Nanchi Mukivuluka Nyi?

Nanchi mwatanga Byamba bya Usopa bya uno mwaka nyi? Monai inge mwakonsha kukumbula ano mepuzho:

Ñanyi bintu bitulengela kupa Yehoba lukumo?

Tuba bino na mambo a kuba’mba twanemeka Yehoba kabiji twamutemwa bingi. Kabiji tupa Yehoba lukumo inge ketubuuleko bantu pe aye mambo tukeba nabo kumuyuka.​—w25.01, ji. 3.

Inge betuzhingijisha, ñanyi kintu kyakonsha kwitukwasha kulekelako bakwetu mambo?

Kechi twafwainwa kufwilangatu mukachi ne, pakuba kuleka kuzhingila ne kubula kufiila bakwetu mfika kuketukwasha kutwajijila kwikala na lusekelo.​—w25.02, ma. 15-16.

Mambo ka balongo banyike o bafwainwa kulondela mwana wa bwanga Mako?

Mako waswile kwingila mwingilo ye bamupele. Nangwa kya kuba Mako kyamukolele bingi ku muchima kabiji walefwilwe, bino kechi walekele ne. Wakoseshe bulunda bwanji ne Paulo ne bena Kilishitu bakwabo bakoma mu lwitabilo.​—w25.04, ji. 27.

Yesu walumbulwilenga ka byo alombele amba: “Nejisolola jizhina jenu kwi abo”? (Yoano 17:26)

Baana banji ba bwanga bayukile jizhina ja Lesa. Bino Yesu wibalengejile kuyuka bulongo mwina jino jizhina, ko kuba’mba kyaswa muchima wanji, byubilo ne mashinda anji.​—w25.05, ma. 20-21.

Kukooka muchima kwitulengela kuyuka ñanyi bintu?

Kwitulengela kuyuka’mba kuji bintu bimo byo twabula kuyuka. Nabiji kechi twayuka kimye kikeya mpelo nangwa jishinda Yehoba jo akobilamo bintu pa kyokya kimye ne. Kabiji kechi twayuka bikamweka kesha nangwa Yehoba byo etuyuka ne.​—w25.06, ma. 15-18.

Twakonsha kuba byepi pa kuba’mba tumwenemo mu jashi ja mvula bantu nangwa mu kibaaba?

Twakonsha kwiipuzha amba: “Ñanyi bishinka byo baingijisha pa kukwasha luonde kumvwisha? Nanchi kujipo kishimpi kyo baingijisha kyo nafwainwa kwingijisha pa kufunjisha nyi? Bañanyi bakonsha kutemwa uno mutwe?’​—w25.07, ji. 19.

Jishimikila ja kwa Davida jitufunjishapo ka pe Lesa byo alekelako mambo?

Nangwa kya kuba Davida walengele mambo akatampe, bino byo alapijile kufuma panshi ya muchima, Yehoba wamulekejileko mambo. (1 Mfu. 9:4, 5) Inge Lesa witulekelako mambo, ulubako kabiji kechi uketukambwilapo kulutwe ne.​—w25.08, ji. 17.

Inge ye tufunjisha Baibolo bishinka bimo byamukatazha kumvwisha, twakonsha kuba byepi?

Inge ye mufunjisha Baibolo, bishinka bimo byamukatazha kumvwisha, mwakonsha kushapo bishinka byamukatazha kumvwisha pa kyo kyo kimye ne kwibibwelela pa kimye kikwabo.​—w25.09, ji. 24.

Baibolo waamba’mba bundengamambo buji na “bujimbijimbi.” (Hebe. 3:13) Mu ñanyi jishinda?

Bundengamambo kechi bwitulengelatu kuba byatama ne. Pakuba bwitulengela ne kutwajijila kuzhinauka butemwe bwa Lesa.​—w25.10, ji. 16.

Ñanyi bintu bisatu byakonsha kwitukwasha kuwamishako milombelo yetu?

(1) Kulanguluka pa byubilo bya Yehoba. (2) Kulanguluka pa byo tubena kupitamo ne kwibitongola mu lulombelo, nabiji kulekelako bakwetu mambo. (3) Kulomba kimye kyabaya. Kuba bino kwitulengela kwamba biji ku muchima.​—w25.10, ma. 19-20.

Twakonsha kukwasha byepi bakikulumpe?

Twafwainwa kufwakeshanga ne kutumina foni balongo ne banyenga bakota. Twakonsha ne kwibatwalako ku kipatela. Nangwa kwingila nabo mu mbaji yapusana pusana ya mwingilo wa kusapwila.​—w25.11, ma. 6-7.

Ñanyi bintu bikemukwasha kunemeka Lesa pa juba jenu ja masongola?

Londelai mizhilo ya kafulumende. Monai kuba’mba bintu byonse byo mukoba byamwesha bipangwa bya mupashi wa Lesa. Kange mukizhemo mu mvwajilo ne mwekelo ne, kabiji chinuzhukainga bisho byakanya Baibolo. Isambainga bulongo kimye kyo mubena kunengezha masongola.​—w25.12, ma. 21-24.