Ilekelaingako Mambo

“Saka mwitekenya anwe bene na bene ne kwilekelako mambo.”—KOLO. 3:13.

MUSAKUKUMBULA’MBA KA?

Mambo ka o twafwainwa kwikela na muchima wa kulekelako bakwetu mambo?

Ñanyi kishimpi kyaingijishe Yesu pa kwamba pa buneme bwa kwilekelako mambo?

Ñanyi bintu byawama bifuma mu kulekelako bakwetu mambo?

1, 2. Mambo ka o kyanemena kulangulukapo bulongo inge kya kuba tulekelako bakwetu mambo nangwa ne?

KUPICHILA mu Mambo anji anembwa, Yehoba witukwasha kuyuka byo amona bundengamambo ne byo oba inge twalenga mambo. Kabiji Mambo anji aamba bingi pa byo etulekelako mambo. Mu mutwe wafumako, twisambile pa byubilo bya kwa Davida ne Manase byalengejile Yehoba kwibalekelako mambo. Kwipelula kwibalengejile kuswa mambo o balengele, kuleka byubilo byabo byatama, ne kulapila kya kine. Ne kyafuminemo, batendekele kutalwa bulongo jibiji kwi Yehoba.

² Pano twayai twisambe pa byo twafwainwa kulekelako bakwetu mambo. Inge kya kuba’mba mulongo wenu wafwile na mambo a byaubile Manase inge mwaubile byepi? Abya inge mwamulekejileko mambo Manase nyi? Buno ke bwipuzho bwawama bingi kwiipuzha ano moba mambo tubena kwikala mu ntanda muji bumpupabizhila, bukapondo, kabiji muji bantu babula kuta muchima ku bantu bakwabo. Pano mambo ka mwina Kilishitu o afwainwa kwibikako kulekelako bakwabo mambo? Kabiji inge kya kuba bemuba nshiji, ki ka kyakonsha kwimukwasha kwikanya ne kubila bintu mu jishinda jikebelamo Yehoba ne kuswa kumulekelako mambo?

ENE MAMBO O TWAFWAINWA KWILEKELANGAKO MAMBO

3-5. (a) Ñanyi kishimpi kyaingijishe Yesu pa kukwasha bantu bamutelekelenga kulanguluka pa buneme bwa kwilekelako mambo? (b) Ñanyi kintu Yesu kyo aambilepo mu kishimpi kyanembwa mu Mateo 18:21-35?

³ Kuswa kulekelako mambo boba betulenga mambo, nangwa ba mu kipwilo kya bena Kilishitu nangwa ne, kwanema bingi pa kuba’mba tutwajijile kwikala mu mutende na ba mu kisemi, balunda netu, bantu bakwetu ne Yehoba. Binembelo bimwesha’mba atweba bena Kilishitu bonse twafwainwa kwikala na muchima wa kulekelako bakwetu mambo nangwa kya kuba betulenga mambo pa bimye byavula. Pa kulumbulula buneme bwa kwilekelako mambo, Yesu waingijishe kishimpi kya kalume wajinga na kikoloto.

⁴ Uno kalume wajinga na kikoloto kwi nkambo yanji kya mali o afwainwe kwingijila pa moba 60,000,000, pano bino, nkambo yanji wamulekejileko kikoloto kyanji. Uno kalume byo alupukile wataine kalume mukwabo wajinga na kikoloto kyanji kya mali muntu o afwainwa kwingijila pa moba 100. Byo amusashijile kuba’mba amutekenye, uno kalume ye balekejileko kikoloto kikatampe watwajile kalume mukwabo mu kaleya. Bino byubilo byazhingijishe nkambo yanji. Onkao mambo, nkambo yanji wamwipwizhe amba: “Nanchi kechi wafwainwe kumubila lusa kalume mukwenu byonka byo nakubijile lusa nenyi?” “Byonkabyo, nkambo yanji wazhingijile bingi ne kumupana [kalume wabujile kulekelako mukwabo mambo] ku baota, amba poso akabwezhe kikoloto kyonse.”—Mat. 18:21-34.

⁵ Ñanyi kintu Yesu kyo aambilengapo mu kino kishimpi? Walumbulwile amba: “Ne Batata ba mwiulu byo byo bakemuba ne anweba, umvwe mwabula kulekelako mambo balongo benu kufuma mu michima yenu.” (Mat. 18:35) Yesu waambilenga pa kwilekelako mambo. Mwapita bwikalo bwetu mambo avula o twalenga na mambo a bumbulwa kulumbuluka ke kishiino kimwesha’mba kyakatazha kufikizha byonse bikebewa bya Yehoba. Aye ukeba bingi kwitulekelako mambo kabiji inge witulekelako mambo kechi wiabika ku muchima ne. Onkao mambo, muntu yense ukeba kwikala mulunda wa Yehoba, wafwainwa kulekelangako bakwabo mambo. Kino kyo kyalumbulwile Yesu mu Jashi ja pa Mutumba amba: “Umvwe saka mwibalekelako bantu mambo, Shenu wa mwiulu naye ukemulekelako mambo; pakuba inge mwabula kwibalekelako bantu mambo abo, ne aye Shenu wa mwiulu kechi ukemulekelako mambo enu ne.”—Mat. 6:14, 15.

6. Mambo ka o kyakatezha kulekelako bakwetu mambo?

⁶ Mwakonsha kwamba’mba, ‘ano ke mañambilatu a bantu’ nangwa’mba ‘kyapela kwamba kukila kwibyuba.’ Kiji bino na mambo a kuba kikola bingi ku muchima inge mukwenu wakutamisha. Muntu wakonsha kuzhingila, kumvwa nobe bamufutukamo, kukeba bunchibamambo bwaoloka nangwa kukeba kushinkanya. Bamo balanguluka’mba kuba balekelako mambo muntu wibatamisha ne. Umvwe ne anweba byo byo mulanguluka, mwakonsha kwikala byepi na muchima wa kulekelako bakwenu mambo byonka bikeba Yehoba?

YUKAI KYALENGELA KUBA’MBA MUMVWENGA BYOBYO

7, 8. Ki ka kyakonsha kwimukwasha kulekelako bakwenu mambo inge kya kuba byubilo byabo bimufichisha ku muchima?

⁷ Kikola bingi ku muchima inge muntu wituzhingijisha nangwa inge ketulanguluke amba betuba kyatama. Nsongwalume umo walumbulula kintu kyaubiwe kimye kyo azhingijile bingi amba: ‘Nalupukile mu nzubo ne kwamba kuba’mba kechi nkabwela ne. Kyajinga kimye kya mute, nayile mu kamukwakwa kawama. Mu ino mpunzha yazhindama natendekele kubwezhamo muchima kabiji pa kupitapo kimye nabwelele pa nzubo ne kuba’mba kechi nkabwezhapo kuzhingila bibye ne.’ Kubwezhamo muchima ne kulangulukapo bulongo pa lukatazho mu meso a nteka kwakonsha kwimukwasha kuchinuzhuka kyubilo kya kubula kulekelako bakwenu mambo kyakonsha kwimulengela kwilangulusha.—Sala. 4:4; Mana 14:29; Yako. 1:19, 20.

⁸ Pano ibyepi inge kya kuba mwakankalwa kubwezhamo muchima? Esekai kumona ene mambo o mwazhingijila. Nanchi mwazhingila na mambo a kuba bemubile kyatama, nabiji kwimukosamika nyi? Nangwa kampe mubena kulanguluka kuba’mba awo muntu wakebelengatu kwimukozha ku muchima kya nshiji nyi? Nanchi byubilo byanji kine byatamine nyi? Kupesa pesa ne kuyuka kine kintu kyalengela kuba’mba muzhingile kwakonsha kwimukwasha kuyuka jishinda jawama ja mu Binembelo ja kukumbwilamo. (Tangai Byambo bya Mana 15:28; 17:27.) Kulangulukishapo kine kintu kyalengela mukwenu kwimutamisha kwakonsha kwimulengela kumulekelako mambo. Nangwa kya kuba kechi kyapela ne, kuba bino kwakonsha kwimulengela kuswisha mambo a Lesa kupesa pesa “milanguluko ya mu michima [yenu]” ne kwimulengela kwikala na muchima wa kulekelako bakwenu mambo byonka biji Yehoba.—Hebe. 4:12.

NANCHI MWAFWAINWA KUKIZHAMO KUZHINGILA INGE MUKWENU WIMUTAMISHA NYI?

9, 10. (a) Mwakonsha kuba byepi inge mwamona’mba bemuzhingijisha? (b) Mukomvwa byepi inge kya kuba mwafunda kubula kuzhingila bukiji ne kwikala na muchima wa kulekelako bakwenu mambo?

⁹ Kuji bintu byavula byakonsha kulengela muntu kuzhingila. Fwanyikizhai kuba’mba mubena kwendesha motoka wenu, pano motoka mukwabo waiya wakwesa motoka wenu. Mwakonsha kuba byepi? Bantu bamo bazhingila bingi kya kuba balwa ne na dalaivwa mukwabo. Byo muji bena Kilishitu, kechi mwafwainwa kuba kintu kya uno mutundu ne.

¹⁰ Kyawama bingi patanshi kukilanguluka pa kintu saka tukyangye kwikyuba ne. Kampe ne anweba mwaji kulubankanya kwenda na mambo a kuba mwaji kulabikwapo na bintu bimo. Nangwa kampe motoka wa mukwenu wajinga na lukatazho. Kechi tukakizhamo kuzhingila nangwa kulefulwa inge twaikala na muchima wa kulekelako bakwetu mambo ne kuyuka kine kintu kyalengela oo mapuso kumweka ne. Musapwishi 7:9 waamba’mba: “Kechi mupelawizhe kuzhingila ne, mambo bukaji bo bwikala mu kyaji kya bakosama.” Kechi mwafwainwa kukizhamo kuzhingila inge mukwenu wimutamisha ne. Bimye bimo tulanguluka’mba mukwetu waubilamotu kya nshiji kwitulenga mambo, nanchi ne, bumbulwa kulumbulukatu nangwa kampe wakankelwetu bya kuba. Vulukainga kuba’mba kechi mwakonsha kuyuka byonse byalengela mukwenu kwamba nangwa kuba byobyo ne. Onkao mambo, ikalai na muchima wa kwilekela mambo. Inge kemube bino, mukekala bingi na lusekelo.—Tangai 1 Petelo 4:8.

‘MUTENDE WENU EMUBWELELE ANWE BENE’

11. Twakonsha kuba byepi inge bantu batambwila mambo awama nangwa bakana?

¹¹ Mwakonsha kulama byepi muchima wenu inge muntu wimuzhingijisha kimye kyo muji mu mwingilo wa mu bujimi? Kimye Yesu kyo atumine basapwishi 70, wibabujile amba mu nzubo yonse yo mukatwelamo mukambe amba: “Mutende ekale mu ino nzubo.” Kabiji wanungilepo amba: “Umvwe mulunda wa mutende mo aji, mutende wenu ukekala pe aye. Bino umvwe kafwamo, ukemubwelela anwe bene.” (Luka 10:1, 5, 6) Twikala na lusekelo inge bantu batambwila mambo awama o tusapwila, mambo bakamwenamo. Bimye bimo, bantu kechi beatambwila ne. Umvwe kyaikala bino, twafwainwa kuba byepi? Yesu waambile amba mutende wetu uketubwelela. Twafwainwa kufuma pa nzubo yonse mu mutende kechi na mambo a byo betuba ne. Inge twazhingila kechi tukatwajijila kwikala na mutende wetu ne.

12. Byambo bya kwa Paulo biji mu Efisesa 4:31, 32, byafwainwa kwitulengela kuba ka?

¹² Ibikaiko kulama mutende mu bintu byonse kechi mu mwingilotu wa bwina Kilishitu ne. Pano bino, kishinka ke kya kuba’mba kechi kilumbulula kuba’mba twakonsha kuswisha bilubo byabo nangwa kuvulañanyakotu ne. Bino kulekelako bakwetu mambo kulumbulula kubula kwikala na kizhingijisha ne kutwajijila kwikala na mutende. Kupichila mu kutwajijila kulanguluka pa bintu byatama byo bebobile, bantu bamo baswisha byubilo bya bakwabo kwibapwishisha lusekelo. Kange muleke bukaji bwimutangijilenga ne. Yukai kuba’mba kechi mwakonsha kwikala na lusekelo inge mwaikala na kizhingijisha ne. Onkao mambo, ilekelaingako mambo.—Tangai Efisesa 4:31, 32.

UBILAINGA BINTU MU JISHINDA JITOKESHA YEHOBA KU MUCHIMA

13. (a) Nga mwina Kilishitu wakonsha kubika byepi “mujilo” pa mutwe wa mulwanyi wanji? (b) Ki ka kyakonsha kufumamo mu kumwesha byubilo byawama inge betuzhingijisha?

¹³ Kwakonsha kwikala bimye bimo byo mwakonsha kumona’mba mwafwainwa kukwasha muntu wimuzhingijisha kunemeka mizhilo ya bwina Kilishitu. Mutumwa Paulo wanembele amba: “Umvwe mulwanyi wenu wafwa nzala, mupepoi bya kuja; umvwe wafwa kilaka, mupepoi bya kutoma; mambo pa kuba bino mwauba nobe mwabika mujilo pa mutwe wanji. Kechi muleke bubi bwimushindenga ne, bino shindainga bubi kupichila mu kuba byawama.” (Loma 12:20, 21) Inge mwamwesha byubilo byawama kimye kyo bemuzhingijisha, mwakonsha kulengela bantu kwalula milanguluko yabo ne kuba byawama. Kupichila mu kulangulukilako ne kubila lusa muntu wimuzhingijisha, mwakonsha kumukwasha kufunda bukine bwa mu Baibolo. Monse mo kyakonsha kwikela, byubilo byenu byawama byakonsha kumulengela kulanguluka pa ene mambo o mwaikela byobyo.—1 Pe. 2:12; 3:16.

14. Nangwa kya kuba bemuba kyatama byepi, mambo ka o mwafwainwa kuchinuzhukila kushinkanya?

¹⁴ Kuji bantu bamo bo twafwainwa kubula kupwanañana nabo. Kyakumwenako, kechi twafwainwa kupwanañana na bantu bo bapanga mu kipwilo ne. Bano bantu bebapangile mu kipwilo mambo balengele mambo akatampe kabiji kechi balapijile ne. Inge muntu wa uno mutundu wimukozha ku muchima kyakonsha kukatazha kumulekelako mambo nangwa kya kuba walapila, mambo bilonda bya ku muchima kechi bipwa bukiji ne. Inge kyaikala bino, mwakonsha kutwajijila kulomba Yehoba kwimukwasha kwikala na muchima wa kulekelako mambo ndengamambo walapila. Kuba bino kwanema mambo kechi mwakonsha kuyuka biji mu muchima wanji ne. Yehoba ye wayuka. Upesa pesa biji mu muchima wa muntu kabiji utekenya boba balenga mambo. (Sala. 7:9; Mana 17:3) O ene mambo Binembelo o byaambila’mba: “Kechi mushinkanyenga kibi na kibi ne. Ubainga bintu bantu bonse byo bamona amba byawama. Umvwe kyakonsheka, monka mwayila bulume bwenu, ikalainga mu mutende na bantu bonse. Anweba batemwe, kechi mushinkanyenga ne, bino nekenenainga bukaji bwimufikila; mambo kyanembwa amba: ‘Kushinkanya ko kwami; Amiwa nkashinkanya nabo na mambo a byubilo byabo byatama, byo byaamba Yehoba.’” (Loma 12:17-19) Nanchi twakonsha kuzhachisha mukwetu nyi? Ine. (Mat. 7:1, 2) Pano bino, mwafwainwa kuketekela kuba’mba Lesa ye uchiba mambo mo aolokela.

15. Kuyuka ñanyi kintu kwakonsha kwitukwasha kubula kuzhingijila boba betuba nshiji?

¹⁵ Inge kya kuba mwamona’mba bemuba nshiji kabiji kimukatazha kulekelako mambo ngubabibi walapila, kyakonsha kuwama kuyuka’mba ngubabibi naye uji mu lukatazho. Mambo naye waswana bumbulwa kulumbuluka. (Loma 3:23) Yehoba ubila lusa bantu bambulwa kulumbuluka. Onkao mambo, kyanema bingi kulombelako muntu witulenga mambo. Inge ketulombeleko muntu, kechi tukatwajijila na kumuzhingijila ne. Kabiji Yesu wakambizhe amba twafwainwa kuchinuzhuka kushinkanya na boba betumanyika. Waambile amba: “Temwainga balwanyi benu ne kulombelako aba bemumanyika.”—Mat. 5:44.

16, 17. Mukoba byepi inge bakulumpe ba bwina Kilishitu bafuukulapo kuba’mba ndengamambo walapila, kabiji mambo ka?

¹⁶ Kwesakana na kyaswa muchima wa Yehoba, bakulumpe mu kipwilo bebapa mwingilo wa kupwisha mambo ekala mu kipwilo. Bano balongo kechi bayuka bintu byonse byayuka Lesa ne, bino bebikako kuba bintu kwesakana na lutangijilo luji mu Mambo a Lesa ne bukwasho bwa mupashi wazhila. Onkao mambo, bintu byo bafuukulapo pa mambo panyuma ya kukeba bukwasho bwa Yehoba mu lulombelo, biswañana na milanguluko yanji.—Mat. 18:18.

¹⁷ Mu bintu bya uno mutundu, twafwainwa kwikala bakishinka. Inge kya kuba bakulumpe bafuukulapo kuba’mba awe muntu walapila, abya mukamulekelako mambo ne kumwesha’mba mwamutemwa nyi? (2 Ko. 2:5-8) Kino kyakonsha kukatazha kikatakata inge yenu balengele mambo nangwa mulongo wenu ye ye balenga mambo. Nangwa byonkabyo, kuketekela mwi Yehoba ne jishinda jo obilamo bintu kupichila mu kipwilo, kuketulengela kuba kintu kyawama. Inge kemube bino, mukamwesha kuba’mba muji na muchima wa kulekelako bakwenu mambo.—Mana 3:5, 6.

18. Ñanyi bintu byawama byo mwakonsha kumwenamo mu kulekelako bakwenu mambo?

¹⁸ Bashayuka bayuka bulongo bingila bongo, bayuka bintu byawama bifuma mu kwikala na muchima wa kulekelako bakwetu mambo. Kwilekelako mambo kulengela muntu kukasuluka kabiji ne kutontolola bukaji ne bulanda bwanji bonse. Pano inge ketubule kulekelako bakwetu mambo, kyakonsha kwitulengela kukolwa, kubula kwikala bulongo na bakwetu ne kwikala na binyenge. Bino kintu kikatampe kifuma mu kulekelako bakwetu mambo, ke kwikala na bulunda bwawama na Shetu wa mwiulu Yehoba.—Tangai Kolose 3:12-14.

[Kipikichala pa peja 27]

Yesu walumbulwilenga ka mu kino kishimpi?

[Kipikichala pa peja 30]

Bena Kilishitu bonse bafwainwa kwilekelangako mambo