Mepuzho Kufuma Kubatanga

Yesu wasapwijile monse mu ntanda ya bena Isalela. Pano mutumwa Petelo waambijile ka amba Bayudea ne bakulumpe babo ‘bekyubile mambo a kubula kuyuka’ byo bakambizhe’mba bamwipaye Yesu?—Byu. 3:17.

Byo aambilenga ku jibumba ja Bayudea pa mambo a byo bevwangilemo mu kwipaiwa kwa Mesiasa, mutumwa Petelo waambile’mba: “Nayuka namba, mwikyubile mambo a kubula kuyuka, ne bakulumpe benu pamo.” (Byu. 3:14-17) Bayudea bamo kyamweka kechi bayukile’mba Yesu wajinga Mesiasa ne, kabiji kechi baumvwishishe mafunjisho anji ne. Bakwabo nabo kyalengejile’mba babule kumuyuka Mesiasa ke kubula kwikala na kizaku kya kutokesha Lesa ku muchima, misalululo, lwiso, ne lupato.

Akimonai kubula kizaku kya kutokesha Yehoba ku muchima byo kwalengejile bavula kubula kuta muchima ku mafunjisho a kwa Yesu. Javula Yesu wafunjishanga mu bishimpi, byo alumbulwilanga bonse bakebanga kufunda byavula. Nangwa byonkabyo, bantu bamo bamutelekanga Yesu bafumangapo kwa kubula kwibikako kuba’mba bomvwe byo aambilenga ne. Kimye kimo, ne baana ba bwanga bamo nabo betuntwile na byambo bya kifwanyikizho byaambile Yesu. (Yoa. 6:52-66) Bano bakankelwe kuyuka’mba bishimpi bya kwa Yesu bibakwashishenga kuba’mba bapimpule milanguluko ne byubilo byabo. (Isa. 6:9, 10; 44:18; Mat. 13:10-15) Kabiji balubileko ne ku bungauzhi bwaambile pe Mesiasa byo afwainwe kwingijisha bishimpi mu mafunjisho anji.—Sala. 78:2.

Na mambo a misalululo, bakwabo nabo bakaine mafunjisho a kwa Yesu. Byo afunjishenga mu nshinagoga ya mu muzhi wanji wa Nazala, bantu “bakuminye.” Pano mu kifulo kya kumwitaba Yesu amba ye Mesiasa, batendekele kwipuzha mepuzho amba: “Lelo uno muntu bino bintu wibifumya pi? . . . Nanchi uno kechi ye sendwe kabiji, mwana Maliya, koloja ba Yakoba, ne Yosesa, ne Yudasa, ne Shimona? ne banyenga yanji ke tuji nabo pano?” (Mako 6:1-3) Bantu ba ku Nazala bamwenenga byakomenenga Yesu, abo basujile byo afunjishenga.

Nga bantangi ba bupopweshi kyajinga byepi? Bavula kechi bateleko muchima kwi Yesu ne, na mambo a bintutu bimo byaambiwapo kala. (Yoa. 7:47-52) Nabo bakaine byo afunjishenga mambo bamumvwijile Yesu kichima byo bamwene bantu saka bamuta muchima. (Mako 15:10) Kabiji bavula bajinga pa bifulo bikatampe nabo bamushikilwe byo ebasanzhilemo mambo a bukamfutumfutu ne bujimbijimbi bwabo. (Mat. 23:13-36) Yesu wibalengulwile pa bulubi bwabo bwa nshiji amba: ‘Malwa enu, anweba bafunjishi ba mizhilo! Mambo mwafumyapo kii wa maana: kechi mwatwelamo anwe bene [mu Bufumu] ne, ne aba basaka kutwelamo mwibakanya.’—Luka 11:37-52.

Pa myaka isatu ne kichika, Yesu wasapwijilenga mambo awama mu ntanda. Kabiji wafunjishe ne bakwabo bavula kwingila uno mwingilo. (Luka 9:1, 2; 10:1, 16, 17) Yesu ne baana banji ba bwanga baingijile bingi bulongo mwingilo kya kuba Bafaliseo bejizhañenye amba: “Talai ne kyalo kyonse ke kimulondele.” (Yoa. 12:19) Bayudea bavula kechi amba kafwako nangwa kimo kyo bayukile ne. Pano bino ‘bekyubile mambo a kubula kuyuka’ amba Yesu ye Mesiasa. Bakonsheshe kuyuka byavula ne kutemwa Mesiasa, pano bino bakankelwe. Bamo bevwangilemo mu kwipaya Yesu. Onkao mambo, mutumwa Petelo wibambijile bavula amba: “Byonkabyo lapilai, ne kwaluluka, mambo enu azhimañane, kukeye myaka ya kubwezha michima ifuma ku meso a Nkambo; kabiji amutume ne Kilishitu, ye bemutongwela, yenkaye Yesu.” (Byu. 3:19, 20) Kyawamine bingi kuba’mba Bayudea bavula batendekele kutako muchima kubikakotu ne “jibumba jikatampe ja bañanga.” Balekele kuba bintu mu bulubi. Balapijile ne kwitabilwa kwi Yehoba.—Byu. 2:41; 4:4; 5:14; 6:7.