Ñanga Mwine Mukatampe aye Yesu Witumvwina Lusa

1-2. (a) Mambo ka Yehoba o atumijile Mwananji kwiya pano pa ntanda? (b) Ñanyi bintu byo tusakwisambapo mu uno mutwe? (Bahebelu 5:7-9)

PAPITA myaka 2,000 kufuma kimye Yehoba Lesa kyo atumine Mwananji yenka wa umotu kwiya pano pa ntanda. Mambo ka o aishijile? Kintu kimo kyo aishijile ke kukuula bantu ku jifingo ja bundengamambo ne lufu, ne kufumyapo bintu byatama byaletele Satana. (Yoa. 3:16; 1 Yoa. 3:8) Kabiji Yehoba wayukile’mba bintu Yesu byo akapitamo pano pa ntanda saka aji muntu, bikamulengela kufikilamo kwikala Ñanga Mwine Mukatampe ukobilanga bantu lusa ne kifyele. Yesu watendekele kwingila uno mwingilo byo abatizhiwe mu 29 C.E.a

² Mu uno mutwe, tusakwisamba pa bintu byapichilemo Yesu byo ajinga pano pa ntanda byo byamulengejile kufikilamo kwikala Ñanga Mwine Mukatampe witumvwina lusa. Kumvwisha Yesu byo aikele walumbuluka kwingila uno mwingilo, kusakwitulengelanga kukasuluka kusolomoka Yehoba mu lulombelo nangwa kya kuba twalefulwa na mambo o twalengele nangwa na bukooke bwetu.​—Tangai Bahebelu 5:7-9.

MWANA LESA YENKAWA UMOTU WAISHILE PANO PA NTANDA

3-4. Bwikalo bwa kwa Yesu bwapimpwilwe byepi byo aishile pano pa ntanda?

³ Atweba bamo twakivilukapo kala kuya ku mpunzha ingi ne kusha nzubo yetu yawama, ba mu kisemi nangwa balunda netu. Luno lupimpu kechi lwapeela ne. Nangwa byonkabyo, kafwako wakipitapo kala mu bintu byapichilemo Yesu byo aishile pano pa ntanda ne. Byo ajinga mwiulu, wajinga pa kifulo kikatampe kukila bilengwa byonse bya kwa Yehoba bya mupashi. Yehoba wamutemenwe bingi kabiji waingijilanga Lesa ‘ku kuboko kwanji kwa kilujo.’ (Sala. 16:11; Maana 8:30) Nangwa byonkabyo, pa Filipai 2:7 paamba’mba “aye washile bintu byonse,” ko kuba’mba kifulo kikatampe kyo ajingapo mwiulu ne kwiya kwikala na bantu bambulwakulumbuluka pano pa ntanda.

⁴ Kabiji akilangulukai pa bintu byapichilemo Yesu byo asemenwe ne byo ajinga mwanyike pano pa ntanda. Mulambo wapaine bansemi banji kimye kyo asemenwe umwesha’mba Yesu wasemekejilwe mu kisemi kya bayanji. (Levi 12:8; Luka 2:24) Mfumu wakanamine aye Heloda byo ayukile’mba Yesu wasemwa, wakebeshe kumwipaya. Pa kuba’mba Yesu bamupulushe, bayile ku Ijipita ne kwikala bipuluka pa kimye kyabaya. (Mat. 2:13, 15) Kwambatu kine, bwikalo Yesu bo aikele pano pa ntanda bwapusene bingi na bo aikalanga mwiulu.

5. Ñanyi bintu bimwenejile Yesu byo ajinga pano pa ntanda, kabiji byamukwashishe byepi kufikilamo kwingila mwingilo wa buñanga? (Monai ne kipikichala.)

⁵ Yesu byo ajinga pano pa ntanda, wimwenejile bantu bavula byo bayanjilenga. Kabiji naye wafwishishepo ba mu kisemi ne balunda nanji, nabiji shanji wamushinjile aye Yosefwa. Byo aingijilenga mwingilo wanji, Yesu wamonanga bantu ba mbumba, bafwa meso, bakolwa kalepu ne bansemi bafwishishe baana. Kabiji wibomvwinanga bingi lusa. (Mat. 9:2, 6; 15:30; 20:34; Mako 1:40, 41; Luka 7:13) Ibyo kuba’mba Yesu byo ajinga mwiulu pa kifulo kikatampe wamonanga bantu byo bayandanga. Bino byo ajinga pano pa ntanda, wamonanga buyanji mu jishinda japusanako. (Isa. 53:4) Bintu byapichilemo Yesu byo ajinga pano pa ntanda byamukwashishe kuyuka bantu byo kibakola ku muchima inge babena kupita mu makatazho. Byonkatu biji bantu bonse naye wakookanga, waikalanga na makatazho ne kumvwa bulanda.

YESU WAUMVWINANGA BANTU LUSA

6. Byambo byaambile ngauzhi Isaya mu bukifwanyikizho bitufunjishapo ka pa butemwe ne kifyele kya kwa Yesu? (Isaya 42:3)

⁶ Byo aingijilenga mwingilo wanji, Yesu waubilanga balanda lusa ne babula wa kwibakwasha. Kuba bino kwafikizhe bungauzhi. Mu Binembelo bya Kihebelu bantu banonka ne baji na bulume pa bimye bimo bebesakanya ku bujimi bo batekezha bulongo nangwa ku bichi byatenkuma. (Sala. 92:12; Isa. 61:3; Yele. 31:12) Pakuba bayanji ne babula wa kwibakwasha bebesakanya ku jitete jafyotoka ne ku muzhinge wa lampi ubena kufutumuka, bintu byo balengulwile bingi. (Tangai Isaya 42:3; Mat. 12:20) Ngauzhi Isaya bamutangijile ku mupashi wazhila kwingijisha ino ñambilo ya kifwanyikizho pa kulumbulula butemwe Yesu bo akobilanga bantu bo balengulwile ku bakwabo.

7-8. Yesu wafikizhe byepi bungauzhi bwa kwa Isaya?

⁷ Nembi wa Mambo Awama aye Mateo waambile pe Yesu byo afikizhe buno bungauzhi amba: “Jitete jafyotoka kechi ukejichimuna ne, nangwa muzhinge ufutumuka kechi ukamuzhimya ne.” Bya kukumya bimo byaubile Yesu byalengejile bantu bo balengulwile, beumvwanga nobe jitete jafyotoka nangwa bapelejilwe bajinga nobe muzhinge ubena kufutumuka ujitu pepi kuzhima kumwenamo. Umo pa bano ke mwanamulume wajinga na mbumba. Kechi wajingapo na luketekelo lwa kubukwa ne kupwanañana na ba mu kisemi kyanji ne balunda nanji ne. (Luka 5:12, 13) Kabiji kwajinga mwanamulume washinkile matwi kabiji wajinga kamama. Akifwanyikizhai byo aumvwanga ku muchima inge wamona bakwabo na kwisamba misambo yo abulanga kumvwa. (Mako 7:32, 33) Pano bino, bano kechi bo bonkatu ne.

⁸ Mu moba ajingako Yesu pano pa ntanda, Bayudea bavula baitabijile’mba bantu bamanamanga na mambo o balengele nangwa alengele bansemi babo. (Yoa. 9:2) Luno lufunjisho lwa bubela lwalengelanga bantu bamanamanga kwilengulula bingi. Yesu pa kufikizha bungauzhi bwa kwa Isaya, wabukanga bano bantu bamanamanga ne kwibalengela kwikala na luketekelo mwi Lesa. Kino kitulengela kwikala na ñanyi luketekelo?

9. Kinembelo kya Bahebelu 4:15, 16 kimwesha byepi amba Ñanga Mwine Mukatampe uji mwiulu witubila lusa?

⁹ Tangai Bahebelu 4:15, 16. Twashiinwa kuba’mba Yesu witumvwina lusa. Kino kibena kulumbulula ka? Muntu uji na lusa umvwa kutama ku muchima pa kumona babena kuyanda. Kyambo kya Kingiliki kyatuntululwa’mba “kumvwa lusa” kilumbulula kumvwa bibena kumvwa bakwetu ku muchima pa makatazho o babena kupitamo. Kino kyo kyambo kyaingijishe ne mutumwa Paulo pa Bahebelu 10:34, kwamba pa byo twafwainwa kumonanga bakwetu baji mu kaleya. Mashimikila aamba pa byakukumya byaubile Yesu, amwesha byo kyamukolanga ku muchima inge wamona bantu na kuyanda. Kechi wibabukangatu na mambo a kuba’mba ye wajinga mwingilo wanji ne. Pakuba waubanga bino mambo wibatele muchima kabiji wakebeshanga kwibakwasha. Nabiji mwanamulume wajinga na mbumba ye abukile, wakonsheshe kumubukilatu palepa, bino Yesu wamukwachile. Kyamweka uno mwanamulume kyo kyajinga kimye kitanshi kumukwatapo ku muntu panyuma ya myaka yavula. Kabiji Yesu byo abukilenga mwanamulume washinka matwi, wamufumishe pa jibumba ne kumutwala kwa bunke na kumubuka. Kabiji Mufaliseo byo alengulwile mwanamukazhi ndengamambo walapijile waovwele maulu a kwa Yesu na mipolo ne kwiashimuna na nsuki yanji, Yesu watakaikile uno mwanamukazhi ne kololako Mufaliseo. (Mat. 8:3; Mako 7:33; Luka 7:44) Yesu kechi wachinuzhukanga bakolwa nangwa balengele mambo akatampe ne. Pakuba bantu ba uno mutundu wibatambwilanga na kifyele ne kwibatekenesha. Twafwainwa kushiinwa’mba ne atweba witubila lusa.

LONDELAINGA ÑANGA MWINE MUKATAMPE

10. Ñanyi bintu byo banengezhezha bashinka matwi ne bampofu bya kwibakwasha kufwenya kwipi ne Yehoba? (Monai ne bipikichala.)

¹⁰ Baana ba bwanga ba kwa Yesu bamulondela kupichila mu kumwesha kifyele, lusa ne butemwe ku bantu. (1 Pe. 2:21; 3:8) Nangwa kya kuba kechi twakonsha kubuka bashinka matwi ne bampofu ne, bino twakonsha kwibakwasha kufwenya kwipi ne Yehoba. Nabiji mabuku o batuntulula mu milaka ya kwamba na maboko aji mu milaka kukila pa 100. Kabiji kuji mabuku a bampofu mu milaka kukila pa 60 ne mavidyo muji mawi alumbulula biji mu vidyo mu milaka kukila 100. Abino bintu byonse bikwasha bampofu ne bashinka matwi kufwenya kwipi ne Yehoba ne Mwananji.

11. Jibumba ja Yehoba jimwesha byepi amba jata muchima bantu bapusana pusana byonka byaubanga Yesu? (Byubilo 2:5-7, 33) (Monai ne bipikichala.)

¹¹ Jibumba ja Yehoba jibena kwingila na ngovu kukwasha bantu bapusana pusana kufwenya kwipi ne Yehoba. Vulukai kuba’mba Yesu byo bamusangwile, waitulwile mupashi wazhila kya kuba bantu bonse baishile pa kijiilo kya Pentekosita, batendekele kumvwa mambo awama mu ‘milaka yabo.’ (Tangai Byubilo 2:5-7, 33.) Ne mu ano moba, Yesu ubena kutangijila jibumba ja Lesa kusampanya mabuku mu milaka kukila pa 1,000, kabiji ino milaka yavula yambatu bantu bacheche. Nabiji milaka yavula ya mu America, yambatu bantu bacheche bekala ku buyeke ne ku bulenge bwa America. Nangwa byonkabyo, jibumba ja Lesa jatuntulula mabuku alumbulula Baibolo mu ino milaka kukila pa 160. Kuba bino kwalengela bantu bavula bamba ino milaka kumvwa mambo awama. Kabiji mabuku etu atuntululwa mu milaka kukila pa 20 ya mu kyalo kya Romania. Bavula bamba ino milaka baswa kuteleka ku mambo awama.

12. Mu ñanyi mashinda akwabo jibumba ja Yehoba mo jibena kukwashisha bantu?

¹² Kununga pa kukwasha bantu kumvwa mambo awama, jibumba ja Yehoba jibena kukwasha ne boba baponenwa na bya malwa. Na mambo a kino, bavula babena kwipana kukwasha balongo ne banyenga bakajilwa. Kabiji jibumba ja Lesa jibena kushimika bishimikwa mwa kupwijila kabiji kino kibena kukwasha bantu kwikala na mwa kupwijila mwawama ne kwibakwasha kufunda pa butemwe bwa Lesa.

ÑANGA MWINE MUKATAMPE BYO EMUKWASHA

13. Ñanyi mashinda amo Yesu mo etukwashisha?

¹³ Kabiji Yesu byo aji kafunga wawama, witukwasha ne pa muntu pa muntu kwikala na bulunda bwawama ne Yehoba. (Yoa. 10:14; Efi. 4:7) Kulefulwa kwakonsha kwitulengela kwikalatu nobe muzhinge ubena kufutumuka nangwa nobe jitete jafyotoka. Twakonsha kulefulwa na mambo a kikola kikatampe, bintu byo tulubankanya nangwa inge twizhingijisha na mwina Kilishitu mukwetu. Kyakonsha kukatazha kuta muchima pa luketekelo lwetu lwa kulutwe inge tubena kumanama. Nangwa byonkabyo, vulukainga’mba Yesu umona byo mubena kupitamo kabiji uyuka byo mubena kumvwa ku muchima. Yukai’mba Yesu wimumvwina lusa kabiji ukebesha kwimukwasha, ukemukosesha kwingijisha mupashi wazhila inge mwalefulwa. (Yoa. 16:7; Titu. 3:6) Kabiji Yesu wakonsha kwingijisha “bya bupe mu bantu” ne bena Kilishitu bakwenu kwimutundaika ne kwimukwasha.​—Efi. 4:8.

14. Twafwainwa kuba byepi inge twalefulwa?

¹⁴ Inge mwalefulwa, langulukainga pa mwingilo uji ne Yesu byo aji Ñanga Mwine Mukatampe. Vulukainga’mba Yehoba kechi watuminetu mwananji kwiya pano pa ntanda na kupana bumi bwanji ne, bino wamutumine ne kwiya na kumvwisha byumvwa bantu ku muchima inge babena kupita mu makatazho. Inge twalefulwa na mambo a kulenga mambo nangwa bintu byo tulubankanya, Yesu winengezha “kwitukwasha pa kimye kyafwainwa.”​—Hebe. 4:15, 16.

15. Shimikizhai kyamwekele kimwesha byo bakonsha kukwasha muntu wafumine mu jitanga ja Yehoba kubwela mu kipwilo.

¹⁵ Kabiji Yesu wingijisha bantu banji kukeba ne kukwasha bantu bafuma mu jitanga ja Yehoba. (Mat. 18:12, 13) Akilangulukai pa byapichilemo mulongo Stefanob wafuukwilepo kutanwa ku kupwila byo papichile myaka 12 kufuma kimye kyo bamufuminye mu kipwilo. Waambile’mba: “Kechi kyapelele ne, bino nakebeshe kubwela mu kisemi kya Yehoba. Bakulumpe mu kipwilo baishile na kwisamba ne amiwa bandengejile kukasuluka. Kimye kimo nezhachishanga bingi kabiji nakebanga ne kuleka kwibikako, bino bamvulwilemo kuba’mba Yehoba ne Yesu bakeba’mba ntwajijile kwa kubula kwikileka. Byo bambwezhezhe, bonse mu kipwilo bantambwijile bingi bulongo pamo na kisemi kyami. Mu kuya kwa moba, bakazhi bami nabo batendekele kufunda Baibolo kabiji lelo jino bonse mu kisemi kyetu tubena kwingijila Yehoba.” Ñanga Mwine Mukatampe umvwa bingi bulongo inge bantu balapila bebakwasha kubwela mu kipwilo.

16. Mambo ka o tusanchila pa kwikala na Ñanga Mwine Mukatampe witubila lusa?

¹⁶ Yesu byo ajinga pano pa ntanda, wakwashishe bantu bavula bingi pa kimye kyafwainwa. Ne lelo jino twashiinwa kuba’mba uketukwashanga kimye kyonse kyo tukakebewanga bukwasho. Kabiji mu ntanda ipya ukakwasha bantu ba lukookelo kukuulwa ku bundengamambo ne bumbulwakulumbuluka. Tumusanchila bingi Lesa wetu aye Yehoba mambo butemwe bwanji bukatampe ne lusa byo byamulengejile kutongola Mwananji kwikala Ñanga Mwine Mukatampe witubila lusa.