Kupwila kwa Kijiiji Kubena Kwiya
1 Nkambo yetu Yesu waambijile jimo kuba’mba baana banji ba bwanga bakapitanga mu bya malwa. (Mat. 24:9) Twafwainwa kumonanga byepi meseko? Kika kiketukwasha kuchinchika bya malwa? Kupwila kwa kijiiji kwa mu mwaka wa Mwingilo wa 2004 kukakumbula ano mepuzho. Mutwe wa kuno kupwila ke wa kuba’mba “Sekelai mu Luketekelo; Tekanyai [Chinchikai, NW] mu bya Malwa.”—Loma 12:12.
2 Majashi a Kushilañana Abiji: Jashi jitanshi ja kushilañana ja kuba’mba “Kupanga Bipangwa Saka Twatekanya, [Twachinchika, NW]” jikamba pa mashinda o tupangilamo bipangwa. Basapwishi bavula bakepuzhiwa pa byo basapwila ne kufunjisha na kizaku. Bansemi kikatakata bakatesheko bingi muchima ku jashi ja kuba’mba “Umvwe Yehoba Witufunda,” mambo jikalumbulula bansemi byo bakonsha kufunda baana babo. Ñambi ukapelako mu jino jashi ja kushilañana, ukalumbulula byotwafwainwa kuba kuchina bya ino ntanda kwitubwezha panyuma ne kwitwalula kebabula kupanga bipangwa.—Mako 4:19.
3 Jashi ja kushilañana jikwabo jikekala na mutwe wa kuba’mba “Nyemai Kapela Samwachinchika.” Jikalumbulula bwikalo bwetu byobuji nobe kapela. Mambo ka o twafwainwa kunyema kwesakana na mwayila mizhilo? Twakonsha kutaya byepi byonse bitunemena ne kubula kupungila mu kapela ka bumi? Mafunde a mu Binembelo o tukafunda, aketukwasha atweba bonse kutwajijila kunyema na mukoyo.
4 Kuchinchika Kulengela Kwitabilwa kwi Lesa: Majashi akambiwa na bakulumpe benda akakosesha lwitabilo lwa boba bateleka ne kulondela mafunde. Jashi jimo jikamba mukulumpe wa nkambi jiji na mutwe wa kuba’mba “Butekanye Buleta Bulumbuluke.” Jashi ja mvula bantu jikakumbula mepuzho akuba’mba: Mikoka ya bantu yafwainwa kuketekela mu jizhina ja ñanyi, kabiji kino kilumbulula kuba ka? Jashi ja kupezhako jikekala ja kuba’mba “Mu Kutekanya [Kuchinchika, NW] Momo Mukatambwila Myeo Yenu,” jikalumbulula Yesu byoakonsheshe kuchinchika nshiji yo bamufwile kwa kubula aye kuzhingila ne.
5 Kukalubako kusenda buku wenu wa Isukulu lya Butumikishi ne Kyamba kya Usopa kyo tukafunda mu yewo mulungu ne. Mukanembengako ne bishinka bikemukwashanga kutako muchima ku kuteleka kabiji byo mukamonangapo kimye kikwabo. Panyuma ya kuno kupwila, kukekala kupitulukamo mu bipwilo pa bishinka byotukafunda mu ano majashi.
6 Yehoba mwine ye wanengezha kino kijiilo kikatampe kya kajo ka ku mupashi. Onkao mambo mukeye! Mukaje! Umvwe tukatanwako, tukasekela bingi pa mfweto yotukamwenamo mu majashi onse.—Isa. 65:14.