Yesu Wafunjishe Nikodema Bufuku

Byo akijinga mu Yelusalema ku Kijiilo kya Lupitailo mu 30 C.E., Yesu waubile biyukilo nangwa’mba bya kukumya byavula. Kino kyalengejile bantu bavula kumwitabila. Nikodema wa mu kije kikatampe kya Bayudea kya Saniedilini, watemenwe bingi. Na mambo a kukeba kuyukilapo byavula, wayile kwi Yesu bufuku. Kyamweka wachiinenga kumulengulula ku bakwabo bantangi ba Bayudea umvwe bamumona.

Nikodema waambile’mba: “Labi, twayuka namba anweba mwi mufunjishi wafuma kwi Lesa, mambo kafwako muntu nangwa umo wakonsha kuba bino biyukilo byo mubena kubapo ne, kana Lesa uji nanji.” Yesu wamwambijile Nikodema amba: “Kinetu nakwambila namba, umvwe muntu wabula kusemwa jibiji, kechi wakonsha kumona Bufumu bwa Lesa ne.”—Yoano 3:2, 3.

Nga muntu wakonsha kusemwa byepi jibiji? Nikodema washikishe Yesu amba: “Nanchi wakonsha kutwela munda mwa inanji ne kusemwa jibiji nyi?”—Yoano 3:4.

Ine, kusemwa jibiji kechi byo byo kulumbulula ne. Yesu walumbulwile’mba: “Kinetu nakwambila namba, inge muntu wabula kusemwa ku mema ne ku mupashi, kechi wakonsha kutwela mu Bufumu bwa Lesa ne.” (Yoano 3:5) Kimye Yesu kyo abatizhiwe, mupashi wazhila wamwikijile, onkao mambo, wasemenwe ku ‘mema ne ku mupashi.’ Kimye kyamwekele bino bintu, jiwi jafumine mwiulu amba: “Uno ye Mwanami ye natemwa, mo mmwena lusekelo.” (Mateo 3:16, 17) Mu jino jishinda, Lesa wabijikile’mba Yesu waikala ke mwananji wa ku mupashi uji na luketekelo lwa kutwela mu Bufumu bwa mwiulu. Mu kuya kwa kimye, pa Pentekosita mu 33 C.E., bantu bakwabo babatizhiwe batambwile mupashi wazhila, onkao mambo, basemenwe jibiji ne kwikala baana ba Lesa ba ku mupashi.—Byubilo 2:1-4.

Kyamukatezhe bingi Nikodema kukwatakanya byamufunjishenga Yesu pa Bufumu bwa Lesa. Onkao mambo, Yesu wamulumbulwijile mwingilo ye aishijile pano pa ntanda byo ajinga Mwana Lesa. Yesu waambile’mba: “Byonkatu Mosesa byo aimikile muloolo mu kiselebwa, ne Mwana muntu naye bakamwimika, kuba’mba yense wamwitabila akekale na bumi bwa myaka ne myaka.”—Yoano 3:14, 15.

Myaka ya kala, bena Isalela bo basuminenga ku miloolo ya bulembe batajilenga ku muloolo wa mukuba pa kuba’mba bapuluke. (Kubala 21:9) Ne bantu bonse bafwainwa kwitabila Mwana Lesa kuba’mba bakapuluke ne kwikala na bumi bwa myaka ne myaka. Byo aambilenga pe Yehoba byo atemwa bantu, Yesu wabuujile Nikodema amba: “Mambo Lesa watemenwe bingi ba pano pa ntanda kya kuba wapaine Mwananji yenkawa umotu, kuba’mba bonse bamwitabila kechi bakonaike ne, poso bakekale na bumi bwa myaka ne myaka.” (Yoano 3:16) Onkao mambo, kimye kyo ajinga mu Yelusalema panyuma ya kusapwila pa bañondo 6, Yesu walumbulwile patoka’mba aye ye jishinda jikapulukilamo bantu.

Yesu watwajijile kulumbulwila Nikodema amba: “Lesa watumine Mwananji pano pa ntanda, kechi na kuzhachisha ba pano pa ntanda ne.” Kino kyalumbulula’mba Yesu kechi waishile na kuzhachisha bantu ne kwibonauna bonse ne. Bino byonka byaambile Yesu, bamutumine kuba’mba bantu “bakapuluke kupichila mwi aye.”—Yoano 3:17.

Na mambo a kuchina bantu, Nikodema waishile bufuku kwi Yesu. Onkao mambo, kyayijilemo bingi Yesu kupezhako mwisambo wanji ne Nikodema kupichila mu kwamba’mba: “Pa kyo kino po paimena luzhachisho: kuba’mba kyeya [ko kuba’mba Yesu kupichila mu bwikalo bwanji ne mafunjisho anji] kyaiya pano pa ntanda, bino bantu batemwako mfishi kukila kyeya, mambo mingilo yabo yatama. Mambo yense uba byatama washikwa kyeya kabiji kechi wiya ku kyeya ne, pa kuba’mba mingilo yanji ibule kulengululwa. Bino yense uba mingilo yaoloka wiya ku kyeya, kuba’mba mingilo yanji isoloke monka mwayila kyaswa muchima wa Lesa.”—Yoano 3:19-21.

Pano kyashajile ku uno Mufaliseo kabiji mufunjishi wa bena Isalela aye Nikodema, kulangulukapo pa byo aumvwine pa mwingilo wa kwa Yesu mu kuba kyaswa muchima wa Lesa.