Ofweshi wa Musampi Waikela Peulu

Mu 2008, basapwishi mu Indonesia bafikile 21,699. Akino kyalengejile mpunzha ya musampi kukepa. Kabiji na mambo a kuba bashimikilenga ofweshi wa musampi kimye kyo bakainye mwingilo, bakashimikijile kwalepa. Nangwa byonkabyo, bakebelenga kushimika musampi mukatampe kwipi na muzhi wa Jakarta.

Byo papichile myaka ibiji, balongo bapotele kishimikwa kyapuseneko na musampi mutanshi kyaikejile peulu mu Jakarta. Kabiji balongo bapotele kishimikwa kikwabo kyatentakene na kino, mwaikalanga balongo ne banyenga kukila pa 80 bengijila pa Betele. Bapotele ne kishimikwa kikwabo mwingijilanga batala pa kisemi kya Betele.

Jibumba ja bantungi jafumine mu byalo byapusana pusana jaingijile pamo na balongo bakonkakwa kuwamisha maofweshi ne bibamba. Darren Berg watangijilanga bya kushimika, waambile’mba: “Yehoba watwajijile kwitukwasha mu makatazho onse o twapitangamo. Twakebele kushimika kishimikwa kyakatataka mwa kuwamishisha mema, bino kafulumende wakainye kushimika mambo kechi wikiyukile ne. Pakuba Kamonyi wa konkakwa wayukile bya kulengalenga wayile na kwisamba na kiloolo wa mu kafulumende. Uno kiloolo wituswishishe ne kwamba’mba naswa byaambile balongo.”

Ofweshi wa musampi wakatataka bamupaine pa 14 February 2015. Anthony Morris III wa mu Jibumba Jitangijila ye waambile jashi. Vincent Witanto Ipikkusuma wa mu Kavoto ka Musampi waambile’mba: “Ofweshi wetu waikela mu mpunzha yawama muji ne bipamo bikwabo bitala pa mingilo ya mu Indonesia. Pano twaleka kufyama. Bantu luno bayuka biji Bakamonyi ba kwa Yehoba. Bayuka’mba kechi tukafumamo ne.”

“Mpunzha Yawama Kusapwilako!”

Mu myaka ya kuno kulutwe, Bakamonyi bavula kufuma mu byalo byapusana pusana babena kuya ku Indonesia. Lothar Mihank waambile’mba: “Kwingijila kuji kukajilwa kwakwasha bingi bantu bavula byonkatu byo kwakwasha kyalo kyetu. Bakwasha bantu kuyuka bya kwingila, kuyuka mwa kubila bintu ne kutundaika bipwilo, kabiji bakwasha bantu kuyuka balongo ne banyenga mwaya ntanda yonse.” Ki ka kibalengejile kuya kuji kukajilwa? Kabiji bintu bibendejile byepi ko bayile? Umvwai bintu bimo byo baambile.

Jason ne Casey Gibbs bafumine ku United States baambile’mba: “Twakebeshe bingi kuyuka basapwishi bo banembele mu Buku wa Mwaka, kabiji twataaine’mba kyalo kya Indonesia kiji pa byalo biji na bantu bavula mwaya ntanda. Bakwetu bayile na kwingijila kuji kukajilwa betubuujile’mba ku Indonesia kubena kukebewa bantu bavula bakwingijilako. Ponkapo twatumine foni ku ofweshi wa musampi mu Indonesia kabiji betwambijile kumonañana ne Bali. Kajibumba ka Kizungu mu Indonesia po po katendekeletu, twipaine kuya na kwingijilako. Twaambile’mba tusakwingijilakotu mwaka umo, bino twaingijileko myaka isatu. Bantu bavula bo twasapwilangako kechi bakimwenepo Bakamonyi ba kwa Yehoba ne. Mwingilo wawamine bingi!”

Stuart ne Mandy Williams ba mulume ne mukazhi bakikulumpe bafumine ku Australia baambile’mba: “Twakebelenga bantu babena kukeba kuyuka bukine, akino kitulengejile kuya ku Indonesia. Twataaine baana basukulu bavula ba pa sukulu mukatampe bayuka Kizungu ku Malang mu East Java bakebelenga kumvwa mambo awama. Batemwa bingi keyala wa jw.org! Mwingilo wa kusapwila kuno ubena kwenda bingi bulongo.”

Takahiro ne Mari Akiyama baingijile mwingilo wa bupainiya mu Yogyakarta pa jikuji ja Java baambile’mba: “Akuno twaikala bulongo kukila byo twaikele mu kyalo kyetu kya Japan. Kuji bantu bawama muchima ne mushingi. Bantu bavula kikatakata banyike, bakeba bingi kuyuka biji bupopweshi bukwabo. Juba jimo byo twatanchikilenga mabuku pa matebulu, twapele bantu magazini 2,600 mu maolatu atanu.”

Dan ne Janine Moore ba mulume ne mukazhi baji na myaka ya mu ma 50 baambile’mba: “Umvwe twaya na kusapwila, bantu betuzhokoloka. Inge twamwemwesela pa kwibatala; ne abo bamwemwesela. Bakeba kuyuka kyo tubena kuba. Inge twibatangila kinembelo mu Baibolo, bamo bepuzha’mba, ‘Nekinembe nyi?’ Bakumya maana awama aji mu Baibolo. Twaikalako mwaka umo, nanchi inge twaishile kala. Twakebelenga mpunzha kuji bantu babula kuyuka Yehoba, kabiji twiitaaine!”

Misja ne Kristina Beerens baishile mu 2009 saka baji bamishonale, aluno ke bakalama ba mwanzo. Baambile’mba: “Nangwatu pa jikuji ja Madura mu East Java, mpunzha mwavula Bamozilemu mu Indonesia, bantu batako muchima inge twibasapwila. Bantu bemika myotoka yabo ne kulomba magazini. Bamba’mba: ‘Amiwa ne Mozilemu, pano bino natemwa bingi kutanga ano magazini. Nanchi mwakonsha kumpapo ne akwabo nsendele balunda nami nyi?’ Aino “mpunzha yawama bingi kusapwilako!”

Majimi Apya Kuba’mba Beanowe

Frank Rice byo aishile mu Jakarta mu 1931, mu Indonesia mwajingatu bantu 60,000,000. Lelo jino mu Indonesia bantu babena kunangijila ku 260,000,000, kabiji Indonesia kyo kyalo kya buna muji bantu bavula ntanda yonse.

Kabiji Bakamonyi ba kwa Yehoba mu Indonesia babena kuvujilako bingi. Mu 1946, mwajingatu basapwishi ba kishinka jikumi bapulukile mu Nkondo ya Bubiji ya Ntanda Yonse. Lelo jino, mu kino kyalo muji basapwishi 26,000, kumwesha’mba Yehoba ubena kwibapesha! Kabiji bantu 55,864 batainwe ku Kivuluko mu 2015, kino kibena kumwesha’mba bantu bakonsha kuvujilako.

Yesu waambile’mba: “Mwingilo wa kunowa wabaya, pakuba ba mingilo bakepa. Onkao mambo, lombai Mwine mwina mwingilo wa kunowa atume ba mingilo mu mwingilo wanji wa kunowa.” (Mat. 9:37, 38) Bakalume ba kwa Yehoba mu Indonesia bavuluka bino byambo. Babena kwibikako bingi kwingila mwingilo wa kutumbijika jizhina ja Yehoba mu kino kyalo.—Isa. 24:15.