Kutundaika Bantu Kwingijisha Baibolo

TUKEBA bingi kukwasha bantu bonse kutesha muchima ku Mambo a Lesa, Baibolo. Mu uno buku wazhila mo mufuma byambo byo tusapwila, kabiji tukeba bantu kuyuka’mba bintu byo twamba kechi byetu ne, bino bifuma kwi Lesa. Bantu bafwainwa kuketekela Baibolo.

Mu Mwingilo wa mu Bujimi. Kimye kyo mubena kwinengezha kuya mu mwingilo wa mu bujimi, salaipo kinembelo kimo nangwa byavula bya kwisamba na bantu bakeba kumvwa. Nangwa kya kuba mwanengezhatu byambo bicheche bya kwamba pa kusha buku ulumbulula Baibolo, javula kikwasha bingi kutanga kinembelo kyafwainwa. Baibolo uji na bulume bwa kutangijila bantu baji nobe mikooko kukila kintu kyonse kyo twakonsha kwamba atweba. Umvwe kechi kyakonsheka pa kyokyo kimye kutanga Baibolo ne, mwakonsha kwambakotu byambo bijimo. Mu myaka kitota kitanshi, mivungilo panembelwe Binembelo kechi yavujile ne. Nangwa kyajinga bino, Yesu ne batumwa banji baambanga byambo byonka byo bebinemba mu Binembelo. Ne atweba twafwainwa kwibikishako kulabijila binembelo ne kwibingijisha bulongo mu mwingilo wetu, kimye kimo kwambakotu byambo bijimo.

Inge pa kyokyo kimye kijitu bulongo kutanga Baibolo, mukwatai bulongo kuba’mba mwina nzubo naye amonengapo po mubena kutanga. Umvwe kya kuba mwina nzubo kealondele mu Baibolo wanji, bintu byo akatanga byakonsha kumulengela kukebesha kumvwa byavula.

Nangwa byonkabyo, mwafwainwa kuyuka’mba bantuntuluzhi bamo ba ma Baibolo kechi bateshesheko muchima pa kutuntulula Mambo a Lesa ne. Ntuntulwilo yabo javula kechi yailamo na byambo bya milaka ine itanshi mwanembejilwe Baibolo ne. Mu ma Baibolo avula a ano moba bafumyamo jizhina ja Lesa, balubankanya byambo byaambiwa mu milaka ine itanshi pa mambo a bafu, kabiji ne kufya Baibolo byo aamba pa mambo a nkebelo ya Lesa ku ino ntanda. Pa kuba’mba mukwashe muntu kuyuka byo bauba, mwakonsha kwesakanya binembelo muji bishinka kupichila mu kwingijisha ma Baibolo apusana pusana nangwa ma Baibolo atanshi o batuntulwile mu mulaka muntutu umo. Pa mitwe ikwabo yapusana pusana, buku wa Ukupelulula Ukufuma Mu Malembo, wamwesha bishinka biji mu byepelo bingila javula byo bebituntulula mu ma Baibolo apusana pusana. Muntu yense watemwa bukine, ukasanta bingi pa kuyuka bino bishinka.

Pa Kupwila kwa Kipwilo. Bonse bafwainwa kutundaikwa kwingijisha ma Baibolo abo pa kupwila kwa kipwilo. Kino kikwasha bingi mu mashinda avula. Kikwasha bantu kutesha muchima pa kyo babena kwambapo. Kibakwasha kumvwisha mikambizho yo abena kufunjisha ñambi. Kabiji kilengela aba baiya na kupwila kimye kitanshi kuyuka’mba mu Baibolo mo mwafuma bintu byo twaitabilamo.

Bantu mu luonde bakonshatu kwimulondela mu ma Baibolo abo umvwe mwibatundaika kuba byonkabyo kimye kyo mubena kutanga Kinembelo. Kwibambila’mba twayai tutangile pamo kino kinembelo jo jishinda jimo jawama bingi.

Kiji kwi anwe bene ñambi kumona binembelo byo mukeba kukosesha kupichila mu kutundaika luonde kutangila nenu pamo. Kyawama kutanga binembelo byakonsha kwimukwasha kukosesha bishinka bikatampe. Apa bino, umvwe kimye ko kiji, nungaipo binembelo bikwabo bicheche bibena kukosesha mulanguluko ye mubena kwambapo.

Nangwa byonkabyo, kutongolatu kinembelo nangwa kutundaikatu luonde kumona kyokyo kinembelo, javula kechi kikwasha ne. Inge mwafikatu kutanga kinembelo kabiji katandakano mwakaya pa kikwabo aku bantu mu luonde saka bakikebakeba kinembelo kitanshi, bakalefulwa ne kwikileka kulondelamo mu Baibolo. Onkao mambo, monainga umvwe bantu bekitana kinembelo nangwa ne. Umvwe bavula bekitana, tangai.

Langulukilaipo jimo. Tongwelai jimo kinembelo kyo mukeba kutanga. Kino kikemukwashako kubula kutaya kimye kya kupembelela luonde kuba’mba nalo lwikitane. Kikwasha bingi bantu kumvwisha umvwe samwibapa kimye kya kutana binembelo nangwa kya kuba kino kyakonsha kwimulengela kwambatu byambo bicheche.