LUFUNJISHO 14

Kulumbulula Bulongo Bishinka Bikatampe

Bahebelu 8:1

BYO MWAFWAINWA KUBA: Kwashai bantu kumvwisha bishinka bikatampe biji mu jashi ne kumona tumitwe tucheche byo twakwatankana na mutwe mukatampe wa jashi.

BYA KUBA:

Yukai ene mambo o mubena kwambila jashi. Pa kuba’mba mwambe bulongo jashi, mwafwainwa kuyuka inge jashi jenu jibena kwamba pa kutundaika bantu, kwibakwasha kushiinwa byaamba Baibolo nangwa kwibafunjisha byo babula kuyuka. Mweshai bishinka bikatampe byo byakwatankana na mutwe wa jashi.

Iipuzhai’mba: ‘Ñanyi mepuzho akonsha kwipuzha bantu inge baumvwa bino byambo? Ñanyi bintu byo bakonsha kuzhinauka? Ñanyi bwipuzho bo bakonsha kutendekelapo kwipuzha inge baumvwa bino byambo?’ Kwiipuzha bino kukemukwasha kutanchika bulongo bishinka biji mu jashi pa kuba’mba bantu bakalondelengamo bulongo byo mukambanga jashi.
Koseshai kishina kya jashi jenu. Bwezhaingapo kwamba kishina kya jashi nangwa kwamba byambo bimo biji mu mutwe wa jashi kufikatu ne byo musakupwisha kwamba jashi.
Lumbululai bishinka bikatampe mu jishinda japeela kumvwa. Mu jashi jenu, salaimo bishinka byakwatankana bulongo na kishina kya jashi kabiji byo mwakonsha kufunjisha bulongo mu kimye kyo bemupa. Salaitu bishinka bicheche ne kwibinemba, kabiji inge mwapwisha kwamba pa kishinka kimo, mwafwainwa kutulumanako saka mukyangye kuya pa kikwabo.

Ku ntendekelotu ya jashi jenu, mwakonsha kutongola bishinka bikatampe bijimo pa kuba’mba bantu balondelengamo, nangwa kwibibwezhapo ku mpelo ya jashi pa kuba’mba bantu bebivulukenga.