Asia ne Middle East

Kusapwila Maola 100 pa Myaka 100

Mu kyalo kimo kya mu Asia, mwanamukazhi waya nkuwa ukaya mu mafilimu waswile kufunda Baibolo. Ponkapotu watendekele kwingijisha bintu byo afunjilenga ne kutaya mabuku aamba pa kupopwela mipashi ne bankishi ba Babuda.

Mulunda nanji umo wamwambijile’mba: “Nanchi kechi wakonsha kwikileka kufunda Baibolo pa myaka isatu ne kuta muchima pa nkito yobe nenyi? Inge wapwisha, wakonsha kutendeka kufunda jibiji.”

Uno mwanamukazhi wakumbwile’mba: “Papita myaka 24 pa kuba’mba namutaane Yehoba. Mambo ka o nafwainwa kulekela kufunda pe aye pa myaka ikwabo isatu?”

Mu mulungu yenka ye afwainwe kunembesha mu Sukulu wa Mwingilo wa Lesa, kampanyi ulenga mafilimu wamwichile. Bamupeele mwingilo pa myaka ina inge kya kuba waswa kukayila pa lubaji lonse lo bakamupa. Wakaine uno mwingilo. Mu May 2014, waikele musapwishi wabula kubatizhiwa, kabiji mu August wafuukwilepo kusapwila maola 100. Byo bamushikishe ene mambo o aubijile kino, aye wakumbwile’mba, “Mbena kukeba kusekelela pa myaka 100 ya bukalama bwa kwa Yesu ne kusapwilanga jiola jimo pa myaka yonse yo alama!” Wafikizhe kikonkwanyi kyanji. Mu January 2015, wabatizhiwe kabiji ubena kwingilako bupainiya bwa kukwasha.

Kwingijisha Bulongo Kimye mu Kaleya

Mu Sri Lanka, banyenga bana bayile na bbasi na kusapwila mu nyaunda mo babulanga kwingijila mwavujile Babuda. Pa juba ja bubiji jo basapwijile, mwanamulume wa mu bupopweshi bungi ne wendesha tumyotoka tucheche, baimikile banyenga ne kwibanena. Mu kakimyetu kacheche, jibumba ja bantu bazhingijile bajinga 30, jibazhokolokele. Bakapokola nabo baishile ne kutwala banyenga ku ofweshi wabo, ne kwibabika mu kaleya nangwa kya kuba kechi bebataaine na mambo ne. Bebabikile mu kaleya mwajinga bambanzhi kabiji bebendelekelenga, nangwa byonkabyo basapwijile mu kaleya. Nyenga umo waambile’mba: “Bambikile mwajinga bambanzhi, nangwa byonkabyo nebasapwijile. Bakuminye bingi kyo bankashijile kabiji bangipwizhe mepuzho avula pa bintu byo naitabilamo. Muntu umo wanshikishe’mba, ‘Mambo ka o wasangalela?’”

Kije Kikatampe kya mu Sri Lanka kyaswa pa byo twalobejile bakapokola pa kwitukwata kwa kubula mambo. Ne ano mambo bakyangye kwiachiba.

Kukwasha Mwanamukazhi Wakolwa

Michiko nyenga painiya mu Japan wafunjishenga Baibolo mwanamukazhi mukote wajinga mu kipatela kwingijisha mulaka wa kwamba na maboko. Nyenga washikishe wa mwingilo mu kipatela inge kujipo bakwabo bakolwa bo akonsha kwisamba nabo. Michiko wataaine Kazumi umvwatu bino kechi wamba ne. Kazumi walaalangatu pa mwanya kufumatu kimye kyo ataainwe mu mapuso na motoka saka aji na myaka 23, kabiji kechi umina kajo nangwa kutoma mema ne. Wajinga na mepuzho avula kabiji waswile kufunda Baibolo.

Michiko waipuzhanga mepuzho, kabiji Kazumi waingijishanga maboko kutongola paji mukumbu mu jifuka nangwa kunemba. Kazumi byo aikele na foni, Michiko wabalaulanga nanji kinembelo kya juba lukelo. Nangwa kya kuba bulume bwa kwa Kazumi bwayilenga na kupwa, watwajijile kufunda kabiji wakebeshe bingi kwikala Kamonyi wa kwa Yehoba. Byo afikizhe myaka 61 ne kufunda Baibolo pa myaka 13, Kazumi waikele musapwishi wabula kubatizhiwa.

Na mambo a kuba Kazumi kechi wenda ne, kipwilo kyanengezhezhe kuba’mba atelekenga ku kupwila konse ne majashi onse a pa kubuñana. Banyenga bapusana pusana mu kipwilo batanganga mikumbu ya kwa Kazumi pa kupwila.

Kazumi unemba makalata atundaika aba bonse babena kufunda Baibolo kuya na kupwila. Usapwila ba mingilo mu kipatela ne bonse beya na kumupempula. Kazumi wibabuula’mba, “Inge ke mufunde Baibolo mukekala na lusekelo.”

Mwanamulume wa mu Bupopweshi Bungi Wafunda Bukine

Mu kyalo kya ku Southeast Asia, nyenga wayile ku kipatela kya meso, ko akataaine mwanamulume wa mu bupopweshi bungi. Uno nyenga wamushikishe’mba, “Nanchi wakonsha kutemwa kwikala na bumi bwalumbuluka ne kwikala myaka ne myaka mu ntanda yawama nyi?” Mwisambo wawamine bingi, kabiji wamupele buloshuwa wa kuba’mba Umvwainga Byamba Lesa. Uno mwanamulume wapeele nyenga nambala yanji ya foni, kabiji nyenga naye wapele mulongo mu kipwilo. Kechi papichile ne kimye kyabaya ne, mulongo wisambile na uno mwanamulume ne kumwita kwiya na kuteleka ku jashi jiikajila. Uno mwanamulume wiyowele kupwila, kikatakata kwimba nyimbo ya Bufumu, kabiji waumvwine bingi bulongo bonse byo bamutambwijile.

Uno mwanamulume washikishe umvwe Bakamonyi baji na masukulu akatampe, pakuba mulongo wamulumbulwijile’mba tufunjisha bantu Baibolo kabiji wamwambijile’mba usakumufunjishanga. Mulungu walondejilepo, uno mwanamulume wapwishishe kitango 1 kya buku wa Nanchi Baibolo Kine Ufunjisha’mba Ka? Watwajijile kufunda, kuya na kupwila ne kukumbulapo pa Kyamba kya Usopa.

Uno mwanamulume byo ayile ku kubuñana kwa mwanzo, waimenejilengako musampi wamwichile kuba’mba akeye na kufwakasha pa Betele. Mulungu walondejilepo, uno mwanamulume waendele maola jikumi kuya ku Betele, kabiji bamutambwijile bingi bulongo. Ku mpelo ya February 2015, uno mwanamulume walekele kuya mu bupopweshi mo ayanga kabiji watwajijila kufunda Baibolo ne kuya na kupwila ne kukumbulapo.

Walekele Kufunda, Watendeka Jikwabo

Bapainiya bebatumine katataka ku northeastern India, mpunzha ko babujile kusapwilapo mambo awama pa myaka yavula. Bapainiya bataaine bantu bavula bakebelenga kufunda Baibolo, kabiji bakebelenga mpunzha pa kwikela na kupwila. Byo bayilenga ku bantu bo bafunjishanga Baibolo, bamwene kishimikwa kyo bashimikilenga kabiji bakebele kushikisha. Byo baendeleko pacheche, babwelele kuba’mba bepuzhe. Kunyuma ya kino kishimikwa, bataaineko mwanamukazhi mukote kabiji bamubuujile’mba twi Bakamonyi ba kwa Yehoba. Watemenwe bingi. Waambile’mba, “Ne amiwa ne Kamonyi wa kwa Yehoba,” kabiji wibatambwijile mu nzubo yanji. Wibamwesheshe mabuku o ajinga nao a mu 1970 kufika mu 1980. Wafunjilepo na bapainiya pa myaka 30 yapichilepo, kabiji wayanga na kupwila nangwa kya kuba bamwatawanji bamukanyanga. Wayukile’mba wataana bukine, pano bino walekele kufunda kimye bapainiya kyo bafumineko ku ino mpunzha. Baana banji bonse bayanga mu machechi apusana pusana, bino aye kafwako ko ayanga ne.

Baana banji batendekele kumukanjikizha kuyanga mu Katolika kuba’mba bakamuzhiike bulongo inge wafwa. Nkasanji wa mukazhi wamusendele kuya ku chechi ya Bakatolika, bino bakankelwe kufika mambo a kuvula kwa myotoka, kabiji babwelelemo ku nzubo. Nkasanji wamwambijile’mba tukaya juba jikwabo, pano bino wakolelwe. Jonkaja juba jo akolelwe mute bapainiya baishile! Aluno watendeka kufunda Baibolo jikwabo, kuya na kupwila kabiji ubena kutundaika baana banji ne bankana banji kufunda Baibolo.