Kubuula Bantu Jizhina ja Yehoba

Pa myaka yavula yo bakainye mwingilo, balongo mu Indonesia balondejile lujimuno lwapaine Yesu lwa kuba’mba, “jimukai nobe miloolo ne kukooka muchima nobe bankunda.” (Mat. 10:16) Kwibakanya byo kwapwile, bantu bavula bafunjile bya kusapwila “na kuchinchika.”—Byu. 4:31.

Balongo bamo bachinanga kusapwila ku nzubo ku nzubo, pakuba abo bateletu muchima kubwela ku bantu bo basapwilangako ne bo bafunjishanga Baibolo. Bakwabo balekele kusapwila ku Bamozilemu. Bavula belumbululangatu amba bena Kilishitu, kechi betongolanga’mba Bakamonyi ba kwa Yehoba ne, kabiji baingijishanga ma Baibolo a Machechi angi kukila kwingijisha Baibolo wa Binembelo bya Ntanda Ipyaa wa mu mulaka wa ku Indonesia. Bakwabo nabo kechi bakasulukile kupa bantu mabuku alumbulula Baibolo ne.

Baikele na uno moyo na mambo a kwibakanya. Bamo balondelanga bisho bya kuba’mba inge bakukatazha kyawama kukookela pa kuba’mba ubule kutanwa mu lukatazho. Nga balongo bafwainwe kwibakwasha byepi?

Yehoba wibakwashishe byo aingijishe balongo kwibapa mafunde a kulondela. (Efi. 4:11, 12) Mu 2010, mulongo Stephen Lett wa mu Jibumba Jitangijila wibafwakashijile ne kutundaika balongo kwingijisha Baibolo wa Binembelo bya Ntanda Ipya muji jizhina ja Lesa mu mwingilo. Misja Beerens mishonale waambile’mba, “Jashi jaambile mulongo Lett jafikile basapwishi bavula pa muchima. Bamwene kuba’mba kyanema kwikala Kamonyi wa kwa Yehoba ne kunemeka Mambo a Lesa.”

Bamozilemu ba mu Indonesia byo baesakanyanga Bakamonyi ba kwa Yehoba ku machechi akwabo, Mwingilo wa Bufumu wa mu Indonesia waambile’mba: “Kwisolola’mba wi Kamonyi wa kwa Yehoba pa kutendeka kwisamba na bantu ke kintu kyawama bingi. . . . Twimenako Yehoba, kabiji tukeba jizhina janji ne bintu byo akeba kubila bantu kuyukanyikwa ku bantu bo tusapwilako!” Shinsuke Kawamoto wingijila pa ofweshi wa musampi mu Indonesia waambile’mba: “Kwingijisha jino jishinda mwafuma bintu byawama bingi. Bamozilemu bavula bakeba bingi kuyuka biji Bakamonyi ba kwa Yehoba. Bakeba kuyuka kyalengela kuba’mba tupusaneko na machechi akwabo. Kukeba kuyuka byo tuji kwitulengejile kwibasapwila mambo awama.”

Basapwishi bebatundaikile kusha Kyamba kya Usopa ne Labainga! Lothar Mihank Mukulumpe Utangijila Kavoto ka Musampi waambile’mba: “Pa kuba’mba bantu bayuke byo tuji, bafwainwa kutanga magazini etu. Magazini ‘akwasha bya kutendeka kwisamba na bantu’ ne kwibatundaika kukeba kufunda bukine. Inge twasha magazini avula, tukwasha bantu bavula kufunda pe Yehoba.”

Kusapwila Kutanwa Bantu Bavula Kwakwasha Bavula

Mu 2013, musampi wa mu Indonesia waingijishe mashinda abiji a kusapwilamo aswishishe Jibumba Jitangijila: mwingilo wa kusapwila ku mapunzha kutanwa bantu bavula ne kipwilo kyonse kuya na kusapwila kwavula bantu. Ano mashinda awama akwasha bantu bavula ba mu Indonesia kumvwa mambo awama.

Matebulu o bengijisha mu mwingilo wa kusapwila ku mapunzha kutanwa bantu bavula beabikijile mu mashitolo akatampe mu West Jakarta. Bipwilo bya konkakwa byatendekele kutanchika pa kubika mabuku ne matebulu mu mapunzha abo a kusapwila. Mu mwakatu umo, babikile matebulu ne bya kutanchikapo mabuku kukila pa 400 kabiji bebitanchikile mu mizhi ya Indonesia. Ñanyi bintu byafumamo?

Yusak Uniplaita, mukulumpe mu kipwilo kya mu Jakarta waambile’mba: “Saka tukyangye kutendeka kwingijisha ano mashinda a kusapwilamo, kipwilo kyetu kyatambulanga magazini 1,200 pa ñondo pa ñondo. Byo papichile bañondo batanu na umo, twatambwilenga magazini 6,000 pa ñondo pa ñondo. Aluno tutambula magazini 8,000 pa ñondo pa ñondo. Kabiji tupa bantu mabuku ne mabuloshuwa avula.” Mu Medan, North Sumatra, kajibumba ka bapainiya kabikile bya kutanchikapo mabuku mu mapunzha asatu. Mu ñondo mutanshi ye batendekele kwingila, bapaine mabuku 115 ne magazini 1,800. Byo papichile bañondo babiji, bapainiya 60 bafumine mu mapunzha atanu na abiji bapaine mabuku kukila pa 1,200 ne magazini 12,400. Jesse Clark mishonale waambile’mba: “Ano mashinda akatataka abena kukwasha balongo ne kulengela bantu ba mu Indonesia kutemwa bukine. Kusapwila kutanwa bantu bavula kusakutwajijila!”

Kwingijisha Mulaka Wamba Bantu

Indonesia ke kyalo muji bantu bamba milaka yapusana pusana.b Nangwa kya kuba bantu bavula bamba mulaka wa ku Indonesia wa lingua franca, bakwabo bavula bamba milaka yabo.

Mu 2012, ofweshi wa musampi wafuukwilepo bya kukwasha nyaunda muji ino milaka yavula. Tom Van Leemputten waambile’mba: “Twatendekejilepo kutuntulula mabuku a mu milaka 12 yamba bantu mamilyonyi 120. Bantuntuluzhi ba ku Java byo bamwene talakiti mutanshi mu mulaka wa Java batemenwe bingi. Onkao mambo, baikele na mabuku a mu mulaka wabo!”

Bipwilo byavula byatwajijile kupwila kwingijisha mulaka wa ku Indonesia nangwatu mu mapunzha mwajinga bantu bamba milaka yapusana pusana. Lothar Mihank, waambile’mba: “Mu 2013, amiwa ne mukazhami Carmen twatainwe ku kubuñana kwa moba abiji kwaikejile pa jikuji ja Nias ku North Sumatra. Bantu 400 batainweko baambanga mulaka wa Nias, pano bino majashi onse beambile mu mulaka wa ku Indonesia. Balongo byo baswile’mba bakonsha kwamba majashi mu mulaka wa Nias, twabuujile batainweko kuba’mba kesha mukatelekanga ku majashi mu mulaka wa Nias. Juba jalondejilepo, bantu kukila pa 600 baishile ku kubuñana. Carmen watwajijila kwamba’mba: “Bantu bateleko bingi muchima ku majashi a mu mulaka wa Nias kukila byo batelekelenga ku majashi o baambilenga mu mulaka wa ku Indonesia. Basangalele bingi ne kumvwisha byambo bya mu Baibolo mu mulaka wabo.”

Ne bantu bashinka matwi mu Indonesia babena “kumvwa” bukine mu mulaka wabo. Kufumatu mu 2010, bantuntuluzhi ba mu Mulaka wa Kwamba na Maboko wa ku Indonesia balupwile mabuloshuwa atanu na abiji ne matalakiti atanu na asatu a mu Mulaka wa Kwamba na Maboko wa ku Indonesia. Kabiji ofweshi wa musampi wanengezhe masukulu 24 a kufunjisha balongo ne banyenga kukila pa 750 kuyuka mulaka wa kwamba na maboko. Lelo jino, bipwilo 23 ne mabumba abena kutundaika ne kukwasha bantu ne kutekenesha bantu bashinka matwi mamilyonyi asatu bekala mu Indonesia.

Aluno mu Indonesia muji Mabumba a Bantuntuluzhi 37. Muji bantuntuluzhi 117 ne bakwabo 50 babena kukwashako uno mwingilo mu mapunzha 19 mu Indonesia.