Ikalai na Muchima wa Kulama Kimye
1. Yehoba witumwesha byepi bya kulama kimye?
1 Yehoba ulama bingi kimye. Kya kumwenako, ukwasha bakalume banji pa ‘kimye kyo babena kukeba bukwasho.’ (Hebe. 4:16) Kabiji unengezha ne kajo ka ku mupashi “pa kimye kyafwainwa.” (Mat. 24:45) Onkao mambo twafwainwa kuketekela kuba’mba ne juba ja bukaji bwanji jikeya ‘kechi jikabanda ne.’ (Ha. 2:3) Tumwenamo bingi na mambo a kuba’mba Yehoba ulama kimye. (Sala. 70:5) Na mambo a kupayankana ne bumbulwa kulumbuluka bwetu, kitukatazha bingi kulama kimye. Mambo ka o twafwainwa kulamanga kimye?
2. Kulama kimye kuleta byepi munema kwi Yehoba?
2 Mu ano moba apelako, bantu kechi balama kimye ne na mambo a kwitemwa abo bene ne kubula kwikanya. (2 Timo. 3:1-3) Onkao mambo, inge bena Kilishitu ke balame kimye ku nkito, mu milaye yabo, ne ku kupwila, bantu babula bena Kilishitu bamona kabiji kino kileta munema kwi Yehoba. (1 Pe. 2:12) Abya nanchi mwatana kuba’mba mulama bulongo kimye ku nkito bino saka mukelwa ku mingilo ya Lesa nyi? Kufika bukiji ku kupwila ne kutanwako ku lwimbo ne lulombelo lwa kushinkwila kumwesha kuba’mba tukeba kulondela Shetu wa mwiulu byo alama kimye.—1 Ko. 14:33, 40.
3. Mambo ka kubula kukelwa kyo kumweshesha amba tulangulukilako bakwetu?
3 Kulama kimye kumwesha amba tubena kulangulukilako bakwetu. (Fili. 2:3, 4) Kya kumwenako, inge twafika bukiji ku kupwila kwa bwina Kilishitu ne ku kusambakana kwa kuya mu busapwishi, kechi tukavulañanya balongo byo babena kuteleka ku bibena kwamba ñambi ne. Pano inge tukelwa kimye kyonse, tukamwesha bakwetu nobe kechi twibanemeka ne. Kubula kukelwa kumwesha amba twabambakana, kabiji bakwetu bakonsha kwituketekela. Bena Kilishitu bakwetu batemwa bingi inge twaikala na bino byubilo.
4. Umvwe bimye byavula tukelwa, twakonsha kuba byepi?
4 Umvwe bimye byavula mukelwa, langulukai pa kimulengela kukelwa. Kyakonsha kwimukwasha ke kunengezha mutanchi wa mingilo yo muji nayo ne kwiingila mu kimye kyafwainwa. (Sapwi. 3:1; Fili. 1:10) Kabiji lombainga bukwasho kwi Yehoba. (1 Yoa. 5:14) Kubula kukelwa ke jishinda jimo mwakumweshesha amba tusanta pa mikambizho ikatampe ibiji ya mu Mizhilo ya kutemwa Lesa ne kutemwa bakwetu.—Mat. 22:37-39.