Mutanchi Wa Kupwila Kwa Mwingilo

Mulungu wa Kutendeka December 10

Lwimbo 205

Mamini. 13: Byakubijika byapakipwilo. Byakubijika byasalululwa mu Mwingilo Wetu wa Bufumu. Kwingijisha ñambilo iji papeja 8, mweshai byakutambika (1) Kyamba kya Usopa January 1 ne (2) Awake! December 22.

Mamini. 12: Byomwakajilwa pakipwilo kyenu.

Mamini 20: “Mapesho Afuma Mukusanchila Butemwe bwa Yehoba—Lubaji 2.”a Pakwisamba mapalagalafu 2-6, ipuzhai kipwilo kishimikizhe byalutundaiko byobamwene mubusapwishi bwakushukilwa, mukunemba makalata, nemukusapwila pafoni. Nengezhezhai jimo kuba’mba bakamweshepo kimo nangwa bibiji mubuno busapwishi bobaubile.

Lwimbo 222 nelulombelo lwakupezhako.

Mulungu wa Kutendeka December 17

Lwimbo 211

Mamini. 10: Byakubijika byapakipwilo. Sawakya wamaakaunti. Tongolai byanengezhewa mwingilo wamubujimi wiikajila pa December 25 nepa January 1.

Mamini. 22: “Ambainga Bulongo Mambo a Lesa.”b Mweshaipo nekimwesho kyawama bulongo byakwingijisha ñambilo iji mupalagalafu 4. Kabiji mweshai kimwesho kyañambilo yawama yomubakosesheshengamo nangwa kutekenesheshamo bantu baakamwa namambo abyubilo bibena kumweka muntanda ano moba. Mwakonsha kushimikizhapo kyamwekele kimo kipi. Shikishai luonde lwambe kwingijisha Baibolo kyokulengela bantu kuta muchima kubusapwishi busapwilwa.

Mamini. 13: ‘Mwakwata Baibolo wenu.’ Kwisamba naluonde kufuma mubuku wa Ukupelulula, mapeja 272-273. Umvwe bantu kechi bakeba kutelekane namambo akuba twingijisha Baibolo wa New World Translation, twakonsha kwamba’mbaka? Bujilai jimo basapwishi kwinengezha kwamba muñambilo yabo bene kushimikizha ñambilo yakukumbwilamo yatongolwa.

Lwimbo 225 nelulombelo lwakupezhako.

Mulungu wa Kutendeka December 24

Lwimbo 218

Mamini. 10: Byakubijika byapakipwilo. Lumbululai buku wakutambika mu January nemabuku ajipo pakipwilo. Kwingijisha ñambilo iji papeja 8, mweshai bimwesho bibiji byakutambika magazini, kimo kimweshe byakutambika Kyamba kya Usopa, kya January 1, kikwabo nakyo kimweshe byakutambika Awake!, wa January 8. Ingijishai mwanyike kumweshapo kimo.

Mamini. 10: “Sukulu ya Mwingilo wa Teokalasi Yamu 2002.” Jashi nautangijila sukulu. Koseshai bonse kwibikako kwamba majashi abo obebapa musukulu.

Mamini. 25: “Namambo Abantu Babena Kuya Nakuvujilako Mazubo a Bufumu Avula Abena Kukebewa.” Mepuzho nemikumbu kwisamba pamapalagalafu 1-17 mukyamukachi. Konkomwenai paene mambo bakulumpe mukipwilo obafwainwa kumonañena na Jibumba ja Bantungi ba Mazubo a Bufumu kimye kyobabena kulanguluka pamwingilo wakutatula kushimika Nzubo ya Bufumu. Ambai pabuneme bwakwikala nabamingilo bavula, kabiji ikalai namapepala a Kingdom Hall Volunteer Worker Questionnaire. Inge kimye kokiji, shimikizhai nebyamwekele kunyumakwe byalamata kumwingilo wakushimika Nzubo ya Bufumu mumpunzha yenu.

Lwimbo 24 nelulombelo lwakupezhako.

Mulungu wa Kutendeka December 31

Lwimbo 140

Mamini. 8: Byakubijika byapakipwilo. Vululaiko basapwishi kuleta masawakya amwingilo wamubujimi a December. Umvwe kipwilo kyenu kikapimpula kimye kyakupwila mumwaka wiya, koseshai bonse kukapwilanga kimye kyonse pakyonkakyo kimye kyakatataka. Bulaiko nebonse baji nalusekelo lwakufunda bukine nebabula kutanwa-tanwako kuyuka luno lupimpu.

Mamini. 12: Nemekeshai Bakulumpe Mukipwilo Monka Mwibafwainwa Munema. Bankwasho mukipwilo babiji nangwa basatu besambe byambo biji mu Kyamba kya Usopa, kya June 1, 1999, mapeja 18-19. Bambe pamingilo yavula bakulumpe mukipwilo yoboba, kuvwangako nemingilo yakumubiji, kulama bisemi byabo nemingilo yateokalasi. Kimo kimye pakonsha kwikala kisela kyakumona mingilo yabo nobe yakukaishakaishatu. Bakulumpe mukipwilo baji namwingilo mukatampe bingi kabiji bakebewa bukwasho nekwingijila nabo pamo. Tongolai mashinda atweba bonse motwakonsha kwibatundaikila, kwibapezhezhako mwingilo wabo, nekulondela mikambizho yabo. Bankwasho betabizhe’mba bakulumpe mukipwilo babena kwingila mwingilo wanema bingi kabiji bafwainwa “kwibanemekesha.”—1 Tesa. 5:12, 13.

Mamini. 25: “Abya Mubena Kunowa Byawamanyi?” Jashi jakwisamba naluonde nebimwesho. Utangijila mwingilo wamubujimi ambe jino jashi. Wafwainwa kutanga nekumvwisha bulongo nkalata ya October 15, 1999, yanembelwe Ku Bipwilo Byonse. Basapwishi nangwa bapainiya bapilwa bobafwainwa kumwesha bimwesho byanengezhiwa bulongo.

Lwimbo 219 nelulombelo lwakupezhako.

Mulungu wa Kutendeka January 7

Lwimbo 20

Mamini. 10: Byakubijika byapakipwilo.

Mamini. 20: Bomfyeni Ubumi Bwenu Bwino. Bamukisemi besambe biji mu Kyamba kya Usopa, kya August 15, 1998, mapeja 8-9. Bashabo basaka kisemi kwingila nkito ikebaletela lusekelo mukifulo kyakwibafichisha kumuchima. Bapituluke mu mafunde amu Binembelo aji muuno mutwe ubena kwamba pabyobafwainwa kutwajijila balusekelo, kukonkomwena pabuneme bwakwikala bamilangwe, kuyuka bintu byanema byafwainwa kutangizhako mubwikalo nekuketekela mwi Yehoba. Batongaule lupimpu lobafwainwa kuba mubintu bimo mukisemi.

Mamini. 15: Kutala-tala Bulongo Nzubo Yetu ya Bufumu. Jashi namukulumpe mukipwilo. Monai Nzubo ya Bufumu byoibena kumwekana. Ñanyi milanguluko yomubena kulangulukapo yakuwamishilamo mpunzha, Kivuluko sakikyangye kufika? Bika byafwainwa kuwamishiwa akyo kimye saka kikyangye kufika? Lumbululai kipwilo byokyakonsha kukwasha. Konkomwenai pabuneme bwakumona kuba’mba mpunzha yotupwilapo yaikala yabuuya kabiji yamushingi mambo kenzubo ya Yehoba.—Sala. 84:1.

Lwimbo 126 nelulombelo lwakupezhako.

[Tubyambo twa mushi]