KIPUNGU 3

Byambo Bikozha ku Muchima—Umvwe Tuji na “Mambo” na Mukwetu

“Nyenga mu kipwilo wambepejile’mba namwibila mali. Bavula mu kipwilo byo bayukile baswishishe kino. Byo papichile moba, uno nyenga wambuujile’mba wataana muntu wamwibijile. Nangwa kya kuba walombele lulekelo lwa mambo, nakaine kumulekelako mambo pa bintu byo angubile.”—Linda.

NANCHI kintu kyamwekejile Linda byo bamukozhezhe ku muchima ku nyenga, ne anweba kyakimumwekelapo kala nyi? Kyatama bingi kuba’mba bamo bonauna bulunda bwabo ne Lesa na mambo a byubilo bya bakwabo. Nanchi kino kyakimumwekelapo kala nyi?

Ñanyi Wakonsha “Kwitwabanya na Butemwe bwa Lesa”?

Kwambatu kine, kyakonsha kwitukatazha bingi kulekelako mambo mukwetu mwina Kilishitu inge witukozha ku muchima. Bena Kilishitu bafwainwa kwitemwa bene na bene. (Yoano 13:34, 35) Umvwe mwina Kilishitu mukwetu witulenga mambo, kyakonsha kwitukola bingi ku muchima.—Salamo 55:12.

Nangwa byonkabyo, Baibolo waamba’mba kuji bimye bimo bena Kilishitu byo balenga “mambo” bakwabo. (Kolose 3:13) Inge kino kitumwekela, kyakonsha kwitukatazha bingi kuyuka mwa kubila. Nanchi kujipo kintu kyakonsha kwitukwasha nyi? Monai mafunde asatu a mu Binembelo:

Shetu wa mwiulu wayuka bintu byonse. Yehoba umona bintu byonse byuba bantu, kuvwangakotu ne nshiji ilengela kuba’mba tuyandenga. (Bahebelu 4:13) Yehoba kimukola bingi ku muchima inge ke tuyande. (Isaya 63:9) Aye kechi uswisha “bya malwa nangwa bulanda” nangwa kintu kikwabo, nangwatu kalume wanji “kwitwabanya na butemwe bwa Lesa” ne. (Loma 8:35, 38, 39) Ne atweba kechi twafwainwa kuswisha kintu nangwa muntu mukwetu kwitwabanya na butemwe bwa Yehoba ne.

Kulekelako mambo muntu kechi kulumbulula’mba twaswisha byo auba ne. Umvwe twalekelako aba betulenga mambo, kechi kilumbulula’mba twatemwa, twaswisha nangwa twatundaika byo bauba ne. Yukai’mba Yehoba kechi uswisha bundengamambo ne, bino ulekelako mambo inge ndengamambo walapila. (Salamo 103:12, 13; Habakuka 1:13) Yehoba byo etutundaika kulekelako mambo bakwetu, ko kuba’mba ubena kwitubuula kubanga byonka byo oba. Aye kechi ‘uzhingila kikupu ne.’—Salamo 103:9; Mateo 6:14.

Inge twaleka kuzhingila kikupu, tumwenamo byawama. Mu ñanyi jishinda? Fwanyikizhai kino. Mwatola jibwe, kampe jabula kunemesha kabiji mwijilama mu kuboko pa kimye kyabaya. Umvwe mwijilamatu pa kakimye kacheche kechi jikemunemena ne. Pano ibyepi inge mwijilama pa kimye kyabaya? Abya mukatwajijila kwijilama pa maminiti? jiola jimo nangwa kukilapo nyi? Ine, kuboko kukakooka! Pano bino, kunema kwa jibwe kechi kukapusana ne. Inge mwijilama pa kimye kyabaya jikatendeka kunema. Byo byo kiji ne kuzhingila kikupu. Umvwe twalama kintu kyatama ku muchima, nangwatu kicheche kikatendeka kwitukatazha. O ene mambo Yehoba o abena kwitubuujila kubula kulama bintu byatama ku muchima. Kwibileka kwitulengela kumwenamo bintu byawama.—Byambo bya Maana 11:17.

Nyenga uji pa Nzubo ya Bufumu kyamukola ku muchima ne kuzhingila byo abena kutala nyenga mukwabo — Inge twaleka kuzhingila kikupu, tumwenamo byawama

“Naumvwinetu Nobe Yehoba ye Ubena Kwamba ne Amiwa”

Ñanyi kintu kyakwashishe Linda kubula kuzhingila kikupu kimye kyo bamubile kintu kyatama ku mukwabo mwina Kilishitu? Walangulukile pa Binembelo byaamba pa ene mambo a kulekelako bakwetu mambo. (Salamo 130:3, 4) Linda wayukile’mba inge twalekelako bakwetu mambo, Yehoba naye uketulekelako mambo etu. (Efisesa 4:32–5:2) Abino byambo byo byamufikile pa muchima, waambile’mba: “Naumvwinetu nobe Yehoba ye ubena kwamba ne amiwa.”

Mu kuya kwa kimye, Linda walekele kumuzhingijila. Wamulekejileko mambo awa nyenga, luno ke balunda bingi. Linda watwajijila kwingijila Yehoba. Yukai’mba Yehoba ukeba kwimukwasha ne anweba kulekelako bakwenu mambo.