Bintu Byawama Bifuma mu Mukwekele wa Kwita Bantu
Byo kukashala milungu isatu bipwilo bikekala na mukwekele wa kwita bantu baji mu nyaunda yabo kuya na kushonkena. Kyanema bingi kwita bantu kuba’mba bakeye na kutanwako. Bantu bo twita bomvwa bingi bulongo majashi a mu Binembelo, balongo byo bepana kwingila mingilo, byubilo byetu byawama ne pa kumona byo twakwatankana. (Sala. 110:3; 133:1; Isa. 65:13, 14) Ñanyi bintu bifuma mu kwita bantu beya na kutanwa ku kushonkena nangwa kya kuba bafuma mu mapunzha mwalepa?
Kushonkena kwa nkambi kwa mu 2011 byo kwapwile ofweshi wa musampi watambwijile nkalata kufuma ku mwanamukazhi umo wataine kapepala pa kibelo. Uno mwanamukazhi wafyamanga umvwe bakamonyi ba kwa Yehoba baiya pa nzubo na kumusapwila. Wanembele’mba: “Nalangulukanga namba muntu wafwainwa kwikala na lusekelo umvwe wasongolwa ku mwanamulume wawama ne kwikala na byonse bikebewa mu nzubo. Pano amiwa, kechi najingapo na lusekelo ne, kabiji kechi nayukile nkebelo ya bumi ne. Pa kibelushi lukelo nayile na kutanwa ku kushonkena, kwalepele makilomita 320.” Uno wamukazhi waumvwine bingi bulongo, watumijile bamwata wanji foni kwibabula’mba kechi usa kubwela ku nzubo ne, mambo wakebelenga kutanwako ne pa mulungu. Waambile’mba “Natelekele ku majashi onse, namwene bakamonyi bavula, kabiji nakebelengatu namba kushonkena kutwajijile.” Byo abwelele ku nzubo waswile kutatula kufunda Baibolo. Bañondo bana balondejilepo waikele musapwishi wabula kubatizhiwa. Kabiji waambile ne kuba’mba “watemenwe bingi pa kapepala koataine mambo kamulengejile kuyuka nkebelo ya bumi.”
Bantu botukapanga tupepala bamo bakeya na kutanwako. Onkao mambo, kyawama atweba bonse kwingilako na ngovu mu uno mukwekele. Tukasende tupepala tukashalapo kimye kyo tukaya na kushonkena, ne kupanga bantu bo tukasambakananga.
[Kitenguluzha pa peja 1]
Tukambanga’mba ka pa Kusha Tupepala?
Pa kuba’mba tukape bantu bonse baji mu nyaunda yetu, kechi twafwainwa kwamba byambo byavula ne. Twakonsha kwamba’mba: “Muji byepi mwane. Tubena kwingila mwingilo ubena kwingijiwa ntanda yonse wa kupana tupepala twa kwichilapo bantu. Kapepala ke mwane. Byambo bikwabo biji ponkapo.” Mwafwainwa kutapo muchima kwingila uno mwingilo. Byo tukengilanga uno mukwekele ku mpelo ya mulungu, tukapanenga ne Kyamba kya Usopa ne Labainga! umvwe kyakonsheka.