Anweba Bakikulumpe—Mwanema Bingi mu Kipwilo

Kampe kukoma kubena kwimulengela kukankalwa kwingila byo mwaingilanga kala. Nangwa kya kuba mwaingijila Yehoba pa myaka yavula, mwakonsha kutendeka kwilengulula na mambo a bintu byo mubena kukankalwa kuba luno. Mwakonsha kutendeka kwesakanya byo mubena kwingila luno na byo mwaingilanga kala. Inge ibyo, ñanyi bintu byakonsha kwimukwasha kutwajijila kwikala na lusekelo?

LANGULUKAINGA PA BINTU YEHOBA BYO AKEBA’MBA MUBENGA

Iipuzhai’mba, ‘Ñanyi bintu Yehoba byo akeba’mba ngubenga?’ Mwakonsha kutaana lutekenesho mu byambo biji pa Mpitulukilo ya mu mizhilo 6:5, paamba’mba: “Mwafwainwa kutemwa Yehoba Lesa wenu na muchima wenu yense, ne na mweo wenu yense ne na bulume bwenu bonse.”

Kwesakana na byaamba kino kyepelo, Yehoba ukeba’mba mumwingijilenga na muchima wenu yense, na mweo wenu yense ne na bulume bwenu bonse. Kino kishinka kikemukwasha kubula kwiesakanya ku bakwenu nangwa kwesakanya byo mubena kwingila luno na byo mwaingilanga kala.

Akilangulukai pa kino: Byo mwakijinga banyike, mwaingijilanga byepi Yehoba? Bantu ba Yehoba bavula bakonsha kwamba’mba bamwingijilanga na muchima wabo yense papelela bulume bwabo. Ne anweba byo byo mwamwingijilanga kwesakana na byo mwajinga pa kyokya kimye. Luno mubena kumwingijila byepi Yehoba? Mubena kumwingijila papelela bulume bwenu kwesakana na biji bwikalo bwenu pa kino kimye. Kumona bintu mu jino jishinda kukemulengela kuyuka’mba mubena kwingijila Yehoba byonkatu byo mwamwingijilanga kala. Pa kyokya kimye mwamwingijilanga papelela bulume bwenu, ne pa kino kimye mubena kumwingijila papelela bulume bwenu.

MWAKONSHA KUKWASHA BINGI BAKWENU

Akilangulukai ne pa kino kishinka kikwabo: Ikalai na mweno yawama ya bukote bwenu, kange mwibumonenga’mba lunkobe ne. Kwambatu kine, bena Kilishitu bakota kuji bintu byo bafwainwa kuba luno byo bakankalwanga kuba byo bakijinga banyike. Mwakonsha kuba bino byalondelapo:

Buulaingako bakwenu bintu byo mwapitamo. Langulukai pa bino byambo bya mu Baibolo:

Mfumu Davida waambile’mba: “Najinga mwanyike pano luno nakota, bino kechi nakimonapo kala muntu waoloka bamulekelela, nangwa baana banji saka bapitamo na kukeba kajo ne.”​—Sala. 37:25.

Yoshua waambile’mba: “Pano talai! Amiwa njitu pepi kufwa, kabiji mwayukishatu bulongo na michima yenu yonse ne na myeo yenu yonse amba kafwako kintu nangwa kimo kya mu milaye yawama kimulayile Yehoba Lesa wenu kyabula kufika ne. Bintu byonse byafika kwi anweba. Kafwako nangwa kimo kyabula kufika ne.”​—Yosh. 23:14.

Kampe ne anweba mwakyambapo byambo bya uno mutundu. Davida ne Yoshua baambile pa bintu byo bapichilemo mu bwikalo bwabo. Bano bakalume ba Yehoba bakishinka baambile pa bintu byo bemwenejile ne kwiumvwina pa myaka yavula. Onkao mambo, byambo bya uno mutundu biji bingi na bulume.

Inge mwaingijila Yehoba pa myaka yavula, mwakonsha kwamba pa bintu byo emubila nangwa byo aubila bakwenu. Nanchi muvulukapo kimye kyo mwimwenejile Yehoba byo apesheshe bantu banji nyi? Inge ibyo, buulaingako bakwenu. Kuba bino kwakonsha kwibatundaika byonkatu byo mwatundaikilwe. Kwambatu kine, mukatundaikanga bingi balongo ne banyenga inge ke mwibashimikizhe byo mwapitamo mu mwingilo wa Yehoba.​—Loma 1:11, 12.

Jishinda jikwabo jo mwakonsha kutundaikilamo balongo ne banyenga ke kutanwa ku kupwila ku Nzubo ya Bufumu inge kyakonsheka, kechi kutelekelangatu ku nzubo ne. Kuba bino, kukemulengela kumwenamo ne kutundaika bakwenu. Ba Connie bo twajikwambapo baambile’mba: “Kutanwa ku kupwila kuntundaika bingi inge nalefulwa. Ntundaikwa bingi mambo balongo ne banyenga pa Nzubo ya Bufumu bamwesha byo bantemwa. Mmwesha’mba nsanchila balongo ne banyenga kupichila mu kwibapapo bya bupe. Kabiji nebikako kutwajijila kuba bintu pamo na balongo ne banyenga bikosesha bulunda bwami ne Yehoba.”

YEHOBA USANTA BINGI PA BYO MU MWINGIJILA MU BUKISHINKA

Mu Baibolo muji mashimikila aamba pa bantu bavula Yehoba bo atemenwe nangwa kya kuba bakotele. Akilangulukai pe Shimeona mwina Isalela mukote wajingako mu moba asemekelwe Yesu. Kyamweka Shimeona kimye kyo ayanga ku nzubo ya Lesa, wamonanga bansongwalume byo baingilanga mingilo ya Lesa. Pano Shimeona waumvwanga byepi ku muchima? Kampe walangulukanga’mba kechi wanema kwi Yehoba ne, mambo kechi wakonsheshe kumwingijila byonka byamwingijilanga bano bansongwalume ne. Bino Yehoba kechi byo byo amumonanga ne. Yehoba wamonanga Shimeona amba ‘waoloka kabiji wamwakamwanga.’ Yehoba wamupesheshe byo amulengejile kufikwako ne kumona Yesu saka akiji lukeke. Kabiji Yehoba wamulengejile ne kwaula bungauzhi pa bintu bikamwekela Mesiasa kulutwe. (Luka 2:25-35) Nangwa kya kuba Shimeona wakotele, Yehoba wamumonanga’mba mwanamulume wajinga na lwitabilo lwakosa “ne mupashi wazhila wajinga pe aye.”

Ne anweba mwafwainwa kushiinwa’mba Yehoba wanemeka bingi byo mumwingijila mu bukishinka nangwa kya kuba mwakota. Kwi aye “kya bupe kitabilwa ke kyokya kipana muntu mwayila bintu byo aji nabyo, kechi mwayila bintu byo abula ne.”​—2 Ko. 8:12.

Onkao mambo, ñanyi bintu byo mwafwainwa kutapo muchima? Ñanyi mbaji ya mwingilo wa kusapwila yo mwakonsha kwingilako nangwa pa kakimye kacheche? Kabiji mwakonsha kutundaika balongo ne banyenga kupichila mu kwibatuminapo foni nangwa kakikachi. Bintu nangwa bichechetu byo tubila balongo ne banyenga bimwesha’mba twibatemwa byakonsha kwibatundaika bingi, kikatakata inge bebobila bino bintu baingijila Yehoba pa myaka yavula.

Bakikulumpe bamo bengilako mwingilo wa kusapwila nangwa kya kuba bakolwakolwa. Tangai kyamwekele ku kyalo kya ku musela wa Africa kiji mu kakitenguluzha ka kuba’mba “Kyapulwishe Bumi Bwanji.”

Vulukainga kuba’mba bukishinka bwenu ne byo mwaingijila Yehoba pa myaka yavula bitundaika bingi bakwenu. Mwachinchika bintu byavula kabiji shiinwai kuba’mba, “Lesa waoloka kabiji kechi wakonsha kuvulama mingilo yenu ne butemwe bo mwamwesha jizhina janji ne, byo mwibengijilenga bazhijikwa ne byo mwatwajijila na kwibengijila.”​—Hebe. 6:10.

TWAJIJILAI KUKWASHA BAKWENU

Bashayuka bamba’mba bakikulumpe banabalume ne banabakazhi bata muchima pa kukwasha bantu, bekala na butuntulu bwa mubiji bwawama, balanguluka bulongo kabiji bekala myaka yavula.

Ibyo kuba’mba kuba byawama kechi kwakonsha kufumyapo makatazho eya na mambo a kukota ne. Bufumu bwa Lesa bo bonkatu bukafumyapo ano makatazho. Lesa ukabwezha bakote ku bwanyike byo akafumyapo bundengamambo ne lufu.​—Loma 5:12.

Nangwa byonkabyo, kwingijila Yehoba ne kukwasha bantu kumuyuka, kwimulengela kutwajijila kwikala na luketekelo lwakosa kabiji kwakonsha ne kwimukwasha kwikala na butuntulu bwa mubiji bwawama. Anweba bakikulumpe, yukai’mba Yehoba wanemeka bingi byo mumwingijila. Kabiji ba mu kipwilo bemunemeka bingi pa lwitabilo lwenu.