Bachechetu bo Bakalamanga, Bino Bavula Bakamwenamo
KUFUMATU kimye kya batumwa, Lesa watwajijila na kusala mu bantu kibelengelo kicheche kya bena Kilishitu bakishinka, ne kwibatambula ke baana banji. Lupimpu lo bapitamo bano baana lwayilamo, kyo kyalengela ne Mambo a Lesa kwilutela amba kusemwa jibiji. Nkebelo ine ya kusemwa jibiji ke ya kunengezha bano bakalume ba Lesa basemwa jibiji kwikala bakalama mwiulu. (2 Timoti 2:12) Pa kuba’mba bekale bakalama, basangulwa kufuma ku bafu ne kuya mwiulu. (Loma 6:3-5) Mwiulu ‘bakekala bamfumu bakulama panopantanda’ pamo ne Kilishitu.—Lumwekesho 5:10; 11:15.
Nangwa byonkabyo, Mambo a Lesa aamba’mba kufumyako basemwa jibiji, kuji bakwabo bakatambula lupulukilo lwa myaka. Mu Baibolo (mu Binembelo bya Kihebelu ne Binembelo bya bwina Kilishitu bya Kingiliki), waambapo’mba Lesa ukapulusha mabumba abiji a bantu, ko kuba’mba kajibumba kacheche ka bakalama mwiulu ne jibumba jikatampe ja bangikazhi bakekala panopantanda. Kya kumwenako, akimonai mutumwa Yoano byo anembejile bakwabo ba mu lwitabilo basemenwe jibiji. Waambile pe Yesu amba: “Aye ye mfuto ya mambo etu kechi etu onka [atweba kajibumba kacheche] ne, ne ba panopantanda ponse [jibumba jikatampe].”—1 Yoano 2:2.
Ne mutumwa Paulo naye wanembele’mba: ‘Bilengwa byonse [bya jibumba jikatampe] bibena kutengela kasa bizanza meso na kupembelela kusoloka kwa baana ba Lesa [kajibumba jicheche].’ (Loma 8:19-21) Bino byambo bya mutumwa Yoano ne Paulo byatala mwepi? Byatala mu kuba’mba: Aba basemwa jibiji bakekala bakalama mwiulu. Pano mwiulu bakengilanga mwingilo ka? Bakaleta mfweto ya myaka ku bantu bavula bakekala bangikazhi mu kafulumende wa Lesa panopantanda. Onkao mambo, Yesu kyo kyo afunjishe baana banji ba bwanga kulomba amba: “Bufumu bwenu bufike. Kyaswa muchima wenu kyubiwe pano panshi, byonka byo kyubiwa mwiulu.”—Mateo 6:10.
Kabiji Binembelo bya Kihebelu nabyo byaamba’mba kuji mabumba abiji akapuluka. Kya kumwenako, akimonai Yehoba byo aambijile mushakulu wa kwa Yesu aye Abalahama amba: “Monka mu ba mu kisemi kyobe [kajibumba kacheche] mo mo bakashukilwa ba mu mikoka yonse ya panopantanda [jibumba jikatampe].” (Ntendekelo 22:18) Mikoka yonse beipeshesha mu “lukunwa” wa kwa Abalahama.
Nga uno ‘lukunwa’ ye ñanyi? Ke Yesu Kilishitu, ukekala pamo na boba basemwa jibiji, bo batambula kwikala baana ba Lesa. Mutumwa Paulo walondolola’mba: “Umvwe mwi ba kwa Kilishitu, mwi ba nkunwa ya Abalahama.” (Ngalatiya 3:16, 29) Mapesho ka akatambula bantu ba mu mikoka yonse na mambo uno ‘lukunwa’? Kwitabilwa kwi Lesa ne kutambula bumi bwa myaka ne myaka mu paladisa panopantanda. Nyimbi wa masalamo aye Davida waawile’mba: “Baoloka bakaswana ntanda, Ne kwikalamo myaka ne myaka.”—Salamo 37:29; Isaya 45:18; Lumwekesho 21:1-5.
Kya kine, bukalama bwa mwiulu ke bwa ba mu kajibumba kacheche, pakuba mfweto ya bukalama bwa mwiulu ke bumi bwa myaka ne myaka panopantanda bukatambula bantu bavula bingi. Anweba ne kisemi kyenu ibikaingako kwikala pa boba bakatambula mfweto ya myaka ne myaka ikaleta Bufumu bwa Lesa.
[Kipikichala pa peja 12]
Bantu bavula bakatambula bumi bwa myaka ne myaka bwa kwikala panopantanda. Nanchi mukekala pa bano nyi?