Mukwekele Wa Ntanda Yonse Wa Kwita Bantu Kwiya Ku Kupwila Kwa Nkambi Kwa
“Kupokololwa Kujitu Pepi!” Basapwishi Bonse mu Kipwilo Kusampanya Katalakiti Keikajila
1 Kutendekatu mu May 2006 kufika ne kimye kikapwa kupwila kwa nkambi, kukekala mukwekele wa kwita bantu kwiya na kutanwa ku kupwila kwa nkambi mu byalo nobe 155. Mu uno mukwekele mukavwangiwa kupwila kukwabo kwiikajila kwanengezhiwa kukekalako mu Germany, mu Czech Republic, ne mu Poland kukatendeka mu July kufika ne mu mulungu mutanshi wa August 2006.
2 Byo twayuka kuba’mba tubena kwikala mu kimye kya kupelako, kupwila kwa nkambi kubena kwamba pa mulaye wa Lesa wa kupokolola bantu mu buno bwikalo bubi, kwakonsha kukwasha bingi bantu baji na michima ya bukishinka. Ano mambo afwainwa kwibatundaika kulanguluka pa bintu bikamweka kulutwe. Pa kuba’mba bantu bavula bakekale na jishuko ja kumvwa ano mambo a lutekenesho ne luketekelo, bipwilo kukilaila pa 98,000 bya Bakamonyi ba kwa Yehoba bibena kutundaikwa kwingilako na lusekelo lonse uno mwingilo wa kwita bantu kwiya ku kupwila kwa nkambi kwatongwelwa kutanwa kipwilo kyabo.
3 Bipwilo byonse bakebitumina tumatalakiti twavula bulongo, pa kuba’mba musapwishi yense akakonshe kutambulako tumatalakiti 15. Bapainiya ba mu kipwilo bakonsha kwingijisha tukashalapo. Mu kipwilo kyonse, uno mukwekele ukatendeka saka kwakishala milungu isatu pa kuba’mba kupwila kwa nkambi kwatongwelwa kipwilo kyabo kutendeke. Kino kikapana kimye kyabaya bulongo kya kukonsha kupwisha nyaunda yonse umvwe kyakonsheka.
4 Kibena kutundaikwa kuba’mba, umvwe kyakonsheka, katalakiti kafwainwa kupanwa ku mwine mwina nzubo. Nangwa byonkabyo, umvwe bamo kechi baji pa nzubo ne, katalakiti kakonsha kupachikwa bulongo mu kinzhilo. Kabiji basapwishi bafwainwa kumona’mba, aba bo bafunjisha Baibolo, balongo ba boba bo bafunjisha Baibolo, kabiji ne bobatu baji mu nyaunda bakeba kufunda bukine, bebafwakashila ne kwibeta kwiya ku kupwila kwa nkambi. Twafwainwa kwibikako bingi kumona kuba’mba tuno tumatalakiti twapanwa ku bantu mu ino milungu yonse isatu.
5 Sawakya wa Mwingilo wa March uji mu uno Mwingilo Wetu wa Bufumu, wafwainwa kwitutundaika bingi na mambo a kukomenako kwa mwingilo. Tuji bingi na lusekelo kubijika amba bibelengelo byavula byayijileko bingi palutwe. Bapainiya ba kimye kyonse bajinga 10,168, kulengela kibelengelo kya basapwishi kufika ku 129,806. Kunungapo, kibelengelo kya mabuku ashilwe kyajinga 37,454 kabiji kya magazini nakyo kyajinga 667,593. Kabiji sawakya ubena kumwesha kuba’mba Mafunjisho a Baibolo afunjishiwe ajinga 209,034.
6 Nanchi mubena kuvuluka lusekelo lwajinga na kipwilo kyenu pa mwingilo wa ku mupashi waingijiwe mu ñondo wa March nyi? Abya bino bibelengelo byakonsha kubailako mu uno mukwekele ubena kwingijiwa ntanda yonse nyi? Bakulumpe balufunjisho lwa buku ne bankwasho babo bafwainwa kumonapo mashinda mwa kutundaikila bonse mu jibumba jabo kwingilako pakatampe mu mwingilo. Kabiji banembeshi mu kipwilo bafwainwa kumona amba banemba bulongo sawakya wa mwingilo wa kipwilo ne kumutuma bukiji bukiji ku ofweshi wa musampi. Umvwe kya kuba musapwishi wapana sawakya kubikapo ne mukwabo ye abujile kupana mu ñondo wapita, ko kuba’mba ano masawakya akabalwa kwikala a basapwishi babiji.
7 Twaketekela kuba’mba mwingilo wa kusapwila ukawama bingi na mambo a kuno kutako muchima kwa kwita bantu kwiya ku kupwila kwa nkambi kwa “Kupokololwa Kujitu Pepi!” byonka byo kwanembwa mu kino kibaba. Tubena kulomba namba bibusa bya Yehoba bikekale ne anweba kimye kyo mukengilanga mu uno mukwekele ukekalako kuzhokoloka ntanda yonse.