Nanchi Bupopweshi Bwakonsha Kwimulengela Kwikala na Byubilo Byawama Nyi?

Sylvia waingilanga mingilo ya kukwasha bakolwa waambile’mba: “Nayanga kusukulu na bavula baambanga amba twi bena kilishitu. Bino babepanga pa kunemba mpeso ne kwingijisha bizhima. Bupopweshi kechi bwibalengejile kupimpula byubilo byabo ne.”

Mwanamulune umo wa jizhina ja Lionel waambile’mba: “Bantu bo ñingila nabo batemwa kubepa ne kutuma foni kuba’mba bakolwa bino saka babula kukolwa. Baji na bupopweshi ko baya bino kechi balondela byo bafunda ne. Bajitu nobe kipe kya mu nzubo kyo babula kwingijisha.”

Bupopweshi kechi bufunjisha bantu kwikala na byubilo byawama ne. Bantu bavula lelo jino “bebepekezha kwikala na munema wa kunemeka Lesa” bino “bakana bulume bwa uno munema.” (2 Timoti 3:5) Bantangi ba bupopweshi babo kechi baji na byubilo byawama ne, kabiji kechi bafunjisha bantu babo kwikala na byubilo byawama bya mu binembelo ne. Kyo kyalengela bantu bavula kwitabila kuba’mba Lesa kechi watako muchima ku bwikalo bwa bantu ne.

NANCHI BAIBOLO UFUNJISHA AMBA KA?

Baibolo umwesha kuba’mba Lesa wituta muchima kabiji bintu byo tuba bimukunza bingi. Kimye bena Isalela kyo basatukijile Lesa, “bamufichishe ku muchima.” (Salamo 78:40) Nangwa byonkabyo, kwikala “lusekelo lukatampe mwiulu” inge ngubabibi wapimpula byubilo byanji byatama. (Luka 15:7) Umvwe muntu wayuka byubilo byawama biji na Shetu wa mwiulu, kino kimulengela butemwe bwa kutemwa Lesa kubailako, kutemwa bintu byatemwa Lesa ne kushikwa bintu byo ashikwa.—Amosi 5:15.

NANCHI BAKAMONYI BA KWA YEHOBA BOBA BYEPI MU KINO?

Pepala wa byambo wa Deseret News of Salt Lake City, Utah, U.S.A waambile’mba: “Bakamonyi ba kwa Yehoba bakwasha bantu kuyuka bya kwikala mu bisemi, kukwasha bakwabo ne kwikala bangikazhi bakishinka.” Uno pepala wanungilepo kuba’mba: “Bano bantu balondela mafunde amba pa byubilo byawama. Bayuka kuba’mba kupepa fwanka, kukizhamo kutoma, kwingisha michi mu jishinda jabula kufwainwa, kisela kya kuchika, bukyendeende ne kwilaala kwa banabalume nangwa banabakazhi bonka bonka byonauna bulunda bwabo na Lesa.”

Kuyuka byubilo bya Lesa kukwasha byepi Bakamonyi? Sylvia ye twaambapo kala waambile’mba: “Bantu bengila mingilo ya kulama bakolwa beba bingi michi. Kino kyapeela bingi kwibalondela. Byo nayuka Yehobaa byo amona bwivi, kinkwasha bingi kuba byawama. Nji na lusekelo kabiji jiwi jami ja mu muchima jatoka.” Sylvia washiinwa kuba’mba kulondela byo afunda ku bupopweshi kwamulengela bwikalo bwanji kuwama.

[Tubyambo twa mushi]

[Mabulañano pa peja 6]

Nanchi bantangi ba bupopweshi bakwasha bantu babo kulondela mizhilo ya Lesa yamba pa byubilo byawama nyi?