Kyafyamika kyo Twayuka

Nanchi bakikubuulapo kala kyafyamika nyi?—a Baibolo waambapo pa kyafyamika kitelwa amba “kyafyamika kyazhila.” Kyazhila mambo kifuma kwi Lesa. Kabiji kitelwa’mba kyafyamika mambo bantu kechi bekiyukile ne. Nangwatu bamalaika nabo bakebelenga kwikiyukisha bulongo. Abya ukeba kwikiyuka kino kyafyamika nyi?—

Kala kene, Lesa walengele mwanamulume ne mwanamukazhi mutanshi. Mazhina abo bajinga ba Adama ne Evwa. Lesa wibapele muzhi wawama wa kwikalamo watelwanga’mba bujimi bwa Edena. Inge kya kuba ba Adama ne Evwa bakokejile Lesa, abo pamo ne baana babo inge baalwile ino ntanda yonse kwikala paladisa byonka byajinga bobwa bujimi. Kabiji inge baikele mu Paladisa myaka ne myaka. Pano bino, wayuka ba Adama ne Evwa kyo baubile nyi?—

Ba Adama ne Evwa kechi bakokejile Lesa ne, o ene mambo o tubujila kwikala mu paladisa lelo jino. Pano bino, Lesa waambile’mba ukawamisha ntanda yonse, kabiji bantu bonse bakekalanga myaka ne myaka na lusekelo. Lesa ukoba byepi kino? Pa myaka yavula bingi bantu kechi bayukile byo akoba kino ne. Kyafyamikile.

Yesu kimye kyo aishile pano pa ntanda, wafunjishe bantu bintu byavula pa kino kyafyamika. Waambile’mba kino kyafyamika kyaamba pa Bufumu bwa Lesa. Yesu wabuujile bantu kulombela buno Bufumu kuba’mba bufike. Buno Bufumu bukalula ino ntanda kwikala paladisa wawama.

Abya waumvwa bulongo pa kuyuka kino kyafyamika nyi?— Yuka kuba’mba kanatu bantu bakokela Yehoba bo bakekala mu Paladisa. Baibolo witubuula mashimikila a banabalume ne banabakazhi bakokelanga Yehoba. Wakonsha kutemwa kwibayuka nyi?— Twaya tufundeko pa bamo ne kumona byo twakonsha kwikala byonka byo bajinga.