Kufika Bukiji Kumwesha byo Twatako Muchima
1. Kukelwa ku kupwila kwatamina ka?
1 “Kyawama kukelwa kukila kushala!” nangwa’mba “Kyanema kutanwako nangwa nakelwa.” Nanchi mwakyumvwapo kala bamo saka bamba bino byambo nyi? Bi ka byo bashalapo bakelwa ku kupwila? Bakonsha kushalapo kwimbila pamo na kipwilo ako kwanema bingi mu bupopweshi bwetu, kabiji kechi bekalako pa lulombelo ne. Babula kufika bukiji kechi bashinkwako ku misambo ya kwikosesha ikalako kupwila saka kukyangye kutendeka ne. Kabiji umvwe twakelwa tuvulañanya bakwetu ne kwibalengela kubula kuteleka bulongo ku majashi.—Sapwi. 3:1; Loma 1:11, 12.
2, 3. (a) Ki ka kilengela bamo kubula kufika bikiji? (b) Kufika bukiji kumwesha ka?
2 Kufika bukiji kumwesha’mba twatemwa bakwetu ne kwibata muchima. Kunengezha bulongo kwanema bingi. Kimye kimo kuji byakonsha kwitulengela kukelwa ku kupwila. Ñendelo yakonsha kukatazha nangwa motoka wakonsha kufwila pakachi. Bino twafwainwa kumona kuba’mba kubula kwinengezha bulongo ne kubula kutako muchima nangwa katende kechi kwitulengela kukelwangatu jonse ne. Twafwainwa kwibikako kufikanga bukiji kupwila saka kukyangye kutendeka.
3 Bamo bakelwa mambo kechi bayuka kufika bukiji kyo kwawamina ne. Kukelwa pabula ne kyalengela kwilengulwisha ku bakwetu. Mu ñanyi jishinda? Bavula bakonsha kutendeka kwimumona kubula kutako muchima nangwa kubula bukishinka ako kwakonsha kulengela bakwenu kubula kwimuketekela. Pa kuba kufika bukiji ke jishinda jimo mo tumweshesha kipangwa kya mupashi wa Yehoba.—Nga. 5:22, 23.
4. Bakulumpe mu kipwilo ne bankwasho bakonsha kwikala byepi ba kumwenako?
4 Tutundaikwa bingi pa kwitutambwila ku bakulumpe mu kipwilo ne bankwasho abo betulengela kumona buneme bwa kwikala mu jibumba ja Lesa.—Loma 15:7.
5. (a) Kufika bukiji ku kupwila ne ku mingilotu ikwabo kumwesha byepi byo tuji? (b) Kufika bukiji kwanemena ka?
5 Umvwe ke tufike bukiji baketunemeka ne jibumba jo twimenako pamo. Kufika bukiji kumwesha byo twatako muchima. Kabiji kumwesha’mba tubena kuba bintu mo byalondakena. (1 Ko. 14:40) Bansemi bafwainwa kwikala bakumwenako ku baana babo mu kufika bukiji. Atweba bonse ne baana betu pamo twafwainwa kwilumbulula atwe bene ne jibumba jo twimenako kupichila mu kufika bukiji. Tuba bino kupichila mukukokela byaambile mutumwa Paulo amba: “Kechi tuba bya kwituntulako bantu, nangwa kimo ne, kuchina’mba mwingilo wetu wakanenwa bibi; bino mu bintu byonse kasa twilumbulula byo tuji ba mingilo ya Lesa.”—2 Ko. 6:3, 4.