Sukulu Witukwasha Kwamba Bintu Bingila

¹ Kimye kyo tubena kulanguluka pa byambo biji mu Mutanchi wa Sukulu ya Mwingilo wa Teokalasi wa 2006, twafwainwa kwibikako pa kuba’mba tumwenengamo mu lufunjisho lwa mu Binembelo kupichila mu kwibingijisha mu mwingilo wetu wazhila ne mu bintu bya juba ne juba. Twibikishako bingi kwingijisha bintu byo tufunda.—Yoa. 13:17; Fili. 4:9.

² Kwambapo: Mutanchi wa uno mwaka wamwesha miniti umo wanungwako ku kimye kya luonde kya kwambapo pa kwisamba bishinka bikatampe kufuma mu kutanga Baibolo. Ko kuba’mba mulongo wapewa jashi ja bishinka wafwainwa kuteshako muchima kwambatu mu maminiti atanu mu kifulo kya kwamba mu maminiti atanu na umo. Kabiji aba babena kwambapo nabo bafwainwa kuyuka kimye kyo bapewa kwamba bishinka byabo. Kupichila mu kulangulukilapo jimo, ubena kwambapo wafwainwa kumona’mba waamba byambo bikwashañana mu masekondi 30 nangwa kubwelako panshi. Bantu baji nobe jikumi bakonsha kwambapo bishinka byabo byalumbuluka mu maminiti atanu apanwa ku luonde kwambapo.

³ Majashi Afunjisha: Majashi a bishinka bikatampe kufuma mu kutanga Baibolo ne majashi a kufunda afwainwa kwambiwa kikatakata pa buneme bwa kwingijishisha byambo mu busapwishi ne mu mbaji ikwabo ya mu bwikalo bwa juba ne juba. Ñambi kechi wafwainwatu kubula bantu kubapo kimo ne. Wafwainwa kutongola kintu kine kibena kukebewa, kumwesha byo kyafwainwa kwingijiwa, kabiji ne kwibabula mfweto ifumamo mu kuba kino. Wakonsha kwamba’mba, “Abino byo bitukwasha kino kibaba,” nangwa amba “Abino byo byo twakonsha kwingijisha bino byepelo mu mwingilo.” Bakulumpe ne bankwasho bayuka bulongo biji nyaunda yabo, bafwainwa kwibikako kwamba bulongo bya kwingijisha byambo bibena kufunjiwa.

⁴ Kwamba pa bya kumwenako bya mu Baibolo kwakonsha kukwasha bingi kuyuka bya kwamba bintu bingila. Panyuma ya kwamba kya kumwenako kya mu Binembelo, ñambi wakonsha kwamba’mba, “Ne anweba mwakonsha kutanwa mu bintu bipashako na bino.” Wafwainwa kumona kuba’mba kyonse kimwesho kyo apana kyakwatankana na bintu bibena kwambiwapo, na Baibolo yense, kabiji ne bintu byanembwa na ‘kalume wakishinka ne wa maana.’—Mat. 24:45.

⁵ Maana ke kwingijisha bulongo bintu byo twayuka ne milangwe. ‘Maana ke kintu kyanema bingi.’ (Mana. 4:7) Byo tubena kufunda maana engila kupichila mu Sukulu ya Mwingilo wa Teokalasi, twayai tumone kuba’mba tubena kuwamishako busendwe bwetu bwa kwi afunjisha ku bakwetu.