Wanemekele Bingi Bulunda Bwanji ne Lesa

MU May 1963, bantu babulanga kutundaika kafulumende wa bena Chaina, babuushishe milukuchi ku Muzhika wa Java. Muzhi wa Sukabumi mo mwabuukile kiwowo, akuno ko kwaubilanga kisemi kyetu busulu. Bantu bavula bazhingijile, kuvwangakotu ne bo twaikalanga nabo kipi kipi bapaswile nzubo yetu. Twakankelwe bya kuba bano bantu byo batwelele ne kusenda bipe byetu.

Abano bantu byo bayile, bo twaikalanga nabo baishile na kwitutekenesha. Batata baikele nabo mu nzubo. Pa bipe byetu byo baonawine, bataainepo ne Baibolo wabo wa mu mulaka wa Sunda. Bamuzhikwile ne kubuula bantu amba ano makatazho beambijilepo jimo. Kabiji bebalumbulwijile bintu byawama bikaleta Bufumu.

Batata kechi batele muchima ku bintu bya pano pa ntanda ne. Betubuulanga kimye kyonse amba: “Twafwainwa kutangizhako bintu bya bufumu patanshi!” Kwingila kwabo na ngovu, kwalengejile bamama, ne atweba baana batanu na umo, bankambo ba myaka 90, bakilongo bavula ne bo twaikalanga nabo kipi kipi kufunda bukine.