LUFUNJISHO 59
Mwakonsha Kwikala Bakishinka Nangwa Babena Kwimumanyika
Katatakatu bantu bakatendeke kwitukanya kwingijila Yehoba kabiji baketumanyika na mambo a kumwingijila. Nanchi kino kyafwainwa kwitulengela kwakamwa nyi?
1. Mambo ka o twafwainwa kuketekela kwitumanyika?
Baibolo waamba’mba: “Bonse bakeba kwikala na munema wa kunemeka Lesa mwi Kilishitu Yesu, nabo bakebamanyikanga.” (2 Timoti 3:12) Yesu bamumanyikilenga mambo kechi wajinga wa pano pa ntanda ya kwa Satana ne. Kyo kimotu ne atweba kechi twi ba pano pa ntanda ne. Onkao mambo, akino kitukwasha kubula kukumya inge makafulumende ne bipamo bya bupopweshi ke bitumanyike.—Yoano 15:18, 19.
2. Twakonsha kwinengezhezha jimo byepi kwitumanyika?
Twafwainwa kuketekela na muchima yense mwi Yehoba lonka luno. Lombainga kimye kyonse kwi aye ne kutanganga Baibolo. Kabiji tanwainga ku kupwila kimye kyonse. Abino bintu bikemukwasha kukosa inge ke bemumanyike nangwatu inge ba mu kisemi kyenu bo babena kwimumanyika. Mutumwa Paulo ye bamanyikile javula bingi, wanembele’mba: “Yehoba ye nkwasho wami; kechi nakonsha kuchina ne.”—Bahebelu 13:6.
Inge saka tusapwila kimye kyonse, kisakuketupeelela bingi kuchinchika. Kabiji kusapwila kwitukwasha kuketekela bingi mwi Yehoba ne kubula kwikala na moyo wa kuchina bantu. (Byambo bya Maana 29:25) Inge moyo mufwaye wa kusapwila luno, kechi kisakukemukatazha kusapwila inge kafulumende witukanya kusapwila ne.—1 Tesalonika 2:2.
3. Umvwe babena kwitumanyika, tumwenamo byepi inge twatwajijila kwikala bakishinka kwi Yehoba?
Kechi tutemwa kwitumanyika ne. Pano bino, inge twachinchika makatazho, lwitabilo lwetu lukoselako. Tufwenya kwipi ne Yehoba, mambo twimwena byo etukwasha inge makatazho akila pa bulume bwetu. (Tangai Yakoba 1:2-4.) Kwambatu kine, kimukola bingi Yehoba ku muchima kwitumona na kuyanda. Bino utemwa bingi inge twachinchika. O ene mambo Baibolo o aambila’mba: “Umvwe mwachinchika lumanamo na mambo a kuba kyawama, kino kitokesha Lesa ku muchima.” (1 Petelo 2:20) Inge twatwajijila kwikala bakishinka kwi Yehoba uketupa bumi bwa myaka ne myaka mu ntanda ipya. Kepo bantu bonse bakekala mu ntanda ipya, bakengijilanga Yehoba kwa kubula wa kwibakanya.—Mateo 24:13.
FUNJILAIPO BIKWABO
Yukai ene mambo o twafwainwa kutwajijila kwikala bakishinka kwi Yehoba ne byo aketupesha nangwa kya kuba bantu babena kwitumanyika.
4. Mwakonsha kuchinchika lumanamo lwa mu kisemi
Yesu wayukile kuba’mba bamo ba mu kisemi kyetu kechi bakatemwa atweba kwingijilanga Yehoba ne. Tangai Mateo 10:34-36, ne kwisamba buno bwipuzho:
Ba mu kisemi bakonsha kwamba nangwa kuba ñanyi kintu inge umo wasalapo kwingijila Yehoba?
Pa kuba’mba tumone byo kikala, tambai VIDYO, ne kwisamba buno bwipuzho.
Mwafwainwa kuba byepi inge mulongo wenu nangwa mulunda nenu ke emukanye kwingijila Yehoba?
Tangai Salamo 27:10 ne Mako 10:29, 30. Inge mwapwisha kutanga kila kinembelo, isambai buno bwipuzho:
Uno mulaye wakonsha kwimukwasha byepi inge wa mu kisemi kyenu nangwa mulunda nenu ke emukanye kwingijila Yehoba?
5. Twajijilai kwingijila Yehoba nangwa babena kwimumanyika
Kikebewa kwibikako bingi inge bakwenu ke bemumanyike na mambo a kwingijila Yehoba. Tambai VIDYO, ne kwisamba buno bwipuzho.
Byaubile bantu bo bamwesha mu vidyo bimutundaika byepi?
Tangai Byubilo 5:27-29 ne Bahebelu 10:24, 25. Inge mwapwisha kutanga kila kinembelo, isambai buno bwipuzho:
Mambo ka o kyawamina kutwajijila kwingijila Yehoba nangwa kya kuba makafulumende etukanya kusapwila ne kupwila pamo?
6. Yehoba ukemukwasha kuchinchika
Bakamonyi ba kwa Yehoba, bakulumpe ne banyike batwajijila kwingijila Yehoba nangwa babena kwibamanyika mwaya ntanda yonse. Pa kuba’mba muyuke bintu bibakwasha kutwajijila, tambai VIDYO. Kepo mwisambe buno bwipuzho:
Mu vidyo ye mwatamba, ñanyi bintu byakwashishe Bakamonyi kuchinchika?
Tangai Loma 8:35, 37-39 ne Filipai 4:13. Inge mwapwisha kutanga kila kinembelo, isambai buno bwipuzho:
Akino kinembelo kyafwainwa kwimutundaika byepi kuchinchika lweseko lonse?
Tangai Mateo 5:10-12, ne kwisamba buno bwipuzho:
Mambo ka o mwafwainwa kwikela na lusekelo nangwa kya kuba babena kwimumanyika?
Bakamonyi ba kwa Yehoba bavula batwajijila kwingijila Yehoba mu bukishinka nangwa kya kuba babena kwibamanyika. Ne anwebatu mwakonsha.
BANTU BAMO BAMBA’MBA: “Amiwa kechi nakonsha kuchinchika kumanyikwa ne.”
Ñanyi binembelo byo mwafwainwa kwingijisha byafwainwa kwibakwasha kuchinchika?
ÑANYI BISHINKA BYO MWAFUNDA?
Yehoba utemwa bingi byo twibikako kumwingijila nangwa bantu babena kwitumanyika. Kabiji uketukwasha kuchinchika makatazho onse!
Mepuzho a kupitulukamo
Mambo ka bena Kilishitu o bafwainwa kuketekela kwibamanyika?
Ñanyi bintu byo mwafwainwa kuba luno bikemukwasha inge ke bemumanyike?
Ñanyi bintu byafwainwa kwimukwasha kuyuka’mba mubena kwingijila Yehoba nangwa kya kuba mubena kupita mu makatazho?
KEBAI BISHINKA BIKWABO
Tambai uno mulongo mwanyike byo abena kulumbulula Yehoba byo amukwashishe kuchinchika byo bamukashile na mambo a kubula kwivwanga mu bya pano pa ntanda.
Umvwai byakwashishe bamulume ne mukazhi bamo kutwajijila kwingijila Yehoba mu bukishinka pa myaka yavula nangwa kya kuba bebamanyikilenga.
Yukai bintu byafwainwa kwimukwasha kuchinchika inge ke bemumanyike.
“Inengezhezhai Jimo Kumanyikwa” (Kyamba kya Usopa, July 2019)
Twafwainwa kumonanga byepi kwitumanyika ku ba mu kisemi? Kabiji twafwainwa kuba byepi pa kuba’mba twikale mu mutende ne kutwajijila kwikala bakishinka kwi Yehoba?
“Bukine Buleta ‘Mpoko Kechi Mutende Ne’” (Kyamba kya Usopa, October 2017)