‘Kechi Bafunjile ne, Bantutu’

1, 2. Ñanyi kintu kya kukumya kyaubile ba Petelo ne Yoano kwipi na kibelo kya nzubo ya Lesa?

KYAJINGA kimye kya mute, juba saka jasama ne jibumba ja bantu saka jikinsana. Bayudea bajinga na mukoyo ne baana ba bwanga ba kwa Kilishitu baishilenga mu kipango kya nzubo ya Lesa. “Kimye kya milombelo” kyafwenyenye pepi.a (Byu. 2:46; 3:1) Pa jino jibumba pajinga ne Petelo ne Yoano bayilenga ku kibelo kya nzubo ya Lesa kyatelwanga amba Buya. Nangwa kya kuba kwajinga kiwowo ne mitutu ya bantu bavula, mwanamulume wasemekelwetu kilema wabijikile’mba bamupepo mali.​—Byu. 3:2; 4:22.

² Ba Petelo ne Yoano byo bafikile kwipi, awa kilema wabwezhezhepo byambo byanji bya kulomba mali. Batumwa baimene ne kukeba kuyuka byakebelenga uno muntu. Petelo wamwambijile’mba: “Siliva ne ngolode mfwabyo, bino nsakukupa kyonka kyo nji nakyo: Mu jizhina ja Yesu Kilishitu mwina Nazala, nakwambila namba enda!” Akifwanyikizhai bantu byo bakuminye pa kumona Petelo wakwata uno mwanamulume ku kuboko kabiji pa kimye kitanshi mu bwikalo bwanji uno mwanamulume waimana! (Byu. 3:6, 7) Nanchi mwakonsha kufwanyikizha uno mwanamulume byo etajilenga ku maulu ne kutendeka kutampula kimye kitanshi nyi? O ene mambo o atatwijile kukilauka ne kutota Lesa na jiwi jasansuka!

3. Ñanyi bupe bwanema bingi bwatambwile jibumba ne yewa wajinga kala kilema?

³ Jibumba jasangalele, janyemejile kwi Petelo ne Yoano bajinga mu bukonde bwa Solomone. Mu buno bonka bukonde Yesu mo aimenepo kimye kimo na kufunjisha, Petelo mo mo ebalumbulwijile bantu buneme bwa akya kyamwekele. (Yoa. 10:23) Wapele jibumba ne yewa wajinga kala kilema bupe bwakijile siliva ne ngolode. Buno bupe bwanemene bingi kukila kubukwa. Buno bupe bwajinga bwa kulapila kuba’mba mambo abo azhimañane ne kwikala ba kulondela “Ntangi Mwine wa bumi,” Yehoba ye atongola, aye Yesu Kilishitu.​—Byu. 3:15.

4. (a) Kubuka yewa mwanamulume mu jishinda ja kukumya kwaletele ñanyi lukatazho? (b) Ñanyi mepuzho abiji o tusakukumbula?

⁴ Jino juba janemene bingi. Muntu umo wajinga kilema bamubukile ne kutendeka kwenda. Bino bantu bavula bebapele kimye kya kuyukisha bulongo Mambo a Lesa ne kwiomvwisha pa kuba’mba bendenga monka mukebela Lesa. (Kolo. 1:9, 10) Bintu byamwekele pa jino juba byalengejile bantu bajinga pa bifulo kukanya baana ba bwanga ba kwa Kilishitu bakishinka kufikizha mukambizho wibakambizhe Yesu wa kusapwila mambo a Bufumu. (Byu. 1:8) Twakonsha kufunjilako ka ku mashinda ne byubilo byamwesheshe Petelo ne Yoano, ‘banabalume babujile kufunda, bantutu,’ byo basapwijilenga jibumba?b (Byu. 4:13) Kabiji twakonsha kulondela byepi byo baubile abo ne bakwabo baana ba bwanga kimye kyo bebakainyenga kusapwila?

Kechi na “Bulume Bwetu” Ne (Byu. 3:11-26)

5. Tufunjilako ka kwi Petelo byo aambilenga ku jibumba?

⁵ Petelo ne Yoano baimene ku jibumba saka bayuka’mba bamo mu jino jibumba babijikileko kuba’mba Yesu bamupope pa kichi. (Mako 15:8-15; Byu. 3:13-15) Akilangulukai pe Petelo byo achinchikile pa kwamba’mba awa wajinga kala kilema wabukilwe mu jizhina ja Yesu. Petelo kechi wapichile mu mbaji pa kulumbulula bukine ne. Waambijile jibumba kwa kubula kupita mumbaji’mba jajinga na mambo a kwipaya Kilishitu. Bino Petelo kechi washikilwe bano bantu ne, mambo ‘baubile kino kintu mu bulubi.’ (Byu. 3:17) Wibamwenenga’mba balongo banji Bayudea kabiji wateletu muchima kwamba pa mambo a Bufumu. Umvwe balapijile ne kwitabila mwi Kilishitu, Yehoba wafwainwe ‘kwibakokolosha.’ (Byu. 3:19) Ne atweba twafwainwa kuchinchika ne kwamba kipasu pa kusapwila pa luzhachisho lwa Lesa lubena kwiya. Pano bino, kechi twafwainwa kukajipilanga nangwa kuzhachisha bantu ne. Onkao mambo, twafwainwa kumonanga bantu bo tusapwila kuba’mba nabo kulutwe bakonsha kwikala balongo betu ba ku mupashi kabiji byonka byaubile Petelo, twafwainwa kutesha muchima kwamba pa bintu byawama bya mambo a Bufumu.

6. Petelo ne Yoano bamwesheshe byepi muchima kwipelula?

⁶ Batumwa bajinga banabalume bepelwile bingi. Kechi betumbijikilenga abo bene pa kya kukumya kyo baubile ne. Petelo waambijile jibumba amba: “Anweba bena Isalela, mambo ka o mubena kukuminya kino, kabiji mambo ka o mubena kwitutajila uba nobe bulume bwetu nangwa kunemeka Lesa kwetu ko kwalengela uno muntu amba ende?” (Byu. 3:12) Petelo ne batumwa bakwabo bayukile’mba bintu byonse byawama byo baubilenga mu mwingilo wabo, bebyubilenga na mambo a bulume bwa Lesa, kechi bwabo ne. O ene mambo o batumbijikilenga Yehoba ne Yesu pa bintu byo baubilenga.

7, 8. (a) Ñanyi bupe bo twakonsha kupa bantu? (b) Nga mulaye wa ‘kubwezha bintu byonse’ ubena kufika byepi mu ano moba?

⁷ Ne atweba twafwainwa kwipelula mu mwingilo wa kusapwila pa Bufumu. Ibyo kuba’mba mupashi wa Lesa kechi ulengela bena Kilishitu ba mu ano moba kubuka bantu mu jishinda ja kukumya ne. Pano bino, twakonsha kukwasha bantu kwikala na lwitabilo mwi Lesa ne Kilishitu ne kutambula bupe buntutu bumo Petelo bo apaine, ko kuba’mba kulekelwa mambo abo ne kwibakokolosha kwi Yehoba. Pa mwaka pa mwaka, bantu bavula batambwila buno bupe ne kubatizhiwa kwikala baana ba bwanga ba kwa Kilishitu.

⁸ Kya kine, tubena kwikala mu kimye kya ‘kubwezha bintu byonse’ Petelo byo aambilepo. Mu kufikizha byambo byaambile Lesa “kupichila mu bangauzhi bazhila ba kala,” Bufumu bwaikajikilwe mwiulu mu mwaka wa 1914. (Byu. 3:21; Sala. 110:1-3; Da. 4:16, 17) Aku Bufumu bwikajikwatu, Kilishitu watendekele kutangijila mwingilo wa kubwezha bupopweshi bwa kine pano pa ntanda. Kyafumamo bantu bavula bebaleta mu paladisa wa ku mupashi kwikala bangikazhi ba Bufumu bwa Lesa. Bavuula bumuntu bwa kala bwibajimbaikanga, ne “kuvwala bumuntu bupya bwalengelwe monka mwayila kyaswa muchima wa Lesa.” (Efi. 4:22-24) Byonka byabukilwe awa wajinga kala kilema wa lulombo, uno mwingilo mukatampe kechi wingijiwa na bulume bwa bantu ne, bino na mupashi wa Lesa. Byonka byaubile Petelo, twafwainwa kuchinchika ne kwingijisha bulongo Mambo a Lesa pa kufunjisha bantu. Tukwasha bantu kwikala baana ba bwanga ba kwa Kilishitu na mambo a bulume bwa Lesa, kechi na bulume bwetu ne.

“Kechi Twakonsha Kuleka Kwamba” Ne (Byu. 4:1-22)

9-11. (a) Bantangi ba Bayudea baubilepo byepi pa byambo byaambile Petelo ne Yoano? (b) Batumwa bafuukwilepo kuba ka?

⁹ Byambo byaambile Petelo, kukilauka ne kubijika kwa yewa muntu wajinga kala kilema kwaletele kiwowo. Mukulumpe wa ku nzubo ya Lesa ye batongwele kusopa ino nzubo kubikapotu ne bañanga bakatampe, baishile na kumona kyamwekelenga. Kyamweka bano banabalume bajinga Basadusea, ko kuba’mba jibumba ja bantu banonshi kabiji bamulwila ntanda baingijilanga pamo na bena Loma kuleta mutende. Bano bantu bakaine mizhilo yaambiwangatu pa kanwa yatemenwe bingi Bafaliseo kabiji kechi baitabijile mu lusanguko ne.c Bazhingijile bingi pa kutana ba Petelo ne Yoano mu nzubo ya Lesa saka bafunjisha na kuchinchika amba Yesu wasanguka!

¹⁰ Bano balwanyi bazhingijile, batayile Petelo ne Yoano mu kaleya ne kwibatwala ku kije kikatampe kya Bayudea juba jalondejilepo. Bantangi bemonanga’mba bakila bakwabo, bamwenenga Petelo ne Yoano’mba ‘kechi bafunjile ne, bantutu,’ kabiji’mba kechi bajinga na lusa lwa kufunjisha mu nzubo ya Lesa ne. Kechi bafunjile pa masukulu a bupopweshi ayukanyikilwe ne. Nangwa byonkabyo, kwamba kipasu ne kushiinwa kwabo kwalengejile kije kukumya. Mambo ka Petelo ne Yoano o bayukijile kufunjisha? Kintu kimo kyalengejile ke kya kuba’mba “baendanga ne Yesu.” (Byu. 4:13) Kikwabo Nkambo yabo wafunjishanga na lūsa lwamupele Lesa kupusanako na banembeshi.​—Mat. 7:28, 29.

¹¹ Kije kyakambizhe batumwa kuleka kusapwila. Pa kyokya kimye kije kyo kyajinga na bulume bwa kukambizha bantu bya kuba. Pa milungu icheche yapichilepo kino saka kikyangye kubiwa, kino kije kyakambizhe’mba Yesu “wafwainwa kufwa.” (Mat. 26:59-66) Nangwa byonkabyo, Petelo ne Yoano kechi bachiine ne. Byo baimene kulutwe ya bano bantu banonshi, bafunjile kabiji bakatezhe bingi, Petelo ne Yoano kwa kubula moyo bino na mushingi baambile’mba: “Anwe bene chibilai mo mwalangulukila, umvwe kyawama kwimumvwa anweba, kukila kumvwina Lesa. Pakuba atweba kechi twakonsha kuleka kwamba pa bintu byo twamwene ne kumvwa ne.”​—Byu. 4:19, 20.

12. Ñanyi bintu byakonsha kwitukwasha kuchinchika ne kushiinwa?

¹² Nanchi ne anweba mwakonsha kuchinchika byonka byo baubile nyi? Mumvwa byepi umvwe ke musapwile ku bantu banonshi, bafunda bingi, nangwa ku boba bakatazha baji mu nyaunda yenu? Pano mwakonsha kuba byepi inge ba mu kisemi, bo mufunda nabo sukulu nangwa bo mwingila nabo nkito kebemwendeleke pa bintu byo mwaitabilamo? Nanchi muchina nyi? Umvwe ibyo, mwakonsha kushinda ino milanguluko. Yesu byo ajinga pano pa ntanda, wafunjishe batumwa banji kulwila bintu byo baitabijilemo saka bashiinwa ne na mushingi. (Mat. 10:11-18) Yesu byo kusangulwe, walayile baana banji ba bwanga’mba ukatwajijila kwikala nabo “moba onse kukafikatu ne ku mpelo ya buno bwikalo.” (Mat. 28:20) Na lutangijilo lwa kwa Yesu, kalume wa kishinka kabiji wa maana witufunjisha byo twafwainwa kuzhikijila bintu byo twaitabilamo. (Mat. 24:45-47; 1 Pe. 3:15) Kino kyubiwa kupichila mu mikambizho yo betufunjisha pa kupwila kwa kipwilo, nabiji Kupwila kwa Bwikalo ne Mwingilo, mabuku alumbulula Baibolo, nabiji “Mepuzho a Baibolo a Kumbulwa” bibaba biji pa keyala wetu wa jw.org. Nanchi mutanwa ku kuno kupwila ne kwingijisha bulongo ano mabuku nyi? Inge byo byo muba, mukachinchika ne kushiinwa mu bintu byo mwamba. Byonka byajinga batumwa, ne anweba kafwako kikemulengela kuleka kwamba bukine bwawama bufuma kwi Lesa bo mwa umvwine.

‘Balombele kwi Lesa’ (Byu. 4:23-31)

13, 14. Inge tubena kupita mu makatazho, twafwainwa kuba byepi, kabiji mambo ka?

¹³ Aku bebakasululatu mu kaleya, Petelo ne Yoano bamonañene na kipwilo kyonse. Bonse pamo, ‘balombele kwi Lesa’mba ebakwashe kutwajijila basapwila na kuchinchika. (Byu. 4:24) Petelo wayukishetu bulongo bumbulwamaana buji mu kuketekela mu bulume bwa muntu mwine pa kuba kyaswa muchima wa Lesa. Pa milungu ichechetu yapichilepo, na mambo a kwiketekela aye mwine waambijile Yesu amba: “Nangwa kya kuba bano bonse basakwimusha na mambo a kisakwimumwekela, amiwa kechi nsakwimusha ne.” Nangwa byonkabyo, byonka byaambijile jimo Yesu, Petelo wachiine bantu ne kukana mulunda nanji kabiji mufunjishi. Pano bino, Petelo wafunjijileko ku byo alubankenye.​—Mat. 26:33, 34, 69-75.

¹⁴ Bintu byo mwafuukulapo mu muchima wenu kechi byo byonka byakonsha kwimukwasha kwingila bulongo mwingilo wenu wa kwikala kamonyi wa Kilishitu ne. Inge balwanyi kebakebe konauna lwitabilo lwenu nangwa kwimulekesha kusapwila, londelai byaubile Petelo ne Yoano. Lombai Yehoba kwimukosesha. Lombai bukwasho kufuma ku kipwilo. Bulai bakulumpe mu kipwilo ne balongo bakwabo bakoma ku lwitabilo makatazho o mubena kupitamo. Milombelo ya bakwenu yakonsha kwimukwasha bingi.​—Efi. 6:18; Yako. 5:16.

15. Mambo ka aba balekele kusapwila pa kimye kimo o bafwainwa kubula kulefulwa?

¹⁵ Umvwe bemukatezhepo kabiji mwaleka ne kusapwila, kechi mwafwainwa kulefulwa ne. Vulukai’mba, batumwa bonse balekele kusapwila pa kimye kimo panyuma ya lufu lwa kwa Yesu, bino palutwe kacheche batendeka jikwabo. (Mat. 26:56; 28:10, 16-20) Mu kifulo kya kuleka bilubo byo mwaubile kala kwimulengela kulefulwa, nanchi kechi mwakonsha kufunjilako ku bimumwekejile ne kukosesha bakwenu nenyi?

16, 17. Ñanyi kintu kyo twafwainwa kufunjilako ku lulombelo lwalombele baana ba bwanga ba kwa Kilishitu mu Yelusalema?

¹⁶ Ñanyi bintu byo twafwainwa kulombapo inge ba luusa kebetumanyike? Batumwa kechi balombele’mba makatazho o bapichilengamo beafumyepo ne. Bavulukile byambo bya kwa Yesu bya kuba’mba: “Umvwe bamanyikile amiwa, ne anweba bakemumanyika.” (Yoa. 15:20) Bano baana ba bwanga bakishinka kechi balombele’mba Yehoba afumyepo makatazho ne. Pakuba balombele’mba “umvwai bintu byo babena kwitupingila” kubalwanyi betu. (Byu. 4:29) Bano baana ba bwanga bamwene bulongo bintu byo byajinga. Bayukile’mba lumanamo lo bapichilengamo lwafikizhenga bungauzhi. Bayukile kuba’mba, byonkatu Yesu byo ebafunjishe kulomba, kyaswa muchima wa Lesa ‘kikobiwa pano pa ntanda,’ kechi na mambo a bintu byakonsha kwamba bamfumu ba pano pa ntanda ne.​—Mat. 6:9, 10.

¹⁷ Pa kuba’mba bobe kyaswa muchima wa Lesa, baana ba bwanga balombele amba: “Kwashai bakalume benu kwambanga mambo enu na kuchinchika.” Yehoba wibakumbwile byepi? “Mu nzubo mo bajinga mwatenkene; kabiji bonse bayujile na mupashi wazhila ne kutatula kwamba mambo a Lesa na kuchinchika.” (Byu. 4:​29-31) Kafwako kintu nangwa kimo kyakonsha kulengela kyaswa muchima wa Lesa kubula kubiwa ne. (Isa. 55:11) Bintu nangwa bikatazhepotu byepi nangwa bantu betukanyepotu byepi, umvwe twalombela pamo kwi Lesa, twakonsha kuketekela amba Lesa uketupa bulume pa kuba’mba tutwajijile kwamba byambo byanji na kuchinchika.

Kutotolola ‘Kechi ku Bantu ne, Bino kwi Lesa’ (Byu. 4:32–5:11)

18. Ba mu kipwilo kya mu Yelusalema bekwashishe byepi bene na bene?

¹⁸ Kipwilo kya katataka kya mu Yelusalema kyakomene kufika ku bantu 5,000 bajinga na lwitabilo bakosa.d Nangwa kya kuba bafumine ku bwikalo bwapusana pusana, baana ba bwanga “bajinga na muchima umo ne mweo umo.” Bakwatankene na muchima umo ne na mulanguluko umo. (Byu. 4:32; 1 Ko. 1:10) Baana ba bwanga kechi balombeletu kwi Yehoba kwibobila bibusa pa mambo a kwibikako kwabo ne, baubile ne bintu bikwabo. Bekwashishenga abo bene na bene ku mupashi ne ku mubiji. (1 Yoa. 3:16-18) Nabiji, mwana wa bwanga aye Yosefwa yetelanga’mba Banabasa ku batumwa, wapoteshe bujimi bwanji ne kupana na muchima yense mali onse kukwashishamo aba bafumine kwalepa kuba’mba bekale kimye kyabaya mu Yelusalema ne kufunjilapo byavula pa lwitabilo lwabo lwa katataka.

19. Mambo ka Yehoba o aipayijile Ananyasa ne Safila?

¹⁹ Bamulume ne mukazhi abo ba Ananyasa ne Safila bapoteshe bujimi bwabo ne kupana bupe. Babepele amba bapaine mali onse o bapoteshemo bujimi; pano bino, ‘bafilepo mali amo.’ (Byu. 5:2) Yehoba waipayile bano bamulume ne mukazhi, kechi na mambo a kupana mali akepa ne, bino na mambo a kuba’mba milanguluko yabo yatamine kabiji bamwesheshe bujimbijimbi. ‘Kechi babepele bantu ne, bino babepele Lesa.’ (Byu. 5:4) Byonka byajinga bakamfutumfutu Yesu bo alengulwile, ba Ananyasa ne Safila kechi batele muchima pa kwitabilwa kwi Lesa ne pakuba batele muchima pa kutumbijikwa ku bantu.​—Mat. 6:1-3.

20. Ñanyi bintu byo twafunda pa mambo a kupana kwi Yehoba?

²⁰ Muchima wa bupanyi wajingapo na boba baana ba bwanga bakishinka bajingako mu myaka kitota kitanshi mu Yelusalema, Bakamonyi bavula lelo jino babena kukwasha mwingilo wa kusapwila ntanda yonse kupichila mu kupana bupe bwa kwifuukwila bene. Kafwako muntu nangwa umo ye bakanjikizha kupana kimye kyanji nangwa mali kutundaikilamo uno mwingilo ne. Kine, Yehoba kechi ukeba atweba kumwingijila kya kwikanjikizha nangwa na bulanda ne. (2 Ko. 9:7) Umvwe twapana, Yehoba kechi utala pa kipimo ne, pakuba aye utala pa kine kintu kyalengela kuba’mba tupane. (Mako 12:41-44) Kechi twafwainwa kwikala na muchima wajingapo na Ananyasa ne Safila wa kukeba’mba bakwetu betutumbijike pa mwingilo ye tubena kwingila ne. Byonka byajinga Petelo, Yoano ne Banabasa, mwingilo wetu ye twingijila Yehoba kimye kyonse twafwainwa kumwingila na mambo a kutemwa Lesa ne bakwetu bantu.​—Mat. 22:37-40.