Langulukai pa Bishinka Byanema byo Mwafunda

Nanchi pa bimye bimo kimukatazha kuvuluka bintu byo mwafuma na kufunda nyi? Kino kitumwekela atweba bonse pa bimye bimo. Pano ñanyi kintu kyakonsha kwimukwasha? Ke kulanguluka pa bishinka byanema byo mwafunda.

Inge mubena kufunda, mwafwainwa kutulumanangako ne kulanguluka pa bishinka byanema bijimo. Abino Paulo byo byo atundaikile balongo ne banyenga kuba byo bafunjilenga bintu byo anembele mu nkalata yanji. Waambile’mba: “Kino kyo kishinka kine kikatampe.” (Hebe. 8:1) Paulo wakwashishe bantu bamutelekelenga kumvwisha bishinka byo aambilengapo ne byo byakwatankene na mutwe ye aambilengapo.

Inge mwapwisha kufunda, ikalaingako na kimye, kampe maminiti jikumi kya kulanguluka pa bishinka bikatampe byo mwafunda. Inge mwakankalwa kuvuluka byo mwafunda, monai tumitwe tucheche nangwa mikuku muji bishinka, kikatakata mukuku mutanshi uji mu jifuka pa kuba’mba muvuluke byo mwafunda. Inge mwafunjilapo kishinka kya katataka, esekai kwikilumbulula mu byambo byenu. Inge ke mulanguluke pa bishinka byanema, kino kikemukwasha kuvuluka bishinka byo mwafunda ne kuyuka byo mwakonsha kwibingijisha mu bwikalo bwenu.