Byubilo bya Bakwenu ne Jishuko Jenu ja Kusapwila
1 Bantu batemwa bingi kulonda byuba bakwabo, ko kuba’mba muntu wakonsha kulonda byawama nangwa byatama. Bakalume bakwetu ba kwa Yehoba betutundaika kwingila mingilo yawama ya bwina Kilishitu. (Hebe. 10:24) Bino, ba mu kisemi babula Bakamonyi, botwingila nabo, bakwetu bana ba sukulu, bakinkalankulo nangwatu bangi botwiyuka nabo bakonsha kwitukanjikizha kuba bintu byapusana na mafunde a bwina Kilishitu. Bakonsha kunena ‘bibi bwikalo [bwetu] bwawama bwa bwi Kilishitu.’ (1 Pe. 3:16) Twakonsha kutwajijila byepi kusapwila kwa kubula kulonda byubilo byabula kufwainwa byuba bakwetu?
2 Ba mu Kisemi: Kimye kimo, nsemi wa mulume wabula Kamonyi wakonsha kukanya bakazhi ne bana kusapwila bantu. Byo byajinga ne kisemi kimo mu Mexico. Mwanamukazhi umo wasongolwa ne bana batanu na babiji bayukile bukine. Patanshi, mwatawanji kechi wakebelenga ne, mambo kechi wakebelenga kisemi kyanji kusapwila ne kutambika mabuku a Baibolo ku nzubo ne nzubo ne. Aye wamwenenga’mba mwingilo wa bumvu bingi. Nangwa kyajinga byonkabyo, mukazhanji ne bana, bakakachile ku mulanguluko wabo wa kwingijila Yehoba ne kukelwa mu mwingilo. Pa kupitapo kimye, uno mwanamulume watatwile kumona munema wa lunengezho lwa Lesa lwa mwingilo wa busapwishi ne kwipana wipaine aye mwine kwi Yehoba. Papichile myaka 15 pa kuba’mba atambwile bukine. Abya wakonsheshe kuba bino umvwe kya kuba’mba kisemi kyanji kechi kyakoseleko mu uno mwingilo ne?—Luka 1:74; 1 Ko. 7:16.
3 Bakwetu Botwingila Nabo: Bantu kechi betutemwa byo tusapwila mambo a Bufumu ne. Bamo bamona mwingilo wetu kuba’mba watutu nangwa’mba bingitu. Bakwabo nabo betwendeleka ne kulengulula mwingilo wetu. Milengulwila ya uno mutundu yafwainwa kufuma ku bakwetu ba pa nkito, bakinkalankulo nangwatu ku balongo betu ba mu kisemi. Kimo kimye twakonsha kumweka nobe bantu babula mana kabiji bakosama. (Yoa. 15:19; 1 Ko. 1:18, 21; 2 Timo. 3:12) Byambo byabo bya kulefula byakonsha kubwezha panyuma kizaku kyetu kya kwingila ne kwitulengela kukoka nangwa kuleka mwingilo wetu wanema. Nyenga umo mu muzhi wa Lusaka watangijilenga jisambijilo ku nkito pa kimye kya pachaile. Kimye nyenga kyo akumbwilenga jipuzho pa mambo a bikobiwa ku bakafwa pa Amagedonyi kwingijisha Yelemiya 25:33, mu ofweshi moajinga mwajinga ne umo watangilenga nyunshipepala. Uno muntu walengulwile bingi nyenga yetu ne kumwambila’mba ubena kubepa bubela ne kuzhobakanya byambo biji mu Baibolo kuba’mba tumvwine mafunjisho anji. Nyenga yetu kechi wabwelele panyuma na mambo a mweno ya busapwishi bwetu yabula kufwainwa moamwenejilenga uno muntu ne. Wamulengulwilenga waswile kuleta Baibolo wanji wa King James Version juba jalondejilepo. Kyafuminemo, jisambijilo ja Baibolo jatatwile. Pa kino kimye uno mwanamukazhi ke nyenga yetu wabatizwa, mu kifulo kya yewa mutanshi yeatangijilenga jisambijilo.
4 Bakwetu Bana Basukulu: Kechi kyenyi ku Bakamonyi bakyanyike kutanwa mu byubilo byabula kufwainwa byuba bakwabo pa sukulu ne, ne kwakamwa’mba basakwibasekanga ku bakwabo bakyanyike inge kebengile mwingilo wa busapwishi. Mwina Kilishitu umo wakyanyike mu United States waambile’mba: “Najinga na moyo wa kusapwila ku bakwetu bakyanyike mambo a kuchina’mba bakansekanga.” Onkao mambo, kechi wasapwilanga ku bakwabo bakyanyike pa sukulu ne, kuvwangakotu ne mu nyaunda yabo. Mwakonsha kukomesha byepi bukose bwa kubula kulonda byuba bakwenu? Ketekelai Yehoba, kuba’mba emupeshe. (Mana. 29:25) Ingijishai ngovu yenu mu kwingila na Kyambo kya Lesa mu busapwishi bwenu. (2 Timo. 2:15) Mwanyike watongolwa watatwile kulomba kwi Yehoba kuba’mba amukwashe kutatula kwisamba na bakwabo bana basukulu. Watatwile kusapwila busapwishi bwa kubazhimukila pa sukulu, kepo akonsheshe ne kwisamba na bonse boayuka, ko kuba’mba mwafumine byawama. Wapezhezheko’mba: “Bakwabo bakyanyike nabo bakajilwa kabiji bakeba kwikala na luketekelo lwa kulutwe. Onkao mambo Yehoba ubena kwitwingijisha mu kwibakwasha.”
5 Bakwetu: Kimye kimo, twakonsha kwikala na bakwetu nangwatu bayukane betushikwako pacheche mambo a byo tuji ne lwitabilo lwetu. Umvwe kya kuba’mba muchina byo balanguluka, ishikishai’mba: ‘Nanchi bano bantu bayuka bukine butangijila ku bumi bwa myaka? Nakonsha kuba byepi pa kuba’mba nebafike pa michima? Paina wingijila kijiiji umo wikimwene kuba’mba kusapwila kufumamo byawama ke kusapwila bakwetu mu byambotu bicheche kimye kyonse. Sashijilai Yehoba kuba’mba emupe ngovu ne mana a kutwajijila kukeba-keba bantu bakishinka.— Fili. 4:13.
6 Kulonda byubilo byatama byuba bakwetu kwakonsha kusekesha boba betulengulula ku michima, pano inge saka tulonda byubilo byabo ko kuba’mba tubena kwibakwasha nyi, inyi tubena kwibatundaika? Yesu bamulengulwilenga ku bantu ba mu kimasa-masa. Wachinchikile ne ku ñambilo ya kapunyi kufuma ku balongo banji. Pano bino wayukile kuba’mba jishinda joakonsheshe kwibakwashishamo, posotu jonka ja bukine bwa Lesa. Onkao mambo, Yesu “wakosejilemo pa kulengululwa ku bandengamambo kwa byonkabyo.” (Hebe. 12:2, 3) Ne atweba twafwainwa kuba byonkabyo. Ibikaiko ne kwingijisha na ngovu jishuko jenu ja kusapwila mambo a Bufumu. Umvwe saka mukelwa mu kuba bino, ‘mukepulusha anweba bene ne boba bemumvwa pamo.’—1 Timo. 4:16.