Mepuzho Kufuma ku Batanga

Ba ñanyi “babula kwitabila” Paulo bo aambapo mu 2 Kolinda 6:14?

Mu 2 Kolinda 6:14 tutangamo’mba: “Kechi mwikase ku kikonkoji kimo ne babula kwitabila ne.” Umvwe twamona mwanembelwa bino byambo, kyamwekeshatu patoka kuba’mba, pano Paulo ubena kwamba pa bantu babula mu kipwilo kya bwina Kilishitu. Mavesi akwabo a mu Baibolo, akwasha kumvwa kino kishinka kyaambile Paulo amba “babula kwitabila,” kuba’mba mo mo kyatala.

Kya kumwenako, Paulo wakajipijile bena Kilishitu pa mambo a kwitwala ku bije bya bantu “babula kwitabila.” (1 Kolinda 6:6) Apo, bantu babula kwitabila, bajinga banchibamambo mu bije bya bena Kolinda. Mu nkalata yanji ya bubiji, Paulo waamba amba, Satana “wiipofula michima ya babula kwitabila.” Meso a babula kwitabila ba uno mutundu azhitwa na “mbutwa” kuchina amba baketabila mambo awama. Babula kwitabila kechi baubapo kiji kyonse kya kwingijila Yehoba ne, mambo ne Paulo patanshi walumbulwile amba: “Byo ikalulukila kwi Nkambo, mbutwa ikavwetulwapo.”—2 Kolinda 3:16; 4:4.

Bamo babula kwitabila boba bungubabibi nangwa kupopwela bankishi. (2 Kolinda 6:15, 16) Pano bino, kechi bonse bakana bakalume ba kwa Yehoba ne. Bamo bamwesha lusekelo lwa kwitabila mu bukine. Bavula baji na bakwabo ba mu masongola bena Kilishitu kabiji batemwa kwikala nabo. (1 Kolinda 7:12-14; 10:27; 14:22-25; 1 Petelo 3:1, 2) Onkao mambo, Paulo waamba byambo bya kuba’mba “babula kwitabila” kutazha ku bantu babula mu kipwilo kya bwina Kilishitu muji ‘baitabila mwi Nkambo.’—Byubilo 2:41; 5:14; 8:12, 13.

Jifunde jiji mu 2 Kolinda 6:14 ke jifunde jimo jawama bingi ja kutangijila bena Kilishitu mu bwikalo bwabo bonse, kabiji javula jikala lufunjisho lwawama ku bena Kilishitu babena kukeba mukwabo wa kutwela nanji mu masongola. (Mateo 19:4-6) Mwina Kilishitu wabatizwa kabiji wipana, kechi ukeba mukwabo wa kutwela nanji mu masongola mu boba babula kwitabila ne, mambo bintu byo batemwa ne byo bakeba kuba byapusana na bya mwina Kilishitu wa kine.

Ibyepi bantu bafunda Baibolo bapwañana na kipwilo kya bwina Kilishitu? Nga basapwishi babula kubatizwa? Nanchi nabo bantu babula kwitabila nyi? Ine. Bantu batambwila bukine bwa mambo awama kabiji babena kukomenako bulongo kuya ku lubatizhilo kechi bafwainwa kutelwa amba babula kwitabila ne. (Loma 10:10; 2 Kolinda 4:13) Koneleusa saka akyangye kubatizwa, watelelwe amba “waji wanemekanga Lesa ne kumwakamwa.”—Byubilo 10:2.

Pano nanchi kyakonsha kwikalatu bulongo mwina Kilishitu wipana kutwela mu busambe kepo palutwe ne masongola na muntu waitabizhiwa kwikala musapwishi wabula kubatizwa, na mambo a kuba’mba lufunjisho lwa kwa Paulo lwa mu 2 Kolinda 6:14 kechi lwalamata kino nenyi? Ine, kino kechi byo kyafwainwa kwikala ne. Pano mambo ka? Ke na mambo a lufunjisho lwa kubula kupita mu mbaji lwapaine Paulo pa mambo a bena Kilishitu banabakazhi bafwilwa. Wanembele’mba: ‘Wayuka kusongolwa ku yenkawa ye aswa; kana monka mwi Nkambo.’ (1 Kolinda 7:39) Kwesakana na lulwe lufunjisho, bena Kilishitu bepana bakambizhiwa kukeba bantu bo bakonsha kutwela nabo mu masongola posotu mu bonka baji “mwi Nkambo.”

Nanchi byambo bya kuba’mba “mwi Nkambo” ne bikwabo byapashako bya kuba’mba “mwi Kilishitu” byatala mwepi? Paulo watongolapo bantu bajinga “mwi Kilishitu” nangwa’mba “mwi Nkambo” mu Loma 16:8-10 ne mu Kolose 4:7. Umvwe mwatanga ano mavesi musakumona kuba’mba bantu batongolwamo ke ‘bakwetu mu mwingilo’ ‘baitabilwa’ ‘balongo batemwe’ ‘bankwasho ba kishinka’ kabiji ‘bakalume pamo ne atweba.’

Ñanyi kimye muntu kyo ekala ‘kalume mwi Nkambo’? Kino kyubiwa umvwe wipana aye mwine kuba bintu byafwainwa muzha ne kwikana aye mwine. Yesu waambile’mba: “Umvwe muntu wasaka kundondela, ekane mwine, ashikule [“kichi kyanji kya lumanamo,” NW] andondelenga.” (Mateo 16:24) Muntu utendeka kulondela Kilishitu ne kukokela kyaswa muchima wa Lesa na muchima yense umvwe wipana mwine kwi Lesa. Kepo palutwe, wipana kubatizwa ne kwikala ke wa mwingilo waitabilwa kwi Yehoba Lesa.a Onkao mambo, kutwela mu masongola “monka mwi Nkambo” kilumbulula kutwela mu masongola na muntu wamwesha patoka kuba’mba ee kine waitabila, “kalume wa Lesa ne wa Nkambo Yesu Kilishitu” wipana.—Yakoba 1:1.

Muntu ubena kufunda Baibolo na Bakamonyi ba kwa Yehoba kabiji ubena kukomenako bulongo, ko kuba’mba ubena kuba kintu kyawama bingi. Nangwa byonkabyo, ukyangye kwipana kwi Yehoba ne kutwela mu bwikalo bwa kumwingijila ne. Ukipimpula bwikalo bwanji. Wafwainwa kumwesha kuba’mba kine waaluka kwikala mwina Kilishitu wipana kabiji wabatizwa, saka akyangye kukolomona bya masongola ne.

Abya kyakonsha kwikalatu bulongo mwina Kilishitu kutwela mu busambe na muntu ubena kumweka nobe ubena kukoma bingi bulongo mu kufunda kwa Baibolo kwanji, kampe samuji na mulanguluko wa kuba’mba nsakumupempelela kufika ne kimye kyo akabatizwa nyi? Ine. Kino kyakonsha kwalula milanguluko ya ubena kufunda Baibolo umvwe wayuka amba, mwina Kilishitu wipana ubena kukeba kutwela nanji mu masongola panyuma ya kubatizwa.

Javula muntu wikala musapwishi wabula kubatizwa pa kimye kyaesakana, kufikilatu ne kimye kyo akomenako kufika ku lubatizhilo. Onkao mambo, lufunjisho lwa kutwela mu masongola posotu monka mwi Nkambo lwawama bingi. Ibyepi kutwela mu busambe na muntu wafika kala pa jifumbi ja masongola wakomena mu kisemi kya bena Kilishitu, wabambakana mu kipwilo pa myaka yavula, kabiji musapwishi wabula kubatizwa? Umvwe uno muntu uji bino, nga ki ka kyamukanya kwipana kwi Yehoba? Mambo ka o akiwaila waila? Uji na luzhinauko nyi? Nangwa kya kuba kechi wakonsha kutelwa amba muntu wabula kwitabila ne, kechi uji “mwi Nkambo” ne.

Lufunjisho lwa kwa Paulo pa mambo a masongola ke lwa kwitukwasha. (Isaya 48:17) Umvwe bantu babena kukeba kutwela mu masongola bepana kwi Yehoba bonse babiji, ko kuba’mba kukashijilwa kwabo kwa masongola kwatendekela pa kitendekesho kyakosa kya ku mupashi. Baji na milanguluko ne byubilo byaswañana bya bintu byo bakeba kuba. Akye kikwasha bingi kwikala mu masongola a lusekelo. Kabiji kutwela mu masongola poso “monka mwi Nkambo,” kilumbulula amba muntu wamwesha bukishinka kwi Yehoba, kabiji kino kileta mapesho a myaka, mambo ‘ku wa lusa [“wakishinka,” NW] [Yehoba] ukemwesha aye mwine ke wa lusa [“wakishinka, NW”].’—Masalamo 18:25.

[Tubyambo twa mushi]