Sukulu ya Mwingilo wa Teokalasi Yamu 2002
1 Bantu bavula bamona bulume bwakwamba amba kintu kyawama bingi, pano bino kechi balangulukapo ene mambo okwaikelakone. Kwamba kekyabupe kitupa Yehoba. Kwitulengela kwisamba nabakwetu nekulumbulula byotubena kulanguluka nekwiumvwa. Nekyakilapo, mukwamba momotwakonsha kutotela Lesa wetu.—Sala. 22:22; 1 Ko. 1:4-7.
2 Banabalume, banabakazhi, nebanyike bafunjishiwa mu Sukulu ya Mwingilo wa Teokalasi kusapwila jizhina ja Yehoba. (Sala. 148:12, 13) Majashi amusukulu yamu 2002 aji namitwe yavula yamu Baibolo iketufweta pamuntu pamuntu kabiji nekwiingijisha mumwingilo. Kupichila mukunengezhezha jimo sukulu nekukumbulapo, tukakonsha kukomenako mumaana nemubusendwe bwetu bwakwikala bafunjishi ba Mambo a Lesa.—Sala. 45:1.
3 Kutanga Baibolo Juba Nejuba: Umvwe satutula Baibolo pabwipi, tukeitanganga kimye kyonse kyotwashukilwapo kimye. Atweba bavula twikala nakimye kyotwafwainwa kubilamo kino kimye kyamute. Byokyakonsha kwitufwetapo umvwe ketutange nangwatu peja umo pajuba pajuba, mambo kyokikebewa pakuba’mba tutwajijile nakulondela mutanchi wakutanga Baibolo watanchikwa musukulu!—Sala. 1:1-3.
4 Kutanga Baibolo kwitukwasha bingi kufika pamichima yabanteleki nekwibatundaika kutota Yehoba. Balongo bapewa mutembo wakwamba jashi Na. 2 musukulu bafwainwa kwesekela jimo abo bene kwijitanga mukubwezha-bwezhapo najiwi jasansuka. Mukulumpe wasukulu ukebasanchila nekwibabulako mashinda mwakuwamishako ntangilo.
5 Kwingijisha Buku wa Ukupelulula: Majashi Na. 3 ne Na. 4 afumanga mubuku wa Ukupelulula. Atweba bavula twafwainwa kutako muchima kwingijisha uno buku ukwasha mumwingilo wamubujimi. Banyenga baji najino jashi bafwainwa kusalululapo ñambilo yafwainwa kwingila bulongo munyaunda. Mukulumpe utangijila sukulu wafwainwa kuteshako muchima kumfunjishilo yabo byoiji nebyobabena kwingijisha Binembelo.
6 Lekai Sukulu ya Mwingilo wa Teokalasi iketukwashe atweba bonse kutwajijila nakwingijisha kyabupe kyakwamba kitupa Lesa mukusapwila mambo awama nekutota Lesa wetu mukatampe, aye Yehoba!—Sala. 34:1; Efi. 6:19.