Mashinda Atanshi o Baingijishanga pa Kusapwila

Kwingijisha Waileshi

MU 1933 balongo banengezhezhe waileshi mu Jakarta kuba’mba bajizhenga majashi a mu Kizungu aambile mulongo Rutherford. Majashi a mu mulaka wa ku Netherlands beatanganga pa mwela na muntu watemenwe bukine. Kwingijisha uno waileshi kwalengejile bantu bavula kutemwa kabiji kwakwashishe balongo kupana mabuku avula mu mwingilo.

Byo bajizhizhe jashi jaambile mulongo Rutherford jajinga na mutwe wa kuba’mba, “Buwame bwa Mutende ne Luzhikijilo,” jino jashi jazhingijishe bantangi ba Bakatolika.a Abano bantangi bapelemo mambo mulongo De Schumaker pa kubika jino jashi pa waileshi, amba “wibabepela, kwibakosamika ne kwibendeleka.” Mulongo De Schumaker wakaine mambo o bamupelemo, pano bino bamwambijile kupana mali 25 guildersb ku kije. Mapepala a byambo asatu aambile pa ano mambo, akino kyalengejile kusapwila ku bantu bavula.

Bwato bwa Jizhina ja Lightbearer

Pa 15 July 1935, Bwato bwa Watch Tower Society bwalepele mamita 16 bwafikile ku Jakarta byo basapwijile bañondo batanu na umo kufuma mu Sydney, ku Australia. Mu buno bwato mwajinga bapainiya babambakana batanu na babiji benengezhe kusapwila mambo awama mu Indonesia monse, mu Singapore ne mu Malaysia.

Kukila pa myaka ibiji, bapainiya baingijishanga Bwato bwayanga ku biito bikatampe ne bicheche bya mu Indonesia na kupana mabuku avula alumbulula Baibolo. Jean Deschamp washimikizha’mba, Inge bwato bwafika pa kiito kicheche, “ba mingilo bajizhanga majashi pa kijimba aambile J. F. Rutherford wajinga mukulumpe wa Watch Tower Society. Fwanyikizhai bena Malay byo bakuminye pa kumona bwato bukatampe byo bwafikile ku kiito kyabo ne kuteleka ku byambo byafuminenga mu bwato. Bantu batemenwe bingi pa kumvwa byambo byafuminenga mu bwato.”

Balongo byo basapwijilenga na mukoyo kyazhingijishe bingi bantangi ba bupopweshi kabiji batundaikile kafulumende kukanya Bwato kufikila mu biito bya mu Indonesia. Abuno Bwato bwabwelele ku Australia mu December 1937, kabiji bwalengejile mwingilo wa bumishonale kwenda bulongo mu Indonesia.