Mukwekele wa Ntanda Yonse wa Kwibikishako Kwita Bantu Kwiya ku Kupwila kwa Nkambi kwa “Londelainga Kilishitu!”
Basapwishi Bakasampanyanga Jikwabo Tumatalakiti Twiikajila
1 Mukwekele wa mwaka wapwa wa ntanda yonse wa kwita bantu ku kupwila kwa nkambi kwa “Kupokololwa Kujitu Pepi!” walengejile bantu bamwesha lusekelo kumwenamo bingi. Aba baswile luno lwito lwiikajila bajiijile pamo na Bakamonyi ba kwa Yehoba kijiilo kikatampe kya ku mupashi. (Isa. 65:13) Bamwenejilemo bingi mu kupwanañena pamo mu bulongo bwetu bwa bwina Kilishitu. (Sala. 133:1) Pa kuba’mba kiketupeleleko kukwasha bantu bavula kutanwa ku Kupwila kwa Nkambi kwa “Londelainga Kilishitu,” tukekala na jishuko jikwabo ja kusampanya tumatalakiti twiikajila mwaya ntanda yonse.
2 Byafuminemo Mwaka Wapwa: Kwesakana na masawakya atambwijilwe mwaka wapwa kufuma mwaya ntanda yonse, mu kwita bantu ku Kupwila kwa Nkambi kwa “Kupokololwa Kujitu Pepi!” mwafumine bintu byawama bingi. Mu mapunzha avula twatakaikilwe bingi ku bantu. Kya kumwenako mu pepala wa byambo umo mwanembelwe kibaba kya byambo kyaambile pa mambo a uno mukwekele wetu amba: “Pa kwichila jimo bantu ku kupwila kwa nkambi, Bakamonyi babena kwingila bingi na mukoyo mu nyaunda maawala avula bingi, kwenda miseke yalepa kabiji babena kwambatu byambo bicheche.” Kuno kusampanya kwa tumatalakiti kwazakwile bingi michima ya boba bengijila pa mwela mu kyalo kikwabo, kwibalengela kutaya ino mbila ku bangikazhi bonse. Mu mapepala a byambo asatu mwajinga sawakya wa kutakaika mwingilo wetu kupwila kwa nkambi saka kukyangye kubiwa. Mu pepala wa byambo umo wa pa Mulungu, munembeshi wa byambo umo wanembelemo bibaba byavula byalepele kukila pa mapeja abiji. Waambile bingi pa mambo a bintu byo twaitabilamo, bulongo bwetu, kusampanya kwa tumatalakiti ne pa mambo a kupwila kwetu kwa nkambi. Musapwishi umo byo esambilenga na mwina nzubo pa kumupa katalakiti ka lwito, uno mwina nzubo wamuchibikizhe ne kwamba, “Ee po po nafumatu na kutanga pa mambo a luno lwito mu pepala!” Mukwabo mwina nzubo naye waambile’mba: “Olo po po nafumatu na kutanga pe anweba, ne kya kine mwaiya! Nanchi mwaiya kungita nyi?” Kabiji wanungilepo’mba, “Kino kyo kintu kyawama kyafwainwa kubanga Bakamonyi ba kwa Yehoba.”
3 Bantu bavula balusekelo baishilenga pa mapuzha a kupwila kwa nkambi saka basenda ku maboko tumatalakiti twa lwito. Bamo baendelenga misinso yalepa bingi pa kubatu’mba bakonshe kutanwako ku bipungu byonse. Kwibikishako kwetu kwa na mukoyo kwa kwita bantu, kwalengejile kibelengelo kya batainweko kuyilako bingi palutwe. Kya kumwenako, mu kyalo kimo kibelengelo kya bantu batainwe ku kupwila kwa nkambi kyayijileko palutwe kukila mwaka wafumineko.
4 Kusampanya mu Nyaunda Yonse: Mwakonsha kutendeka kusampanya tumatalakiti saka kwakishala milungu isatu kutendeka kupwila kwa nkambi. Mwafwainwa kwibikako bingi kupwisha kusampanya mu nyaunda yonse ya kipwilo. Mu bipwilo biji na nyaunda ikatampe, basapwishi bakonsha kusha bapachika bulongo tumatalakiti mu binzhilo bya boba bakabulwa kutanwa pa mazubo mu mulungu ukapelako, kupwila kwa nkambi saka kukyangye kutendeka. Bipwilo byafwainwa kwibikishako kupwisha kusampanya mu nyaunda yonse tumatalakiti tonse to byatambwijile. Umvwe tumo twasubukapo, bapainiya mu kipwilo bakonsha kwitwingijisha.
5 Bya Kwamba: Mwakonsha kwamba’mba: “Tubena kwingilako mu mwingilo ubena kwingijiwa ntanda yonse wa kusampanya tumatalakiti twa kwita bantu kuya na kutanwa ku kintu kyanema kikobiwa. Kano ko katalakiti kenu. Byonse byo mwakonsha kukeba kwipuzha biji mu konka kano katalakiti.” Kwambatu byambo bicheche kukemulengela kusampanya tumatalakiti twavula. Nangwa byonkabyo, umvwe mwina nzubo uji na mepuzho a kwimwipuzha mwakonsha kumukumbula. Monai kuba’mba mwanemba mazhina a boba bakamwesha lusekelo ne kubwelako bukiji.
6 Byo kyanemapo kuba’mba twibikisheko kulondela Kilishitu! (Yoa. 3:36) Kupwila kwetu kwa nkambi kubena kwiya kukakwasha bingi boba bakatanwako kumulondela Kilishitu. Ee kine, twaketekela’mba bukamonyi bukashimunwa pakatampe na mambo a uno mukwekele wa kwita bantu ku kupwila kwa nkambi kwa “Londelainga Kilishitu!” Onkao mambo, ikalai na mukoyo wa kwita bantu bavula kwiya kutanwako. Mwane bibusa bya Yehoba byavula bikekale ne anweba pa kwibikishako kwenu byo mukengilanga uno mwingilo wa ntanda yonse.