Bena North ne South America

Kwingijisha Kandulu Mungye pa Kufunda Baibolo

Bapainiya beikajila ba mulume ne mukazhi bengijila ku mpunzha ya kwalepa mu Brazil, bataaine Valdira mwanamukazhi wafunjilepo Baibolo saka papita myaka 13. Byo bayilenga mu mukwakwa wa lufukuchi ne kwabuka mikola, abano bapainiya bataaine Valdira wakebelenga kufunda Baibolo jibiji. Na mambo a kuba waikalanga kwalepa, bamwenepo jishinda ja kumukwashishamo. Nangwa kya kuba Valdira wajinga na foni, yaingilangatu inge waya kwalepa na nzubo yanji. Nangwa byonkabyo, Valdira wafundangatu ku ma 9 koloko a bufuku. Akifwanyikizhai byo kyajinga: Nsongwakazhi ubena kufunda Baibolo kwingijisha foni mungye bufuku saka abena kwingijisha kandulu.

Valdira watelekanga ku kupwila kwa pa Mulungu kwingijisha foni. Wayanga mu kiswa saka asenda Baibolo, Kyamba kya Usopa ne lwimbo. Inge kubena kunoka mvula, wasendanga sumbulenyi.

Mu March, Valdira waendele makilomita 97 kuya ku Nzubo ya Bufumu kuba’mba atanweko kimye kyo balupwile Baibolo wa Binembelo bya Ntanda Ipya wa Kipotogizi. Watemenwe bingi byo atambwile Baibolo wa katataka. Byo bamusanchijile pa kwibikako kufunda Baibolo, Valdira waambile’mba, “Kafwako ne kyakatazha ne!”

“Nayukile Namba Juba Jimo Mukeya”

Bena Yukpa ke bena Amerindia bekala mu Colombia. Frank painiya wiikajila saka akyangye kufwakashila bantu ba mu yoya mpunzha, bamubuujile pe mfumu John Jairo wapangile jibumba ja ba evangelical chechi jakebelenga kusapwila mu yoya mpunzha. Juba jimo, John byo ayukile’mba ntangi wabo watambwilenga bya bujikumi ku bantu, wamupangishe aku saka aloza mwiulu.

Frank waamba’mba: “Byo twafikile mu yoya mpunzha, muntu mutanshi ye twasapwijile wajinga mwana wa mukazhi wa kwa John Jairo! Byo twamumwesheshe buku wa Nanchi Baibolo Kine Ufunjisha’mba Ka? ponkapotu waambile’mba, ‘Abuno bo bupopweshi bo nsakuyangamo!’ Kepo anyemene lubilo kuya na kubuula bashanji amba twafika. Ponkapotu betwichile. Nangwa kya kuba twaumvwine moyo, twayile. Saka tukyangye ne kwambapo kyambo ne, abo baambile’mba: ‘Nayuka namba muji mu bupopweshi bwa kine. Myaka itanu na isatu yapitapo, nataaine buku ku mpunzha ko bataya biswaswa mu Becerril uji nobe uno ye mwa kupapo mwanami wa mukazhi. Namutangile, kabiji kufumatu kyokya kimye nemupembejilenga. Nayukile namba juba jimo mukeya. Mbena kukeba’mba mumfunjishenga amiwa, kisemi kyami ne bantu ba mu ino mpunzha. Mwakasuluka kusapwila.’

“Abino byambo byalengejile mipolo kuyengelela mu meso etu. Bantu bonse ba mu mpunzha baishile na kuteleka byo twasapwijilenga, kabiji John Jairo watuntulwilenga mu mulaka ye bayuka. Byo twabwelelenga, witupele mbongolo wa kwitusendelako byola byetu. Aluno tubena kufunjisha bantu 47 Baibolo, bena Yukpa 120 bafuma mu mizhi yapusana pusana, kuvwangakotu John Jairo ne mwananji wa mukazhi.”

Wamanyikanga Bantu Wapimpula Byubilo Byanji

José wajinga kala Katolika wikala mu Ecuador. Wanemba’mba: “Nashikilwe bingi Bakamonyi ba kwa Yehoba. Nebayanjishe pa myaka jikumi. Nanengezhanga mabumba a kupuma Bakamonyi ne kwibapamo mambo amba bangivi. Kabiji pa maofweshi a bakapokola, nebambilanga namba banswishe nkiyenga mu kaleya. Kimye kimo, twaonawine motoka wa Bakamonyi. Pa kimye kikwabo, twatayile kapulututu mu kimbotela.

“Mu 2010, nakolelwe kikola kya bankumba. Dokotala wambuujile’mba mfume pa nzubo yami ku Andes ne kuya ku mpunzha kwatwa kyuya, kuba’mba nkakose. Nayile na kwikala pa bujimi bwa mulongo wami, ku musezho wa mukola ko nakatendekele kutala pa bujimi ne pa bilelwa. Byo naikalangatu bunke, nakebelenga wa kwisamba nanji. Bañanyi baishile pa bujimi? Bakamonyi ba kwa Yehoba! Na mambo a kumvwa mukose, naswile kwisamba nabo, kabiji naumvwine bingi bulongo byo balumbulwilenga Binembelo. Naswile kufunda Baibolo mambo nakebelenga kuyuka bintu. Byo twafunjileko pa bañondo batanu na umo, nayile na kupwila kimye kitanshi. Natemenwe bingi byo bammwesheshe kifyele ne kunta muchima, neshikishe’mba, ‘Nanchi abano bo bakalume ba Lesa wa kine nyi?’ Natwajijile kufunda kabiji nabatizhiwe mu April 2014.

“Kyankolele bingi ku muchima byo namanyikanga Bakamonyi. Nangwa byonkabyo, Yehoba wankwashishe kupimpula byubilo byami. Pa kubuñana kwa mwanzo kwajingako pa 4 October 2014, bangipwizhe pa bwikalo bwami bwa kala byo namanyikanga Bakamonyi amba, ‘Inge bakwambila’mba ulombe lulekelo lwa mambo ku bantu bo wamanyikanga, bañanyi bo wakonsha kulombako lulekelo lwa mambo?’ Nakumbwile’mba, nafwainwa kulomba lulekelo lwa mambo ku mulongo Edmundo, pano bino kechi nayuka ko nakonsha kumutaana ne. Kwa kubula amiwa kuyuka, kalama wa mwanzo waichile uno mulongo. Bantu ba mu luonde bajijile, byo bamwene amiwa ne Edmundo twipakachilamo ne kujila pa mutuntamo.”

“Anweba Yehoba, Ntuminai Bakamonyi Benu”

Jibumba ja banyenga ja kuya mu mwingilo ku Asunción mu Paraguay, japwishishe kwingila mu mute wazonga mu nyaunda yo bejipele. Bafuukwilepo kuba’mba batwajijile kusapwila mu mizhi ya kipikipi. Kamonyi umo waambile’mba: “Kampe kuji ubena kulomba.” Byo bafikile pa nzubo imo, nsongwakazhi umo walupukile mu nzubo kwiya ku banyenga saka amwemwesela ne kukeba kuyuka umvwe bajinga Bakamonyi ba kwa Yehoba. Uno mwanamukazhi waambile’mba, ñondo wapwa twafumine ku Bolivia ne kuvilukila kuno ku Paraguay na mambo a nkito. Saka akyangye kufuma ku Bolivia wafundanga Baibolo. Kafwako muntu nangwa umo mu mpunzha mo aikalanga wamubuujile kuji Bakamonyi ne, onkao mambo, walombele’mba, “Napopwela anweba Yehoba, ntuminai Bakamonyi benu.” Jonkaja juba, banyenga baishile pa nzubo ne kutendeka kumufunjisha Baibolo.