Mwisambo na Wakinkalankulo Nanchi Boba Byawama Baya Mwiulu Nyi?

BAKAMONYI BA KWA YEHOBA bomvwa bingi bulongo kwisamba bya mu Baibolo na bantu. Nanchi mujipo na bwipuzho pa bya mu Baibolo bwimukatazha nyi? Nanchi mukebesha kuyuka byaitabilamo Bakamonyi ba kwa Yehoba nyi? Umvwe byo kiji, kange mukazhinyezhinye kwipuzha kimye kyo mukamonañana na Kamonyi ne. Bakatemwa bingi kwisamba nenu.

Uno ke mwisambo Kamonyi wa kwa Yehoba ye akonsha kwisamba na bantu. Twayai tufwanyikizhe kuba’mba Kamonyi wa jizhina ja Mako wafika pa nzubo ya mwanamulume wa jizhina ja Lombanya.

Aba Baya Mwiulu Baya na Kuba Ka?

Mako: Inge mwalanguluka pa bya kulutwe, abya mulanguluka’mba bintu bikawama nyi, inyi bikakilamo kutama nangwa kwikala byonka byo biji?

Lombanya: Ndanguluka’mba bintu bikawama. Nkebesha kuya na kwikala ne Nkambo mwiulu.

Mako: A lo luketekelo lwawama. Baibolo wamba bingi pa biji mwiulu ne pa jishuko ja kuya mwiulu. Abya mwakilangulukapo kala pa baya mwiulu kyo baya na kuba nyi?

Lombanya: Tukaya na kwikala ne Lesa kabiji tukamutakaikanga myaka ne myaka.

Mako: Alo ke luketekelo lwawama bingi. Baibolo kechi waambatu pa mapesho akekala na bantu bakaya mwiulu ne, yaamba ne pa mwingilo wanema bingi ye bakengilanga.

Lombanya: Ñanyi mwingilo yenka o?

Mako: Uno mwingilo bamutongola pa Lumwekesho 5:10. Pa kino kinembelo patangwa’mba: ‘[Yesu] wibalula kwikala bamfumu ne bañanga ba Lesa wetu kabiji bakekala bamfumu ne kulama ntanda.’ Ba Lombanya, mwaumvwa mwingilo uji na bakaya mwiulu nyi?

Lombanya: Kino kinembelo kibena kwamba’mba bakekala bamfumu bakalamanga ino ntanda.

Mako: Uno mwingilo wanema bingi, ke ibyo nenyi?

Bañanyi bo Bakalamanga?

Mako: Inge bakaya mwiulu bakekala bamfumu, nanchi kechi mwaswa kuba’mba paji bo bakalamanga nenyi? Umvwe kafwako bo bakalamanga, ke kafulumende wa mutundu ka wabula bangikazhi.

Lombanya: Po naumvwisha.

Mako: Onkao mambo, bwipuzho bwanema bingi kwipuzha bwa kuba’mba: Bañanyi bo bakalamanga?

Lombanya: Namona tukalamanga bantu bashala pano pa ntanda bakyangye kufwa ne kuya mwiulu.

Mako: Akyo kyo mwaamba kyaumvwanyika bingi bulongo inge kya kuba bantu boba byawama bonse baya mwiulu. Pano akilangulukai pa kino, nanchi bantu bamo bawama kechi bakaya mwiulu nenyi?

Lombanya: Nkyangye kumvwapo mwina Kilishitu waitabila byobyo ne.

Mako: Naipuzha buno bwipuzho na mambo a byo tutanga pa Salamo 37:29. Tangaipo.

Lombanya: Kyawama. Panembwa’mba: “Baoloka bakaswana ntanda, Ne kwikalamo myaka ne myaka.”

Mako: Mwatanga bingi bulongo. Nanchi mwamona pakekala bantu bavula boba byawama nyi?

Lombanya: Kinembelo kyaamba’mba bakaswana ntanda.

Mako: Byo ibyo kabiji kechi pa kakimyetu kacheche ne. Kinembelo kyaamba’mba: “Bakekalamo myaka ne myaka.”

Lombanya: Namona kampe kino kibena kulumbululatu’mba boba byawama kechi bakapwapo pano pa ntanda ne. Inge twafwa ne kuya mwiulu, bakwabo basemwa ne kutwajijila kuba byawama pano pa ntanda.

Mako: Bavula mo mo bekyumvwina kino kinembelo. Nanchi twakonsha kwamba’mba kino kinembelo kilumbulula bingi nyi? Nanchi kyalumbulula’mba bonse boba byawama bakekala myaka ne myaka pano pa ntanda nyi?

Lombanya: Kechi nayuka inge nkekala pano pa ntanda ne.

Paladisa Ukekala Pano pa Ntanda

Mako: Akimonai byaamba kinembelo kikwabo pa bwikalo bwa kulutwe pano pa ntanda. Twayai tutange Lumwekesho 21:4. Kino kinembelo kyaamba pa bantu bakekala pano pa ntanda kimye kya kulutwe amba: “Kabiji ukebashimuna mipolo yonse ku meso abo, ne lufu, mabingo, kujila nangwa misongo kechi bikekalako jibiji ne. Bintu bya kala byapichijila.” Nanchi kechi mwakonsha kutemwa kukekala buno bwikalo nenyi?

Lombanya: Nakonsha kutemwa. Pano bino namona kino kinembelo kibena kwamba pa bikekala bwikalo mwiulu.

Mako: Byo ibyo bakaya mwiulu nabo bakekala bwikalo bwa uno mutundu. Pano akimonai byaamba kino kinembelo. Kyaamba’mba, ki ka kikamweka ku lufu?

Lombanya: Kyaamba’mba, ‘lufu kechi lukekalako jibiji ne.’

Mako: Kya kine. Naketekela musakuswa kuba’mba, pa kuba’mba kintu kibule kwikalako jibiji, ko kuba’mba kyajingako patanshi.

Lombanya: Ee ibyo.

Mako: Nanchi mwiulu mwakikalapo kala lufu nyi? Pano pa ntanda po pafwa bantu.

Lombanya: Kampe. Pano bino nsakukilangulukapo.

Mako: Mwamona ba Lombanya, Baibolo ubena kwitufunjisha’mba bantu boba byawama bamo bakaya mwiulu, pa kuba bavula bakekala pano pa ntanda myaka ne myaka. Naketekela mwakitangapo kala kino kinembelo kyaamba’mba: “Bo bene balusekelo bakoka michima, mambo bakaswana ntanda.”—Mateo 5:5.

Lombanya: Ee, naumvwine saka bekitanga ku chechi.

Mako: Inge bakoka muchima bakaswana ntanda, nanchi kino kechi kibena kulumbulula’mba bakekala pano pa ntanda nenyi? Bakekala pano pa ntanda bakamona byawama byo baambapo mu Lumwekesho. Bakemwena bintu byonse byo bikaluka, mambo Lesa ukafumyapo byonse byatama ne lufu pamo.

Lombanya: Naumvwa mo mwatazha, pano bino kechi natondwa na binembelo bibiji byo mwatanga ne.

Mako: Kechi byo byonkatu ne, binembelo byaamba pa bikekala bwikalo bwa pano pa ntanda byavulatu. Inge muji na kimye, twayai tutange kinembelo kyo natemwa bingi.

Lombanya: Tangai, kimye ko kikiji kicheche.

“Babi Bakekala ke Kafwako”

Mako: Twaji kutanga Salamo 37:29. Pano twayai tutange kyepelo 10 ne 11. Tangai bino byepelo.

Lombanya: Patangwa’mba: “Bino pakishala pacheche ne babi bakekala ke kafwako: Ee kine, obewa ukatajishanga pantu panji kabiji aye ukekala ke kafwapo. Pakuba bakimote bakaswana ntanda. Kabiji bakasangalela mu kuvula kwa mutende.”

Mako: Mwatanga bingi bulongo. Kwesakana na kyepelo 11, “bakimote,” nangwa’mba bantu boba byawama bakekala pi?

Lombanya: Paamba’mba “bakaswana ntanda.” Nangwa byonkabyo, namona nobe kibena kwamba pa ano moba mambo bantu bawama po baji pa ntanda ne lelo jino.

Mako: Ee ibyo. Pano bino kinembelo kyaamba ne kuba’mba boba byawama bakeyowa “kuvula kwa mutende.” Nanchi twiyowa mutende pano pa ntanda nyi?

Lombanya: Ine.

Mako: Pano uno mulaye ukafika byepi? Akilangulukai pa kino: Fwanyikizhai kuba’mba muji na mazubo mo mwabika bakusonkela. Imo musonkela baji na byubilo byawama balama bulongo nzubo kabiji bekala bulongo na bakwabo. Mukatemwa kuba’mba batwajijile kwikalamo. Mu nzubo yenu ikwabo musonkela bantu batama michima babena konauna ne nzubo kabiji baikazha ne bakwabo bufinda. Bano batama michima umvwe bakana kupimpula byubilo byabo mukoba byepi?

Lombanya: Nkebapangamo.

Mako: Ne Lesa naye byobyo akoba na bantu baji na byubilo byatama. Akimonai byaamba kyepelo 10 amba: “Babi bakekala ke kafwako.” Ko kuba’mba Lesa “ukebafumyapo” bonse baikazha bakwabo bufinda. Pakuba baji na byubilo byawama bakekala mutende pano pa ntanda. Naketekela uno mulanguluko wa kuba’mba bantu baji na byubilo byawama bakekala pano pa ntanda myaka ne myaka wapusana na byo mwafunjile ku chechi kwenu.

Lombanya: Ee, kechi na kyumvwapo bino ku chechi kwetu ne.

Mako: Byonka byo mwaji kwamba pa kutendeka, kechi twafwainwa kutangatu kinembelo kimo nangwa bibiji twashiinwa ne. Twafwainwa kubalaulanga byaamba Baibolo yonse pa bikekala boba byawama. Pano kwesakana na binembelo byo twatanga pano, nanchi mwaswa kuba’mba bantu bawama bamo bakaya mwiulu, bakwabo bakekala pano pa ntanda myaka ne myaka nyi?

Lombanya: Kechi nayuka bulongo ne. Bino kwesakana na binembelo byo twatanga kibena kumweka nobe byobyo kikekala. Nafwainwa kulangulukishapo pa bino.

Mako: Byo musakulangulukanga pa uno mutwe, kampe mwakonsha kwikala ne na mepuzho akwabo. Nabiji, a kuba’mba, Pano kikekala byepi ku bantu bawama bajinga pano pa ntanda kala? Nanchi bonse bayile mwiulu nyi? Inge kechi bayile mwiulu ne, baji pi?

Lombanya: Ao mepuzho awama bingi.

Mako: Nsakwimushila binembelo. Lekai nemunembelepo pamo binembelo byaamba pa uno mutwe.a Bino pa nkabwele jibiji tukesambepo, umvwe mwaikalapo na kimye mukebitange ne kulangulukapo. Kijitu bulongo nyi?

Lombanya: Kijitu bulongo, nasanta bingi.

[Tubyambo twa mushi]