‘Ikalai Monka Mu Butemwe Bwa Lesa’

‘Ikalai monka mu butemwe bwa Lesa, saka mutengela lusa lwa Nkambo yetu Yesu Kilishitu luleta bumi bwa myaka.’—YUDA 21, NW.

1, 2. Yehoba witumwesha byepi butemwe bwanji, kabiji twayuka byepi kuba’mba kechi ufikenatu kwitulengela kwikala mu butemwe bwanji ne?

YEHOBA LESA witumwesha butemwe bwanji mu mashinda avula. Pano kwa kubula nangwa kuzhinaukatu ne, Kiyukilo kikatampe kya kuyukilako amba Yehoba witutemwa ke lunengezho lwa kitapisho kya bukuzhi. Butemwe bwanji ku bantu bwabaya bingi kya kuba watumine ne Mwananji yenkawa umo kwiya na kwitufwila. (Yoa. 3:16) Yehoba waubile bino, mambo ukeba atweba kwikala myaka ne myaka kabiji ukeba ne kuba’mba tumwenengamo mu butemwe bwanji kikupu!

² Pano nanchi twakonsha kulanguluka’mba Yehoba wakonsha kufikenatu kwitulengela kwikala mu butemwe bwanji nangwa kya kuba ke tube bintu byo twikebela kuba nyi? Ine. Mambo mu Yuda kyepelo 21, tutangamo bino byambo bya lujimuno byaamba’mba: ‘Ikalai monka mu butemwe bwa Lesa, saka mutengela lusa lwa Nkambo yetu Yesu Kilishitu luleta bumi bwa myaka.’ Byambo bya kuba’mba ‘Ikalai monka mu butemwe bwa Lesa’ bimwesha kuba’mba pajipo bimo byo twafwainwa kubanga. Pano bintu ka byo twafwainwa kubanga pa kuba’mba tutwajijile kwikala monka mu butemwe bwa Lesa?

Twakonsha Kwikala Byepi mu Butemwe bwa Lesa?

3. Yesu waambile amba kintu ka kyanemene kwi aye pa kuba amba ekale monka mu butemwe bwa Shanji?

³ Tutana mukumbu wa buno bwipuzho mu byambo byaambile Yesu bufuku bwa juba janji japeleleko panopantanda. Waambile’mba: “Umvwe mwalama mikambizho yami, mukekala mu butemwe bwami; byonka byo nalama mikambizho ya Batata, ne kwikala naikala mu butemwe bwabo.” (Yoa. 15:10) Kya kine, Yesu wamwene kuba’mba kulondela mikambizho ya Yehoba kwanemene pa kuba’mba ekale wawama kwi Shanji. Pano inge Mwana Lesa walumbuluka waubile bino, nanchi ne atweba kechi twafwainwa kuba byonkabye nenyi?

4, 5. (a) Ñanyi jishinda jikatampe jo twakonsha kumwesheshamo kuba’mba twatemwa Yehoba? (b) Mambo ka o twafwainwa kubujila kukana mulanguluko wa kukokela mikambizho ya Yehoba?

⁴ Tumwesha amba twatemwa Yehoba kikatakata kupichila mu kumukokela. Mutumwa Yoano waambile bino byambo mu jino jishinda kuba’mba: “Kutemwa Lesa ko ko kuno, amba, tulame mikambizho yanji: kabiji mikambizho yanji kechi yakatazha ne.” (1 Yoa. 5:3) Bantu bavula lelo jino kechi bakeba kukokela muntu nangwa umo ne. Pano bino monai bino byambo byaamba amba: “Kabiji mikambizho yanji kechi yakatazha ne.” Yehoba kechi witukebela kuba bintu byo twakonsha kukankalwa kuba ne.

⁵ Kya kumwenako: Abya mwakonsha kwambila mulunda nenu kusenda kintu kyanema kyo mwayuka amba wakonsha kukankalwa kwikisenda nyi? Ine bino ne! Yehoba witukila mu kuba lusa kabiji wayuka ne papelela bulume bwetu bwa kuba bintu. Baibolo witubula kuba’mba Yehoba ‘uvuluka’mba, twi lukungu.’ (Sala. 103:14) Kechi wakonsha kwitukebela kuba bintu byo twakonsha kukankalwa kuba ne. Onkao mambo, kafwako kyakonsha kwitulengela kukana mulanguluko wa kukokela mikambizho ya Yehoba ne. Mambo twayuka amba kukokela Yehoba ke jishuko jawama bingi ja kumwesheshamo Shetu wa mwiulu amba twamutemwa kya kine kabiji tukeba kwikala mu butemwe bwanji.

Bupe Bwanema Kufuma kwi Yehoba

6, 7. (a) Nga jiwi ja mu muchima jo ji ka? (b) Ambai kya kumwenako pa mambo a jiwi ja mu muchima byo jakonsha kwitukwasha kwikala monka mu butemwe bwa Lesa.

⁶ Mu ino ntanda mwaimbwa ñoma na bichi yo twikalamo, tufuukula bintu byavula bingi byavwangamo kukokela Lesa. Twakonsha kuyuka byepi kuba’mba bino bintu byo tufuukula byayilamo na nkebelo ya Lesa? Yehoba witupa bupe bwakonsha kwitukwasha pakatampe kwikala balukokelo. Witupa jiwi ja mu muchima. Nga Jiwi ja mu muchima jo ji ka? Ke bulume bwa kukumya bwitulengela kwipima atweba bene. Jiji nobe muntu wa mukachi witubula bya kuba mu bwikalo ne kwitulengela kulanguluka pa bintu byo twauba kala ne kumona inge byawama nangwa byatama.—Tangai Loma 2:14, 15.

⁷ Twakonsha kwingijisha byepi jiwi jetu ja mu muchima? Monai kino kya kumwenako. Fwanyikizhai’mba muji pa lwendo lwa kuya ku mpunzha ko mwabula kuyuka. Bemupa muntu wa kuya nanji ye mwaketekela kabiji wayuka yoyo mpunzha. Ukakonsha kwimutangijila umvwe kya kuba wijiyuka bulongo jishinda. Kabiji inge mwalondela byo abena kwamba kechi mukalubilamo ne. Mu jishinda jikwabo, uno muntu wakonsha kwikala nobe bupe bukatampe Yehoba bo etupa—jiwi ja mu muchima. Kwa kubula muntu wa kwimutangijila, mwakonsha kulubilamo. Po pamotu, kwa kubula jiwi ja mu muchima, bantu kechi bakonsha kwikala na byubilo byawama ne kusala bintu bikwabo byaoloka mu bwikalo bwabo ne.

8, 9. (a) Twafwainwa kuvuluka kuba’mba jiwi jetu ja mu muchima jiji na ñanyi pa kupelela? (b) Twakonsha kuba byepi pa kuba’mba jiwi jetu ja mu muchima jitukwashenga kuba bulongo?

⁸ Byonka biji muntu wakonsha kwimutangijila, jiwi ja mu muchima najo jiji na mwakupelela. Kimye kimo, muntu ubena kwimutangijila wakonsha kuvulañana ne kulubamo jishinda nangwa kampe yenka anweba mwakonsha kubula kumumvwina ne kukeba kwiyila jishinda jenu. Po pamotu, kwiubila bisaka muchima wetu mu kifulo kya kulondela jiwi ja mu muchima, kuketulengela kuya mungi. Kusakasaka bya lwiso kwakonsha konauna jiwi jetu ja mu muchima. Baibolo witujimunako amba, “muchima wa muntu uji na bujimbijimbi kukila bintu byonse, kabiji watamishatu.” (Yele. 17:9; Mana. 4:23) Kunungapo, umvwe muntu ubena kwimutangijila kechi uji na mapu yawama ne, mukakonsha kulubilamo umvwe walubamo jishinda. Kyo kimotu, umvwe twakankalwa kuketekela lutangijilo lwa kine luji mu Mambo a Lesa, Baibolo, jiwi jetu ja mu muchima kechi jiketukwasha nangwa pachechetu ne. (Sala. 119:105) Kya bulandatu ke kya kuba’mba, bantu bavula mu ino ntanda batesha maana ku bya kusakasaka bikeba michima yabo mu kifulo kya kutesha muchima nangwa kulondela mizhilo yatongolwa mu Mambo a Lesa. (Tangai Efisesa 4:17-19.) O ene mambo bantu bavula o bobila bintu byatama nangwa kya kuba baji na jiwi ja mu muchima.—1 Timo. 4:2.

⁹ Atweba kechi tukeba kwikala bino ne! Twasalapo kuleka Mambo a Lesa kufunjisha ne kolola jiwi jetu ja mu muchima kuba’mba jitukwashenga kuba bulongo. Kabiji tumvwina byamba jiwi jetu ja mu muchima jo bafunjisha ku Baibolo mu kifulo kya kulengela bintu bya lwiso kwijitwala mungi. Pa kimye kimotu, tukebesha kunemeka jiwi ja mu muchima ja balongo ne banyenga yetu ba ku mupashi. Twibikishako bingi kubula kwibatuntwisha, mambo tuvuluka’mba jiwi ja mu muchima ja balongo jakonsha kupusanako bingi na jetu.—1 Ko. 8:12; 2 Ko. 4:2; 1 Pe. 3:16.

10. Tusakwisamba pa mbaji ka isatu ya bwikalo?

¹⁰ Twayai twisambepo pa mbaji isatu ya bwikalo mo twakonsha kumweshesha butemwe bwetu bo twatemwa Yehoba kupichila mu kumukokela. Jiwi ja mu muchima jikebewa bingi mu ino mbaji yonse ya bwikalo, bino pa kuba’mba jitukwashe, jafwainwa kutangijilwa kikatakata na mizhilo ya Lesa iji mu Baibolo. Mbaji isatu yo tumwesheshamo’mba twamutemwa Yehoba ne kumukokela ke ino: (1) Twatemwa bantu Yehoba bo atemwa, (2) tunemeka lutangijilo lwa boba baji mu buntangi, ne (3) twibikishako bingi kwikala ba butooto ku meso a Lesa.

Temwainga bantu Yehoba bo Atemwa

11. Mambo ka o twafwainwa kutemenwa boba Yehoba bo atemwa?

¹¹ Kitanshi, twafwainwa kutemwa bantu Yehoba bo atemwa. Pa mambo a kupwanañana, bantu baji nobe butonge. Tukeba kulondela byonse byuba bantu byonkatu maloba byo afikena kulamata ku butonge umvwe bwapona panshi. Mulenga wetu wayuka bulongo bulunda bwa bantu babula kulumbuluka byo bwakonsha kwibabika mu kizumba nangwa kwibakwasha. O ene mambo o etujimwinako amba: ‘Awa wenda na ba maana ukekala ke wa maana; pakuba awa wenda ne bakosama ukamona byakatazha.’ (Mana. 13:20; 1 Ko. 15:33) Kafwako nangwa umo ukeba ‘kumona byakatazha’ ne. Atweba bonse tukeba ‘kwikala ba maana.’ Yehoba kechi ukebewa kumupa maana ne, mambo waikela jimo nao, kabiji kafwako wakonsha kumongola ne. Onkao mambo, ke wa kumwenako wawama bingi kwi atweba pa mambo a balunda bo twafwainwa kwikala nabo. Akilangulukai pa kino, bantu bambulwakoloka ka Yehoba bo asala kwikala balunda nanji?

12. Balunda ba mutundu ka Yehoba bo asala?

¹² Yehoba watongwele mushakulu Abalahama amba “mulunda nami.” (Isa. 41:8) Uno mwanamulume wajinga wa kumwenako wawama mu kwikala na lwitabilo, bololoke ne lukokelo kwi Lesa. (Yako. 2:21-23) Muntu wa bino Yehoba ye ye asala kwikala mulunda nanji. Ne lelo jino bo bantu bo asala. Umvwe Yehoba ukeba bano kwikala balunda nanji, nanchi ne atweba kechi twafwainwa kusala bulongo balunda pa kuba’mba twendenga na ba maana ne kwikala na maana nenyi?

13. Pa mambo a kusala balunda, ki ka kyakonsha kwitukwasha kusala bulongo balunda?

¹³ Kintu ka ne anweba kyakonsha kwimukwasha kusala bulongo balunda? Kufunda bya kumwenako bya mu Baibolo kwakonsha kwimukwasha bingi. Akilangulukai pa bulunda bwa kwa Luta ne bako banji ba bakazhi ba Naomi, Davida ne Yonafwanyi nangwa bobwa bwajinga pakachi ka kwa Timoti ne Paulo. (Luta 1:16, 17; 1 Sam. 23:16-18; Fili. 2:19-22) Bulunda bwa bano bantu bwakosele bingi na mambo a kishinka kimo kikatampe: Bulunda bwabo bwaimenejile pa butemwe bwabo bwa kine pe Yehoba. Nanchi ne anweba mwakonsha kukeba balunda batemwa Yehoba byonka byo mwamutemwa nyi? Yukai kuba’mba mu kipwilo kya bena Kilishitu mo muji balunda bawama. Balunda baji bino kechi bakemulengela kuba bintu byakonsha kufichisha Yehoba ku muchima ne. Bino bakemukwasha kukokela Yehoba, kukoma ku mupashi ne kunowa ku mupashi. (Tangai Ngalatiya 6:7, 8.) Bakemukwashanga kwikala monka mu butemwe bwa Lesa.

Nemekainga Lutangijilo lwa Boba Baji mu Buntangi

14. Bintu ka javula bitulengela kukankalwa kunemeka boba baji mu buntangi?

¹⁴ Jishinda ja bubiji jo twakonsha kumwesheshamo amba twamutemwa Yehoba javwangamo buntangi. Twafwainwa kunemeka boba baji mu buntangi. Mambo ka kuba bino kimo kimye o kwashupila kwi atweba? Aba baji mu buntangi ke bambulwakoloka. Kunungapo, ne atweba bene twi bambulwakoloka. Twasemwa na muchima wa kukeba kusatuka.

15, 16. (a) Mambo ka o kyanemena kwi atweba kunemeka boba Yehoba bo apa mwingilo wa kulama bantu banji? (b) Lufunjisho ka lwanema lo twakonsha kufunjilako ku jishinda Yehoba jo amwenejilemo bena Isalela basatukijile Mosesa?

¹⁵ Mwakonsha ke mulanguluke amba, ‘Umvwe kitukatazha kunemeka boba baji mu buntangi, mambo ka o kikebewa kuba’mba tukokelenga?’ Mukumbu waimena pa mambo a bumfumu. I ñanyi ye mukasala kwikala mfumu nangwa’mba kalama wenu? Umvwe twasala Yehoba amba ye Mfumu wetu, twafwainwa kunemeka buntangi bwanji. Umvwe twabula kuba bino, nanchi kine twakonsha kumutela amba Kalama wetu nyi? Kunungapo, Yehoba javula utangijila kupichila mu bantu bambulwakoloka bo apa mwingilo wa kulama bantu banji. Umvwe twasatukila bano bantu, Yehoba wakonsha kwitumona byepi?—Tangai 1 Tesalonika 5:12, 13.

¹⁶ Kya kumwenako, bena Isalela byo banyinyichilenga ne kusatukila Mosesa, Yehoba wamwene amba aye ye ye baubijilenga bino. (Bala. 14:26, 27) Lesa kechi waaluka ne. Umvwe jonse ke tusatukile boba bo abika pa buntangi, ko kuba’mba tubena kumusatukila.

17. Muchima ka wawama ye twafwainwa kwikala naye ku boba batangijila mu kipwilo?

¹⁷ Mutumwa Paulo wamwesheshe muchima wawama ye twafwainwa kwikala naye pa mambo a boba baji na mwingilo wa kutangijila mu kipwilo kya bena Kilishitu. Wanembele amba: ‘Kokelai bemutangijila ne kwibanekenena: mambo abo babena kwimukenkentela na mambo a kulama michima yenu, byo baketotolwela na mambo ayo: nasaka namba, bekyube kino na lusekelo, kechi na bulanda ne: mambo akya kechi kikemuletela kyawama ne.’ (Hebe. 13:17) Kya kine kuba’mba, twafwainwa kwibikako bingi pa kuba’mba twikale na muchima wa kukokela ne kunekenena. Pano bino, yukai kuba’mba tubena kwingila na ngovu pa kuba’mba twikale mu butemwe bwa Lesa. Nanchi kino kikonkwanyi kechi kyo kyo twafwainwa kwibikila nenyi?

Ikalai ba Butooto ku Meso a Yehoba

18. Mambo ka Yehoba o akebela atweba kwikala ba butooto?

¹⁸ Jishinda ja busatu jo tumwesheshamo amba twamutemwa Yehoba ke kwibikako kwikala ba butooto kwi aye. Bansemi javula bengila na ngovu kumona’mba baana babo ba butooto. Mambo ka? Mambo kwikala ba butooto kulengela mwana kwikala na butuntulu bwa mubiji bwawama. Kabiji mwana wa butooto ulengela kisemi kutelwa bulongo ne kumwesha amba bansemi bamutemwa kabiji ne kumuta muchima. Po pamotu, ne Yehoba ukeba atweba kwikala ba butooto. Wayuka amba butooto bwitulengela kwikala na butuntulu bwa mubiji bwawama. Kabiji wayuka ne kuba’mba inge twaikala ba butooto, tulengela Shetu wa mwiulu kutelwa bulongo. Kwikala bino kwanema bingi, mambo bantu bakonsha kufwenya kwipi ne Lesa ye twingijila umvwe bamona byo twapusanako na bantu bavula ba mu ino ntanda ibi.

19. Twayuka byepi amba butooto bwa ku mubiji bwanema bingi?

¹⁹ Mashinda ka o twafwainwa kwikelamo ba butooto? Mu mbaji yonse ya bwikalo bwetu. Mu bena Isalela bakala, Yehoba waambile kuba’mba butooto bwa ku mubiji bwanema bingi. (Levi 15:31) Mizhilo ya Mosesa yaambile pa bintu nabiji kuzhika byafuma munda, kovwa bipe, kowa ku maboko, ku maulu ne kuchapa bivwalo. (Lupu. 30:17-21; Levi. 11:32; Bala. 19:17-20; Mpitu. 23:13, 14) Bena Isalela bebavulwilengamo kuba’mba Yehoba Lesa wabo “wazhila,” kibena kulumbulula kuba’mba wa “butooto.” Bakalume ba Lesa wazhila nabo bafwainwa kwikala bazhila.—Tangai Bena Levi 11:44, 45.

20. Mashinda ka o twafwainwa kwikelamo ba butooto?

²⁰ Onkao mambo twafwainwa kwikala ba butooto mukachi ne pangye ya mubiji. Twibikako kwikala na milanguluko yatoka. Tulamachila mu bukishinka ku mizhilo ya Yehoba yaamba pa kwikala na byubilo byawama, kechi na mambo a byubilo bya kwilaala kubi byubiwa mu ino ntanda ne. Kyanemesha, tukebesha mpopwelo yetu kwikala ya butooto ne kuchinuzhuka kwichampankanya na bupopweshi bwa bubela. Kechi tuvulama lujimuno lwanembwa mu Isaya 52:11 lwa kuba’mba: ‘Fumaimo, fumaimo, lupukaimo, kukwata ku bintu bya muzhilo ne; lupukaimo mu muzhi; izhijikai.’ Lelo jino twikala ba butooto ku mupashi kupichila mu kubula kwikala na bintu byo amona Shetu wa mwiulu amba bya muzhilo byalamata bupopweshi bwa bubela. Kino kyo kitulengela ne kubula kwivwanga mu bya kusekelela bya mpopwelo ya bubela ne moba a kukokoloka byasampukamo lelo jino mu ntanda. Ibyo kuba’mba kechi kyapela kwikala ba butooto ne. Pano bino, bantu ba Yehoba bebikako kwikala ba butooto, mambo kuba bino kwibakwasha kwikala monka mu butemwe bwa Lesa.

21. Twakonsha kumona byepi kuba’mba twaikala monka mu butemwe bwa Lesa?

²¹ Yehoba ukeba atweba kwikala monka mu butemwe bwanji kikupu. Bino atweba bonse pa muntu pa muntu twafwainwa kumona’mba tubena kwibikako kwikala mu butemwe bwa Lesa. Twakonsha kuba bino kupichila mu kulondela kya kumwenako kya kwa Yesu ne kumwesha butemwe bwetu pe Yehoba kupichila mu kukokela mikambizho yanji. Umvwe twauba bino, twakonsha kuketekela’mba kafwako ‘kikakonsha kwitwabanya na butemwe bwa Lesa mwi Kilishitu Yesu Nkambo yetu ne.’—Loma 8:38, 39.

Nanchi Mukivuluka Nyi?

• Jiwi jetu ja mu muchima jakonsha kwitukwasha byepi kwikala monka mu butemwe bwa Lesa?

• Mambo ka o twafwainwa kutemenwa boba Yehoba bo atemwa?

• Mambo ka o kyanemena kunemeka boba baji mu buntangi?

• Butooto bwanema byepi ku bantu ba Lesa?

[Kitenguluzha/Kipikichala pa peja 20]

BUKU UTUNDAIKA KWIKALA NA BYUBILO BYAWAMA

Kimye kya kushonkena kwa nkambi kwa mwaka wa 2008 ne 2009, kwalupwilwe buku wa mapeja 224 wa kuba’mba ‘Ikalai Monka mu Butemwe bwa Lesa.’ Uno buku wakatataka wanembelwa ka? Wanembelwa kukwasha bena Kilishitu kuyuka mizhilo ya Yehoba ne kwiitemwa kabiji waamba kikatakata pa byubilo byafwainwa kwikala na bena Kilishitu. Kuteshako muchima kufunda uno buku wa ‘Ikalai Monka mu Butemwe bwa Lesa’ kuketulengela kusumininwa amba kwikela mwayila mizhilo ya Yehoba jo jishinda jawama kulondela lelo jino ja ku bumi bwa myaka kulutwe na lwendo.

Kunungapo, uno buku bamunengezha ne kwitukwasha kuyuka amba kukokela Yehoba kechi mutembo ne. Kupusanako, ke jishinda ja kumwesheshamo Yehoba byo twamutemwa. Onkao mambo, uno buku uketulengela kwiipuzha amba ‘Mambo ka o nkokela Yehoba?’

Kilengela bamo kulenga mambo ne kusha butemwe bwa Yehoba ke byubilo kechi mafunjisho ne. Onkao mambo kyanema bingi kuba’mba tukoseshe butemwe ne lusanchilo lwetu lwa mizhilo ne mafunde a Yehoba etutangijila mu bwikalo bwetu pa juba pa juba. Twaketekela kuba’mba uno buku wa katataka ukakwasha mikooko ya Yehoba mwaya ntanda, kwikala bakosa mu kuba byawama, ne kushinawina Satana amba wabubela, kabiji ne kyakilapo ke kwikala monka mu butemwe bwa Lesa.—Yuda 21.

[Kipikichala pa peja 18]

“Umvwe mwalama mikambizho yami, mukekala mu butemwe bwami; byonka byo nalama mikambizho ya Batata, ne kwikala naikala mu butemwe bwabo.”