nangwa kusongolwa nyi?’ Kwinengezha kusongola nangwa kusongolwa kechi kwaimenatu pa byo mubena kumvwa pa mambo a butemwe, kwilaala, bulunda nangwa kwikala na baana ne. Bino kuji mingilo yafwainwa kuba mwanamulume nangwa mwanamukazhi.

¹⁴ Nsongwalume ubena kukeba wa mukazhi wa kusongola, wafwainwa kulangulukishapo bulongo pa jino jifunde ja kuba’mba: “Nengezha mwingilo wobe wa pangye, ne kunengezhezha jimo bintu byonse mu bujimi bobe; apa bino ushimike nzubo yobe.” (Byambo bya Maana 24:27) Kino kinembelo kibena kwamba pa ñanyi kintu? Mu moba a kala, muntu pa ‘kushimika nzubo yanji,’ nangwa’mba kukosesha kisemi inge wasongola, wafwainwe patanshi kwishikisha’mba, ‘Nanchi nenengezha kulama ne kukwasha mukazhami ne baana bo twakonsha kusema nyi?’ Patanshi wafwainwe kwingila, kujima bujimi nangwa kwikala na kajo. Jifunde jintutu jimo jingila ne mu ano moba. Mwanamulume ukeba kusongola wafwainwa kwinengezha kwingila ino mingilo. Umvwe uji na bumi bwawama, wafwainwa kwingila. Mambo a Lesa aamba’mba mwanamulume ubula kumwena ba mu nzubo yanji bintu bya ku mubiji, byo bakeba ne kubula kukwasha kisemi kwikala na bulunda bwawama ne Lesa, watama kukila yewa wabula kwitabila!—Tangai 1 Timoti 5:8.

¹⁵ Mwanamukazhi ubena kukeba kusongolwa naye wafwainwa kuswa kwingila mingilo yanema. Baibolo waambapo bingi bulongo pa mingilo ne byubilo mwanamukazhi byo afwainwa kwikala nabyo pa kukwasha mwatawanji ne kulama bulongo ba mu nzubo yanji. (Byambo bya Maana 31:10-31) Banabalume ne banabakazhi bapupumina kutwela mu masongola kwa kubula kuyuka mingilo yo bafwainwa kwingila, ko kuba’mba bakebatu kuba bintu byo bakeba abo bene, mambo kechi baji na muchima wa kulangulukilako bakwabo ba mu masongola ne. Kyanema bingi ku babena kukeba kusongola nangwa kusongolwa, patanshi kukosesha bulunda bwabo ne Lesa.

16, 17. Ñanyi jifunde ja mu Binembelo jafwainwa kulondela boba bakeba kutwela mu masongola?

¹⁶ Kwinengezha kutwela mu masongola kwavwangamo kulanguluka pa mingilo Lesa yo apa mwanamulume ne mwanamukazhi. Mwanamulume wafwainwa kuyuka byo kilumbulula kwikala mutwe wa kisemi kya bena Kilishitu. Kwikala mutwe kechi kilumbulula kwikala muntu wakanama ne. Mwanamulume wafwainwa kwingijisha bumutwe bwanji byonka Yesu byo engijisha bumutwe. (Efisesa 5:23) Mwanamukazhi naye wafwainwa kuyuka mwingilo wanji wanema. Nanchi ukaswanga kunekenena “muzhilo wa mwatawanji” nyi? (Loma 7:2) Waikala kala mu muzhilo wa Yehoba ne Kilishitu. (Ngalatiya 6:2) Luusa luji na mwatawanji mu nzubo, lwimenako muzhilo mukwabo. Nanchi wakonsha kukwasha ne kunekenena mwatawanji wabula koloka nyi? Umvwe kyakonsha kumukatazha kunekenena, kyawama kubula kusongolwa.

¹⁷ Kabiji bonse babiji ba mulume ne mukazhi bafwainwa kutesha muchima ku bintu bikeba mukwabo. (Tangai Filipai 2:4.) Paulo wanembele’mba: “Muntu yense wafwainwa kutemwa mukazhanji byonka byo etemwa aye mwine; kabiji mwanamukazhi naye wafwainwa kwikala na mushingi mukatampe ku mwatawanji.” Byo bamutangijile ku mupashi wa Lesa, Paulo waumvwishishe kuba’mba mwanamulume ukeba bingi kumunemeka ku mukazhanji. Mwanamukazhi naye ukeba bingi kumutemwa ku mwatawanji.—Efisesa 5:21-33.

18. Mambo ka bantu beipanguzha o bafwainwa kwikainya?

¹⁸ Onkao mambo, kimye kya kwiipanguzha kechi kya kukaya ne. Kyo kimye kyafwainwa mwanamulume ne mwanamukazhi kuyuka bulongo bya kwikala na mukwabo ne kumona umvwe bakonsha kwisongola nangwa ne. Kyo kimye kya kwikanya! Lweseko lwa kukeba kwilaala lubaya bingi mu kimye kya kwiipanguzha kabiji ino ndangulukilo iyamotu ayo ine. Nangwa byonkabyo, aba betemwa kya kine, bachinuzhuka bingi kuba kintu kyonse kyakonsha konauna bulunda bwa mukwabo bo aji nabo ne Lesa. (1 Tesalonika 4:6) Byonkabyo, umvwe mwiipanguzha, ikanyainga; mwakonsha kumwenamo byawama bingi mu kino kyubilo mu bwikalo bwenu bonse, inge mwasongola nangwa ne.

MWAKONSHA KUBA BYEPI UMVWE MUKEBA MASONGOLA ENU KUTWAJIJILA?

19, 20. Mwina Kilishitu wafwainwa kumona byepi masongola kupusanako na biamona bantu bavula ba mu ino ntanda? Lumbululai.

¹⁹ Umvwe ba mulume ne mukazhi bakeba masongola abo kutwajijila, kechi bafwainwa kumona masongola amba kintu kyapela ne. Mu mabuku ne mu mafilimu, masongola beamonatu nobe kintu kyakonsha kupwatu pa kakimye kacheche. Mwayilatu bwikalo bwine, masongola kechi kintu kya kutendeka lelo kesha kyapwa ne; ke ntendekelotu ya kintu Yehoba kyo abikileko kwikala myaka ne myaka. (Ntendekelo 2:24) Kyatama kuba’mba bantu bavula lelo jino kechi byo byo balanguluka ne. Mu bisho bimo, bantu ba mba’mba kusongola nangwa kusongolwa kujitu nobe “jinungi.” Kechi bakonsha kuyuka jino jinungi byo jimwesha bantu bavula byo bamona masongola ne. Mu ñanyi jishinda? Nangwa kya kuba jinungi bakonsha kwijikasa bulongo, kintu kikwabo kyanema ke kya kuba’mba bakonsha kwijikasa ne kwijikasulula kwa kubula lukatazho.

²⁰ Bavula lelo jino bamona masongola nobe kintu kya kwikalamotu lelo kesha wafumamo. Batwelamo lubilo, mambo balanguluka’mba bintu byonse bikekalangatu bulongo. Kabiji balanguluka’mba umvwe kebapite mu makatazho, masongola bakeapwisha. Pano bino, vulukai kintu Baibolo kyo aingijisha pa bulunda nabiji masongola, ko kuba’mba muzhinge. Mizhinge nangwa ntambo yo bakasa ku maato beilenga kwikala myaka yavula, kechi yakonsha kuchibika nangwa kya kuba kwapita kipupu kyabaya ne. Byonkabyo, ne masongola nao afwainwa kutwajijila. Vulukai byaambile Yesu kuba’mba: “Akya kyasambakanya Lesa, muntu kechi ekyabanye ne.” (Mateo 19:6) Umvwe mwasongola nangwa kusongolwa, mwafwainwa kunemeka masongola. Nanchi kumwena masongola mu jino jishinda kulengela masongola kukatazha nyi? Ine.

21. Ba mulume ne mukazhi bafwainwa kwimonanga byepi, kabiji ñanyi kintu kyakonsha kwibakwasha kuba bino?

²¹ Ba mulume ne mukazhi bafwainwa kwinemekanga. Umvwe bonse saka bata muchima pa byubilo byawama ne kumona bintu byawama bibena kuba mukwabo, masongola akekala a lusekelo ne kwibasangajika. Nanchi kijitu bulongo kukeba byubilo byawama mu mukwetu wa mu masongola wabula koloka nyi? Yehoba umona byawama mu bantu babula koloka, kabiji kyanema bingi kwi atweba kuyuka’mba byo byo etumona bonse. Nyimbi wa masalamo waipwizhe’mba: “Anweba Yehoba, inge mwaji mwatalangatu pa bubi, anweba Yehoba, ñanyi wakonsha kubinga?” (Salamo 130:3) Ba mulume ne mukazhi nabo bafwainwa kumonanga bintu byawama mu mukwabo ne kwilekelangako mambo.—Tangai Kolose 3:13.

22, 23. Baji mu masongola lelo jino, bakonsha kufunjilako ka kwi Abalahama ne Sala?

²² Monka mu kuya kwa myaka, masongola akonsha kuleta lusekelo lukatampe bingi. Baibolo waamba pa masongola a kwa Abalahama ne Sala mu kimye kya bukote bwabo. Mu masongola abo kechi mwabujile makatazho ne. Pano akifwanyikizhaitu Sala byo aumvwine, mwanamukazhi wajinga na myaka ya kusemwa ya mu ma 60, pa kusha nzubo yanji yawama mu muzhi wa bunonshi wa Ula ne kutendeka kwikala mu matente bwikalo bwanji bonse. Nangwa kyajinga bino, aye watwajijile kunekenena mwatawanji. Byo ajinga nkwasho wawama wa kwa Abalahama, wakwashishe mwatawanji kwingila bulongo mingilo yanji. Kabiji kunekenena kwanji kechi kwajingatu kwa pa kanwa ne. Sala waitanga mwatawanji amba nkambo. (Ntendekelo 18:12; 1 Petelo 3:6) Wanemekele Abalahama kufuma panshi ya muchima wanji.

²³ Nangwa byonkabyo, kino kechi kilumbulula’mba Abalahama ne Sala kimye kyonse pa kuba bintu bayilangatu mumo ne. Juba jimo, Sala waambilepo kintu kimo, bino Abalahama “kechi watemenwe” ne. Pano bino, na lutangijilo lwa Yehoba, Abalahama na kwipelula walondejile byaambile mukazhanji, byalengejile kisemi kwikala na bibusa. (Ntendekelo 21:9-13) Lelo jino, ba mulume ne mukazhi nangwa kya kuba baikala myaka yavula mu masongola, bakonsha kufunjilako ku bano ba mulume ne mukazhi baakamwanga Lesa.

24. Ñanyi masongola aleta munema kwi Yehoba Lesa, kabiji mambo ka?

²⁴ Mu kipwilo kya bena Kilishitu, muji masongola avula a lusekelo, masongola muji mwanamukazhi unemeka mwatawanji, wa mulume utemwa ne kupa mushingi mukazhanji, kabiji bonse babiji bengijila pamo kutangizhako kuba kyaswa muchima wa Yehoba mu bwikalo bwabo. Umvwe mwafuukulapo kusongola nangwa kusongolwa, mwafwainwa kusala bulongo muntu wa kusongola nangwa wa kusongolwako, mwafwainwa kwinengezha bulongo saka mukyangye kusongola nangwa kusongolwa, ne kulengela masongola kwikala a mutende kabiji a butemwe, aleta munema kwi Yehoba Lesa. Umvwe mwauba bino, masongola enu akemukwasha kwikala mu butemwe bwa Lesa.