Nanchi Kujipo Bupopweshi bo Mwafwainwa Kuketekela Nyi?
Umvwe kya kuba mwalefulwa na mambo a bupopweshi bumo, kyakonsha kwimukatazha kuketekela bupopweshi buji bonse. Bino yukai kuba’mba kuji bupopweshi bwa kine bo mwafwainwa kuketekela. Kimye Yesu kyo ajinga pano pa ntanda, wajinga na jibumba ja baana ba bwanga ba kishinka kabiji wibafunjishe kulondela mizhilo ya Lesa. Baana ba bwanga ba kine ba kwa Kilishitu ko kuba’mba bantu bakeba kulondela mafunde a bwina Kilishitu ko baji ne lelo jino. Pano mwakonsha kwibatana kwepi?
Estelle ye twaambapo kala mu kibaba kya kutendekelako waambile amba: “Nayukile bya mu Baibolo kimye kyo natendekele kufunda na Bakamonyi ba kwa Yehoba. Kechi papichiletu ne kimye kyabaya ne, nayukile mwatala byambo biji pa Yoano 8:32 bya kuba’mba: “Mukayuka bukine, ne bukine bukemukasulula.”
Ray watongolwapo kala waambile’mba: “Kupichila mu kufunda Baibolo na Bakamonyi ba kwa Yehoba, nayukile kuba’mba Lesa kechi ye ulengela bantu kuyanda ne. Naumvwine bulongo kuba’mba nangwa kya kuba Lesa waswisha bubi pa kino kimye, walaya kuba’mba katatakatu akebupwishe.”
Bino kinkatazha bingi kuba byawama mu ntanda muji bantu baji na byubilo byatama. Bino kyakonsheka. Bantu bavula bakeba kwibakwasha kumvwisha biji mu Baibolo. O ene mambo Bakamonyi ba kwa Yehoba o bafunjishisha bantu Baibolo mwaya ntanda yonse kyatutu. Mulungu ne mulungu, bantu bavula babena kufunda bifunjisha Baibolo. Kabiji kino kibalengela, kufwenya kwipi na Mulenga wabo kabiji babena kwikala bwikalo bwa lusekelo.a
Kimye kikwabo kyo mukasambakana na Bakamonyi ba kwa Yehoba mukebepuzhe ene mambo o baketekela bupopweshi bwabo. Yukai bulongo byo bafunjisha ne bishinka byamba pe abo. Apa bino mwifuukwilepo anweba bene umvwe kujipo bupopweshi bo mwafwainwa kuketekela.
[Tubyambo twa mushi]
a Umvwe mukeba kuyukilapo byavula, monai buku wa kuba’mba Nanchi Baibolo Kine Ufunjisha’mba Ka? Wanembwa na Bakamonyi ba kwa Yehoba.
[Mabulañano pa peja 7]
Mambo ka a kubujila kwipwizha Bakamonyi ba kwa Yehoba ene mambo o baketekela bupopweshi bwabo?