Kakitenguluzha Ka Mepuzho

◼ Mu ñanyi mashinda mo twakonsha kukwashisha bapainiya?

Mu mwaka wa mwingilo wa 2009, kuzhokoloka ntanda yonse, balongo ne banyenga nobe 800,000 baingijileko mwingilo wa bupainiya bwa kimye kyonse ne bwiikajila. Baji mu mwingilo wa kimye kyonse bengijisha kimye kyabaya, bulume ne nsabo yabo kutwajilamo palutwe mwingilo wa kusapwila mambo awama a Bufumu. (Mana 3:9) Kwibikako kwabo kumutokesha bingi Yehoba ku muchima. Twakonsha kumwesha byepi amba twibamona byonka bibamona Yehoba kabiji twakonsha kwibalengela byepi kwikala na lusekelo ne na bulume bwa kuchinchika mu uno mwingilo?

Byambo byawama byakonsha kwibatundaika kutwajijila mu mwingilo wa bupainiya. (Mana 25:11) Nanchi twakonsha kumonapo kimye mu mulungu kya kwingila nabo mu mwingilo nyi? Inge tubena kwingijila pamo mu mwingilo, mu kifulo kya kwingijisha motoka wabo, kyakonsha kuwama kwingijisha wetu. Inge twaingijisha motoka wabo, kijitu bulongo kwibapa mali. (1 Ko. 13:5; Fili. 2:4) Kabiji tumwesha ne kuba’mba twibata muchima kupichila mu kwibobila kifyele, pa bimye bimo ne kwibetako ku mazubo etu.—1 Pe. 4:8, 9.

Binembelo byamba’mba Yehoba ukebamwena bya mu bwikalo aba batangizhako Bufumu bwanji. (Sala. 37:25; Mat. 6:33) Jishinda jimo jo ebakwashishamo ke kupichila mu bwanabwankazhi bwetu bwa bwina Kilishitu. (1 Yoa. 3:16-18) Kya kine kuba’mba bapainiya kechi baketekela bakwabo kwibakwasha ne. Kabiji kimye kimo kechi bakonsha kubula bakwabo byo bakajilwa ne. Nangwa byonkabyo, inge twibata muchima tukayukanga kimye kyo ‘bakajilwa’ ne kwibakwasha.—2 Ko. 8:14, 15.

Fibe mwanamukazhi wabambakene mu mwingilo wa kusapwila wajinga mu kipwilo kya Kenkelea kya bena Kilishitu batanshi byo ayile ku Loma, Paulo watundaikile balongo ba mu Loma amba: “Mumutambule bulongo mwi Nkambo, mwafwainwa bazhijikwa, ne kumukwasha mu byonse byo akemusakilanga.” (Loma 16:1, 2) Byonka byo baubanga kala, netuwa twayai tukwashenga bapainiya ba kimye kyonse ne beikajila baji mu kipwilo babena kwingila na mukoyo mwingilo wa kusapwila mambo awama.—Byu. 5:42.