Byambo Bikwabo bya mu Mutanchi wa Kupwila kwa Bwikalo ne Mwingilo
© 2024 Watch Tower Bible and Tract Society of Pennsylvania
MAY 6-12
BYA BUNEME BIJI MU MAMBO A LESA SALAMO 36-37
“Kange Uzhingile na Mambo a Bantu Babi Ne”
Bufumu bwa Lesa byo Bukafika, Ñanyi Bintu byo Bukafumyapo?
4 Bantu batama betukatazha byepi? Mutumwa Paulo wanembele’mba mu ano moba etu kukeya “bimye byakatazha,” ne kuba’mba: “Bantu babi ne ba bujimbijimbi bakataminangakotu.” (2 Timo. 3:1-5, 13) Nanchi mwamona bino byambo bya bungauzhi byo bibena kufika nyi? Atweba bavula bakitulukukapo kala ku bambanzhi, nangwa ku bantu bashikwa ba mishobo ikwabo. Bamo ke bambanzhi besololatu patoka, bino bakwabo befya nobe babena kwingila mingilo yawama bino saka babena kuba bakwabo nshiji. Nangwa inge kechi betubapo kala byatama ne, bino byubilo byabo bituletela bingi bufinda. Kitufichisha bingi ku muchima inge twamona bintu byatama byuba bano bantu. Kileta bingi bulanda inge twamona bano bambanzhi byo bayanjisha baana babacheche, bakote, ne bantutu bakwabo babula bulume bwa kwipokolola. Bantu ba uno mutundu baji na michima yatama, ya bunyama ne bundemona. (Yako. 3:15) Kyawamatu ke kya kuba’mba Mambo a Yehoba etutekenesha bingi.
Yehoba Upesha Bantu Balekelako Bakwabo Mambo
10 Umvwe twatwajijila kuzhingila mufuma byatama. Kutwajijila kuzhingila kujitu nobe twasenda kintu kyanema. Yehoba ukeba atweba kubula kutwajijila kuzhingila pa kuba’mba twikale na lusekelo. (Tangai Efisesa 4:31, 32.) Yehoba witukambizha’mba: “Kange uzhingile nangwa kubuuka bukaji ne.” (Sala. 37:8) Tukamwenamo bingi inge twalondela luno lujimuno. Inge twatwajijila kuzhingijila muntu wituzhingijishe twakonsha kukolwa ne kuleka kulanguluka bulongo. (Maana. 14:30) Inge twatwajijila kuzhingila, atweba yetu twikala mu lukatazho, kechi muntu wituzhingijisha ne. Kijitu nobe kutoma bulembe. Watoma bulembe ye wikala mu lukatazho. Onkao mambo, umvwe ke tulekeleko bakwetu mambo, tumwenamo byawama bingi. (Maana. 11:17) Twikala mu mutende kabiji tutwajijila kwingijila Yehoba na lusekelo.
‘Sangalelai Mwi Yehoba’
20 Kepo “bakimote bakaswana ntanda.” (Masalamo 37:11a) Pano bano “bakimote” bo ba ñanyi? Kyambo kyatuntululwa’mba: “kimote” kyafuma ku kyambo kilumbulula “kuyanjishiwa, kupelulwa, kusebanyishiwa.” Ee kine, “bakimote” ke boba bepelula na kupembelela Yehoba kufumyapo nshiji yonse yo bebobila. “Bakasangalela mu kuvula kwa mutende.” (Masalamo 37:11b) Nangwatu luno tutana kuvula kwa mutende mu paladisa wa ku mupashi wa kipwilo kya bena Kilishitu bakine.
Bishinka Bikwabo Byanema
it-2 445
Katumbatumba, Mutumba
Kushikimana, kwikala kikupu, nangwa’mba kutumbalala. Mitumba imenako kushinkimana ne kwikala kikupu. (Is 54:10; Hab 3:6; esakanyaiko Sl 46:2.) Onkao mambo, nyimbi wa masalamo byo aesakenye bololoke bwa Yehoba ku “mutumba” (Sl 36:6) kyamweka waambilenga pa kushikimana kwa bololoke bwa Yehoba. Nangwa na mambo a kuba’mba mitumba yalepa bingi, ne bololoke bwa Lesa byobyo bwakila bololoke bwa bantu. (Esakanyaiko Is 55:8, 9.) Nsanyi yafukama ya butanu na bubiji ya bukaji bwa Lesa byo yaitulwilwe, Lumwekesho 16:20 waamba’mba: “Mitumba nayo kechi yamwekele ne.” Kino kibena kulumbulula’mba nangwatu bintu byatumbalala nobe mitumba kechi bikapuluka bukaji bwa Lesa ne.—Esakanyaiko Ye 4:23-26.
TAIKO MUCHIMA KU MWINGILO WA KUSAPWILA
“Nga Kinembelo kya Salamo 37:4 Kyatala Mwepi?”
ijwbv 45
BINEMBELO BYA MU BAIBOLO BYALUMBULULWA
Salamo 37:4b—“Sangalela mwi NKAMBO”
“Sangalela mwi Yehoba, ne aye ukakupa bintu bikeba muchima wobe.”—Salamo 37:4, Binembelo bya Ntand Ipya.
“Sangalela mwi NKAMBO, ne aye ukakupa bintu bikeba muchima wobe.”—Salamo 37:4, English Standard Version.
Bilumbulula Salamo 37:4
Nyimbi wa masalamo watundaikile bapopweshi ba Lesa kuba’mba inge bakosesha bulunda bwabo ne Lesa bakekala na lusekelo. Bonse balunda nanji bafwainwa kuketekela kuba’mba Yehoba Lesa ukebapa byonse byo bakeba.
“Sangalelai mwi Yehoba.” Bino byambo byakonsha ne kutuntululwa’mba “Ikalainga na lusekelo lukatampe mwi Yehoba,” “Ikalainga na lusekelo pa kwingijila NKAMBO,” nangwa’mba “Ikalainga na lusekelo na mambo a milaye nkambo yo emulaya.” Kino kibena kulumbulula’mba twafwainwa kwikalanga na “lusekelo lukatampe” byo tuji bapopweshi ba Lesa wa kine. (Salamo 37:4, tubyambo twa panshi) Mambo ka o twakonsha kwambila bino?
Bapopweshi ba Yehoba bamwena bintu monka mwibimwena Yehoba, kwesakana na byaamba Baibolo. Kechi bayukatu Lesa ne, bino bamona ne buneme bwa kumukookela. Na mambo a kino batwajijila kwikala na jiwi ja mu muchima jatooka kabiji bachinuzhuka bizumba byakonsha kwibaletelela. (Byambo bya Maana 3:5, 6) Kechi bazhingila nangwa kumvwina kichima babi inge baikala bulongo ne. (Salamo 37:1, 7-9) Bantu ba Lesa baji bingi na lusekelo mambo bayuka kuba’mba Lesa katatakatu akafumyepo makatazho onse ne kufweta bakalume banji bakishinka pa byubilo byabo byawama. (Salamo 37:34) Kabiji kikwabo kibaletela bingi lusekelo ke kuyuka kuba’mba Shabo wa mwiulu wibatala bulongo.—Salamo 5:12; Byambo bya Maana 27:11.
“Ukakupa bintu bikeba muchima wobe.” Bino byambo byakonsha ne kutuntululwa’mba “ukakumbula milombelo yobe” nangwa’mba “ukakupa bintu byo ukebesha.” Kishinka ke kya kuba’mba Yehoba kechi uketupa byonsetu byo tulomba ne. Byonkatu biji nsemi wawama, Yehoba naye wayuka bintu byawamina baana banji. Kununga pa kino, milombelo yetu ne byubilo byetu byafwainwa kuswañana na mizhilo ne kyaswa muchima wanji. (Byambo bya Maana 28:9; Yakoba 4:3; 1 Yoano 5:14) Inge byobyo tuba, ko kuba’mba twafwainwa kushiinwa kuba’mba inge twalomba kwi aye ‘umvwa milombelo,’ uketumvwa.—Salamo 65:2; Mateo 21:22.
Kyo Babena Kwambapo pa Salamo 37:4
Mfumu Davida wa bena Isalela bakala ye wanembele Salamo 37. Wanembele uno Salamo mwayila ndonda ya bisopelo, nangwa’mba mu bunsansawilo.
Davida bamubile bingi nshiji. Mfumu Saulo ne bakwabotu bakebelenga kumwipaya. (2 Samwela 22:1) Nangwa byonkabyo, Davida watwajijile kuketekela mwi Lesa na wanji muchima yense. Davida wayukile’mba Yehoba ukakambula balwanyi banji. (Salamo 37:10, 11) Nangwa kya kuba baikele bulongo, bino bajingatu “nobe munyemvu” mambo wayukile’mba bakazhiya.—Salamo 37:2, 20, 35, 36.
Salamo 37 waamba pa bintu byawama bimona bantu bakookela Lesa ne bintu byatama biletelela balengulula mizhilo yanji. (Salamo 37:16, 17, 21, 22, 27, 28) Nyimbi wa masalamo witukwasha kwikala na maana ne kwikala bantu baitabilwa kwi Lesa.
Tangai Salamo 37 mu Baibolo wa Binembelo bya Ntanda Ipya wa kufundamo. Uno Baibolo wapela bingi kutanga, kuji ne ye batangila jimo, muji byambo byo balumbulula, kabiji wamwesha binembelo byaamba pa kintu kimo, muji bipikichala, mavidyo ne mamapu.
Tambai vidyo mwipi walumbula biji mu buku wa Masalamo.
MAY 13-19
BYA BUNEME BIJI MU MAMBO A LESA SALAMO 38-39
Kange Mutwajijile Kukizhamo Kwizhachisha Ne
‘Meso Enu Atalengatu Kulutwe’
12 Tangai 1 Yoano 3:19, 20. Bonsetu bimye bimo twizhachisha pa bintu bimo. Bamo bezhachisha pa bintu byo baubile saka bakyangye kufunda bukine. Bakwabo bezhachisha na mambo bintu byo balubankenye saka babatizhiwa kala. (Loma. 3:23) Kya kine kuba’mba tukeba kuba byawama, bino “atweba bonse twituntula javula.” (Yako. 3:2; Loma 7:21-23) Nangwa kya kuba kwizhachisha kechi kumvwanyika bulongo ne, bino kwakonsha kwitukwasha. Mambo ka? Mambo kwizhachisha kwakonsha kwitulengela kupimpula bwikalo bwetu ne kufuukulapo kubula kubwezhapo bintu byo twalubankeny.—Hebe. 12:12, 13.
13 Pano bino, kukizhamo kwizhachisha, ke kutwajijilatu na kumvwa kutama ku muchima nangwa kya kuba twalapijile kabiji Yehoba witulekelako mambo etu. Kwizhachisha kwa uno mutundu kechi kwawama ne. (Sala. 31:10; 38:3, 4) Mambo ka? Langulukai pa nyenga umo watwajijiletu na kwizhachisha pa mambo o alengele kala. Waambile’mba: “Nalangulukanga’mba mbena kutayatu kimye kwingila na ngovu mu mwingilo wa Yehoba mambo kampe kechi nkapuluka ne.” Ne atweba bavula yo milanguluko yo twakonsha kwikala nayo. Onkao mambo, kyanema bingi kuba’mba twashinda kano kakose ka kukizhamo kwizhachisha. Mambo ka? Mambo Satana wakonsha kusangalala bingi inge twaleka kwingijila Yehoba, bino saka etulekelako mambo.—Esakanyaiko 2 Kolinda 2:5-7, 11.
w02 11/15 20 mafu. 1-2
Twakonsha Kwikala Byepi Bwikalo Butokesha Yehoba ku Muchima mu Moba a Bumi Bwetu?
1 Moba bumi bwetu akepa kabiji apwa bingi bukiji. Nyimbi wa masalamo byo alangulukilenga pa byaipipa bumi, walombele’mba: “Anweba Yehoba, nkwashai ngyuke bikekala mpelo yami, ne kuvula kwa moba ami, pa kuba’mba ngyuke bumi bwami byo bwaipipa. Kine, mwalengela moba a bumi bwami kukepa; ne myaka ya bumi bwami yo yatutu kwi anweba.” Davida watele bingi muchima pa kwikala bwikalo butokesha Yehoba ku muchima, mu byambo ne mu byubilo. Waambile byo akinkile manungo mwi Yehoba amba: “Anweba yenu naketekelatu.” (Salamo 39:4, 5, 7) Yehoba waumvwine lulombelo lwanji. Wamufwetele Davida kwesakana na bwikalo bwanji.
2 Twakonsha kupayankana ne kulabikwa na bya kutabataba bya pa juba pa juba mambo bya kuba byavula bingi. Kwikala na byakuba byavula kwakonsha kwitulengela kwikala na bijikila, kikatakata inge bya kuba byavula bino kimye kitukepela kya kwibingilamo. Pano nanchi bintu byo twatapo muchima byo byatelepo muchima ne Davida nyi? Nanchi mwata muchima pa kwikala bwikalo bwa kutokesha Yehoba ku muchima nyi? Kwambatu kine, Yehoba umona byonse byo tuba kabiji uyuka ne kitulengela kwibyuba. Kala papita ne myaka 3,600, kufuma kimye Yoba mwanamulume waakamwanga Lesa po ayukijile kuba’mba Yehoba umona byonse byo tuba mu bwikalo bwetu. Yoba wiipwizhe’mba: “Nkamukumbula’mba ka inge akantotolweshe?” (Yoba 31:4-6, 14) Kutwajijila kuba bintu byanema bitukwasha kupopwela Lesa, kukookela mikambizho yanji ne kwingijisha kimyetu bulongo kuketukwasha kwikala bwikalo bwa kutokesha Yehoba ku muchima mu moba a bumi bwetu onse. Pano twayai twisambe pa bino bintu.
Kuwamisha Bulunda Bwenu ne Yehoba
4 Isambainga ne Yehoba bimye byavula. Shenu wa mwiulu wayuka kuba’mba inge mwatwajijila kwizhachisha pa bintu byatama byo mwaubile kyakonsha kwimukatazha kulomba kwi aye. (Loma 8:26) Nangwa byonkabyo, “lombainga na mukoyo” kwi Yehoba byo mubena kukebesha kukosesha bulunda bwenu ne aye. (Loma 12:12) Ba Andrej bavuluka kuba’mba: “Nezhachishenga bingi ne kumvwa bumvu. Bino kimye kyonse inge nalomba, ino milanguluko yakepelenga. Kabiji naikele na mutende wa mu milanguluko.” Inge kechi mwayuka bintu byo mwafwainwa kulombapo ne, langulukai pa milombelo yalombele Mfumu Davida byo alapijile yanembwa mu Salamo 51 ne 65.
Bishinka Bikwabo Byanema
Ikalai Baketekelwa
16 Umvwe tukeba’mba bakwetu betuketekele, twafwainwa kwikala na kino kyubilo kya kwikanya. Kino kyubilo kyakonsha kwitukwasha kulama kanwa ketu ne kubula kwamba bintu bitubuula balongo ne banyenga betuketekela byo twafwainwa kubula kubuulako bangi. (Tangai Byambo bya Maana 10:19.) Kyakonsha kwitukatazha bingi kulama kanwa ketu nge kyakuba tubena kwingijisha intaneti kwisambilapo na bakwetu. Umvwe ne kujimuka ne, twakonsha kwamba bintu byo twafwainwa kubula kubuulako bantu bangi kwakubula nangwa kuyuka ne. Kino kyakonsha kulengela bantu bavula kuyuka bino byambo kabiji kechi twakonsha kwibabuula byo bafwainwa kwingijisha bino byambo nangwa kuyuka lukatazho lwakonsha kufumamo ne.
17 Kabiji kulama kanwa ketu kwakonsha kwitukwasha kuzhindamapo ne kubula kusolola bintu byakonsha kubika balongo ne banyenga mu lukatazho. Twakonsha kuzhindamapo inge kyakuba bakapokola babena kwitutebawizha kukeba kuyuka byavula pa balongo ne banyenga baji mu mpunzha nangwa mu kyalo mo bakanya mwingilo wetu. Twafwainwa kuba byonka byo baambapo mu jifunde ja kuba’mba “nkakasa kanwa kami na lutambo” inge kyakuba paji ubena kwitutebawizha nangwa ubena kukeba kuyuka bishinka pa balongo ne banyenga. (Sala. 39:1) Nangwa inge kyakuba tubena kwisamba na ba mu kisemi kyetu, balunda netu, balongo ne banyenga, nangwatu muntu mukwabo, twafwainwa kuba bintu byakonsha kulengela bakwetu kwituketekela. Kabiji pa kuba’mba bakwetu betuketekele, twafwainwa kulama kanwa ketu.
MAY 20-26
BYA BUNEME BIJI MU MAMBO A LESA SALAMO 40-41
Mambo ka o Twafwainwa Kukwashinga Bakwetu?
Bampanyi Bekala Bingi na Lusekelo
16 Bantu bapana kechi boba bino kuba’mba bakwabo nabo bakebapepo bimo ne. Yesu wayukile kino byo afunjishe’mba: “Umvwe wanengezha kijiilo ita bayanji, basunkuta, balemana ne bampofu; kabiji ukekala na lusekelo, mambo abo kafwako kyo bakakufweta ne.” (Luka 14:13, 14) Baibolo waamba’mba: “Muntu upana bakamupesha.” Kabiji waamba ne kuba’mba: “Ye mwine wa lusekelo awa ukwasha muyanji.” (Maana 22:9; Sala. 41:1) Twafwainwa kwikala bampanyi mambo kupana kwituletela bingi na lusekelo.
17 Kimye Paulo kyo aambilenga pa byambo bya kwa Yesu bya kuba’mba, “mu kupana mufuma lusekelo lukatampe kukila mu kutambula,” Paulo kechi waambilengatu pa kupana bintu bya ku mubiji ne, waambilenga ne pa kwitundaika, kwizhikijila ne kukwasha bakajilwa. (Byu. 20:31-35) Mu byambo ne mu byubilo, mutumwa witufunjishe kwingijisha bulongo kimye, ngovu yetu, kuta muchima bantu ne kwibatemwa.
18 Bashayuka ba sayansi bafunda pa bwikalo bwa bantu bataana kuba’mba kupana kulengela bantu kwikala na lusekelo. Kibaaba kimo kyaambile’mba, “bantu bekala bingi na lusekelo inge baubila bakwabo byawama.” Bashayuka bataana kuba’mba inge twakwasha bakwetu, twikala bingi na lusekelo. Kabiji bataana ne kuba’mba bantu bepana kwingijila bakwabo pa kuba’mba bekale na butuntulu bwa mubiji bwawama. Pano bino, byo bataana kechi kukumya ne, mambo Mulenga wetu wa butemwe aye Yehoba witubuula kimye kyonse amba kupana kwituletela lusekelo.—2 Timo. 3:16, 17.
Yehoba Ukemukosesha
7 Bino inge mwakolwa, Yehoba ukemutekenesha ne kwimukwasha, byonkatu byo aubile ku bakalume banji ba kala. Mfumu Davida wanembele’mba: “Ye mwine wa lusekelo awa ukwasha muyanji; Yehoba ukamupokolola mu juba ja bya malwa. Yehoba ukamuzhikijila ne kumulama na bumi.” (Salamo 41:1, 2) Davida kechi walumbulwile’mba muntu wawama wajingako pa kyokya kimye wakwashanga bayanji kechi ukafwa ne. Pano Yehoba wakonsheshe byepi kukwasha uno muntu wawama? Davida walumbulwile’mba: “Yehoba ukamukosesha mu kimye kya misongo yanji pa mwanya; mukamukwasha mu kukolwa kwanji.” (Salamo 41:3) Yehoba wayuka onse makatazho apitamo bakalume banji, kabiji kechi wibalubako ne. Wakonsha kwibalengela kuchinchika ne kwibapa maana. Kabiji Yehoba walengele mubiji wa muntu mu jishinda ja kuba’mba wakonsha kwibuka aye mwine.
Ikalai na Kifyele Byonka Biji Yehoba
17 Kuyuka kuba’mba mu kubila bantu kifyele mufuma byawama kechi kyo kine kintu kyafwainwa kwimulengela kufunda kwikala na kifyele ne. Kine kintu kyafwainwa kwimulengela kuba kifyele ke kukeba kulondela ne kutumbijika mwine Nsulo ya butemwe ne kifyele, Yehoba Lesa. (Maana 14:31) Ye mwine uji na kifyele. Twayai tutwajijile kwibikako kubila bakwetu kifyele byonka byuba Lesa pa kuba’mba twitemwenga atweba bene na bene ne kwikala bulongo na bantu mu kimasamasa.—Nga. 6:10; 1 Yoa. 4:16.
Bishinka Bikwabo Byanema
it-2 16
Yehoba
Baibolo yense waimena pa kutumbijika bumfumu bwa Yehoba bwa pa bilengwa byonse. Kabiji kino kitulengela kuyuka kuba’mba kintu kyanemeka bingi Yehoba ke kuzhijika jizhina janji. Kuzhijika jizhina janji kulumbulula kufumyapo mwenga pa jizhina janji. Kuba bino mwavwangwa byavula. Bamalaika mwiulu ne bantu pano pa ntanda bafwainwa kunemeka jizhina janji. Kino kibena kulumbulula kunemeka Yehoba byo aji mfumu wa bilengwa byonse na muchima yense, ne kwipana kumwingijila na lusekelo na mambo a kumutemwa. Lulombelo lwalombele Davida kwi Yehoba lwanembwa pa Salamo 40:5-10 lumwesha muchima ye twafwainwa kwikala nanji ne bya kuzhijika jizhina ja Yehoba kya kine. (Monai mutumwa Paulo byo alumbulwile Kilishitu Yesu byo aubanga bino pa Bahebelu 10:5-10.)
MAY 27–JUNE 2
BYA BUNEME BIJI MU MAMBO A LESA SALAMO 42-44
Mwenaingamo Byawama mu Bimufunjisha Lesa
Bishinka Bikatampe Kufuma mu Buku wa Bubiji wa Masalamo
42:4, 5, 11; 43:3-5. Na mambo a makatazho, kimye kimo kampe twakonsha kwamuka ku kipwilo kya bwina Kilishitu pa ka kimye kacheche. Pano bino kuvuluka bintu byo twaubanga kwakonsha kwituletela bingi lusekelo. Nangwa kya kuba kwamuka ku kipwilo kwakonsha kwitulengela kumvwa mukose, kino kyonka kyakonsha ne kwituvululako amba Lesa ye kyetu kya kufyamamo kabiji twafwainwa kumupembelela.
Bya Kuba pa Kuba’mba Mwiyowenga Kutanga
2 LOMBAI: Kulomba kyo kintu kitanshi kyo twafwainwa kuba. (Sala. 42:8) Mambo ka? Twafwainwa kumonanga kutanga Mambo a Lesa amba nalo lubaji lwa mpopwelo yetu. O ene mambo o twafwainwa kulombela kwi Yehoba kwitukwasha kwikala na milanguluko yawama ne kwitupa mupashi wanji wazhila. (Luka 11:13) Ba Barbara baingila myaka yavula mu mwingilo wa bumishonale baambile’mba: “Ndomba kimye kyonse saka nkyangye kutendeka kutanga Baibolo. Panyuma ya kulomba, ñumvwa kuba’mba Yehoba uji ne amiwa kabiji byo mbena kuba byaitabilwa kwi aye.” Kulomba saka tukyangye kutendeka kutanga kwitukwasha kunengezha muchima kutambwila kajo ka ku mupashi.
w16.09 5 Mafu. 11-12
“Kange Ukookeshe Maboko Obe Ne”
11 Kabiji bitufunjisha Lesa pa kupwila, pa kubuñana, pa kushonkena ne mu masukulu a mwingilo wa Lesa bitukosesha bingi. Byo tufunda bitutundaika kwibikila bikonkwanyi bya kwingijila Lesa ne kwingila mingilo ya Lesa. (Sala. 119:32) Nanchi mukebesha kutanwa ku ano masukulu akonsha kwimukosesha nyi?
12 Yehoba wakwashishe bena Isalela kushinda bena Amaleki ne bena Etiopya kabiji wapele Nehemiya ne balunda nanji bulume bwa kupwisha mwingilo wa kushimukulula. Ne atweba Lesa uketupa bulume bwa kuchinchika inge kebetumanyike, kulengulula mambo o tusapwila ne kwikala na bijikila pa kwingila mwingilo wa kusapwila. (1 Pe. 5:10) Kechi twafwainwa kuketekela Yehoba kwitukwasha mu jishinda ja kukumya ne. Bino twafwainwa kwibikako. Kino kyavwangamo kutanga Mambo a Lesa moba onse, kunengezha ne kupwila, kwikala na lufunjisho lwa pa bunke, kupopwela kwa kisemi ne kulomba kimye kyonse kwi Yehoba. Kechi twafwainwa kuswisha bintu bikwabo kwitulengela kuleka kuba bintu byanengezha Yehoba bitutundaika ne kwitukosesha ne. Inge mwamona kuba’mba maboko enu apona, lombai Lesa kwimukwasha. Mukemwena mupashi wanji ‘byo akemukosesha ne kwimupa kizaku ne bulume bwa kwingila.’ (Fili. 2:13) Mwafwainwa kuba byepi pa kuba’mba mukoseshe maboko a bakwenu?
Bishinka Bikwabo Byanema
it-1 1242
Balubwala
Binembelo byaamba pa balubwala mu bukifwanyikizho. Yoba pa kulumbulula byatamine bwikalo bwanji waambile’mba naaluka ke “mulongo wa balubwala.” (Yoba 30:29) Nyimbi wa masalamo pa kulumbulula bumvu bwajinga na bantu ba Lesa byo bebashinjile mu nkondo, kyamweka saka abena kulanguluka pa balubwala byo baja bantu bo baipaya mu nkondo. (esakanyaiko Sl 68:23) Wajijile’mba: “Mwitushinjila mu mpunzha mwikala balubwala.” (Sl 44:19) Bena Babilona byo bataile muzhi wa Yelusalema mu kanumbwanumbwa mu 607 B.C.E., balengejile mu Yelusalema mwaikala kipowe kya nzala kyalengejile bainetu kukanama michima na baana babo. O ene mambo Yelemiya o aambijile’mba bainetu ba mu ‘ba balongo banji’ bakanamine kukila balubwala mambo balubwala balamanga bulongo baana babo.—Jil 4:3, 10.
JUNE 3-9
BYA BUNEME BIJI MU MAMBO A LESA SALAMO 45-47
Lwimbo Waamba pa Masongola a Mfumu
w14 2/15 9-10 Mafu. 8-9
Sangalalai na Mambo a Masongola a Mwana Mukooko!
8 Tangai Salamo 45: 13, 14a. Musongwa “wakumbanatu lukumo” bamutwala ku kijiilo kya masongola a ku bufumu. Pa Lumwekesho 21:2, uno musongwa “wavwajila bulongo mwata wanji” bamufwanyikizha ku muzhi utelwa’mba Yelusalema Mupya. Uno muzhi wa mwiulu uji na “lukumo lwa Lesa” ne kubeka kwanji “nobe kwa jibwe ja buneme kabiji nobe kubeka kwa jibwe ja yasipa.” (Lum. 21:10, 11) Buya bwa Yelusalema Mupya bebulumbulula bingi bulongo mu buku wa Lumwekesho. (Lum. 21:18-21) O ene mambo nyimbi wa masalamo o aambijile’mba, “wakumbanatu lukumo.” Wafwainwa kwikala bino mambo ano masongola a ku bufumu akekela mwiulu.
9 Musongwa bakamutwala ku Musongoshi, aye Mfumu wa Bumesiasa. Wamuwamisha musongwa ne ‘kumutokesha kupichila mu kumovwa na mema a mambo a Lesa.’ Uno musongwa ‘wazhila kabiji kechi uji na kaneneno’ ne. (Efi. 5:26, 27) Kabiji musongwa wavwala bivwalo byafwainwa ku kijiilo kya masongola. Wamweka bulongo! “Bivwalo byanji bebilukila na ngolode” kabiji “ukatwalwa kuji mfumu mu bivwalo byo balukilapo ne bya buya.” Pa masongola a Mwana mukooko, “mukazhanji bamuswishishe kuvwala kisapi kya linenyi kyawamisha, kyakema kabiji kyatoka. Kino kisapi kimenako byubilo byaoloka bya bazhijikwa.”—Lum. 19:8.
Buku wa Lumwekesho Waambapo’mba ka pa Bwikalo Bwenu bwa Kulutwe?
10 Pano nga Yehoba ukobapo byepi inge bantu banji bakebalukuke? Yehoba wakumbula’mba: “Bukaji bwami bukakolomoka.” (Ezi. 38:18, 21-23) Buku wa Lumwekesho kitango 19 waamba pa bintu bikwabo bikamweka. Yehoba ukatuma Mwananji kuya na kuzhijikila bantu banji ne kushinda balwanyi babo. “Mazhita a mwiulu” a bamalaika bakishinka ne ba 144,000 pamo ne Yesu bakalwa nkondo na Gogi wa Magogi. (Lum. 17:14; 19:11-15) Ñanyi bintu bikafuma mu ino nkondo? Bantu bonse ne mabumba balengulula Yehoba bakebonaunatu bonse pelu!—Tangai Lumwekesho 19:19-21.
11 Fwanyikizhai bantu bakishinka pano pa ntanda byo bakekala na lusekelo Lesa byo akazhiya balwanyi banji! Kinetu bakasangalala bingi! Nangwa kya kuba bilengwa bya mwiulu bikekala bingi na lusekelo Babilona Mukatampe byo bakamonauna, pano bino kuji ne kintu kikwabo kikebasangajika bingi. (Lum. 19:1-3) Ke “masongola a Mwana Mukooko” o baambapo mu buku wa Lumwekesho.—Lum. 19:6-9.
12 Pano ñanyi kimye kikekalako ano masongola? Saka bakyangye kulwa nkondo ya Amagedonyi, ba 144,000 bonse bakaya mwiulu. Kino kechi kyo kimye kikekalako masongola a Mwana Mukooko ne. (Tangai Lumwekesho 21:1, 2.) Masongola a Mwana Mukooko akekalako inge balwa nkondo ya Amagedonyi ne kushinda balwanyi ba Lesa bonse.—Sala. 45:3, 4, 13-17.
it-2 1169
Nkondo
Ino nkondo byo ikapwa, pano pa ntanda pa kekala mutende pa myaka kiumbi kimo. Nyimbi wa masalamo waambile’mba “[Yehoba] upwisha nkondo pa ntanda ponse. Uchimauna buta bwa mukanda ne jifumo; usoka makalaki a nkondo mu mujilo.” Buno bungauzhi bwafikile patanshi kimye Yehoba kyo aonawine bilwilo bya balwanyi babena Isalela ne kwibalengela kwikala mu mutende mu ntanda yabo. Yesu byo akashinda batundaika nkondo pa Amagedonyi, mutende wa kine popo akakumbana pano pa ntanda ponse. (Sl 46:8-10) Bantu bakapuluka bakekala na bumi bwa myaka ne myaka “bakabundanga mapoko abo ne kwialula ke bya kujimako,” kabiji “kechi bakafunda kulwa nkondo jibiji ne.” “Mambo kanwa ka Yehoba wa mabumba ko kaamba.”—Is 2:4; Mik 4:3, 4.
Bishinka Bikwabo Byanema
Bufumu bwa Lesa byo Bukafika, Ñanyi Bintu byo Bukafumyapo?
9 Pa ntanda pakashala ka inge bipamo byatama bebyonauna? Amagedonyi byo ikapwa, nanchi pa ntanda pakekalapo jibumba ja bantu nyi? Baibolo waamba’mba: “Tubena kutengela meulu apya ne ntanda ipya monka mwayila mulaye wanji, kabiji mu bino mo mukekala bololoke.” (2 Pe. 3:13) Meulu ne ntanda bijiko luno, ko kuba’mba makafulumende ne bipamo bya bantu bikonaunwa. Ñanyi bintu bikapingakenapo? Byambo bya kuba’mba “meulu apya ne ntanda ipya” bibena kulumbulula’mba kukekala kafulumende mupya ne bantu baoloka bakalamwanga na uno kafulumende. Buno Bufumu bukalamwanga ne Yesu Kilishitu bukamwesha bukalama bwaoloka bwa Yehoba, Lesa wa mutende. (1 Ko. 14:33) Onkao mambo, mu “ntanda ipya” mukekala mutende. Kukekala bantu bakalamanga bintu pa ntanda. (Sala. 45:16) Bakebatangijilanga kwi Kilishitu ne ba 144,000 bo akalamanga nabo. Akifwanyikizhai byo kikawamapo kimye bipamo bya bantu kyo bakebyonauna ne kupingizhapo kafulumende umo, wakwatankana kabiji wabula bubi!
TAIKO MUCHIMA KU MWINGILO WA KUSAPWILA
“Nga Kinembelo kya Salamo 46:10 Kilumbulula Ka?”
ijwbv 26
BINEMBELO BYA MU BAIBOLO BYALUMBULULWA
Salamo 46:10—“Nchinai ne Kuyuka’mba Yami Lesa”
“Nchinai ne kuyuka’mba yami Lesa. Nkatumbijikwa mu bisaka bya bantu; Nkatumbijikwa pano pa ntanda.”—Salamo 46:10, Baibolo wa Binembelo bya Ntanda Ipya.
“Zhindamaipo muyuke’mba Amiwa ne Lesa. Nkatumbijikwa mu mikoka ya bantu, nkatumbijikwa pano pa ntanda.”—Salamo 46:10, Buku wa Lesa.
Bilumbulula Salamo 46:10
Lesa utundaika bantu bonsetu kumupopwela ne kumunemeka mambo ye mfumu wakila pano pa ntanda ponse, ye wa bulume bonse kabiji bonse bakeba kwikala myaka ne myaka bafwainwa kuyuka kino kishinka.—Lumwekesho 4:11.
“Nchinai ne kuyuka’mba yami Lesa.” Ma Baibolo amo atuntulula byambo bitanshi mu uno mukuku’mba “zhindamai.” Kino kyalengela bavula kulanguluka’mba kuzhindama mu machechi abo ke mukambizho. Nangwa byonkabyo, byambo bya Kihebelu byo batuntulula kuba’mba “Nchinai ne kuyuka’mba yami Lesa” ke byambo bimwesha’mba Yehoba Lesa bafwainwa kumupa munema ku bisaka bya bantu, bafwainwa kuyuka kuba’mba ye yenkatu ye bafwainwa kupopwela ne kupa munema.
Bino byambo byamunema bitanwa ne pa Salamo 2. Lesa po alaya kukambula bantu bonse babula kumukookela. Kabiji aba baketekela mwi Lesa bayuka’mba ukebatangijilanga, ne kwibapa bulume ne maana. Na mambo a kuba’mba “bafyama mwi aye,” bekala bingi na lusekelo ne kumvwa kuzhikijilwa kikatakata mu bimye bya makatazho.—Salamo 2:9-12.
“Nkatumbijikwa mu bisaka bya bantu; Nkatumbijikwa pano pa ntanda.” Mu moba a kala, Yehoba watumbijikwanga inge waingijisha bulume bwanji bukatampe kuzhikijila bantu banji. (Kulupuka 15:1-3) Kulutwe, Yehoba ukatumbijikwa bingi kimye bantu bonse pano pa ntanda kyo bakamukookelanga ne kumupopwela.—Salamo 86:9, 10; Isaya 2:11.
Bilumbulula Salamo 46:10
Buku umo waamba pa Salamo 46 amba “uno Salamo wakutakaika Lesa pa bulume bwanji ne pa byo azhikijila bantu banji.” Kimye kyo baimbilenga uno Salamo 46, bantu ba Lesa bamwesheshenga byo baketekela mwi Yehoba kwibazhikijila ne kwibakwasha. (Salamo 46:1, 2) Byambo biji mu uno lwimbo bibavulwilengamo kuba’mba Yehoba uji nabo kimye kyonse.—Salamo 46:7, 11.
Pa kuba’mba bekala na luketekelo lwakosa mwi Yehoba Lesa, uno Salamo wibatundaikanga kulanguluka pa mingilo yanji ya kukumya. (Salamo 46:8) Uno Salamo waamba kikatakata, kuba’mba Yehoba uji na bulume bwa kupwisha nkondo. (Salamo 46:9) Yehoba walekeshe makondo mu moba anembejilwemo Baibolo kupichila mu kuzhikijila bantu banji ku bisaka bibalukukanga. Nangwa byonkabyo, Baibolo waamba’mba Lesa walaya amba katatakatu akafumyepo bintu byonse byatama biji pano pa ntanda ne nkondo.—Isaya 2:4.
Nanchi Yehoba watwajijila kukwasha bapopweshi banji lelo jino nyi? Ee. Mutumwa Paulo watundaikile bena Kilishitu kuketekela mwi Yehoba na muchima wabo yense. (Bahebelu 13:6) Byambo biji mu Salamo 46 bitulengela kuketekela mwi Yehoba na muchima yense amba uketuzhikijila. Bitulengela kuyuka’mba Lesa ye kya kufyamamo “kyetu kabiji bo bulume bwetu.”—Salamo 46:1.
Tangai Salamo 46, tubyambo ne twa munshi ne binembelo bikwabo byobamwesha byakwatankana na kino kitango.
Tambai vidyo mwipi walumbulula biji mu buku wa Masalamo.
“Mulangulukapo Amba ka pa Kwilaala kwa Banabalume ne Banabakazhi Bonka Bonka?”
g 12/10 22-23
Mepuzho Epuzha Banyike
Nakonsha Kulumbulula Byepi Byaamba Baibolo pa Kwilaala kwa Babalume Mulwabo ne Babakazhi Mulwabo?
Kimye kyo bapainenga bilambu bantu basekejile bingi bankaizhi babiji bamafilimu babakazhi byo befyompele. Patanshitu bajinga mu luonde bakuminye bingi, bino byo papichiletu ka kimye batendekela kupopwela kutundaika kino kyubilo. Batundaika kino kyubilo baumvwine bingi bulongo, pa kuba bashikwa kino kyubilo baambilenga’mba jajingatu jishinda ja kwikitumbijikilamo. Nangwa byonkabyo mavidyo ne bipikichala bya bano banabakazhi befyompele bakebitambishanga pa TV ne pa Intaneti pa moba avula bingi.
KWESAKANA na byo bafwanyikizha peulu po, bantu batako bingi muchima umvwe muntu waya nkuwa wisolola mwine kuba’mba watemwa mwanamulume nangwa mwanamukazhi mukwabo. Bamo batakaika bano bantu kuba’mba bachinchika; kabiji bakwabo balengulula bano bantu kuba’mba baji na byubilo byatama. Bino bantu bavula balanguluka’mba kwisongola kwa banabakazhi ne banabalume bonka bonka ke bwikalotu muntu mwine bo afwainwa kwisajilapo. Daniel uji na myaka 21 waambile’mba, “Byo najinga ku sukulu, ne banyike babulanga kuba bino byubilo baambanga’mba inge washikwa bantu besongola mulwabo ko kuba’mba uji na misalululo kabiji ubena kwibazhajichisha.”
Bilanguluka bantu pa kwisongola kwa banabalume ne banabakazhi bonka bonka byapusana monka mwapusena mafumbi a bantu ne byalo ko bafuma. Pano bino bena Kilishitu kechi ‘balondela mafunjisho a bubela a bantu bajimbaika bakwabo’ ne. (Efisesa 4:14) Pa kuba abo balondela byaamba Baibolo.
Nanchi Baibolo Waambapo’mba ka pa Banabalume nangwa Banabazhi Kwisongola Mulwabo?
Baibolo waambishatu kipasu kuba’mba wamulume ne wamukazhi bo bafwainwatu kwisongola. (Ntendekelo 1:27, 28; Bena Levi 18:22; Byambo bya Maana 5:18, 19) Baibolo wakanya bulalelale kumvwangakotu ne belaala mulwabo banabalume ne banabakazhi bonka bonka.—Ngalatiya 5:19-21.
Inge muntu waipuzha’mba: “Ulangulukapo’mba ka pa bantu basongola bakwabo babalume nangwa babakazhi?”
Wakonsha kukumbula’mba: “Kechi nebashikwa ne, bino byo boba kechi byawama ne.”
Vulukai kuba’mba: Inge mwasalapo kulondela byaamba Baibolo, ko kuba’mba bo bwikalo bo mwasalapo anweba bene, kabiji muji na luusa lwa kusalapo bwikalo bo mukeba. (Yoshua 24:15) Kechi mwafwainwa kumvwanga bumvu ne.—Salamo 119:46.
Nanchi bena Kilishitu bafwainwa kunemeka bantu basalapo kwisongola mulwabo nyi?
Bafwainwa kwibanemeka. Baibolo waamba’mba: “Nemekainga bantu bonse.” Baibolo wa Today’s English Version waamba’mba, “Painga mushingi bantu bonse.” (1 Petelo 2:17) Onkao mambo bena Kilishitu kechi bashikwa bantu baji na bino byubilo ne. Bena Kilishitu bobila kifyele bantu bonse, nangwatu besongola mulwabo.—Mateo 7:12.
Inge muntu washikisha’mba: “Nanchi kubula kutundaika mulanguluko wa bantu kwisongola mulwabo kwimulengela kushikwa bantu boba bino nyi?”
Wakonsha kumukumbula’mba: “Ine, kechi ntundaika uno mulanguluko ne, bino kechi nashikwa bano bantu ne.”
Wakonsha kunungapo amba: “Twambe’mba muntu wafuukulapo kutendeka kupeepa fwanka. Nangwa kya kuba nashikwa kupeepa fwanka, bino kechi nashikwa muntu upeepa fwanka ne. Bino ku muntu mwine upeepa kino kyubilo umona amba kijitu bulongo. Onkao mambo, kechi nafwainwa kumushikwa uno muntu ne, byonka aye byo afwainwa kubula kunshikwa na mambo a kushikwa kino kyubilo. Kyo kimotu ne ku bantu besongola mulwabo.”
Nanchi Yesu Wafunjishanga Kubula Kulengululula Bantu Nyi? Inge ibyo, nanchi bena Kilishitu bafwainwa kulengululanga bantu basongola bakwabo banabalume ne banabakazhi bakwabo nyi?
Yesu kechi watundaikanga baana banji ba bwanga kuswa bwikalo bonse busalapo bantu ne. Bino wafunjishanga kuba’mba, “bonse bamwitabila” bakapuluka. (Yoano 3:16) Kwitabila mwi Yesu kulumbulula ne kukookela mizhilo ya Lesa yakanya byubilo byatama nabiji kwisongola babalume mulwabo ne babakazhi mulwabo.—Loma 1:26, 27.
Inge muntu waamba’mba: “Basongola banabalume bakwabo ne basongola banabakazhi bakwabo kechi bakonsha kupimpula ne, mambo byobyo basemenwetu”
Wakonsha kukumbula’mba: “Nangwa kya kuba Baibolo kechi waambapo pa bya Sayansi ne, bino waamba’mba byubilo bimo byaikizha mizhazhi mu michima yabo. (2 Kolinda 10:4, 5) Nangwa kya kuba bamo batemwa banabalume bakwabo ne babakazhi bakwabo, bino Baibolo witubula kuchinuzhuka kino kyubilo.”
Bya kuba: Kechi wafwainwa kutwezhamo ne mutwe mu kwichocheka pa bilengela bantu kwisongola mulwabo ne, pa kuba wafwainwa kuta muchima pa kulumbulula kuba’mba Baibolo wakanya kino kyubilo. Pa kwesakanyako, wakonsha kwamba’mba “Bantu bamo bamba’mba kushinta kyo kisemwa kyabo, kabiji kino kilengela bano bantu kutemwa bukapondo. (Byambo bya Maana 29:22) Nangwa inge kya kuba kya kine byo byo baji, bino byonka byo mwayuka, Baibolo wakanya kubuuka bukaji. (Salamo 37:8; Efisesa 4:31) Pano nanchi twakonsha kwamba’mba uno muzhilo watama mambo bamo baji na kisemwa kya bukaji nyi?”
JUNE 10-16
BYA BUNEME BIJI MU MAMBO A LESA SALAMO 48-50
Anweba Bansemi—Kwashainga Baana Benu Kuketekela Jibumba ja Yehoba
Bupopweshi bwa Kine Bukemulengela Kwikala na Lusekelo
11 Tupopwela Yehoba kimye kyo tufunda Mambo anji ne kufunjisha baana betu pe aye. Pa juba ja Sabado, bena Isalela kechi baingilanga mingilo yabo ne, pa jino juba bakoseshanga bulunda bwabo ne Yehoba. (Lupu. 31:16, 17) Bansemi ba kishinka bafunjishanga baana babo pe Yehoba ne bintu byawama byo ebobilanga. Ne atweba pa muntu pa muntu twafwainwa kwikala na mutanchi wa kutanga Mambo a Lesa ne kwiafunda. Kuba bino ke lubaji lwa mpopwelo yetu kwi Yehoba, kabiji kitukwasha kufwenya kwipi ne aye. (Sala. 73:28) Kabiji inge ketufunjile pamo na kisemi kyetu, twakonsha kukwasha baana betu kwikala na bulunda bwakosa na Shetu wa mwiulu wa butemwe.—Tangai Salamo 48:13.
Muji na Bishinka Bimulengela Kwikala na Lusekelo
5 “Pitañanai mu Ziona ne kumuzhokoloka; Balai byamba byanji; Tajishai bulongo masakwa anji; Langulukai bipango byanji: Namba, mukekibule kisemi kya kulutwe.” (Sala. 48:12, 13) Nyimbi wa masalamo watundaikilenga bena Isalela kumumwena pepi Yelusalema. Nanchi mwakonsha kufwanyikizha bisemi bya bena Isalela bayile mu muzhi wazhila ku kijiilo kya pa mwaka byo bavulukilenga bintu byawama byo bamwene ku nzubo ya Lesa nyi? Bafwainwa bakebeshenga bingi ‘kubula kisemi kya kulutwe.’
6 Akilangulukai pe mfumu wamukazhi wa ku Sheba, awo patanshitu wazhinaukile masawakya aambilenga pa bukalama bwawama ne maana a kwa Solomone. Ki ka kyamulengejile kuswa amba byo bamubujilenga byajinga bya kine? Waambile amba: “Amiwa kechi nebitabile ne, poso byo naiya ne kwibimona na meso ami ami mwine.” (2 Moba 9:6) Kya kine, bintu byo tumona na “meso” byakonsha kwitufika bingi pa muchima.
7 Mwakonsha kukwasha byepi baana benu kumona buwame bwa jibumba ja Yehoba na “meso” abo? Umvwe ofweshi wa musampi wa Bakamonyi ba kwa Yehoba uji kwipi na komwikela, inengezhai kuya na kufwakeshako. Kyakumwenako, Mandy ne Bethany, bakomejile ku mpunzha kwalepele makilomita 1,500 na kwajinga Betele wa mu kyalo kyabo. Pano bino, bansemi babo banengezhanga kuya na kufwakesha bino bishimikwa, kikatakata baana babo babakazhi byo bakikomenenga. Balondolola amba: “Saka tukyangye kuyapo ku Betele, twalangulukanga amba kwakatazha kabiji kwikalatu bakote, pano bino byo twayileko twataineko ne bakyanyike baingijijilenga Yehoba na bulume bwabo bonse ne na lusekelo. Twamwene kuba amba jibumba ja Yehoba kechi jajingatu ku mpunzha ko twikala ne, kabiji kimye kyonse kyo twayanga na kufwakesha ku Betele, kitulengelanga kufwenya kwipi ne Yehoba ne kwitutundaika kwingijila Yehoba na ngovu.” Kumwena jibumba ja Lesa pepi kwatundaikile Mandy ne Bethany kutendeka bupainiya, kabiji ne abo bebechile kuya na kwingijilako ku Betele pa ka kimye kacheche.
Byubilo Byenu Bimweshenga’mba Mwi Bangikazhi Ba Mu Bufumu!
5 Kuyuka biji kafulumende. Muntu ukeba kwikala ngikazhi mu kafulumende wa bantu wafwainwa kuyukapo bintu bimo pa yewo kafulumende. Kyo kimotu, ne boba bakeba kwikala bangikazhi ba mu Bufumu bafwainwa kufunda byavula pa Bufumu bwa Lesa. Akilangulukai pa byaubile baana ba kwa Kola baingijilanga mu Isalela wa kala. Batemenwe bingi Yelusalema ne mpunzha ya kupopwelamo kabiji bashimikizhanga bintu byavula pa yewa muzhi. Kechi batemenwe mabwe nangwa manonokela o bashimikijile mpunzha ya kupopwelamo ne, bino batemenwe bine bintu byaimenangako muzhi ne mpunzha ya kupopwelamo. Yelusalema wajinga “muzhi wa Mfumu mukatampe,” Yehoba, mambo mo mwajinga mpopwelo ya kine. Mo mo bafunjishanga Mizhilo ya Yehoba. Kabiji Yehoba waubilanga lusa bantu bo balamanga ku Mfumu wa mu Yelusalema. (Tangai Salamo 48:1, 2, 9, 12, 13.) Abya ne anweba mukeba kufunda ne kubulako bakwenu bintu byuba jibumba ja Yehoba byonka byaubanga baana ba kwa Kola nyi? Inge mwafunda byavula pa jibumba ja Lesa ne Yehoba byo abena kukwasha bantu banji, po po mukayukisha Bufumu bwa Lesa byo buji. Kabiji kizaku kyenu kya kusapwila mambo awama a Bufumu kikabayilako.—Yele. 9:24; Luka 4:43.
Bishinka Bikwabo Byanema
it-2 805
Bunonshi
Mukoka wa bena Isalela wajinga na bunonshi bwavula bingi, kya kuba bajanga ne kutoma (1Mf 4:20; Mus 5:18, 19), bunonshi bwabo bwibazhikijilanga ku makatazho aiyanga na buyanji. (Man 10:15; Mus 7:12) Nangwa kya kuba Yehoba wapesheshe bena Isalela na bunonshi ne kwibalengela kubila na mambo a kwingila na ngovu (esakanyaiko Man 6:6-11; 20:13; 24:33, 34), bino wibajimwineko ne pa bintu byatama bifuma mu kuketekela mu bunonshi. Mambo kuba bino kwakonsheshe kwibalengela kuvulama aye mwine wibapele bunonshi. (Mpi 8:7-17; Sl 49:6-9; Man 11:4; 18:10, 11; Ye 9:23, 24) Wibavulwilemo ne kuba’mba bunonshi bwa pa kakimye kachechetu. (Man 23:4, 5), kabiji kechi bakonsha kwibupana kwi Lesa kwikala bukuzhi bwa kwibakula ku lufu ne. (Sl 49:6, 7), kaiji kechi bukwasha bafwa ne (Sl 49:16, 17; Mus 5:15). Kabiji bebajimwineko kuba’mba kukizhamo kunemeka bunonshi kulengela kwikala na byubilo bya bujimbijimbi ne kuba bintu bifichisha Yehoba ku muchima. (Man 28:20; esakanyaiko ne Ye 5:26-28; 17:9-11.) Kabiji bebatundaikile ‘kunemeka Yehoba na bintu byabo byawamisha.”—Man 3:9.
JUNE 17-23
BYA BUNEME BIJI MU MAMBO A LESA SALAMO 51-53
Bintu Byafwainwa Kwimukwasha Kuchinuzhuka
Kulenga Mambo
Mwakonsha Kuzhikijila Byepi Muchima Wenu?
4 Pa Byambo bya Maana 4:23, kyambo kya “muchima” bekingijisha kulumbulula ‘muntu wa mukachi’ nangwa’mba ‘mukachi mwafyamika.’ (Tangai Salamo 51:6 ne tubyambo twa munshi.) Mu ñambilo ikwabo, “muchima” ulumbulula milanguluko yo twikala nayo, byo tumvwa, bintu byo tukeba kuba ne byo tukeba kwikala nabyo. Ko kuba’mba muchima ulumbulula byo tuji mukachi bibula kumweka ku bantu.
5 Akilangulukai pa butuntulu bwetu bwa mubiji byo bwakonsha kulumbulula buneme bwa kuyuka byo tuji mukachi. Kitanshi, pakuba’mba twikale na butuntulu bwa mubiji bwawama, twafwainwa kuja kajo kawama ne kukaya makayo akosesha mubiji kimye kyonse. Byo byo kikala ne na bulunda bwetu ne Lesa. Pa kuba’mba twikale na bulunda bwakosa ne Lesa, twafwainwa kujanga kajo kawama pa juba pa juba, ko kuba’mba kutanga Baibolo ne mabuku alumbulula Baibolo, kabiji twafwainwa kumwesha patoka’mba tuji na lwitabilo mwi Yehoba. Tumwesha lwitabilo lwetu mwi Yehoba kupichila mu kwingijisha bintu byo tufunda ne kwamba pa lwitabilo lwetu.
6 (Loma 10:8-10; Yako. 2:26) Kya bubiji, na mambo a mwekelo yetu, twakonsha kulanguluka’mba tuji na butuntulu bwa mubiji bwawama bino mukachi saka tuji na kikola. Kyo kimotu, na mambo a kwingila mingilo ya Lesa, twakonsha kulanguluka’mba tuji na lwitabilo lwakosa, bino bya kusakasaka byatama saka bibena kujimba mizhazhi mu muchima wetu. (1 Ko. 10:12; Yako. 1:14, 15) Twafwainwa kuvulukanga’mba Satana ukeba kubika milanguluko yatama mu muchima wetu. Ñanyi jishinda jo engijisha pa kuba bino? Kabiji twakonsha kwizhikijila byepi?
Twakonsha Kwikala Bakishinka
5 Yehoba uketukwasha kushinda milanguluko yatama umvwe saka tulomba kwi aye kimye kyonse. Inge twafwenya kwipi ne Yehoba mu lulombelo, ne aye ufwenya kwipi ne atweba. Witupa mupashi wanji wazhila kuba’mba etukwashe kukana milanguluko yatama ne kwikala ba kishinka. Onkao mambo, twayai tumubuule Lesa wetu kuba’mba tubena kukebesha kumutokesha ku muchima na bintu byo tulanguluka mu michima yetu. (Sala. 19:14) Nanchi tumulomba kuba’mba apime biji mu muchima pa kuba’mba ayuke inge “mujipo kyatama,” ko kuba’mba milanguluko yatama yakonsha kwitulengela kulenga mambo nyi? (Sala. 139:23, 24) Nanchi tumulomba kimye kyonse kuba’mba etukwashe kwikala ba kishinka umvwe twaikala mu lweseko nyi?—Mat. 6:13.
6 Nkomeno yetu nangwa byubilo byo twaubanga kala byakonsha kwitulengela kutemwa bintu byashikwa Yehoba. Nangwa byonkabyo, wakonsha kwitukwasha kupimpula byubilo byetu ne kutwajijila kumwingijilanga. Mfumu Davida waswile kino. Byo aubile bukende ne Batesheba, Davida walombele Yehoba amba: “Lengai mwi amiwa muchima watoka, kabiji bikai mwi amiwa milanguluko ipya, yashikimana.” (Sala. 51:10, 12) Umvwe kala twatemenwe byubilo byatama, kabiji twakebesha kwibileka, Yehoba wakonsha kwitukwasha kumukookela ne kuba byawama. Nangwa kya kuba byubilo byatama bitukosela ne kutamisha milanguluko yetu, Yehoba wakonsha kwitukwasha kulondela mikambizho yanji ne kwikela monka. Wakonsha kukanya bintu byatama kwitutangijilanga.—Sala. 119:133.
Bishinka Bikwabo Byanema
it-1 644
Doega
Mwina Edomu waingilanga mu kipango kya Mfumu Saulo wajinga kafunga mukatampe, kifulo kya peulu bingi. (1Sa 21:7; 22:9) Doega kyamweka waalukile ke mwina Isalela. Pa kimye kimo byo ajinga mu muzhi wa Noba “saka bamulama kwi Yehoba,” kyamweka kampe na mambo a luchipo, bubipisho nangwa na mambo a biyukilo bya mbumba, Doega wamwene ñanga mukatampe aye Ahimaleki nakupa Davida mpoko ya kwa Goliata ne bashinkwa ba kupana kwi Lesa. Kimye Saulo kyo abujilenga bakalume banji amba bamusatukila, Doega popo aambile kyo amwene byo ajinga mu muzhi wa Noba. Ñanga mukatampe ne bañanga bakwabo byo bebechile na kwibatebawisha, wakambizhe bakapaso kwipaya bañanga. Byo bakaine, Doega aye byo bamukambizhe kwi Saulo, waipaile bañanga 85 kwa kubula nangwa kuzhinyazhinya ne. Panyuma ya bino, Doega waonawine muzhi yense wa Noba, waipaile bangikazhi bonse ba mu uno muzhi ne bilelwa byabo pamo.—1Sa 22:6-20.
Kwesakana na byaamba tubyambo tuji peulu ya Salamo 52, Davida waambile pe Doega amba: “Lujimi wobe, watwa nobe mpemuna, ufuukula kuba bintu byatama ne mingilo ya bujimbijimbi. Watemwa bintu byatama kukila bintu byawama, wamba bya bubela kukila kwamba bya kine. Watemwa byambo byonse byatama, obewa lujimi wa bujimbijimbi!”—Sl 52:2-4.
JUNE 24-30
BYA BUNEME BIJI MU MAMBO A LESA SALAMO 54-56
Lesa uji Nenu
Ikalai na Maana—Akamwai Lesa!
10 Juba jimo Davida waile na kufyama kwi Akishi mfumu wa bena Gata mu muzhi wa bena Filishitiya mwaikalanga Goliata. (1 Samwela 21:10-15) Bakalume bamfumu baambile’mba Davida mulwanyi wabo. Nga Davida waubilepo byepi pa kino kimye kyakatazha? Walombele kwi Yehoba. (Masalamo 56:1-4, 11-13) Nangwa kya kuba wibepekezhe uba nobe wakonya kuba’mba epulushe, Davida wayukile amba Yehoba ye wamupokolola. Davida waketekejile mwi Yehoba na muchima wanji yense, kabiji kino kyamwesheshetu patoka amba kine waakamwanga Lesa.—Masalamo 34:4-6, 9-11.
11 Byonka byaubile Davida, ne atweba twafwainwa kumwesha moyo wa kwakamwa Lesa umvwe twaketekela mu milaye yanji kuba’mba uketukwasha kuchinchika kimye kya makatazho. Davida waambile’mba: “Ufikizhe jishinda jobe kwi Yehoba; Kabiji uketekele mwi aye, ne aye ukekyuba.” (Masalamo 37:5) Bino kino kechi kilumbulula amba twafwainwa kutula makatazho etu kwi Yehoba ne kuketekela amba usa kwingijilapo kwakubula atweba kwibikako kuba’mba tubepo kiji kyonse ne. Davida kechi walombeletu kwi Lesa wabwela waikalatu chaka ne. Waingijishe bulume ne kalango kamupele Yehoba kabiji washinjile lolwa lukatazho. Pano bino, Davida wayukile amba bulume bwa bantu kechi bo bulengela kushinda ne. Netuwa byo byo twafwainwa kuba. Twafwainwa kuba papelela bulume bwetu, apa bino byashala twibishila mu maboko a Yehoba. Javujishatu kafwapo kyo twakonsha kuba bunke bwetu kwakubula Yehoba ne. Mu kimye kya uno mutundu, po po tumwesha moyo wetu wa kumwakamwa Lesa. Byambo byaambile Davida byakonsha kwitutekenesha bingi. Waambile’mba: “Balunda na Yehoba ke boba bamwakamwa.”—Masalamo 25:14, NW.
Kafwako Kyakonsha “Kwitwabanya na Butemwe bwa Lesa” Ne
9 Kabiji Yehoba unemeka ne kuchinchika kwetu. (Mateo 24:13) Vulukai kuba’mba, Satana ukeba anweba kumuvundamina Yehoba. Juba ne juba jo mwikala bakishinka kwi Yehoba mumwesha kuba’mba myendeleko ya kwa Satana ya bubela. (Byambo bya Mana 27:11) Bimye bimo kechi kyapela kuchinchika ne. Kubelabela, lukatazho lwa mali, kukatazhiwa mu milanguluko, ne bintutu bikwabo byakonsha kulengela moba onse kwikala akatazha bingi. Kabiji kubula kufikizhiwa kwa kintu kyaketekelwa nako kwakonsha kulefula bingi. (Byambo bya Mana 13:12) Kuchinchika mu bimye bya uno mutundu kwanema bingi kwi Yehoba. O ene mambo Mfumu Davida o aambijile Yehoba kulonga mipolo yanji mu “mutumwa,” kabiji ne kunungapo na kusumininwa amba: “Kechi iji mu buku wenu nenyi?” (Masalamo 56:8) Ee, Yehoba unemeka bingi kabiji ne kuvuluka mipolo yetu yonse ne buyanji bo tuchinchika aku saka tulama bukishinka bwetu kwi aye. Ino mipolo ne buyanji nabyo byanema bingi ku meso anji.
Butemwe bwa Yehoba byo Bwitukwasha Kushinda Moyo
16 Satana wayuka’mba twanemeka bingi bumi bwetu. Wamba’mba muntu wakonsha kuba kiji kyonse, kuvwangakotu ne kusankilapo bulunda bwanji ne Yehoba pa kubatu’mba apulushe bumi bwanji. (Yoba 2:4, 5) Buno ke bubela bwafitatu bwii. Kabiji na mambo a kuba’mba ye “uleta lufu,” Satana ukeba’mba tuchiinenga lufu pa kuba’mba tuleke kwingijila Yehoba. (Hebe. 2:14, 15) Kimye kimo, Satana wingijisha bantu banji kwituzakamisha kuba’mba basakwitwipaya inge twakana kusankilapo lwitabilo lwetu. Kabiji Satana wakonsha kweseka lwitabilo lwetu umvwe twakolwa bingi. Badokotala ne balongo betu babula kwitabila bakonsha kwitukanjikizha’mba tuswe kwitubika mashi. Kuba bino kwakonsha kwitulengela kulala mizhilo ya Lesa. Nangwa bantu bamo bakonsha kwitukanjikizha kwingijisha mashinda akwabo a kubukilwamo akonsha kwitulengela kulala mafunde a mu Baibolo.
17 Nangwa kyakuba kechi tukeba kufwa ne, twayuka’mba Yehoba ukatwajijila kwitutemwa nangwa twafwa. (Tangai Loma 8:37-39.) Balunda ba Yehoba umvwe bafwa, utwajijila kwibavuluka kabiji kwi aye kikalatu nobe bakiji bomi. (Luka 20:37, 38) Ukebesha bingi kwibasangula. (Yoba 14:15) Yehoba wapaine bupe bwanema bingi pa kuba’mba “[tukekale] na bumi bwa myaka ne myaka.” (Yoa. 3:16). Twayuka kuba’mba Yehoba witutemwa bingi kabiji wituta muchima. Onkao mambo, umvwe twakolwa nangwa betuzakamisha’mba basakwitwipaya, kechi twafwainwa kumusankilapo Yehoba ne. Pakuba twafwainwa kumulomba’mba etutekeneshe, kwitupa maana ne bulume bwa kwitukwasha kuchinchika. Abino byo byaubile ba Valérie ne bamwatawabo.—Sala. 41:3.
Bishinka Bikwabo Byanema
it-1 857-858
Kuyukila Jimo Bikamweka Kulutwe, Kutongwela Jimo
Bunsatuki bwa kwa Yudasa Isakaliota bwafikikizhe bungauzhi kabiji bwamwesheshe ne kuba’mba Yehoba ne mwananji bayukijile jimo bikamweka . (SI 41:9; 55:12, 13; 109:8; By 1:16-20) Bino kino kechi kilumbulula’mba Yehoba wanengezhejile jimo kuba’mba Yudasa ye ukoba kino ne . Bungauzhi bwaambijile jimo kuba’mba mulunda wa kwa Yesu ye ukamusolola, bino kechi baambijile jimo mwine muntu pa balunda nanji ukamusolola ne . Kikwabo ndangulukilo ya kuba’mba lo lwajinga lunengezho lwa Lesa kuba’mba Yudasa akasatuke, yapusana bingi na mafunde a Lesa. Lesa watangijile mutumwa kunemba’mba: “Kange upelawizhe kutenteka maboko pa muntu nangwa umo ne; kabiji kange wibikenga mu mambo a bantu bakwabo ne; saka wilama obe mwine bulongo.” (1Ti 5:22; esekanyaiko 3:6.) Bishinka bimwesha amba Yesu wateleko muchima kusala batumwa 12 mambo walombele bufuku bonse kwi Shanji saka akyangye kufuukulapo. (Luk 6:12-16) Inge Lesa wanengezhezhe jimo kuba’mba Yudasa ye ukamusolola, kino inge kyamwesheshe amba kechi watangijile bulongo Yesu ne. Kabiji naye inge watundaikileko mambo alengele Yudasa.
Onkao mambo, kyamwenka kimye Yudasa kyo bamusajilenga kwikala mutumwa kechi wajingapo na milanguluko ya bujimbijimbi mu muchima wanji ne. Waswishishe ‘muzhazhi wa bulembe kusapuka ‘ mu muchima wanji. Onkao mambo Lesa kechi yewamutangijile kuba kino ne, bino aye mwine waswishishe Diabola kumutangijila kwikala ngivi kabiji nsatuki . (Heb 12:14, 15; Yoa 13:2; By 1:24, 25; Ya 1:14, 15; mona YUDASA Na. 4.) Ino milanguluko byo yakomene, Yesu watendekele kwiimona ne kuyuka kuba’mba ye ukamusolola.—Yoa 13:10, 11.
TAIKO MUCHIMA KU MWINGILO WA KUSAPWILA
“Kutemwa Kilishitu Kwitulengela Kuchinchika?”
“Butemwe bwa Kilishitu bo Bwitulengela Kwingila”
12 Bufuku bwapeleleko Yesu saka akyangye kufwa waambijile baana banji ba bwanga amba: “Mukapitanga mu bya malwa pano pa ntanda, bino kosai! Amiwa nepashinda pano pa ntanda.” (Tangai Yoano 16:32, 33.) Ñanyi kintu kyakwashishe Yesu kuchinchika balwanyi banji byo bamumanyikilenga ne kutwajijila kwikala wa kishinka kufika ne ku lufu? Waketekejile mwi Yehoba. Yesu byo ayukile’mba baana banji ba bwanga nabo bakesekwa byonkatu byo aesekelwe, walombele kwi Yehoba amba ebazhikijilenga. (Yoa. 17:11) Mambo ka bino byambo o bitutundaikila? Mambo Yehoba uji bingi na bulume kukila balwanyi betu bonse. (1 Yoa. 4:4) Yehoba umonatu byonse. Kabiji twashiinwa’mba inge twaketekela mwi Yehoba, uketukwasha kubula moyo kabiji tukachinchika.
13 Akilangulukai pa byaubile Yosefwa wa ku Alimatea. Bayudea bamunemekele bingi. Wajinga wa mu kije kikatampe kya Bayudea kya Saniedilini. Nangwa byonkabyo, Yesu byo aingijilenga mwingilo wanji pano pa ntanda, Yosefwa wamwesheshe’mba wajinga na moyo. Yoano waambile’mba wajinga “mwana wa bwanga wa kwa Yesu, bino wabujile kwisolola na mambo a kuchina Bayudea.” (Yoa. 19:38) Nangwa kya kuba Yosefwa waitabijile mu bukine bwaambilenga pa Bufumu, kechi wisolwele ku bakwabo amba waitabijile mwi Yesu ne. Wachiinenga’mba bantu bakaleka kumunemeka umvwe bayuka’mba mwana wa bwanga wa kwa Yesu. Bino Baibolo witubuula’mba Yesu byo afwile, Yosefwa “wachinchikile ne kuya kwi Pilato na kulomba mubiji wa kwa Yesu.” (Mako 15:42, 43) Pa kyokya kimye Yosefwa kechi wifile’mba mwana wa bwanga wa kwa Yesu ne.
14 Nanchi mwakyumvwapo moyo byonka byaumvwine Yosefwa nyi? Nanchi mumvwa bumvu kubuula bakwenu bo mufunda nabo nangwa bo mwingila nabo amba mwi Bakamonyi ba kwa Yehoba nyi? Nanchi mukankazhama kwikala musapwishi wabula kubatizhiwa nangwa kubatizhiwa na mambo a kuchiina’mba bakwenu bakemwendelekanga nyi? Kange muleke bintu bya uno mutundu kwimulengela kubula kuba kintu kyaoloka ne. Mwafwainwa kubuula Yehoba mu lulombelo byonse biji ku muchima. Mubuulai kwimukwasha kuchinchika pa kuba’mba mubenga kyaswa muchima wanji. Inge mwamona’mba Yehoba wakumbula milombelo yenu, mukekala na bulume kabiji kechi mukobanga moyo ne.—Isa. 41:10, 13.