‘Besekwe Umvwe Babulwa Mambo’—Mu ñanyi jishinda?
1 Na mambo akuba jibumba ja kwa Yehoba jibena kutwajijila kununguluka, paji kukajilwa kwa balongo bafikapo kwikala bankwasho mu kipwilo. Balongo bavula babulwa kusalwa, kubikapo ne bakitwala baji na lusako lwa kwingila mingilo mu kipwilo. Inge kyakuba bapewa mwingilo wanungwako, beumvwa bingi kwikala bamwingilo, ne kwikala na mukonsha wa kwingila. Kunungulukilako kwabo kwaimena pa ‘kwesekwa umvwe babulwa mambo.’ (1 Timo. 3:10) Nanchi besekwa byepi?
2 Mwingilo wa Bakulumpe mu Kipwilo: Byo luji lubaji lwa kupima mulongo kupichila mukwingijisha bikebewa bya mu Binembelo bitanwa pa 1 Timoti 3:8-13, bakulumpe mu kipwilo bakapima ne kumona umvwe mulongo wakonsha kwingila mingilo. Bakonsha kumupa mingilo nabiji ya kutala pa magazini ne mabuku, kunengezha biñamba-ñamba bya kwambilamo, kuwamisha Nzubo ya Bufumu, ne mingilo ikwabotu. Bakulumpe mu kipwilo bakamona ñiñijilo yanji ne byo atemwa ino mingilo yanji. Bakatajisha pa byubilo bya kuketekelwa, kufika mu kimye, kujimuka, butekanye, ne mupashi wa kutemwa kuba bintu, ne byoomvwañana na bakwabo. (Fili. 2:20) Nanchi uji na kimwesho kyawama mu mvwajilo ne nzañwino nyi? Nanchi uji na mukonsha wa kwiumvwa wa mwingilo nyi? Bakakeba kumona “bwikalo bwanji bwawama [ne] byubilo byanji mu bukimote bwa mana.” (Yako. 3:13) Nanchi kine kine ubena kukanamina kwikala nkwasho mu kipwilo nyi? Nanchi ulondela mukambizho wa kwa Yesu wa ‘kulenga bana ba bwanga’ kupichila mu kwikalamo na lubaji mu butumwa na kizaku nyi?—Mat. 28:19 NW; monai September 1, 1990, Ulupungu lwa kwa Kalinda, mapeja 18-28.
3 Nangwa kya kubaˈmba Baibolo kechi yaimika myaka ya kusemwane pa kusala muntu kwikala nkwasho mu kipwilo, yamba pa balongo ba yewo mutundu kwikala ‘banabalume bengila.’ Kechi twafwainwa kuketekela bano banabalume kwikalatu bansongwalume kikupu ne, mambo bakonsha kusongola ne kwikala na bana. (1 Timo. 3:12, 13) Banabalume ba yewo mutundu kechi bafwainwa kwikala na “lwiso lwa bwanyike” ne, bino bafwainwa kwikala bantu bateshako mana ku bintu, kabiji ba byubilo byawama ne jiwi ja muchima jatoka too ku meso a kwa Lesa ne a bantu bakwetu.—2 Timo. 2:22.
4 Nangwa kyakuba mana a kisemwa akebewa, ndangulukilo ne muchima wawama byo byanema. Nanchi mulongo ukeba kutota Lesa ne kukwasha balongo banji nyi? Umvwe byo ibyo, Yehoba ukapesha kweseka-eseka kwanji kwa kukeba kununguluka mu kipwilo.