BYAFWAINWA KWIKALA BENA KILISHITU
Sekelainga Inge Babena Kwimumanyika
Bena Kilishitu bafwainwa kuketekela kwibamanyika. (Yoa 15:20) Nangwa kya kuba lumanamo luleta makatazho ne bijikila, bino twakonsha kwikala na lusekelo inge twatwajijila kuchinchika.—Mat 5:10-12; 1Pe 2:19, 20.
TAMBAI VIDYO WA KUBA’MBA SEKELAINGA NANGWA KYA KUBA BABENA KWIMUMANYIKA, APA BINO MUKUMBULE ANO MEPUZHO:
Ñanyi bintu byo mwafunjilako ku Mulongo Bazhenov pa ene mambo o kyanemena
kutanga Baibolo pa juba pa juba?
kutambwila bukwasho bufuma ku bena Kilishitu bakwetu?a
kulomba kimye kyonse?
kwimba nyimbo ya Bufumu?
kwamba pa lwitabilo lwetu?
a Twakonsha kulombelako bena Kilishitu bo bakasa mu kaleya ne kwibatela pa mazhina. Nangwa byonkabyo, kechi kyakonsheka ofweshi wa musampi kwibatumina makalata pa muntu pa muntu ne.