Jibumba ja Bafunda Baibolo

KU MPELO ya 1930, kwaishile jibumba ja bupopweshi ja katataka jo batelanga’mba, Bibelkring (jizhina ja mu mulaka wa Dutch jilumbulula “jibumba ja bafunda Baibolo”) jatendekejile ku mpunzha ya Kizhiba kitelwa’mba Toba ku kabeta ka ku buyeke bwa Sumatra. Ajino jibumba jatendekele kimye bafunjishi ba pa sukulu bavula kyo bebapele mabuku alumbulula Baibolo kwi Eric Ewins, painiya wasapwijile ku mpunzha ya ku Kizhiba kya Toba mu 1936. Bintu byatangile bafunjishi mu ano mabuku byalengejile bafunjishi kufuma mu Chechi wa Batak Polotesitanti ne kulenga mabumba a kusambakena mu mazubo na kufunda Baibolo. Ano mabumba akomejileko kabiji bantu bavujile bingi.a

Kwingijisha mabuku ebashijile painiya, bantu batanshi ba mu jibumba ja bafunda Baibolo bataaine bukine bwa mu Baibolo. Dame Simbolon wafunjile bukine mu 1972, wajinga mu jino jibumba, waambile’mba, “Bakananga kupopwela mbandela kabiji kechi basekelelanga Kiminshiminshi nangwa kuvuluka moba a kusemwa ne. Bamo basapwilanga ku nzubo ku nzubo.” Byo babujile kulondela lutangijilo lwa jibumba ja Lesa, jino jibumba jakankelwe kuyilako palutwe mambo jilengejile mizhilo ajo jine. Limeria Nadap-Dap wajinga mu jibumba ja bafunda Baibolo, luno ke nyenga yetu walumbulula’mba, “Banabakazhi kechi bebaswishanga kwishinga manyi, kuvwala bivwalo bya katataka nangwa nsapato ne. Ba mu jino jibumba bebakanyanga ne kutambula bitupa, akino kyazhingijishe bingi kafulumende.”

Jibumba ja Bafunda Baibolo jaabene mu mabumba avula kabiji mu kuya kwa kimye ano mabumba azhimañene. Bapainiya byo baishile jikwabo ku mpunzha ya Kizhiba kya Toba, bantu bavula bajinga mu jino jibumba batambwijile bukine.